1Cor 6 | KswSKMB | STEP | သုဝဲသ့ၣ်တဂၤဂၤတၢ်အမူးဘၣ်ဃးဒီးပှၤဂၤမ့ၢ်အိၣ်ဒီး,သုလိာ်ကွီၢ်လၢပှၤတတီတလိၤဘၣ်အမဲာ်ညါ,ဒီးတမ့ၢ်ဘၣ်လၢပှၤစီဆှံအမဲာ်ညါန့ၣ်ဘၣ်ကဘူၣ်ဧါ.

‏ 1 Corinthians 6

1 သုဝဲသ့ၣ်တဂၤဂၤတၢ်အမူးဘၣ်ဃးဒီးပှၤဂၤမ့ၢ်အိၣ်ဒီး,သုလိာ်ကွီၢ်လၢပှၤတတီတလိၤဘၣ်အမဲာ်ညါ,ဒီးတမ့ၢ်ဘၣ်လၢပှၤစီဆှံအမဲာ်ညါန့ၣ်ဘၣ်ကဘူၣ်ဧါ. 2 မ့ၢ်သုတသ့ၣ်ညါဘၣ်လၢပှၤစီဆှံကစံၣ်ညီၣ်ဟီၣ်ခိၣ်ဘၣ်ဧါ.ဒီးဟီၣ်ခိၣ်မ့ၢ်ဘၣ်တၢ်စံၣ်ညီၣ်လၢသုဒီး,မ့ၢ်သုစံၣ်ညီၣ်တၢ်လၢအဆံးကတၢၢ်တဖၣ်တကြၢးဘၣ်ဧါ. 3 မ့ၢ်သုတသ့ၣ်ညါဘၣ်လၢပကစံၣ်ညီၣ်ကလူးတဖၣ်န့ၣ်ဘၣ်ဧါ.ဒီးတၢ်ဘၣ်ဃးဒီးအအံၤတဃၣ်အါန့ၣ်အန့ၣ်တက့ၢ်,တမ့ၢ်ဘၣ်ဧါ. 4 မၤသးဒ်န့ၣ်ဒီး,စံၣ်ညီၣ်တၢ်ဘၣ်ဃးဒီးအအံၤတဃၣ်အလီၢ်မ့ၢ်အိၣ်ဒီး,ပာ်ပှၤလၢအလၤကပီၤဆံးကတၢၢ်လၢတၢ်အိၣ်ဖှိၣ်အပူၤ,လၢအကစံၣ်ညီၣ်တၢ်န့ၣ်တက့ၢ်.

5 ယကတိၤတၢ်လၢသုမဲာ်ဆှးအဂီၢ်လီၤ.မ့ၢ်ဒ်န့ၣ်ဧါ.ပှၤကူၣ်တၢ်သ့တအိၣ်ဘၣ်လၢသုကျါနီတဂၤဘၣ်ဧါ.ပှၤစံၣ်ညီၣ်တၢ်လၢဒီပုၢ်ဝဲၢ်အဘၢၣ်စၢၤတအိၣ်ဘၣ်နီတဂၤဘၣ်ဧါ. 6 မ့မ့ၢ်ဒီပုၢ်ဝဲၢ်လိာ်ကွီၢ်ဒီးဒီပုၢ်ဝဲၢ်,ဒီးအဝဲန့ၣ်လၢပှၤတစူၢ်တနာ်ဘၣ်တၢ်တဖၣ်အမဲာ်ညါလီၤ. 7 မၤသးဒ်န့ၣ်ဒီး,ခဲကနံၣ်အံၤမ့ၢ်မးတၢ်ကမၣ်အိၣ်လၢသုကျါသပှၢ်တၢၢ်လီၤ.အဂ့ၢ်ဒ်အံၤ,သုလိာ်လိာ်သုသးလၢကွီၢ်လီၤ.ဘၣ်မနုၤလၢသုတဒိးဘၣ်တၢ်ဂုာ်န့ၢ်သုတၢ်လဲၣ်. 8 မ့မ့ၢ်သုမၤတၢ်တတီတလိၤဘၣ်,ဒီးသုဂုာ်န့ၢ်ပှၤဂၤအတၢ်,ဒီးသုမၤတၢ်န့ၣ်တဖၣ်မ့ၢ်လၢသုဒီပုၢ်ဝဲၢ်လီၤ. 9 မ့ၢ်သုတသ့ၣ်ညါဘၣ်လၢပှၤတတီတလိၤဘၣ်န့ၣ်,တန့ၢ်ဘၣ်သါယွၤအဘီအမုၢ်န့ၣ်ဘၣ်ဧါ.သုတလီလီၤသုသးတဂ့ၤ.ပှၤမၤကမၣ်ပိာ်မုၣ်ပိာ်မၢၤမ့ၢ်ဂ့ၤ,ပှၤဘါတၢ်ဂီၤမ့ၢ်ဂ့ၤ,ပှၤအဲၣ်ဘၢတၢ်မ့ၢ်ဂ့ၤ,ပှၤဒိးတၢ်အဲၣ်ပကၢၤမ့ၢ်ဂ့ၤ,ပှၤအဲၣ်ပကၢၤတၢ်မ့ၢ်ဂ့ၤ, 10 ပှၤဟုၣ်တၢ်မ့ၢ်ဂ့ၤ,ပှၤသးကွံစ့မ့ၢ်ဂ့ၤ,ပှၤအီမူၤသံးမ့ၢ်ဂ့ၤ,ပှၤဒုၣ်ဒွဲၣ်တၢ်မ့ၢ်ဂ့ၤ,ပှၤအီၣ်ကဘျံးအီၣ်ကဘျၣ်တၢ်မ့ၢ်ဂ့ၤ,တန့ၢ်ဘၣ်သါယွၤအဘီအမုၢ်ဘၣ်လီၤ. 11 ဒီးသုဝဲတနီၤနီၤ,သုမ့ၢ်တ့ၢ်ပှၤဒ်န့ၣ်အသိးလီၤ.မ့မ့ၢ်လၢပကစၢ်ယ့ၣ်ရှူးခရံာ်အမံၤ,ဒီးပကစၢ်အသးသတးဒီး,သုဘၣ်သ့စီကွံာ်,ဒီးသုစီဆှံထီၣ်,ဒီးသုဘၣ်တၢ်ပာ်တီပာ်လိၤသုလီၤ.

12 တၢ်ခဲလၢာ်မ့ၢ်တီမ့ၢ်လိၤလၢယဂီၢ်,ဘၣ်ဆၣ်ဒီးတၢ်ခဲလၢာ်မၤအါထီၣ်တၢ်ဘျုးတမ့ၢ်ဘၣ်.တၢ်ခဲလၢာ်မ့ၢ်တီမ့ၢ်လိၤလၢယဂီၢ်,ဘၣ်ဆၣ်ဒီးယတအိၣ်ဘၣ်လၢအစိအကမီၤအဖီလာ်နီတမံၤဘၣ်. 13 တၢ်အီၣ်တၢ်အီမ့ၢ်လၢဟၢဖၢအဂီၢ်,ဒီးဟၢဖၢမ့ၢ်လၢတၢ်အီၣ်တၢ်အီအဂီၢ်,ဒီးယွၤကမၤဟးဂီၤခံမံၤလၢာ်လီၤ.ဘၣ်ဆၣ်ဒီးပနီၢ်ခိအံၤ,တမ့ၢ်ဘၣ်လၢတၢ်ကမၣ်မုၣ်ကမၣ်ခွါအဂီၢ်ဘၣ်.မ့ၢ်လၢကစၢ်အဂီၢ်,ဒီးကစၢ်မ့ၢ်လၢပနီၢ်ခိအဂီၢ်လီၤ. 14 ဒီးယွၤမၤဂဲၤဆၢထၢၣ်က့ၤကစၢ်န့ၣ်,ဒီးကမၤဂဲၤဆၢထၢၣ်က့ၤပဝဲဒၣ်စ့ၢ်ကီး,လၢအစိအကမီၤဒၣ်ဝဲလီၤ.

15 မ့ၢ်သုတသ့ၣ်ညါဘၣ်လၢသုနီၢ်ခိတဖၣ်န့ၣ်,မ့ၢ်ခရံာ်အဂီၤတဖၣ်ဘၣ်ဧါ.မၤသးဒ်န့ၣ်ဒီးမ့ၢ်ယကဟံးန့ၢ်ခရံာ်အဂီၤတဖၣ်,ဒီးပာ်အီၤလၢပှၤဃဲသဲမုၣ်အဂီၤတဖၣ်န့ၣ်ဧါ.မ်အသုတမၤအသးဒ်န့ၣ်တဂ့ၤ. 16 မ့ၢ်သုတသ့ၣ်ညါဘၣ်လၢပှၤလၢအစဲဘူးလိာ်အသးဒီးဃဲသဲမုၣ်တဂၤမ့ၢ်နီၢ်တဂၤဘၣ်ဧါ.အဂ့ၢ်ဒ်အံၤ,ပှၤခံဂၤကကဲထီၣ်လၢတၢ်ညၣ်တပူၤဃီ,စံးဝဲဒၣ်. ^{▼▼6:16 ၁မိၤ.၂း၂၄} 17 မ့မ့ၢ်ပှၤလၢအစဲဘူးလိာ်အသးဒီးကစၢ်န့ၣ်,မ့ၢ်အသးတဖျၢၣ်ဃီလီၤ. 18 ဃ့ၢ်ဟးဆှဲးကွံာ်တၢ်မၤကမၣ်မုၣ်ကမၣ်ခွါတက့ၢ်.ကယဲၢ်တၢ်မၤကမၣ်တမံၤလၢ်လၢ်လၢပှၤကညီမၤဝဲန့ၣ်,တဘၣ်ဃးဘၣ်ဒီးပနီၢ်ခိဘၣ်.မ့မ့ၢ်ပှၤလၢအမၤကမၣ်ပိာ်မုၣ်ပိာ်မၢၤန့ၣ်,မၤကမၣ်အနီၢ်ခိဒၣ်ဝဲလီၤ. 19 သုနီၢ်ခိမ့ၢ်တၢ်လုၢ်အဟံၣ်ဘၣ်ဃးဒီးသးစီဆှံ,အိၣ်လၢသုပူၤ,လၢသုန့ၢ်လၢယွၤ,ဒီးသုတမ့ၢ်ဘၣ်သုတၢ်ဒၣ်သုဝဲဘၣ်န့ၣ်,မ့ၢ်သုတသ့ၣ်ညါဘၣ်ဧါ. 20 အဂ့ၢ်ဒ်အံၤ,တၢ်ပှ့ၤက့ၤသုလၢအပှ့ၤလီၤ.မၤသးဒ်န့ၣ်ဒီး,မၤလၤကပီၤယွၤလၢသုနီၢ်ခိနီၢ်ကစၢ်တက့ၢ်.