‏ 1 Corinthians 7

1ဒီးတၢ်လၢသုကွဲးန့ၢ်ယၤအဂ့ၢ်န့ၣ်ပှၤမ့ၢ်တဘၣ်ဘူးဘၣ်ဒီးပိာ်မုၣ်ဘၣ်ဒီး,ဂ့ၤဝဲလီၤ. 2ဘၣ်ဆၣ်ဒီးဒ်သိးပှၤကဟးဆှဲးတၢ်မၤကမၣ်မုၣ်ကမၣ်ခွါဒီး,မ်ပိာ်ခွါကအိၣ်ဒီးအမါဒၣ်ဝဲ,ဒီးပိာ်မုၣ်ကအိၣ်ဒီးအဝၤဒၣ်ဝဲတက့ၢ်. 3မ်ဝၤမၤတၢ်ကြၢးဒီးအမါ,ဒီးမါလၢအဝၤဒ်န့ၣ်အသိးစ့ၢ်ကီးတက့ၢ်.မါတဂၤတအိၣ်ဘၣ်ဒီးအစိအကမီၤလၢအနီၢ်ခိဒၣ်ဝဲအဖီခိၣ်ဘၣ်,မ့ၢ်အဝၤလီၤ. 4ဒီးဒ်န့ၣ်အသိးစ့ၢ်ကီး,ဝၤတဂၤတအိၣ်ဘၣ်ဒီးအစိအကမီၤလၢအနီၢ်ခိဒၣ်ဝဲအဖီခိၣ်ဘၣ်,မ့ၢ်အမါလီၤ. 5မ့တမ့ၢ်ဘၣ်လၢသုအၢၣ်လီၤအီလီၤလိာ်သုသးလၢသုကအိၣ်ဖးတစိၢ်,ဒ်သိးသုက[ဒုၣ်တၢ်အီၣ်တၢ်အီဒီး]ဘါထုကဖၣ်တၢ်အဂီၢ်ဒီး,သုတဂုာ်န့ၢ်လိာ်သုတၢ်တဂ့ၤ.ဒီးအိၣ်ဃုာ်က့ၤကဒီးတက့ၢ်.ဒ်သိးမုၣ်ကီၤလံၢ်သုတလ့ပစီသုလၢသုကီၤသုသးတကဲဘၣ်အဃိတဂ့ၤလီၤ. 6ဘၣ်ဆၣ်ဒီးတၢ်အံၤတမံၤယစံးဒ်တၢ်ပျဲအသိး,တမ့ၢ်ဘၣ်ဒ်တၢ်မၤလိာ်အသိးဘၣ်လီၤ. 7အဂ့ၢ်ဒ်အံၤၤ,ယသးအိၣ်လၢပှၤခဲလၢာ်ကအိၣ်ဒ်ယကစၢ်ဒၣ်ယဲအသိးလီၤ.မ့မ့ၢ်ပှၤတဂၤဒီးတဂၤအိၣ်ဒီးအတၢ်ဘျုးဒၣ်ဝဲလၢယွၤ,တဂၤဒ်အံၤ,ဒီးတဂၤဒ်နုၤလီၤ.

8ဘၣ်ဆၣ်ဒီးယစံးဘၣ်ပှၤလၢအမါတအိၣ်ဘၣ်,ဒီးပှၤမုၣ်ကမဲသ့ၣ်တဖၣ်,မ့ၢ်အိၣ်ဒၣ်ဝဲဒ်ယၤအသိးဒီး,ဂ့ၤလၢအဂီၢ်လီၤ. 9ဘၣ်ဆၣ်ဒီးကီၤအသးမ့ၢ်တကဲဘၣ်ဒီး,ကန့ၢ်မါန့ၢ်ဝၤဒၣ်ဝဲတက့ၢ်.အဂ့ၢ်ဒ်အံၤ,န့ၢ်မါန့ၢ်ဝၤဂ့ၤန့ၢ်တၢ်အိၣ်ဒီးသးကတၢတက့ၢ်လီၤ.

10ဒီးပှၤဒီမိဝၤတဖၣ်ယမၤလိာ်အီၤ,ဘၣ်ဆၣ်ဒီးတမ့ၢ်ဘၣ်ယၤဘၣ်,မ့ၢ်ကစၢ်လီၤမါတဂၤ,မ်အသုတလဲၤသဒၣ်အဝၤတဂ့ၤ. 11ဘၣ်ဆၣ်ဒီးမ့ၢ်လဲၤသဒၣ်ဝဲဒီး,အဝၤတအိၣ်ဘၣ်ဒီးမ်အအိၣ်တက့ၢ်.မ့တမ့ၢ်ဘၣ်ဒီး,မ်အဘၣ်လိာ်က့ၤအသးဒီးအဝၤန့ၣ်တက့ၢ်.ဒီးအဝၤတဂၤန့ၣ်မ်အသုတပာ်မၢ်အမါတဂ့ၤ.

12လၢပှၤအိၣ်လီၤတဲာ်တဖၣ်န့ၣ်ယစံးဘၣ်ယဲ,တမ့ၢ်ဘၣ်ပကစၢ်ဘၣ်.ဒီပုၢ်ဝဲၢ်တဂၤဂၤမ့ၢ်အိၣ်ဒီးအမါလၢအတနာ်ဘၣ်တၢ်,ဒီးမ့ၢ်ဘၣ်အသးလၢအကအိၣ်ဝဲဆိးဝဲဒီးအီၤဒီး,မ်အသုတပာ်မၢ်အီၤတဂ့ၤ. 13ဒီးပိာ်မုၣ်လၢအအိၣ်ဒီးအဝၤလၢအတနာ်ဘၣ်တၢ်,ဒီးမ့ၢ်ဘၣ်အသးလၢအကအိၣ်ဝဲဆိးဝဲဒီးအီၤဒီး,မ်အသုတလဲၤသဒၣ်အီၤတဂ့ၤ. 14အဂ့ၢ်ဒ်အံၤ,ဝၤလၢအတနာ်ဘၣ်တၢ်တဂၤ,တၢ်ပာ်အီၤလၢအကဆှီလၢအမါအဃိ,ဒီးမါလၢအတနာ်ဘၣ်တၢ်တဂၤ,တၢ်ပာ်အီၤလၢအကဆှီလၢအဝၤအဃိလီၤ.မ့တမ့ၢ်ဘၣ်ဒ်န့ၣ်ဒီး,သုဖိမ့ၢ်တၢ်တကဆှီဘၣ်လီၤ.မ့မ့ၢ်ခဲကနံၣ်အံၤ,မ့ၢ်အကဆှီဝဲလီၤ.

15ဘၣ်ဆၣ်ဒီးပှၤလၢအတနာ်ဘၣ်တၢ်မ့ၢ်လဲၤသဒၣ်ဝဲဒီး,ကလဲၤသဒၣ်ဒၣ်ဝဲတက့ၢ်.တၢ်မ့ၢ်မၤအသးဒ်န့ၣ်ဒီး,ဒီပုၢ်ဝဲၢ်မုၣ်မ့ၢ်ဂ့ၤ,ဒီပုၢ်ဝဲၢ်ခွါမ့ၢ်ဂ့ၤ,တဘၣ်စၢဃာ်ဘၣ်ဝဲဘၣ်.ဘၣ်ဆၣ်ဒီးယွၤကိးလံပှၤလၢတၢ်အိၣ်ဃူအိၣ်ဖိးအဂီၢ်လံ. 16အဂ့ၢ်ဒ်အံၤ,ပိာ်မုၣ်ဧၢ,နတအုၣ်က့ၤခီၣ်က့ၤနဝၤဘၣ်န့ၣ်,နသ့ၣ်ညါဒ်လဲၣ်.ဒီးပိာ်ခွါဧၢ,နတအုၣ်က့ၤခီၣ်က့ၤဘၣ်နမါဘၣ်န့ၣ်,နသ့ၣ်ညါဒ်လဲၣ်. 17ဘၣ်ဆၣ်ဒီးဒ်ယွၤဟ့ၣ်နီၤဖးတဂၤအတၢ်,တဂၤအတၢ်အသိး,ဒီးဒ်ကစၢ်ကိးလံပှၤတဂၤဒီးတဂၤအသိးန့ၣ်,မ်အလဲၤတၢ်ဒ်န့ၣ်အသိးတက့ၢ်.ဒီးယမၤလိာ်တၢ်ဒ်န့ၣ်အသိး,လၢတၢ်အိၣ်ဖှိၣ်တဖၣ်ခဲလၢာ်အပူၤလီၤ.

18ပှၤတဂၤဂၤလၢအဒိးတၢ်ကူးတရံးန့ၣ်,မ့ၢ်ဘၣ်တၢ်ကိးအီၤဒီး,မ်အသုတကဲထီၣ်ပှၤလၢအတဒိးဘၣ်တၢ်ကူးတရံးတဂ့ၤ.ပှၤတဂၤဂၤလၢအတဒိးဘၣ်တၢ်ကူးတရံးမ့ၢ်ဘၣ်တၢ်ကိးအီၤဒီး,မ်အသုတဒိးတၢ်ကူးတရံးတဂ့ၤ. 19တၢ်ဒိးတၢ်ကူးတရံးတမ့ၢ်ဘၣ်တၢ်ဘၣ်,ဒီးတၢ်တဒိးဘၣ်တၢ်ကူးတရံးတမ့ၢ်ဘၣ်တၢ်ဘၣ်.မ့မ့ၢ်တၢ်တိၢ်န့ၢ်ယွၤအတၢ်မၤလိာ်န့ၣ်,မ့ၢ်တၢ်လီၤ. 20တၢ်ကိးလၢပှၤအိၣ်တ့ၢ်လၢအပူၤဖဲတၢ်ကိးအီၤန့ၣ်,မ်အအိၣ်အဆိးဒၣ်တၢ်လၢအပူၤတက့ၢ်. 21လၢတၢ်ကိးနၤ,နမ့မ့ၢ်ကုၢ်ဒီး,ပးကဲအဝဲန့ၣ်တဂ့ၤ.ဘၣ်ဆၣ်ဒီးနထူၣ်ဖျဲးမ့ၢ်သ့ဒီး,ဟံးန့ၢ်အဝဲန့ၣ်,မ့ၢ်အဂ့ၤတက့ၢ်လီၤ. 22အဂ့ၢ်ဒ်အံၤၤ,ကုၢ်လၢအဘၣ်တၢ်ကိးအီၤလၢကစၢ်အပူၤမ့ၢ်ကစၢ်အပှၤထူၣ်ဖျဲးလီၤ.ဒ်န့ၣ်အသိးစ့ၢ်ကီး,ပှၤထူၣ်ဖျဲးလၢအဘၣ်တၢ်ကိးအီၤ,မ့ၢ်ခရံာ်အကုၢ်အပှၤလီၤ. 23တၢ်ပှ့ၤက့ၤသုလၢအပှ့ၤလီၤ.သုတကဲထီၣ်ပှၤကညီအကုၢ်အပှၤတဂ့ၤ. 24ပုၢ်သ့ၣ်ဝဲၢ်သ့ၣ်ဧၢ,တၢ်လၢပှၤအိၣ်တ့ၢ်လၢအပူၤ,ဖဲအဘၣ်တၢ်ကိးအီၤန့ၣ်,မ်အအိၣ်အဆိးလၢအပူၤဒီးယွၤတက့ၢ်.

25ဒီးလၢပမုၣ်ကနီၤအဂ့ၢ်အကျိၤန့ၣ်,ယတအိၣ်ဘၣ်ဒီးတၢ်မၤလိာ်လၢကစၢ်န့ၣ်ဘၣ်.မ့မ့ၢ်ဒ်ပှၤလၢအဒိးတၢ်သးကညီၤလၢကစၢ်လၢအကမ့ၢ်ပှၤအကလုၢ်တီအသိးန့ၣ်,ယဟ့ၣ်ယတၢ်ဆိကမိၣ်လီၤ. 26မၤသးဒ်န့ၣ်ဒီးယဆိကမိၣ်လၢတၢ်အံၤမ့ၢ်အဂ့ၤဝဲလၢတၢ်နးတၢ်ဖှီၣ်ခဲကနံၣ်အံၤအဃိန့ၣ်,လၢအမ့ၢ်တၢ်ဂ့ၤလၢပှၤကအိၣ်ဝဲဆိးဝဲဒ်အအိၣ်ဝဲအသိးလီၤ. 27မ့ၢ်နဘၣ်စၢဃာ်ဒီးမါန့ၣ်ဧါ.သုတဃုထူၣ်ဖျဲးတဂ့ၤ.မ့ၢ်နထူၣ်ဖျဲးဒီးမါန့ၣ်ဧါ.ဃုန့ၢ်မါတဂ့ၤ. 28မ့ၢ်နာ်သက့ဒ်န့ၣ်ဒီးနမ့ၢ်န့ၢ်မါစ့ၢ်ကီးဒီး,နတမၤကမၣ်ဘၣ်တၢ်ဘၣ်.ဒီးမုၣ်ကနီၤမ့ၢ်န့ၢ်ဝၤဒီး,တမၤကမၣ်ဘၣ်တၢ်ဘၣ်.မ့မ့ၢ်ပှၤဒ်န့ၣ်အသိးတဖၣ်,ကဘၣ်တၢ်နးတၢ်ဖှီၣ်လၢပဖံးပညၣ်အပူၤလီၤ.ဒီးယသးလီသုလီၤ.

29မ့မ့ၢ်ပုၢ်သ့ၣ်ဝဲၢ်သ့ၣ်ဧၢ,ယစံးတၢ်အံၤ,တၢ်အဆၢအကတီၢ်အံၣ်ကိာ်သတးဒီး,တၢ်အိၣ်လီၤတဲာ်မ့ၢ်လၢပှၤအိၣ်ဒီးအမါ,ဘၣ်အိၣ်ဝဲ,ဒ်အတအိၣ်ဘၣ်အသိး, 30ဒီးပှၤလၢအဟီၣ်,ဒ်အတဟီၣ်ဘၣ်အသိး,ဒီးပှၤလၢအသူၣ်ဖှံသးညီ,ဒ်ပှၤလၢအတသူၣ်ဖှံသးညီဘၣ်အသိး,ဒီးပှၤလၢအပှ့ၤတၢ်,ဒ်အတၢ်တအိၣ်ဘၣ်အသိး, 31ဒီးပှၤလၢအမၤအအံၤတဃၣ်အတၢ်,ဒ်ပှၤလၢအတမၤဘၣ်နးကဲၣ်ဆိးအသိးန့ၣ်လီၤ.အဂ့ၢ်ဒ်အံၤ,တၢ်အိၣ်လၢခိအံၤ,အက့ၢ်အဂီၤဒံကွံာ်ဝဲလီၤ.

32ဘၣ်ဆၣ်ဒီးယသးအိၣ်လၢသုသုတအိၣ်ဒီးတၢ်ဘၣ်ယိၣ်ဘၣ်ဘီတဂ့ၤလီၤ.ပှၤလၢအတန့ၢ်ဘၣ်အမါန့ၣ်,ကမၤဘၣ်ကစၢ်အသးဒ်လဲၣ်ဒ်လဲၣ်န့ၣ်,ဘၣ်ယိၣ်တၢ်လၢအဘၣ်ဃးဒီးကစၢ်အဂ့ၢ်လီၤ. 33မ့မ့ၢ်ပှၤလၢအအိၣ်ဒီးအမါန့ၣ်,ကမၤဘၣ်အမါအသးဒ်လဲၣ်ဒ်လဲၣ်န့ၣ်,ဘၣ်ယိၣ်တၢ်လၢအဘၣ်ဃးလၢဟီၣ်ခိၣ်အဂ့ၢ်လီၤ. 34ပမါဒီးပမုၣ်ကနီၤန့ၣ်,တဒ်သိးလိာ်အသးစ့ၢ်ကီးဘၣ်.ပှၤလၢအဝၤတအိၣ်ဘၣ်န့ၣ်,ဘၣ်ယိၣ်တၢ်လၢအဘၣ်ဃးဒီးကစၢ်အဂ့ၢ်,ဒ်သိးအနီၢ်ခိမ့ၢ်ဂ့ၤ,အသးမ့ၢ်ဂ့ၤ,ကစီကဆှံလီၤ.မ့မ့ၢ်ပှၤလၢအအိၣ်ဒီးအဝၤန့ၣ်,ကမၤဘၣ်အဝၤအသးဒ်လဲၣ်ဒ်လဲၣ်ဒီး,ဘၣ်ယိၣ်တၢ်လၢအဘၣ်ဃးဒီးဟီၣ်ခိၣ်အဂ့ၢ်လီၤ.

35ဒီးတၢ်တဖၣ်န့ၣ်,ယစံးဘၣ်သုလၢသုဘျုးအဂီၢ်လီၤ.တမ့ၢ်ဘၣ်ဒ်သိးယကကွံာ်ဖျီၣ်ပျံၤသကွီၤလၢသုလိၤဘၣ်.မ့မ့ၢ်လၢတၢ်ဂ့ၤအဂီၢ်,ဒ်သိးတၢ်တံာ်မုၢ်တံာ်တာ်တအိၣ်ဘၣ်ဒီး,သုကမၤကစၢ်အတၢ်လီၤ. 36ဘၣ်ဆၣ်ဒီးပှၤတဂၤဂၤမ့ၢ်ဆိကမိၣ်လၢအမၤအပှၤမုၣ်ကနီၤတဂ့ၤတဘၣ်ဘၣ်,ဒီးအယူာ်အထံးမ့ၢ်တလၢကွံာ်ဒီးတၢ်မ့ၢ်ကြၢးဒ်န့ၣ်ဒီး,မ်အမၤတၢ်ဖဲဒၣ်အသးတက့ၢ်.တမ့ၢ်ဘၣ်အမၤတၢ်ဒဲးဘးဘၣ်.မ်အဝဲသ့ၣ်ဒိးဖျီလိာ်အသးတက့ၢ်. 37ဘၣ်ဆၣ်ဒီးပှၤလၢအလီၢ်တအိၣ်ဘၣ်,ဒီးအိၣ်ဂၢၢ်ဆိးကျၢၤလၢအသး,ဒီးအိၣ်ဒီးအစိကမီၤလၢအသးဒၣ်ဝဲအဖီခိၣ်,ဒီးစံၣ်ညီၣ်လံတၢ်အံၤလၢအသး,လၢအကဟံးဃာ်အပှၤမုၣ်ကနီၤဒၣ်ဝဲန့ၣ်ဒီး,အဝဲဒၣ်မၤတၢ်ဂ့ၤလီၤ. 38ဒ်န့ၣ်အသိး,ပှၤလၢအဒုးဖျီအီၤန့ၣ်မၤတၢ်ဂ့ၤဘၣ်ဆၣ်ဒီး,ပှၤလၢအတဒုးဖျီဘၣ်န့ၣ်,မၤတၢ်ဂ့ၤတက့ၢ်လီၤ.

39ပိာ်မုၣ်ဖဲအဝၤမူဝဲအဖၢမုၣ်န့ၣ်,ဘၣ်စၢဃာ်ဒီးအဝၤလီၤ.မ့မ့ၢ်အဝၤမ့ၢ်သံဒီး,ထူၣ်ဖျဲးဝဲ,ဒီးကန့ၢ်ဘၣ်အဝၤဖဲဒၣ်အသးဘၣ်ဆၣ်ဒီး,ထဲလၢကစၢ်အပူၤဧိၤလီၤ. 40ဘၣ်ဆၣ်ဒီးဒ်ယဆိကမိၣ်တၢ်အသိးန့ၣ်,မ့ၢ်အိၣ်ဒၣ်တၢ်ဒီး,ကမုာ်တက့ၢ်လီၤ.ဒီးယဆိကမိၣ်လၢယအိၣ်ဒီးယွၤအသးလီၤ.