1 Corinthians 9
1မ့ၢ်ယတမ့ၢ်ဘၣ်တၢ်မၢဖိဘၣ်ဧါ.မ့ၢ်ယတမ့ၢ်ဘၣ်ပှၤထူၣ်ဖျဲးဖိဘၣ်ဧါ.မ့ၢ်ယတထံၣ်ဘၣ်လံပကစၢ်ယ့ၣ်ရှူးခရံာ်ဘၣ်ဧါ.မ့ၢ်သုတမ့ၢ်ဘၣ်ယတၢ်မၤလၢကစၢ်အပူၤဘၣ်ဧါ. 2ယမ့တမ့ၢ်ဘၣ်ပှၤတၢ်မၢဖိလၢပှၤဂၤအဂီၢ်ဘၣ်ဆၣ်ဒီး,ယမ့ၢ်မးလၢသုဂီၢ်လီၤ.အဂ့ၢ်ဒ်အံၤ,သုအိၣ်လၢကစၢ်အပူၤန့ၣ်,သုမ့ၢ်တၢ်စဲပနီၣ်ဃာ်လၢယမ့ၢ်ပှၤတၢ်မၢဖိလီၤ. 3ပှၤလၢအသံကွၢ်သံဒိးယၤန့ၣ်,ယစံးဆၢအီၤဒ်အံၤ, 4ဒ်သိးပကအီၣ်တၢ်အီတၢ်န့ၣ်,ပစိပကမီၤတအိၣ်ဘၣ်ဧါ.ဒ်သိးပကဟးဝ့ၤဝီၤဆှၢဒီပုၢ်ဝဲၢ်မုၣ်ပမါဒ်တၢ်မၢဖိအဂၤတဖၣ်, 5ဒီးပကစၢ်အဒီပုၢ်ဝဲၢ်သ့ၣ်တဖၣ်,ဒီးစီၤက့ၤဖး,အသိးန့ၣ်,ပစိပကမီၤတအိၣ်ဘၣ်ဧါ. 6ထဲယၤတဂၤ,ဒီးစီၤဘၢ်နါဘၤ,ပစိပကမီၤလၢပသုတမၤတၢ်ဖံးတၢ်တဂ့ၤန့ၣ်,တအိၣ်ဘၣ်ဧါ. 7အဘူးအလဲတအိၣ်ဘၣ်ဒီး,မ့ၢ်မတၤလဲၤဒုးတၢ်တဘျီဘျီတဂၤလဲၣ်.မ့ၢ်မတၤသူၣ်စပံးအလီၢ်,ဒီးတအီၣ်ဘၣ်အသၣ်တဂၤလဲၣ်.မ့ၢ်မတၤကွၢ်သိတဖုဒီး,တအီၣ်ဘၣ်တဖုန့ၣ်အနုၢ်ထံဘၣ်တဂၤလဲၣ်. 8မ့ၢ်ယစံးတၢ်တဖၣ်န့ၣ်ဒ်ပှၤကညီအသိး,မ့ၢ်တၢ်သိၣ်တၢ်သီစံးစ့ၢ်ကီးတၢ်တဖၣ်န့ၣ်လဲၣ်. 9အဂ့ၢ်ဒ်အံၤ,တၢ်ကွဲးအသးလၢစီၤမိၤရှ့အတၢ်သိၣ်တၢ်သီအပူၤ,ဂီၤဖံးလၢအယီၢ်ဘုန့ၣ်,သုတပသံးဃာ်အထးခိၣ်တဂ့ၤ. ▼▼9:9 ၅မိၤ.၂၅း၁၀၄
မ့ၢ်ယွၤအံးက့ၤကွၢ်က့ၤဂီၤဖံးဧါ. 10မ့ၢ်အစံးတၢ်န့ၣ်ခဲလၢာ်လၢပဂီၢ်လဲၣ်.မ့ၢ်မးတၢ်ကွဲးအသးလၢပဂီၢ်,ဒ်သိးပှၤလၢအထဲၣ်တၢ်ကထဲၣ်တၢ်အိၣ်ဒီးတၢ်မုၢ်လၢ်,ဒီးပှၤလၢအယီၢ်ဘုအိၣ်ဒီးတၢ်မုၢ်လၢ်န့ၣ်,ကန့ၢ်ဘၣ်တၢ်လၢအမုၢ်လၢ်ဝဲလီၤ. 11ပဝဲဒၣ်အံၤ,ပမ့ၢ်ဖှံတၢ်ဘၣ်ဃးဒီးသးလၢသုဂီၢ်ဒီး,သုတၢ်ဘၣ်ဃးဒီးတၢ်ညၣ်ပမ့ၢ်ကူးဒီး,မ့ၢ်တၢ်အဒိၣ်အမုၢ်ဧါ. 12ပှၤဂၤမ့ၢ်အိၣ်ဒီးတၢ်စိတၢ်ကမီၤအံၤလၢသုဖီခိၣ်ဒီး,ပဝဲဒၣ်အံၤအါန့ၢ်အန့ၣ်တက့ၢ်,တမ့ၢ်ဘၣ်ဧါ.ဘၣ်ဆၣ်ဒီးပတမၤဘၣ်တၢ်စိတၢ်ကမီၤအံၤဘၣ်.မ့ၢ်ပဒိးတၢ်ခဲလၢာ်,ဒ်သိးပသုတတြီတၢ်သးခုကစီၣ်တဂ့ၤလီၤ. 13မ့ၢ်သုတသ့ၣ်ညါဘၣ်လၢပှၤလၢအမၤတၢ်စီဆှံအတၢ်မၤတဖၣ်,အီၣ်တၢ်ဘၣ်ဃးဒီးတၢ်လုၢ်အဟံၣ်,ဒီးပှၤလၢအမၤတၢ်လုၢ်လီၢ်အတၢ်မၤန့ၣ်,န့ၢ်ဘၣ်တၢ်ဘၣ်ဃးဒီးတၢ်လုၢ်လီၢ်,တမ့ၢ်ဘၣ်ဧါ. 14ဒ်န့ၣ်အသိးစ့ၢ်ကီး,ကစၢ်စံၣ်ညီၣ်ဝဲလၢပှၤလၢအစံၣ်တဲၤတဲလီၤတၢ်သးခုအကစီၣ်တဖၣ်န့ၣ်,ကမူဝဲလၢတၢ်ဘၣ်ဃးဒီးတၢ်သးခုအကစီၣ်လီၤ. 15ဘၣ်ဆၣ်ဒီးယတမၤန့ၢ်ဘၣ်တၢ်တဖၣ်န့ၣ်နီတမံၤဘၣ်.ဒီးယတကွဲးဘၣ်တၢ်အံၤ,ဒ်သိးပှၤကမၤတၢ်ဒ်န့ၣ်လၢယဂီၢ်ဘၣ်.အဂ့ၢ်ဒ်အံၤ,ယမ့ၢ်သံဒီး,ဂ့ၤန့ၢ်ပှၤဒုးကဲထီၣ်ယတၢ်ပာ်ယသးကဖၢလၢအံၤလၢတၢ်ကလီကလီန့ၣ်တက့ၢ်လီၤ. 16အဂ့ၢ်ဒ်အံၤ,ယမ့ၢ်စံၣ်တဲၤတဲလီၤတၢ်သးခုကစီၣ်ဒီး,တမ့ၢ်ဘၣ်ယပာ်ယသးကဖၢလၢအလီၢ်အိၣ်န့ၣ်ဘၣ်.အဂ့ၢ်ဒ်အံၤ,ယဘၣ်မၤဒ်န့ၣ်လီၤ.မ့ၢ်မးယမ့ၢ်တစံၣ်တဲၤတဲလီၤဘၣ်တၢ်သးခုကစီၣ်ဘၣ်ဒီး,ယကဘၣ်အဖှီၣ်လီၤ. 17အဂ့ၢ်ဒ်အံၤ,လၢယသးလိၣ်ထီၣ်ဒၣ်ဝဲအဃိယမ့ၢ်မၤတၢ်ဒီး,ယအိၣ်ဒီးယဘူးယလဲလီၤ.ဘၣ်ဆၣ်ဒီးမ့တမ့ၢ်လၢယသးလိၣ်ထီဒၣ်ဝဲအဃိဘၣ်ဒီး,မ့ၢ်မးတၢ်ဒုးမၤယၤလၢပှၤကွၢ်တၢ်အလီၢ်လီၤ. 18မၤသးဒ်န့ၣ်ဒီးယဘူးယလဲမ့ၢ်မနုၤလဲၣ်.မ့ၢ်လၢယကစံၣ်တဲၤတဲလီၤတၢ်သးခုကစီၣ်ဒီး,တပာ်ဘၣ်တၢ်သးခုအကစီၣ်အပှ့ၤဘၣ်,ဒ်သိးယသုတမၤဒီးယစိယကမီၤလၢတၢ်သးခုကစီၣ်အပူၤအါကဲၣ်ဆိးတဂ့ၤန့ၣ်လီၤ. 19အဂ့ၢ်ဒ်အံၤ,ယထူၣ်ဖျဲးဒီးပှၤခဲလၢာ်ဘၣ်ဆၣ်ဒီးယပာ်လီၤယသးလၢပှၤခဲလၢာ်အကုၢ်အပှၤ,ဒ်သိးယကမၤန့ၢ်ပှၤအါတက့ၢ်လီၤ. 20လၢပှၤယူဒၤဖိအဂီၢ်,ယကဲထီၣ်တၢ်ဒ်ပှၤယူဒၤဖိအသိး,ဒ်သိးယကန့ၢ်ဘၣ်ပှၤယူဒၤဖိလီၤ.လၢပှၤအိၣ်လၢတၢ်သိၣ်တၢ်သီအဖီလာ်အဂီၢ်,ဒပှၤအိၣ်လၢတၢ်သိၣ်တၢ်သီအဖီလာ်,ဒ်သိးယကန့ၢ်ဘၣ်ပှၤအိၣ်လၢတၢ်သိၣ်တၢ်သီအဖီလာ်လီၤ. 21လၢပှၤလၢအတအိၣ်ဘၣ်ဒီးတၢ်သိၣ်တၢ်သီဘၣ်အဂီၢ်,ဒ်ပှၤလၢတၢ်သိၣ်တၢ်သီတအိၣ်ဘၣ်အသိး,တအိၣ်ဘၣ်ဒီးယွၤအတၢ်သိၣ်တၢ်သီတမ့ၢ်ဘၣ်,မ့ၢ်ယအိၣ်လၢခရံာ်အတၢ်သိၣ်တၢ်သီအဖီလာ်,ဒ်သိးယကန့ၢ်ဘၣ်ပှၤလၢအတအိၣ်ဘၣ်ဒီးတၢ်သိၣ်တၢ်သီန့ၣ်လီၤ. 22လၢပှၤအဂံၢ်စၢ်အဘါစၢ်အဂီၢ်,ဒ်ပှၤဂံၢ်စၢ်ဘါစၢ်အသိး,ဒ်သိးယကန့ၢ်ဘၣ်ပှၤအိၣ်ဒီးအဂံၢ်စၢ်ဘါစၢ်န့ၣ်လီၤ.လၢပှၤခဲလၢာ်အဂီၢ်,ယကဲတၢ်ခဲလၢာ်,ဒ်သိးယမၤတၢ်ခဲလၢာ်သတးဒီးယကအုၣ်က့ၤခီၣ်က့ၤပှၤတနီၤနီၤလီၤ. 23ဒီးယမၤတၢ်ခဲလၢာ်လၢတၢ်သးခုအကစီၣ်အဃိ,ဒ်သိးယကကဲလၢပှၤန့ၢ်ဃုာ်အဘျုးအဖှိၣ်န့ၣ်လီၤ. 24မ့ၢ်သုတသ့ၣ်ညါဘၣ်လၢပှၤလၢအဃ့ၢ်သတြီၤတၢ်တဖၣ်န့ၣ်,ဃ့ၢ်ခဲလၢာ်ဘၣ်ဆၣ်ဒီးပှၤန့ၢ်ဘၣ်တၢ်မ့ၢ်ထဲတဂၤဧိၤန့ၣ်ဘၣ်ဧါ.ဒ်သိးသုကန့ၢ်တၢ်ဒီး,ဃ့ၢ်ဒ်န့ၣ်သိးတက့ၢ်. 25ဒီးကယဲၢ်ပှၤလၢအဂုာ်မၤသတြီၤတၢ်တဖၣ်န့ၣ်,ကီၤဒၣ်အသးလၢတၢ်ခဲလၢာ်လီၤ.ဒီးအဝဲသ့ၣ်မၤဝဲဒ်သိးအကန့ၢ်ဘၣ်တၢ်ခိၣ်သလုးလၢအအုၣ်သံကျၣ်သံဒၣ်တၢ်လီၤ.မ့မ့ၢ်ပဝဲဒၣ်အံၤ,တၢ်လၢအတအုၣ်သံကျၣ်သံဘၣ်လီၤ. 26မၤသးဒ်န့ၣ်ဒီးယဃ့ၢ်တၢ်ဒ်န့ၣ်အသိး,ဒ်ပှၤသးဒ့ဒီအသိးတမ့ၢ်ဘၣ်.ယထိတၢ်ဒ်န့ၣ်အသိး,ဒ်ပှၤတီၢ်ကလံၤအသိးတမ့ၢ်ဘၣ်. 27မ့ၢ်ယမၤနၢၤမၤဃၣ်ယနီၢ်ခိ,ဒီးယမၢအကဲကုၢ်ဒ်သိးယစံၣ်တဲၤတဲလီၤတၢ်လၢပှၤဂၤဝံၤဒီး,ယသုတကဲလၢပှၤဘၣ်တၢ်ညိကွံာ်အီၤယကစၢ်ဒၣ်ယဲတဂ့ၤလီၤ.
Copyright information for
KswSKMB