1 John 4
1ပှၤလၢတၢ်အဲၣ်အီၤသ့ၣ်ဧၢ,နာ်ထီရီၤသးန့ၣ်တဂ့ၤ.မ့မ့ၢ်,မ့ၢ်အဘၣ်ဃးဒီးယွၤတဘၣ်ဃးလဲၣ်န့ၣ်,မၤကွၢ်သးတဖၣ်န့ၣ်တက့ၢ်.အဂ့ၢ်ဒ်အံၤ,ဝံအဘျၣ်လဲၤထီၣ်လံလၢဟီၣ်ခိၣ်ချၢအါဂၤလံ. 2သုကသ့ၣ်ညါယွၤအသးလၢတၢ်အံၤအဃိ,ကယဲၢ်သးလၢအအၢၣ်လီၤအီလီၤလၢယ့ၣ်ရှူးခရံာ်ဟဲလၢတၢ်ဖံးတၢ်ညၣ်အပူၤန့ၣ်,မ့ၢ်အဘၣ်ဃးဒီးယွၤလီၤ. 3ဒီးကယဲၢ်သးလၢအတအၢၣ်လီၤအီလီၤဘၣ်ယ့ၣ်ရှူးန့ၣ်,မ့ၢ်အတဘၣ်ဃးဘၣ်ဒီးယွၤဘၣ်.ဒီးအဝဲန့ၣ်ဘၣ်ဃးဒီးတၢ်ဂ့ၢ်လိာ်ဘှီလိာ်ခရံာ်,လၢသုနၢ်ဟူလၢအကဟဲန့ၣ်,ဒီးခဲကနံၣ်အံၤဒၣ်လဲာ်,အိၣ်လၢဟီၣ်ခိၣ်ချၢလီၤ. 4ဖိဆံးသ့ၣ်ဧၢ,သုဝဲသ့ၣ်အံၤသုဘၣ်ဃးဒီးယွၤ,ဒီးသုမၤနၢၤမၤဃၣ်လံအဝဲသ့ၣ်လံ.အဂ့ၢ်ဒ်အံၤ,ပှၤအိၣ်လၢသုပူၤဒိၣ်န့ၢ်ပှၤအိၣ်လၢဟီၣ်ခိၣ်အပူၤတက့ၢ်လီၤ. 5အဝဲသ့ၣ်ဘၣ်ဃးဒီးဟီၣ်ခိၣ်လီၤ.မၤသးဒ်န့ၣ်ဒီးကတိၤတၢ်ဘၣ်ဃးဒီးဟီၣ်ခိၣ်,ဒီးဟီၣ်ခိၣ်ဒိကနၣ်အကလုၢ်လီၤ. 6ပဝဲဒၣ်အံၤ,ပဘၣ်ဃးဒီးယွၤလီၤ.ပှၤလၢအသ့ၣ်ညါယွၤန့ၣ်ဒိကနၣ်ပကလုၢ်လီၤ.ပှၤလၢအတဘၣ်ဃးဘၣ်ဒီးယွၤန့ၣ်,တဒိကနၣ်ဘၣ်ပကလုၢ်ဘၣ်.လၢတၢ်န့ၣ်အဃိဒီး,ပသ့ၣ်ညါသးလၢအဘၣ်ဃးဒီးတၢ်မ့ၢ်တၢ်တီ,ဒီးသးလၢအဘၣ်ဃးဒီးတၢ်လီတၢ်ဝ့ၤလီၤ. 7ပှၤလၢတၢ်အဲၣ်အီၤသ့ၣ်ဧၢ,မ်ပအဲၣ်လိာ်ကွံလိာ်ပသးတက့ၢ်.အဂ့ၢ်ဒ်အံၤ,တၢ်အဲၣ်တၢ်ကွံဟဲလၢယွၤ,ဒီးကယဲၢ်ပှၤလၢအအဲၣ်ဝဲတဂၤလၢ်လၢ်န့ၣ်,အိၣ်ဖျဲၣ်လၢယွၤ,ဒီးသ့ၣ်ညါယွၤလီၤ. 8ပှၤလၢအတအဲၣ်ဘၣ်န့ၣ်,တသ့ၣ်ညါဘၣ်ယွၤဘၣ်.အဂ့ၢ်ဒ်အံၤ,ယွၤမ့ၢ်တၢ်အဲၣ်တၢ်ကွံလီၤ. 9ယွၤအတၢ်အဲၣ်တၢ်ကွံအိၣ်ဖျါဝဲလၢပဂီၢ်လၢတၢ်အံၤ,ယွၤမၢလီၤအဖိခွါတဂၤဃီဆူဟီၣ်ခိၣ်ချၢ,ဒ်သိးပကမူလၢအဃိလီၤ. 10လၢတၢ်အံၤမ့ၢ်တၢ်အဲၣ်တၢ်ကွံ,လၢပအဲၣ်ယွၤတမ့ၢ်ဘၣ်.မ့ၢ်လၢအဝဲဒၣ်အဲၣ်ပှၤ,ဒီးမၢလီၤအဖိခွါဒီး,မၤပူၤမၤဖျဲးပတၢ်ဒဲးဘးလီၤ. 11ပှၤလၢတၢ်အဲၣ်အီၤသ့ၣ်ဧၢ,ယွၤမ့ၢ်အဲၣ်ပှၤထဲထဲန့ၣ်ဒီး,ဂ့ၤလၢပအဲၣ်လိာ်ကွံလိာ်ပသးသကိးသကိးစ့ၢ်ကီးလီၤ. 12ပှၤတထံၣ်ဘၣ်ယွၤနီတခီၣ်နီတဂၤဘၣ်.ပမ့ၢ်အဲၣ်လိာ်ကွံလိာ်ပသးဒီး,ယွၤအိၣ်ဝဲဆိးဝဲလၢပပူၤ,ဒီးအတၢ်အဲၣ်တၢ်ကွံလၢထီၣ်ပှဲၤထီၣ်လၢပပူၤလီၤ. 13လၢတၢ်အံၤအဃိပသ့ၣ်ညါလၢပအိၣ်ပဆိးလၢအပူၤ,ဒီးအဝဲဒၣ်အိၣ်လၢပပူၤန့ၣ်,အဂ့ၢ်ဒ်အံၤ,ဟ့ၣ်လီၤလံပှၤလၢအသးန့ၣ်လံ. 14ဒီးပထံၣ်လံ,ဒီးပအုၣ်ပသးလၢပၢ်မၢလီၤအဖိခွါလၢတၢ်အုၣ်က့ၤခီၣ်က့ၤဟီၣ်ခိၣ်အဂီၢ်လံ. 15ဖဲဒၣ်ပှၤလၢအအၢၣ်လီၤအီလီၤလၢယ့ၣ်ရှူးမ့ၢ်ယွၤအဖိခွါန့ၣ်,ယွၤအိၣ်ဝဲဆိးဝဲလၢအပူၤ,ဒီးအဝဲဒၣ်အိၣ်ဝဲလၢယွၤအပူၤလီၤ. 16ဒီးပသ့ၣ်ညါလံ,ဒီးပနာ်သပှၢ်ပှၢ်ယွၤအတၢ်အဲၣ်တၢ်ကွံလၢအအိၣ်ဝဲလၢပပူၤလံ.ယွၤမ့ၢ်တၢ်အဲၣ်တၢ်ကွံ,ဒီးပှၤလၢအအိၣ်ဝဲဆိးဝဲလၢတၢ်အဲၣ်တၢ်ကွံအပူၤန့ၣ်,မ့ၢ်အအိၣ်ဝဲဆိးဝဲလၢယွၤအပူၤ,ဒီးယွၤအိၣ်ဝဲလၢအပူၤလီၤ. 17လၢတၢ်အံၤအဃိ,တၢ်အဲၣ်တၢ်ကွံလၢထီၣ်ပှဲၤထီၣ်ဒီးပှၤ,ဒ်သိးပကအိၣ်ဒီးပသးခူတလ့ၢ်လၢမုၢ်စံၣ်ညီၣ်အနံၤလီၤ.အဂ့ၢ်ဒ်အံၤ,ဒ်အဝဲဒၣ်အိၣ်အသိးန့ၣ်,ပအိၣ်ပဝဲလၢဟီၣ်ခိၣ်ချၢအံၤလီၤ. 18တၢ်ပျံၤတၢ်ဖုးတအိၣ်ဘၣ်လၢတၢ်အဲၣ်တၢ်ကွံအပူၤဘၣ်.မ့မ့ၢ်တၢ်အဲၣ်တၢ်ကွံအလၢအပှဲၤန့ၣ်,ဟီထီၣ်ကွံာ်တၢ်ပျံၤတၢ်ဖုးလီၤ.အဂ့ၢ်ဒ်အံၤ,တၢ်ပျံၤတၢ်ဖုးန့ၣ်အိၣ်ဒီးတၢ်ကိၢ်တၢ်ဂီၤ,ဒီးပှၤလၢအပျံၤတၢ်န့ၣ်တလၢထီၣ်ပှဲၤထီၣ်လၢတၢ်အဲၣ်အပူၤဘၣ်. 19ပအဲၣ်တၢ်ကွံတၢ်လီၤ,အဂ့ၢ်ဒ်အံၤ,အဝဲဒၣ်အဲၣ်ဆိပှၤလီၤ. 20ပှၤမ့ၢ်စံး,ယအဲၣ်ယွၤ,ဒီးမ့ၢ်သးဟ့အဒီပုၢ်ဝဲၢ်ဒီး,မ့ၢ်ပှၤကတိၤတၢ်ကဘျံးကဘျၣ်လီၤ.အဂ့ၢ်ဒ်အံၤ,ပှၤလၢအတအဲၣ်ဘၣ်အဒီပုၢ်ဝဲၢ်လၢအထံၣ်ဝဲန့ၣ်ဒီး,ကအဲၣ်ယွၤလၢအတထံၣ်ဘၣ်န့ၣ်,သ့ဒ်လဲၣ်. 21ဒီးတၢ်မၤလိာ်လၢပန့ၢ်လၢအီၤမ့ၢ်အအံၤ,ဒ်သိးပှၤလၢအအဲၣ်ယွၤန့ၣ်,ကအဲၣ်စ့ၢ်ကီးအဒီပုၢ်ဝဲၢ်လီၤ.
Copyright information for
KswSKMB