‏ 1 Kings 11

1ဒီးစီၤပၤၡလိၤမိၤအဲၣ်ပှၤတခီဘီမုၢ်ဖိအပိာ်မုၣ်အါဂၤလီၤ.လၢဖၤရိၤအဖိမုၣ်အမဲာ်ညါန့ၣ်ပှၤမိၤအးမုၣ်,ပှၤဧၣ်မိၣ်မုၣ်,ပှၤအဒိၣ်မုၣ်,ပှၤစံဒိၣ်မုၣ်,ပှၤဃ့ၤသးမုၣ်, 2လၢပှၤကလုာ်အကျါလၢယွၤစံးပှၤအံၣ်စရ့လးဖိလၢအဂ့ၢ်န့ၣ်,သုတဘၣ်လဲၤနုာ်ဆူအအိၣ်ဘၣ်,ဒီးအဝဲသ့ၣ်တဖၣ်န့ၣ်တဘၣ်ဟဲနုာ်ဆူသုအိၣ်ဘၣ်,ကဘိးဃၣ်ကွံာ်သုသးထွဲအကစၢ်တဖၣ်အခံန့ၣ်လီၤ.ဒီးစီၤၡလိၤမိၤဘျုးအသးဒီးအီၤလၢတၢ်အဲၣ်လီၤ.

3ဒီးအိၣ်ဝဲဒီးအမါနွံကယၤ,စီၤပၤအဖိမုၣ်တဖၣ်,ဒီးအသံၣ်မါသၢကယၤ,ဒီးအမါတဖၣ်န့ၣ်ဘိးဃၣ်ကွံာ်အသးလီၤ. 4ဒီးစီၤၡလိၤမိၤအသးပှၢ်အကတီၢ်န့ၣ်တၢ်မၤအသးလၢအမါတဖၣ်ဘိးဃၣ်ကွံာ်အသးထွဲကစၢ်အဂၤတဖၣ်အခံ,ဒီးအသးတအိၣ်ဒီဖျၢၣ်ဒီးယွၤအကစၢ်,ဒ်အပၢ်စီၤဒၤဝံးအသးအသိးန့ၣ်ဘၣ်.

5ဒီးစီၤၡလိၤမိၤလဲၤပိာ်ပှၤစံဒိၣ်ဖိအကစၢ်မုၢ်ဧၤၡတြိးအခံ,ဒီးပှၤဧၣ်မိၣ်ဖိအတၢ်သးဘၣ်အၢ,မိလးအခံလီၤ.

6ဒီးစီၤၡလိၤမိၤမၤတၢ်အၢလၢယွၤအမဲာ်,ဒီးတပိာ်ထွဲယွၤအခံလၢလၢပှဲၤပှဲၤဒ်အပၢ်စီၤဒၤဝံးအသိးန့ၣ်ဘၣ်. 7တုၤနုၤတစုစီၤၡလိၤမိၤမၤတၢ်အလီၢ်ထီၣ်ထီလၢမိၤအးအတၢ်သးဘၣ်အၢ,ကမိၣ်အဂီၢ်လၢကစၢၢ်အိၣ်လၢယရူၤၡလ့ၣ်အမဲာ်ညါအလိၤ,ဒီးလၢပှၤဧၣ်မိၣ်ဖိအတၢ်သးဘၣ်အၢ,မိလးအဂီၢ်လီၤ.

8ဒီးမၤဝဲဒ်န့ၣ်အသိးလၢကယဲၢ်အပှၤတခီဘီမုၢ်ဖိအမါအဂီၢ်လၢအဆိၣ်ကဲၤတၢ်နၢမူ,ဒီးလုၢ်တၢ်လၢကစၢ်အဂၤတဖၣ်လီၤ.

9ဒီးယွၤအသးထီၣ်ဘၣ်စီၤၡလိၤမိၤလီၤ.အဂ့ၢ်ဒ်အံၤ,အသးဃၣ်ကွံာ်လံအသးလၢယွၤအံၣ်စရ့လးအကစၢ်အအိၣ်လၢအအိၣ်ဖျါလၢအမဲာ်ညါခံဘျီလံ. 10ဒီးမၤလိာ်ဝဲလၢတၢ်တမံၤန့ၣ်အဂ့ၢ်အကျိၤ,ဒ်သိးအသုတပိာ်ကစၢ်အဂၤတဖၣ်အခံတဂ့ၤလီၤ.ဒီးတတိၢ်န့ၢ်ဘၣ်တၢ်လၢယွၤမၤလိာ်အီၤလီၤ.

11ဒီးယွၤစံးဘၣ်စီၤၡလိၤမိၤ,မ့ၢ်နမၤတၢ်အံၤ,ဒီးနတတိၢ်န့ၢ်ဘၣ်ယတၢ်အၢၣ်လီၤအီလီၤဘၣ်,ဒီးယတၢ်သိၣ်တၢ်သီလၢယမၤလိာ်နၤဘၣ်ဒီး,ယကထုးထီၣ်ကွံာ်ဘီမုၢ်လၢနအိၣ်,ဒီးဟ့ၣ်လီၤအီၤလၢနကုၢ်နပှၤတဂၤသပှၢ်တၢၢ်လီၤ. 12ဘၣ်ဆၣ်ဒီးလၢနမုၢ်နံၤတဖၣ်အပူၤန့ၣ်ယတမၤဘၣ်,လၢနပၢ်စီၤဒၤဝံးအဃိလီၤ.ယကထုးထီၣ်ကွံာ်အီၤလၢနဖိခွါအစုပူၤလီၤ. 13မ့ၢ်နာ်သက့ဒ်န့ၣ်ဒီးယတထုးထီၣ်ကွံာ်ဘီမုၢ်ခဲလၢာ်ဘၣ်.ယကဟ့ၣ်လီၤပှၤတဒူၣ်လၢနဖိခွါလၢယခ့ယပှၤစီၤဒၤဝံးအဃိ,ဒီးလၢယရူၤၡလ့ၣ်အဃိလၢယဃုထၢအီၤလီၤ.

14ဒီးယွၤထိၣ်ဂဲၤထီၣ်တၢ်အဒုၣ်အဒါလၢစီၤၡလိၤမိၤအဂီၢ်,လၢပှၤအဒိၣ်ဖိစီၤဟၤဒးလီၤ.အဝဲဒၣ်န့ၣ်မ့ၢ်ပှၤလၢစီၤပၤအချံအသၣ်အကျါလၢအဒိၣ်အပူၤလီၤ.

15ဒီးစီၤဒၤဝံးအိၣ်ဝဲလၢအဒိၣ်အပူၤ,ဒီးစီၤယိၤအာ်,ပှၤသုးမုၢ်အခိၣ်လဲၤထီၣ်ခူၣ်လီၤကွံာ်ပှၤဘၣ်တၢ်မၤသံအီၤ,လၢအကျီကွံာ်ပှၤပိာ်ခွါခဲလၢာ်လၢအဒိၣ်အပူၤအလီၢ်ခံန့ၣ်, 16(အဂ့ၢ်ဒ်အံၤ,စီၤယိၤအာ်အိၣ်ဖဲန့ၣ်ဒီးအံၣ်စရ့လးခဲလၢာ်ဃုလါတုၤအဒီၣ်တဲာ်ကွံာ်ကယဲၢ်ပှၤပိာ်ခွါလၢအဒိၣ်အပူၤန့ၣ်,) 17တၢ်မၤအသးလၢစီၤဟၤဒးဃ့ၢ်ထီၣ်ကွံာ်,အဝဲဒၣ်ဒီးပှၤအဒိၣ်ဖိအပၢ်အခ့အပှၤတနီၤနီၤ,ဒ်သိးအကလဲၤလီၤဆူအဲၤကူပတူးအပူၤ,ဒီးစီၤဟးဒ့မ့ၢ်ဖိဆံးလီၤ.

18ဒီးဂဲၤဆၢထၢၣ်ဟးထီၣ်လၢမံးဒယၣ်အပူၤ,ဒီးဟဲဝဲဆူပၤရၣ်အပူၤ,ဒီးမၤန့ၢ်ပှၤကညီလၢပၤရၣ်အပူၤ,ဒီးဟဲဝဲဆူကီၢ်အဲၤကူပတူးအပူၤ,ဆူအဲၤကူပတူးအစီၤပၤဖၤရိၤအအိၣ်လၢအဟ့ၣ်လီၤအီၤလၢအဟံၣ်တဖျၢၣ်,ဒီးမၤလိာ်လၢအကန့ၢ်တၢ်အီၣ်,ဒီးဟ့ၣ်လီၤအီၤလၢဟီၣ်ခိၣ်လီၤ.

19ဒီးစီၤဟၤဒးထံၣ်န့ၢ်တၢ်ဘျုးတၢ်ဖှိၣ်လၢဖၤရိၤအမဲာ်ဒိၣ်မးလီၤ.ဒီးဟ့ၣ်လီၤအမါလၢအမါဒၣ်ဝဲအဒီပုၢ်ဝဲၢ်မုၣ်,နီၢ်ပၤမုၣ်တၤပါန့ၤအဒီပုၢ်ဝဲၢ်မုၣ်လီၤ.

20ဒီးနီၢ်တၤပါန့ၤအဒီပုၢ်ဝဲၢ်မုၣ်န့ၣ်ဆံးစၢ်န့ၢ်အီၤလၢအဖိခွါစီၤကနူးဘး,ဒီးနီၢ်တၤပါန့ၤဒုးဖှၣ်အနုၢ်လၢဖၤရိၤအဟံၣ်ပူၤ,ဒီးစီၤကနူဘးန့ၣ်အိၣ်ဝဲလၢဖၤရိၤအဟံၣ်ဖိအကျါ,လၢဖၤရိၤအဖိခွါအကျါန့ၣ်လီၤ.

21ဒီးစီၤဟၤဒးန့ၣ်နၢ်ဟူဝဲလၢအဲၤကူပတူးအပူၤလၢစီၤဒၤဝံးမံဝဲဒီးအပၢ်တဖၣ်,ဒီးလၢပှၤသုးမုၢ်အခိၣ်စီၤယိၤအာ်သံလံန့ၣ်လီၤ.ဒီးစီၤဟၤဒးစံးလၢဖၤရိၤ,ပျၢ်ယၤဒ်သိးယကလဲၤထီၣ်ဆူယကီၢ်ဒၣ်ယဲတက့ၢ်.

22ဖၤရိၤစံးဘၣ်အီၤ,ဘၣ်ဆၣ်ဒီးကွၢ်ကွၢ်,နဃုလဲၤထီၣ်ဆူနကီၢ်ဒၣ်နဲန့ၣ်တၢ်လၢနန့ၢ်ဘၣ်အလီၢ်အိၣ်လၢနတန့ၢ်ဘၣ်န့ၣ်မ့ၢ်အအိၣ်ဒံးမနုၤတမံၤလဲၣ်,ဒီးစံးဆၢဝဲဒၣ်,တအိၣ်ဘၣ်တၢ်နီတမံၤဘၣ်.ဘၣ်ဆၣ်ဒီးပျၢ်,ဒီးပျၢ်ယၤတက့ၢ်.

23ဒီးယွၤထိၣ်ဂဲၤထီၣ်ကဒီးအဒုၣ်အဒါလၢစီၤအလံဒၤအဖိခွါစီၤရစိၣ်,လၢအဃ့ၢ်ထီၣ်ကွံာ်လၢအကစၢ်စိဘၤအစီၤပၤဟးဒးဧ့စ့ၢ်အအိၣ်လီၤ.

24ဒီးတုၤစီၤဒၤဝံးမၤသံပှၤတဖၣ်,ဒီးအဝဲဒၣ်ဒုးအိၣ်ဖှိၣ်ပှၤကညီဆူအအိၣ်,ဒီးကဲထီၣ်ပှၤတဖုအခိၣ်,ဒီးလဲၤဝဲဆူဒၤမ့ၤစ့းအပူၤ,ဒီးအိၣ်ဝဲဆိးဝဲဖဲန့ၣ်,ဒီးကဲစီၤပၤလၢဒၤမ့ၤစ့းအပူၤလီၤ. 25ဒီးမ့ၢ်အံၣ်စရ့လးအဒုၣ်အဒါလၢစီၤၡလိၤမိၤအမုၢ်နံၤခဲလၢာ်အပူၤ,လၢတၢ်အၢလၢစီၤဟၤဒးမၤဝဲအမဲာ်ညါ,ဒီးသးဟ့အံၣ်စရ့လး,ဒီးကဲစီၤပၤလၢစူၤရံအဖီခိၣ်န့ၣ်လီၤ.

26ဒီးစီၤနဘးအဖိခွါစီၤယၤရၤဘၣ်,ပှၤအ့ဖရးသးဖိဘၣ်ဃးဒီးစရ့ဒၤ,စီၤၡလိၤမိၤအကုၢ်အပှၤတဂၤစ့ၢ်ကီး(အမိၢ်အမံၤမ့ၢ်နီၢ်စရူဧၤပှၤမုၣ်ကမဲတဂၤ,)ယူာ်ထီၣ်အစုထီဒါဘၣ်စီၤပၤလီၤ.

27ဒီးယူာ်ထီၣ်အစုထီဒါစီၤပၤအဂ့ၢ်မ့ၢ်အအံၤ,စီၤၡလိၤမိၤမၤမံးလိၤ,ဒီးဘှီက့ၤတၢ်ဘၢၣ်ဖျိလၢအပၢ်စီၤဒၤဝံးအဝ့ၢ်ပူၤ, 28ဒီးပှၤကညီစီၤယၤရၤဘၣ်တဂၤန့ၣ်မ့ၢ်ပှၤအဆူၣ်,ပှၤအဂံၢ်ဆူၣ်အဘါဆူၣ်,ဒီးစီၤၡလိၤမိၤထံၣ်ဘၣ်ဝဲလၢပှၤဖိၣ်သၣ်ခွါတဂၤန့ၣ်မ့ၢ်ပှၤလၢအခုမၤတၢ်,ဒီးစီၤၡလိၤမိၤပာ်အီၤလၢကယဲၢ်ယိၤသးအပှၤဟံၣ်ဖိအဝံတၢ်ယိးတၢ်အဖီခိၣ်လီၤ.

29ဒီးအကတီၢ်ဖဲန့ၣ်တၢ်မၤအသးလၢစီၤယၤရၤဘၣ်ဟးထီၣ်လၢယရူၤၡလ့ၣ်,ဒီးပှၤၡံလိၤဖိဝံအဃံယၤထံၣ်န့ၢ်အီၤလၢကျဲပူၤ,ဒီးကၤဝဲလၢယၣ်အသီတဘ့ၣ်,ဒီးအဝဲသ့ၣ်အိၣ်ဝဲလၢပှၢ်လၢ်ကျါခံဂၤဧိၤလီၤ.

30ဒီးစီၤအဃံယၤဖီၣ်ဃာ်ယၣ်သီတဘ့ၣ်လၢအအိၣ်ဝဲလၢအလိၤ,ဒီးဖှီဝဲလၢတဆံခံက့, 31ဒီးစံးဘၣ်စီၤယၤရၤဘၣ်,ဟံးန့ၢ်ဆံဆဲၣ်က့အံၤတက့ၢ်.အဂ့ၢ်ဒ်အံၤ,ယွၤအံၣ်စရ့လးအကစၢ်စံးဝဲဒ်အံၤ,ကွၢ်ကွၢ်,ယကထုးထီၣ်ကွံာ်ဘီမုၢ်လၢစီၤၡလိၤမိၤအစုပူၤ,ဒီးယကဟ့ၣ်လီၤပှၤဆံဆဲၣ်ဒူၣ်လၢနၤလီၤ. 32ဒီးအဝဲဒၣ်န့ၣ်ကအိၣ်ဒီးပှၤတဒူၣ်လၢယခ့ယပှၤစီၤဒၤဝံးအဃိ,ဒီးလၢယရူၤၡလ့ၣ်အဃိ,ဝ့ၢ်လၢယဃုထၢအီၤလၢကယဲၢ်အံၣ်စရ့လးအဒူၣ်အကျါန့ၣ်လီၤ. 33အဂ့ၢ်ဒ်အံၤ,လဲၤသဒၣ်လံယၤလံ.ဒီးဘူၣ်ထီၣ်ဘါထီၣ်ပှၤစံဒိၣ်ဖိအကစၢ်မုၣ်ဧၤၡတြိး,ပှၤမိၤအးဖိအကစၢ်ကမိၣ်,ပှၤဧၣ်မိၣ်ဖိအကစၢ်မိလး,ဒီးတပိာ်ဘၣ်ယကျဲတဖၣ်ဒ်သိးအကမၤတၢ်လၢအလိၤလၢယမဲာ်ဒီးတိၢ်န့ၢ်ယတၢ်သိၣ်တၢ်သီဒီးယတၢ်စံၣ်ညီၣ်,ဒ်အပၢ်စီၤဒၤဝံးအသိးန့ၣ်ဘၣ်လီၤ.

34ဒီးယတဟံးန့ၢ်ဘၣ်ဘီမုၢ်ဒီဘ့ၣ်ညါလၢအစုပူၤဘၣ်,ဒီးယကပာ်အီၤလၢအခိၣ်တစိၤဒၣ်အီၤလၢယခ့ယပှၤစီၤဒၤဝံးအဃိလၢယဃုထၢအီၤလၢအတိၢ်န့ၢ်ယတၢ်မၤလိာ်ဒီးယတၢ်သိၣ်တၢ်သီတဂၤအဃိန့ၣ်လီၤ. 35ဒီးယကဟံးန့ၢ်ဘီမုၢ်န့ၣ်လၢအဖိခွါအစုပူၤ,ဒီးယကဟ့ၣ်လီၤအီၤလၢနၤ,ပှၤဆံဆဲၣ်ဒူၣ်လီၤ. 36ဒီးယကဟ့ၣ်အဖိခွါလၢပှၤတဒူၣ်ဒ်သိးယခ့ယပှၤစီၤဒၤဝံးကအိၣ်ဒီးအတၢ်ကပီၤတဖျၢၣ်လၢယမဲာ်ညါတထံၣ်ဃီလၢယရူၤၡလ့ၣ်အပူၤ,ဝ့ၢ်တဖျၢၣ်လၢယဃုထၢအီၤဒ်သိးယကပာ်ယမံၤလၢအပူၤန့ၣ်လီၤ. 37ဒီးယကဟံးန့ၢ်နၤ,ဒီးနကကဲစီၤပၤဒ်ကယဲၢ်တၢ်လၢနသးဆၢတၢ်အသိးန့ၣ်,ဒီးနကကဲထီၣ်စီၤပၤလၢအံၣ်စရ့လးအဖီခိၣ်လီၤ.

38ဒီးနမ့ၢ်ဒိကနၣ်ကယဲၢ်တၢ်လၢယမၤလိာ်နၤ,ဒီးပိာ်ယကျဲတဖၣ်,ဒီးမၤတၢ်လၢအလိၤလၢယမဲာ်,ဒ်သိးနကတိၢ်န့ၢ်ယတၢ်မၤလိာ်ဒီးယတၢ်သိၣ်တၢ်သီ,ဒ်ယခ့ယပှၤစီၤဒၤဝံးမၤဝဲအသိးန့ၣ်ဒီး,တၢ်ကမၤအသးလၢယကအိၣ်ဒီးနၤ,ဒီးယကသူၣ်န့ၢ်နၤလၢဟံၣ်ကျၢၤတဟံၣ်,ဒ်ယသူၣ်န့ၢ်လၢစီၤဒၤဝံးအဂီၢ်,ဒီးယကဟ့ၣ်အံၣ်စရ့လးလၢနၤလီၤ. 39ဒီးလၢတၢ်တမံၤန့ၣ်အဃိယကမၤနးမၤဖှီၣ်စီၤဒၤဝံးအချံအသၣ်လီၤ.ဘၣ်ဆၣ်ဒီးလီၤထူလီၤယိာ်တမ့ၢ်ဘၣ်.

40ဒီးစီၤၡလိၤမိၤဃုမၤသံစီၤယၤရၤဘၣ်,ဒီးစီၤယၤရၤဘၣ်ဂဲၤဆၢထၢၣ်,ဒီးဃ့ၢ်ကွံာ်ဆူအဲၤကူပတူးအပူၤ,ဆူအဲၤကူပတူးအစီၤပၤစီၤၡံၡးအအိၣ်,ဒီးအိၣ်လၢအဲၤကူပတူးအပူၤတုၤစီၤၡလိၤမိၤသံဝဲလီၤ.

41ဒီးတၢ်အိၣ်လီၤတဲာ်ဘၣ်ဃးဒီးစီၤၡလိၤမိၤ,ဒီးကယဲၢ်တၢ်လၢအမၤဝဲခဲလၢာ်,ဒီးအတၢ်ကူၣ်သ့န့ၣ်ကွဲအသးလၢလံာ်ၡလိၤမိၤအတၢ်မၤ,တမ့ၢ်ဘၣ်ဧါ.

42ဒီးမုၢ်နံၤတဖၣ်လၢစီၤၡလိၤမိၤကဲစီၤပၤလၢယရူၤၡလ့ၣ်အပူၤလၢအံၣ်စရ့လးခဲလၢာ်အဖီခိၣ်န့ၣ်မ့ၢ်အနံၣ်လွံၢ်ဆံလီၤ.

43ဒီးစီၤၡလိၤမိၤမံဝဲဒီးအပၢ်တဖၣ်,ဒီးပှၤခူၣ်လီၤကွံာ်အီၤလၢအပၢ်စီၤဒၤဝံးအဝ့ၢ်ပူၤ,ဒီးအဖိခွါစီၤရဃၤဘၣ်ကဲစီၤပၤလၢအလီၢ်န့ၣ်လီၤ.