‏ 1 Kings 22

1ဒီးသၢနံၣ်အတီၢ်ပူၤန့ၣ်တၢ်ဒုးသုးတအိၣ်ဘၣ်လၢစူၤရံဒီးအံၣ်စရ့လးအဘၢၣ်စၢၤဘၣ်.

2ဒီးသၢနံၣ်တနံၣ်န့ၣ်တၢ်မၤအသးလၢယူဒၤအစီၤပၤစီၤယဟိၡၤဖးဟဲလီၤဆူအံၣ်စရ့လးအစီၤပၤအအိၣ်လီၤ.

3ဒီးအံၣ်စရ့လးအစီၤပၤစံးလၢအခ့အပှၤ,ရၤမိးလၢကံးလဧးမ့ၢ်ပတၢ်,ဒီးပအိၣ်ဃိကလာ်,ဒီးတဟံးန့ၢ်ဘၣ်အီၤလၢစူၤရံအစီၤပၤအစုပူၤန့ၣ်သုတသ့ၣ်ညါဘၣ်ဧါ.

4ဒီးစံးလၢစီၤယဟိၡၤဖး,နကလဲၤဒုးတၢ်ဒီးယၤဆူရၤမိးကံးလဧးန့ၣ်ဧါ.ဒီးစီၤယဟိၡၤဖးစံးဆၢအံၣ်စရ့လးအစီၤပၤ,ယဲဒၣ်အံၤယမၤသးဒ်နၤအသိးန့ၣ်,ယပှၤဂီၢ်မုၢ်ဒ်နပှၤဂီၢ်မုၢ်အသိးန့ၣ်,ယကသ့ၣ်ဒ်နကသ့ၣ်အသိးန့ၣ်လီၤ.

5ဒီးစီၤယဟိၡၤဖးစံးဘၣ်အံၣ်စရ့လးအစီၤပၤ,သံကွၢ်လၢ်လၢယွၤအကလုၢ်အကထါလၢမုၢ်မဆါတနံၤအံၤတက့ၢ်.

6ဒီးအံၣ်စရ့လးအစီၤပၤဒုးအိၣ်ဖှိၣ်ရိဖှိၣ်ဝံတဖၣ်ပှၤလွံၢ်ကယၤဃၣ်ဃၣ်,ဒီးစံးလၢအီၤ,ယဘၣ်လဲၤထီၣ်ဆူရၤမိးကံးလဧးဒ်သိးယကဒုးတၢ်,ယဘၣ်အိၣ်လဲၣ်.ဒီးစံးဝဲဒၣ်,လဲၤထီၣ်တက့ၢ်.အဂ့ၢ်ဒ်အံၤ,ယွၤကဟ့ၣ်လီၤကွံာ်အီၤလၢစီၤပၤအစုပူၤလီၤ.

7ဒီးစီၤယဟိၡၤဖးစံးဝဲဒၣ်,ယွၤအဝံတအိၣ်လၢၤဘၣ်ဖဲအံၤတဂၤဒ်သိးပကသံကွၢ်အီၤစ့ၢ်ကီးဧါ.

8ဒီးအံၣ်စရ့လးအစီၤပၤစံးဘၣ်စီၤယဟိၡၤဖး,ပှၤလၢပကသံကွၢ်ယွၤလၢအီၤအိၣ်ဒံးတဂၤ,စီၤယံးမလၤအဖိခွါစီၤမံၤကါယၤလီၤ.ဘၣ်ဆၣ်ဒီးယသးဟ့အီၤလီၤ.အဂ့ၢ်ဒ်အံၤ,ကတိၤတၢ်လၢဝံအကျိာ်လၢတၢ်ဂ့ၤလၢယဂ့ၢ်ယကျိၤတမ့ၢ်ဘၣ်,မ့ၢ်တၢ်အၢလီၤ.ဒီးစီၤယဟိၡၤဖးစံးဝဲဒၣ်,မ်စီၤပၤအသုတစံးဒ်န့ၣ်တဂ့ၤ.

9ဒီးအံၣ်စရ့လးအစီၤပၤကိးန့ၢ်ပှၤဒ့ဒံၣ်တဂၤ,ဒီးစံးဝဲဒၣ်,ဒုးဟဲစီၤယံးမလၤအဖိခွါစီၤမံၤကါယၤချ့ချ့တက့ၢ်.

10ဒီးအံၣ်စရ့လးအစီၤပၤဒီးယဟိၡဖးကၤတ့ၢ်အယၣ်လၢတၢ်အလီၢ်ဖဲတၢ်လဲၤနုာ်ဆူၡၤမရံအပဲတရီပူၤ,ဒီးဆ့ၣ်နီၤတဂၤလၢအလီၢ်ပစိာ်,တဂၤလၢအလီၢ်ပစိာ်န့ၣ်,ဒီးဝံခဲလၢာ်ကတိၤတၢ်လၢဝံအကျိာ်လၢအမဲာ်ညါလီၤ.

11ဒီးစီၤကနၤနါအဖိခွါစီၤစံးဒကံယၤတဂၤတ့နၢၤထးတဖၣ်လၢအဂီၢ်,ဒီးစံးဝဲဒၣ်,ယွၤစံးဒ်အံၤ,နကဘျၢၣ်ပှၤစူၤရံဖိလၢအဝဲအံၤ,တုၤနမၤလၢာ်ကွံာ်အီၤလီၤ. 12ဒီးဝံခဲလၢာ်န့ၣ်ကတိၤတၢ်လၢဝံအကျိာ်ဒ်န့ၣ်အသိး,ဒီးစံးဝဲဒၣ်,လဲၤထီၣ်ဆူရၤမိးကံးလဧး,ဒီးဘီၣ်ထီၣ်ညီထီၣ်တက့ၢ်.အဂ့ၢ်ဒ်အံၤ,ယွၤကဟ့ၣ်လီၤကွံာ်အီၤလၢစီၤပၤအစုပူၤလီၤ.

13ဒီးကလူးတဂၤန့ၣ်လၢအလဲၤကိးန့ၢ်စီၤမံၤကါယၤကတိၤတၢ်ဒီးအီၤ,ဒီးစံးဝဲဒၣ်,ကွၢ်ကွၢ်,ဝံတဖၣ်အတၢ်ကတိၤမ့ၢ်တၢ်ဂ့ၤလၢစီၤပၤအဂ့ၢ်လၢအထးခိၣ်တပူၤဃီလီၤ.မ်နတၢ်ကတိၤကမၤသးဒ်ပှၤလၢအကျါတဂၤအတၢ်ကတိၤအသိးန့ၣ်,ဒီးကတိၤတၢ်ဂ့ၤတက့ၢ်.

14ဒီးစီၤမံၤကါယၤစံးဝဲဒၣ်,ယွၤမူဝဲန့ၣ်,တၢ်လၢယွၤစံးဘၣ်ယၤန့ၣ်ယကတိၤတၢ်န့ၣ်လီၤ.

15ဒီးဟဲဝဲဆူစီၤပၤအအိၣ်,ဒီးစီၤပၤစံးဝဲ,စီၤမံၤကါယၤဧၢ,ပဘၣ်လဲၤထီၣ်ထီဒါရၤမိးကံးလဧးဒ်သိးပကဒုးသုး,ပဘၣ်အိၣ်လဲၣ်.ဒီးစံးဘၣ်အီၤ,လဲၤထီၣ်ဒီးဘီၣ်ထီၣ်ညီထီၣ်တက့ၢ်.အဂ့ၢ်ဒ်အံၤ,ယွၤကဟ့ၣ်လီၤကွံာ်ဝဲဆူစီၤပၤအစုပူၤလီၤ.

16ဒီးစီၤပၤစံးဘၣ်အီၤ,ဒ်သိးနကစံးဘၣ်ယၤထဲတၢ်မ့ၢ်တၢ်တီလၢယွၤအမံၤန့ၣ်ယဘၣ်ဒုးဆိၣ်နၤပှံၤဘျီလဲၣ်.

17ဒီးစံးဝဲဒၣ်,ယထံၣ်ဘၣ်အံၣ်စရ့လးခဲလၢာ်လီၤပြံလီၤပြါလၢကစၢၢ်လိၤ,ဒ်သိလၢအပှၤကွၢ်သိတအိၣ်ဘၣ်အသိးန့ၣ်,ဒီးယွၤစံးဝဲဒၣ်,အဝဲသ့ၣ်တဖၣ်အံၤအကစၢ်တအိၣ်ဘၣ်.မ်ပှၤက့ၤက့ၤတဂၤဆူအဟံၣ်ဒၣ်ဝဲ,တဂၤဆူအဟံၣ်ဒၣ်ဝဲ,မုာ်မုာ်တက့ၢ်.

18ဒီးအံၣ်စရ့လးအစီၤပၤစံးဘၣ်စီၤယဟိၡၤဖး,ယစံးဘၣ်နၤလၢအတကတိၤဘၣ်လၢဝံအကျိာ်လၢတၢ်ဂ့ၤလၢယဂ့ၢ်ဘၣ်,မ့ၢ်လၢတၢ်အၢတခီ,တမ့ၢ်ဘၣ်ဧါ.

19ဒီးစံးဝဲဒၣ်,မၤသးဒ်န့ၣ်ဒီးဒိကနၣ်ယွၤအကလုၢ်တက့ၢ်.ယထံၣ်ဘၣ်ယွၤဆ့ၣ်နီၤလၢအလီၢ်ပစိာ်,ဒီးမူခိၣ်အသုးမုၢ်ခဲလၢာ်ဆၢထၢၣ်လၢအဃၢၤ,လၢအစုထွဲ,ဒီးလၢအစုစ့ၣ်လီၤ.

20ဒီးယွၤစံးဝဲဒၣ်,မ့ၢ်မတၤကလွဲန့ၢ်စီၤအၤဃာ်ဒ်သိးအကလဲၤထီၣ်,ဒီးလီၤဃံၤလၢရၤမိးကံးလဧးအပူၤတဂၤလဲၣ်.ဒီးတဂၤစံးဒ်အံၤ,ဒီးတဂၤစံးဒ်နုၤလီၤ.

21ဒီးတဂၤဟဲထီၣ်,ဒီးဆၢထၢၣ်လၢယွၤအမဲာ်ညါ,ဒီးစံးဝဲဒၣ်,ယကလွဲန့ၢ်အီၤလီၤ.

22ဒီးယွၤစံးလၢအီၤ,လၢမနုၤတမံၤလဲၣ်.ဒီးစံးဘၣ်အီၤ,ယကလဲၤထီၣ်,ဒီးယကကဲထီၣ်သးကဘျံးကဘျၣ်လၢအဝံခဲလၢာ်အကိာ်ပူၤလီၤ.ဒီးစံးဝဲဒၣ်,နကလွဲန့ၢ်အီၤ,ဒီးမၤဃၣ်တၢ်စ့ၢ်ကီးလီၤ.လဲၤထီၣ်ဒီးမၤဒ်န့ၣ်တက့ၢ်.

23ဒီးခဲကနံၣ်အံၤ,ကွၢ်ကွၢ်,ယွၤပာ်သးကဘျံးကဘျၣ်လၢနဝံခဲလၢာ်အံၤအကိာ်ပူၤ,ဒီးယွၤကတိၤတၢ်အၢလၢနဂ့ၢ်နကျိၤလီၤ.

24ဒီးစီၤကနၤနါအဖိခွါစီၤစံးဒကံယၤသုးဘူးအသး,ဒီးဒဲစီၤမံၤကါယၤအဘိးပၤ,ဒီးစံးဝဲဒၣ်,ဒ်သိးအကကတိၤတၢ်ဒီးနၤဒီး,ယွၤအသးဟးထီၣ်လၢယၤဖဲလဲၣ်ခီလဲၣ်.

25ဒီးစီၤမံၤကါယၤစံးဝဲဒၣ်,ကွၢ်ကွၢ်,မုၢ်တနံၤလၢနကလဲၤနုာ်လၢဒၢးလၢညါခီတဒၢးဒ်သိးနကပာ်ခူသူၣ်နသးန့ၣ်နကသ့ၣ်ညါလီၤ.

26ဒီးအံၣ်စရ့လးအစီၤပၤစံးဝဲဒၣ်,ဟံးန့ၢ်စီၤမံၤကါယၤ,ဒီးစိာ်ကဒါက့ၤအီၤဆူဝ့ၢ်အခိၣ်စီၤအၤမိၣ်,ဒီးစီၤပၤအဖိခွါစီၤယိၤအၣ်အအိၣ်, 27ဒီးစံး,စီၤပၤစံးဒ်အံၤ,ပာ်ပှၤတဂၤအံၤလၢဃိာ်ပူၤ,ဒီးလုၢ်အီၣ်လုၢ်အီအီၤလၢတၢ်နးတၢ်ဖှီၣ်အကိၣ်,ဒီးတၢ်နးတၢ်ဖှီၣ်အထံတုၤယဟဲက့ၤမုာ်မုာ်တက့ၢ်.

28ဒီးစီၤမံၤကါယၤစံးဝဲဒၣ်,နမ့ၢ်ဟဲက့ၤမုာ်မုာ်ဒီး,ယွၤတကတိၤဘၣ်လၢယၤဘၣ်.ဒီးစံးဝဲဒၣ်,ပှၤဂီၢ်မုၢ်သ့ၣ်ဧၢ,ဒိကနၣ်ကိးဂၤဒဲးတက့ၢ်.

29ဒီးအံၣ်စရ့လးအစီၤပၤ,ဒီးယူဒၤအစီၤပၤစီၤယဟိၡၤဖးလဲၤထီၣ်ဆူရၤမိးကံလဧးအပူၤလီၤ.

30ဒီးအံၣ်စရ့လးအစီၤပၤစံးဘၣ်စီၤယဟိၡၤဖး.ယကမၤလီၤဆီယသး,ဒီးလဲၤနုာ်လၢဒုးသုးအပူၤလီၤ.မ့မ့ၢ်နဲဒၣ်အံၤ,ကၤနယၣ်တက့ၢ်.ဒီးအံၣ်စရ့လးအစီၤပၤမၤလီၤဆီအသး,ဒီးလဲၤနုာ်လၢတၢ်ဒုးသုးအပူၤလီၤ.

31ဒီးစူၤရံအစီၤပၤမၤလိာ်အခိၣ်သၢဆံဂၤလၢအပၢအလ့ၣ်ကဟၣ်တဖၣ်ဒီးစံးဝဲဒၣ်,အဒိၣ်ဂ့ၤ,အဆံးဂ့ၤ,ဒုးတၢ်ဒီးအီၤတဂ့ၤ.ဒုးတၢ်ထဲလၢအံၣ်စရ့လးအစီၤပၤတဂၤဧိၤတက့ၢ်.

32ဒီးတုၤလ့ၣ်ကဟၣ်အခိၣ်တဖၣ်ထံၣ်ဘၣ်စီၤယဟိၡၤဖးဒီး,တၢ်မၤအသးလၢအစံးဝဲဒၣ်,မ့ၢ်ဝဲလၢအံၣ်စရ့လးအစီၤပၤလီၤ.ဒီးဃၣ်အသးဒ်သိးအကဒုးတၢ်ဒီးအီၤ,ဒီးစီၤယဟိၡၤဖးကိးထီၣ်တၢ်လီၤ.

33ဒီးတုၤလ့ၣ်ကဟၣ်အခိၣ်တဖၣ်ထံၣ်ဘၣ်ဝဲလၢအတမ့ၢ်ဘၣ်အံၣ်စရ့လးအစီၤပၤဒီး,တၢ်မၤအသးလၢအဝဲသ့ၣ်က့ၤကဒါက့ၤလၢအလူၤအီၤလီၤ.

34ဒီးပှၤတဂၤခးတၢ်တဘျီလၢအသးဒီဖျၢၣ်,ဒီးဘၣ်အံၣ်စရ့လးအစီၤပၤလၢအသဃိးအဆၢ,ဒီးအဝဲဒၣ်စံးလၢအလ့ၣ်ကဟၣ်အခိၣ်,ဃၣ်ဃီၤနစု,ဒီးစိာ်ထီၣ်ကွံာ်ယၤလၢပှၤသုးမုၢ်အကျါတက့ၢ်.အဂ့ၢ်ဒ်အံၤ,ယဘၣ်တၢ်ဆဲးလီၤ.

35ဒီးတၢ်ဒုးသုးအါထီၣ်လၢမုၢ်တနံၤန့ၣ်ဒီးပှၤဝံၣ်ဆၢထၢၣ်စီၤပၤလၢအလ့ၣ်ကဟၣ်အပူၤထီဒါပှၤစူၤရံဖိ,ဒီးသံဝဲလၢမုၢ်ဟါ,ဒီးအသွံၣ်ယွၤလီၤလၢအပူၤလီၢ်ဆူလ့ၣ်ကဟၣ်အသးကံၢ်ပူၤလီၤ.

36ဒီးတုၤမုၢ်လီၤနုာ်ဃၣ်ဃၣ်ဒီး,တၢ်ကိးထီၣ်လဲၤသကုၤပှၤသုးမုၢ်,ဒီးစံးဝဲဒၣ်,တဂၤဆူအဝ့ၢ်ဒၣ်ဝဲ,တဂၤဆူအဝ့ၢ်ဒၣ်ဝဲ,ဒီးတဂၤဆူအကီၢ်ဒၣ်ဝဲ,တဂၤဆူအကီၢ်ဒၣ်ဝဲန့ၣ်တက့ၢ်.

37ဒီးတုၤစီၤပၤသံဝဲဒီး,ပှၤစိာ်အီၤဆူၡၤမရံ,ဒီးခူၣ်လီၤကွံာ်စီၤပၤလၢၡၤမရံအပူၤလီၤ.

38ဒီးပှၤသ့ကွံာ်လ့ၣ်ကဟၣ်လၢၡၤမရံအနိၣ်ပူၤ,ဒီးထွံၣ်တဖၣ်လ့ၣ်ကွံာ်အသွံၣ်,ဒီးသ့ကွံာ်အသဃိး,ဒ်ယွၤအကလုၢ်ကထါလၢအကတိၤဝဲအသိးန့ၣ်လီၤ.

39ဒီးတၢ်အိၣ်လီၤတဲာ်ဘၣ်ဃးဒီးစီၤအၤဃာ်,ဒီးကယဲၢ်တၢ်လၢအမၤဝဲ,ဒီးဟံၣ်ကဆီမဲလၢအသူၣ်ဝဲ,ဒီးကယဲၢ်ဝ့ၢ်လၢအတ့ဝဲခဲလၢာ်န့ၣ်ကွဲးအသးလၢအံၣ်စရ့လးအစီၤပၤအလံာ်ကွဲးနီၣ်တၢ်အပူၤ,တမ့ၢ်ဘၣ်ဧါ.

40ဒီးစီၤအၤဃာ်မံဝဲဒီးအပၢ်တဖၣ်,ဒီးအဖိခွါစီၤအဃၤစယၤကဲထီၣ်စီၤပၤလၢအလီၢ်လီၤ.

41ဒီးလၢအံၣ်စရ့လးအစီၤပၤအၤဃာ်အနံၣ်ပှဲၤထီၣ်လွံၢ်နံၣ်တနံၣ်န့ၣ်စီၤအၤစါအဖိခွါစီၤယဟိၡၤဖးကဲသီစီၤပၤလၢယူဒၤအဖီခိၣ်လီၤ.

42ဒီးလၢစီၤယဟိၡၤဖးကဲသီစီၤပၤန့ၣ်အသးပှၢ်တ့ၢ်သၢဆံယဲၢ်နံၣ်,ဒီးကဲစီၤပၤလၢယရူၤၡလ့ၣ်အပူၤန့ၣ်ခံဆံယဲၢ်နံၣ်လီၤ.ဒီးအမိၢ်အမံၤမ့ၢ်နီၢ်ဧစူဘၤ,စီၤၡံးလဃံအဖိမုၣ်လီၤ.

43ဒီးပိာ်အပၢ်စီၤအၤစါအကျဲခဲလၢာ်,ဒီးတဃၣ်ကွံာ်ဘၣ်အသးလၢအမၤတၢ်ဂ့ၤလၢယွၤအမဲာ်ဘၣ်.ဘၣ်ဆၣ်ဒီးတၢ်တမၤဟးဂီၤဘၣ်တၢ်အလီၢ်ထီၣ်ထီဘၣ်.ပှၤဂီၢ်မုၢ်လုၢ်ဒံးတၢ်ဒီးဆိၣ်ကဲၤဒံးတၢ်နၢမူလၢတၢ်အလီၢ်ထီၣ်ထီန့ၣ်လီၤ.

44ဒီးစီၤယဟိၡၤဖးမၤတၢ်ဃူလိာ်ဖိးလိာ်ဒီးအံၣ်စရ့လးအစီၤပၤလီၤ.

45ဒီးတၢ်အိၣ်လီၤတဲာ်ဘၣ်ဃးဒီးစီၤယဟိၡၤဖး,ဒီးတၢ်အစိအကမီၤလၢအဒုးနဲၣ်ဝဲ,ဒီးအဒုးသုးအဂ့ၢ်န့ၣ်ကွဲးအသးလၢယူဒၤအစီၤပၤအလံာ်ကွဲးနီၣ်တၢ်အပူၤ,တမ့ၢ်ဘၣ်ဧါ.

46ဒီးပှၤအဲၣ်ပကၢၤဖိလၢအအိၣ်လီၤတဲာ်လၢအပၢ်စီၤအၤစါအမုၢ်နံၤတဖၣ်န့ၣ်သုးကွံာ်ဝဲလၢကီၢ်ပူၤလီၤ.

47ဒီးစီၤပၤတအိၣ်ဘၣ်လၢအဒိၣ်အပူၤဘၣ်,ပဒိၣ်ဖးဒိၣ်တဂၤမ့ၢ်စီၤပၤလီၤ.

48ဒီးစီၤယဟိၡၤဖးတ့ကဘီတၢ်ၡံၣ်ဒ်သိးအကလဲၤဆူအိဖ့ၢ်လၢထူဧိၤလွဲဧိၤအဂီၢ်လီၤ.ဘၣ်ဆၣ်ဒီးတလဲၤဘၣ်ဝဲဘၣ်.အဂ့ၢ်ဒ်အံၤ,ကဘီဟးဂီၤလၢဧ့းစယိၣ်က့ဘ့ၢ်အပူၤလီၤ.

49တုၤနုၤတစုစီၤအၤဃာ်အဖိခွါစီၤအဃၤစယၤစံးလၢစီၤယဟိၡၤဖး,ဒုးလဲၤယခ့ယပှၤဒီးနခ့နပှၤလၢကဘီပူၤတက့ၢ်.ဒီးစီၤယဟိၡၤဖးတအၢၣ်လီၤဘၣ်ဝဲဘၣ်.

50ဒီးစီၤယဟိၡၤဖးမံဝဲဒီးအပၢ်တဖၣ်,ဒီးပှၤခူၣ်လီၤကွံာ်အီၤဒီးအပၢ်တဖၣ်လၢအပၢ်စီၤဒၤဝံးအဝ့ၢ်ပူၤ,ဒီးအဖိခွါစီၤယဟိရၣ်ကဲထီၣ်စီၤပၤလၢအလီၢ်န့ၣ်လီၤ.

51ဒီးလၢယူဒၤအစီၤပၤစီၤယဟိၡၤဖးအနံၣ်ပှဲၤထီၣ်တဆံနွံနံၣ်တနံၣ်န့ၣ်စီၤအၤဃာ်အဖိခွါစီၤအဃၤစယၤကဲသီစီၤပၤလၢအံၣ်စရ့လးအဖီခိၣ်လၢၡၤမရံအပူၤ,ဒီးကဲစီၤပၤလၢအံၣ်စရ့လးအဖီခိၣ်န့ၣ်ခံနံၣ်လီၤ. 52ဒီးမၤတၢ်အၢလၢယွၤအမဲာ်ဒီးပိာ်အပၢ်အကျဲ,ဒီးအမိၢ်အကျဲ,ဒီးစီၤနဘးအဖိခွါစီၤယၤရၤဘၣ်အကျဲ,လၢအဒုးမၤအံၣ်စရ့လးလၢတၢ်ဒဲးဘးလီၤ.

53ဒီးမၤဘဧၤလးအတၢ်,ဒီးဘူၣ်ထီၣ်ဘါထီၣ်အီၤ,ဒီးဒုးသးထီၣ်ယွၤအံၣ်စရ့လးအကစၢ်,ဒ်ကယဲၢ်တၢ်လၢအပၢ်မၤတ့ၢ်အသိးန့ၣ်လီၤ.