1 Kings 9
1ဒီးတုၤစီၤၡလိၤမိၤမၤယွၤအဟံၣ်ဝံၤဒီး,ဒီးစီၤပၤအဟံၣ်,ဒီးကယဲၢ်စီၤၡလိၤမိၤအတၢ်ဆၢလၢအဘၣ်အသးလၢအကမၤဝဲဒီး, 2တၢ်မၤအသးလၢယွၤလီၣ်ဖျါထီၣ်အသးလၢစီၤၡလိၤမိၤအမဲာ်ညါပှဲၤထီၣ်ခံဘျီတဘျီ,ဒ်အအိၣ်ဖျါလၢအမဲာ်ညါလၢကံးဘိၣ်အသိးန့ၣ်လီၤ. 3ဒီးယွၤစံးဘၣ်အီၤ,ယနၢ်ဟူလံနဘါထုကဖၣ်တၢ်ဒီးနဃ့ကညးတၢ်လၢနမၤလၢယမဲာ်ညါ,ယမၤစီဆှံလံဟံၣ်တဖျၢၣ်အံၤလၢနမၤအီၤဒ်သိးယကပာ်ယမံၤဖဲန့ၣ်လီၤထူလီၤယိာ်,ဒီးယမဲာ်ဒီးယသးကအိၣ်ဖဲန့ၣ်ကိးမုၢ်နံၤမုၢ်နၤဒဲးလီၤ. 4ဒီးနမ့ၢ်လဲၤတၢ်လၢယမဲာ်ညါ,ဒ်နပၢ်စီၤဒၤဝံးလဲၤတၢ်အသိးလၢနသးဒီဖျၢၣ်,ဒီးလၢတၢ်တီတၢ်လိၤအပူၤဒ်သိးနကမၤကယဲၢ်တၢ်လၢယမၤလိာ်နၤ,ဒီးတိၢ်န့ၢ်ယတၢ်သိၣ်တၢ်သီ,ဒီးယတၢ်စံၣ်ညီၣ်တဖၣ်န့ၣ်ဒီး, 5ယကဒုးအိၣ်ဂၢၢ်ဆိးကျၢၤနဘီနမုၢ်အလီၢ်ပစိာ်လၢအံၣ်စရ့လးအဖီခိၣ်လီၤထူလီၤယိာ်,ဒ်ယကတိၤတၢ်ဒီးနပၢ်စီၤဒၤဝံးအသိးန့ၣ်ဒီးယစံး,ပှၤလၢအဘၣ်ဃးဒီးနၤလၢအံၣ်စရ့လးအလီၢ်ပစိာ်အဖီခိၣ်တလီၤတုာ်ဘၣ်ဝဲဘၣ်. 6မ့မ့ၢ်သုမ့ၢ်ဂ့ၤ,သုဖိသုလံၤမ့ၢ်ဂ့ၤ,မ့ၢ်ဃၣ်ကွံာ်လၢတၢ်ပိာ်ယခံသပှၢ်တၢၢ်,ဒီးတတိၢ်န့ၢ်ဘၣ်ယတၢ်သိၣ်တၢ်သီ,ဒီးယတၢ်မၤလိာ်လၢယပာ်လီၤလၢသုမဲာ်ညါဘၣ်,ဒီးလဲၤမၤကစၢ်အဂၤတဖၣ်အတၢ်,ဒီးဘါထီၣ်အီၤဒီး, 7ယကဒီၣ်တဲာ်အံၣ်စရ့လးဒီးအကီၢ်လၢယဟ့ၣ်လီၤအီၤ,ဒီးဟံၣ်လၢယမၤစီဆှံအီၤလၢယမံၤအဂီၢ်တဖျၢၣ်အံၤ,ယကညိကွံာ်လၢယမဲာ်ညါ,ဒီးအံၣ်စရ့လးကကဲထီၣ်တၢ်ကတိၤဒိအလီၢ်,ဒီးတၢ်ဒုၣ်ဒွဲၣ်အလီၢ်လၢပှၤကိးကလုာ်ဒဲးအမဲာ်ညါလီၤ. 8ဒီးဟံၣ်ထီအံၤကယဲၢ်ပှၤလၢအလဲၤပူၤကွံာ်အီၤကပာ်အသးကမၢကမၣ်,ဒီးၡံ,ဒီးကစံး,ယွၤမၤတၢ်ဒ်အံၤသိးလၢကီၢ်အံၤ,ဒီးဟံၣ်အံၤမ့ၢ်အဘၣ်မနုၤလဲၣ်. 9ဒီးပှၤကစံးဆၢဝဲ,မ့ၢ်အလဲၤသဒၣ်ယွၤအကစၢ်လၢအဟဲစိာ်အပၢ်လၢကီၢ်အဲၤကူပတူးအပူၤ,ဒီးဟံးန့ၢ်အကစၢ်အဂၤ,ဒီးဘါထီၣ်အီၤ,ဒီးမၤအတၢ်လီၤ.မ်ဒ်န့ၣ်ဒီးယွၤဒုးဟဲဘၣ်အီၤလၢကယဲၢ်တၢ်အၢအံၤလီၤ. 10ဒီးလၢအနံၣ်ခံဆံအကတၢၢ်န့ၣ်တုၤစီၤၡလိၤမိၤမၤတ့ၢ်ယွၤအဟံၣ်,ဒီးစီၤပၤအဟံၣ်ဒၣ်ဝဲခံဖျၢၣ်ဒီး, 11စိၢ်အစီၤပၤစီၤဃံရၣ်ဟ့ၣ်လီၤစီၤၡလိၤမိၤလၢသ့ၣ်ဆှိအ့ရ့း,ဒီးသ့ၣ်ဆှိ,ဒီးထူဧိၤလွဲဧိၤဒ်ကယဲၢ်တၢ်ဘၣ်အသးအသိးန့ၣ်လီၤ.တၢ်မၤအသးလၢစီၤပၤၡလိၤမိၤဟ့ၣ်လီၤစီၤဃံရၣ်လၢဝ့ၢ်ခံဆံလၢကီၢ်ကၤလံၤလါအပူၤလီၤ. 12ဒီးစီၤဃံရၣ်ဟဲဝဲလၢစိၢ်အပူၤဒ်သိးအကကွၢ်ဝ့ၢ်တဖၣ်လၢစီၤၡလိၤမိၤဟ့ၣ်လီၤအီၤ,ဒီးတဘၣ်ဘၣ်အသးဘၣ်. 13ဒီးစံးဝဲဒၣ်,ဝ့ၢ်တဖၣ်အံၤနဟ့ၣ်လီၤယၤမ့ၢ်ဝ့ၢ်မနုၤလဲၣ်,ယဒီပုၢ်ဝဲၢ်ဧၢ.ဒီးယုၢ်ဝဲအမံၤလၢကၤဘူလးတုၤမုၢ်မဆါတနံၤအံၤလီၤ. 14ဒီးစီၤဃံရၣ်ဟ့ၣ်ယုၢ်စီၤပၤလၢထူအကံကၢ်ဃုဆံလီၤ. 15ဒီးစီၤၡလိၤမိၤမၢပှၤဟ့ၣ်သွဲအဂ့ၢ်ဒ်အံၤ,ဒ်သိးအကမၤယွၤအဟံၣ်,ဒီးအဟံၣ်ဒၣ်ဝဲ,ဒီးမံးလိၤ,ဒီးယရူၤၡလ့ၣ်အခိၣ်ဒူ,ဒီးဃါစိၢ်,ဒီးမကံးဒိၤ,ဒီးက့စ့ၢ်လီၤ. 16အဲၤကူပတူးအစီၤပၤဖၤရိၤလဲၤတၢ်,ဒီးမၤန့ၢ်က့စ့ၢ်,ဒီးဆူးထီၣ်ကွံာ်ဝဲလၢမ့ၣ်အူ,ဒီးမၤသံပှၤကနၤဧၣ်ဖိလၢအအိၣ်ဝဲဆိးဝဲလၢဝ့ၢ်ပူၤ,ဒီးဟ့ၣ်လီၤဝဲလၢတၢ်ဟ့ၣ်လၢအဖိမုၣ်စီၤၡလိၤမိၤအမါလီၤ. 17ဒီးစီၤၡလိၤမိၤတ့က့စ့ၢ်,ဒီးဘ့ၤသဃိရိၣ်လၢအဖီလာ်တဖျၢၣ်, 18ဒီးဘဧၤလး,ဒီးတးဒမိၢ်လၢပှၢ်မုၢ်ကနၢလၢကီၢ်ပူၤန့ၣ်လီၤ. 19ဒီးကယဲၢ်ဝ့ၢ်ပာ်ဖှိၣ်တၢ်လၢအအိၣ်ဒီးစီၤၡလိၤမိၤ,ဒီးဝ့ၢ်တဖၣ်လၢအလ့ၣ်ကဟၣ်အဂီၢ်,ဒီးတၢ်လၢစီၤၡလိၤမိၤဆၢမၤဝဲလၢယရူၤၡလ့ၣ်အပူၤ,ဒီးလၢလဘၤနိၣ်အလိၤ,ဒီးလၢအကီၢ်ပူၤဒီဘ့ၣ်ညါလၢအပၢဝဲန့ၣ်လီၤ. 20ကယဲၢ်ပှၤလၢအအိၣ်လီၤတဲာ်လၢပှၤအမိၢ်ဖိ,ပှၤဃ့ၤသးဖိ,ပှၤပရးစၤဖိ,ပှၤဃံၤဝံဖိ,ဒီးပှၤယဘူၣ်ဖိ,လၢအတဘၣ်ဃးဘၣ်ဒီးပှၤအံၣ်စရ့လးဖိဘၣ်န့ၣ်, 21အဖိအလံၤလၢအအိၣ်လီၤတဲာ်ဝဲလၢကီၢ်ပူၤလၢပှၤအံၣ်စရ့လးဖိမၤဟးဂီၤအီၤလၢာ်တသ့ဘၣ်န့ၣ်စီၤၡလိၤမိၤမၢအမၤတၢ်လၢဟ့ၣ်သွဲအလီၢ်တုၤမုၢ်မဆါတနံၤအံၤလီၤ. 22ဒီးပှၤအံၣ်စရ့လးဖိန့ၣ်စီၤၡလိၤမိၤတမၢအကဲကုၢ်ဘၣ်.မ့မ့ၢ်အဝဲသ့ၣ်တဖၣ်န့ၣ်မ့ၢ်ပှၤသုးဖိတဖၣ်,ဒီးအခ့အပှၤတဖၣ်,ဒီးအပဒိၣ်တဖၣ်,ဒီးအပှၤသုးဖိအခိၣ်တဖၣ်,ဒီးအလ့ၣ်ကဟၣ်အခိၣ်တဖၣ်,ဒီးအပှၤကသ့ၣ်သုးတဖၣ်လီၤ. 23ပဒိၣ်ဖးဒိၣ်လၢအအိၣ်ဝဲလၢစီၤၡလိၤမိၤအတၢ်မၤအဖီခိၣ်န့ၣ်မ့ၢ်ပှၤယဲၢ်ကယၤယဲၢ်ဆံလၢအပၢပှၤလၢအမၤတၢ်လီၤ. 24မ့မ့ၢ်ဖၤရိၤအဖိမုၣ်ဟဲထီၣ်လၢစီၤဒၤဝံးအဝ့ၢ်ပူၤဆူအဟံၣ်လၢအမၤဝဲလၢအဂီၢ်လီၤ.တုၤနုၤတစုတ့ဝဲလၢမံးလိၤလီၤ. 25ဒီးစီၤၡလိၤမိၤလုၢ်တၢ်လုၢ်မ့ၣ်အူ,ဒီးတၢ်လုၢ်မၤဃူမၤဖိးလၢတၢ်လုၢ်လီၢ်အဖီခိၣ်လၢအမၤဝဲလၢယွၤအဂီၢ်တနံၣ်သၢဘျီ,ဒီးဆိၣ်ကဲၤတၢ်နၢမူလၢတၢ်လုၢ်လီၢ်အဖီခိၣ်လၢအအိၣ်ဝဲလၢယွၤအမဲာ်ညါလီၤ.ဒီးမၤဟံၣ်ဝံၤဝဲလီၤ. 26ဒီးစီၤၡလိၤမိၤမၤကဘီတဘ့ၣ်လၢဧ့းစယိၣ်က့ဘ့ၢ်အပူၤလၢအအိၣ်ဝဲဖဲအ့လိးလၢပီၣ်လဲၣ်အနံၤလၢကီၢ်အဒိၣ်အပူၤလီၤ. 27ဒီးစီၤဃံရၣ်မၢလီၤအခ့အပှၤ,ပှၤကဘီဖိလၢအသ့ၣ်ညါပီၣ်လဲၣ်တဖၣ်အိၣ်လၢကဘီပူၤအိၣ်ဒီးစီၤၡလိၤမိၤအခ့အပှၤလီၤ. 28ဒီးဟဲဝဲဆူအိဖ့ၢ်,ဒီးဟဲစိာ်ဖဲန့ၣ်ထူအကံကၢ်တကယၤခံဆံ,ဒီးဟဲစိာ်ဝဲဆူစီၤပၤၡလိၤမိၤအအိၣ်လီၤ.
Copyright information for
KswSKMB