1 Kings 14
1အကတီၢ်ဖဲန့ၣ်ဒီး,စီၤယၤရၤဘၣ်အဖိခွါစီၤအဘံယၤဆါထီၣ်ဝဲလီၤ. 2ဒီးစီၤယၤရၤဘၣ်စံးဘၣ်အမါ,ဂဲၤဆၢထၢၣ်လၢ်တက့ၢ်.ဒီးမၤလီၤဆီနသးဒ်သိးပှၤသုတသ့ၣ်ညါလၢနမ့ၢ်စီၤယၤရၤဘၣ်အမါတဂ့ၤ.ဒီးလဲၤဆူၡံလိၤတက့ၢ်.ကွၢ်ကွၢ်,ဝံအဃံယၤလၢအစံးဘၣ်ယၤလၢယကကဲထီၣ်စီၤပၤလၢပှၤဂီၢ်မုၢ်အံၤအဖီခိၣ်န့ၣ်အိၣ်ဖဲန့ၣ်လီၤ. 3ဒီးဟံးန့ၢ်ကိၣ်ဆံဆဲၣ်လိၣ်,ဒီးကိၣ်ဘ့ၣ်ဘၣ်တဖၣ်ဒီးကနဲစီတပလီလၢနစုပူၤ,ဒီးလဲၤဆူအအိၣ်,ဒီးဖိသၣ်ကမၤသးဒ်လဲၣ်ဒ်လဲၣ်န့ၣ်ကစံးဘၣ်နၤလီၤ. 4ဒီးစီၤယၤရၤဘၣ်အမါမၤဝဲဒ်န့ၣ်,ဒီးဂဲၤဆၢထၢၣ်,ဒီးလဲၤဝဲဆူၡံလိၤ,ဒီးဟဲဆူစီၤအဃံယၤအဟံၣ်လီၤ.ဒီးစီၤအဃံယၤထံၣ်တၢ်တသ့ဘၣ်.အဂ့ၢ်ဒ်အံၤ,အမဲာ်ယုာ်လၢအသးပှၢ်အဃိလီၤ. 5ဒီးယွၤစံးဘၣ်စီၤအဃံယၤ,ကွၢ်ကွၢ်,စီၤယၤရၤဘၣ်အမါဟဲဃ့တၢ်လၢနၤလၢအဖိအဂီၢ်လီၤ.အဂ့ၢ်ဒ်အံၤ,ဘၣ်တၢ်ဆါလီၤ.ဒီးနဘၣ်စံးဘၣ်အီၤဒ်အံၤ,အဂ့ၢ်ဒ်အံၤ,တၢ်ကမၤအသးတုၤအဟဲနုာ်ဒီး,ကလီၤပျိာ်အသးလၢပိာ်မုၣ်အဂၤတဂၤလီၤ. 6ဒီးတုၤစီၤအဃံယၤနၢ်ဟူအခီၣ်အသီၣ်ဖဲအဟဲနုာ်လၢလၢတြဲၤအပူၤဒီး,တၢ်မၤအသးလၢအစံးဝဲဒၣ်,စီၤယၤရၤဘၣ်အမါဧၢ,ဟဲနုာ်တက့ၢ်.နမၤလီၤပျိာ်နသးလၢပှၤဂၤမ့ၢ်အဘၣ်မနုၤလဲၣ်.တၢ်မၢလီၤယၤဆူနအိၣ်ဒီးတၢ်အဃၢလီၤ. 7လဲၤစံးဘၣ်စီၤယၤရၤဘၣ်,ယွၤအံၣ်စရ့လးအကစၢ်စံးဝဲဒ်အံၤ,မ့ၢ်ယပာ်ထီၣ်ထီနၤလၢပှၤဂီၢ်မုၢ်အကျါ,ဒီးပာ်နၤလၢယပှၤဂီၢ်မုၢ်အံၣ်စရ့လးအဖီခိၣ်, 8ဒီးထုးန့ၢ်ဘီမုၢ်လၢစီၤဒၤဝံးအပှၤဟံၣ်ဖိ,ဒီးဟ့ၣ်လီၤလၢနၤ,ဒီးနတဒ်ဘၣ်ယခ့ယပှၤစီၤဒၤဝံးလၢအတိၢ်န့ၢ်ယတၢ်သိၣ်တၢ်သီ,ဒီးလူၤယၤလၢအသးဒီဖျၢၣ်ညါအသိး,ဒ်သိးအကမၤထဲတၢ်အလိၤလၢယမဲာ်ဘၣ်, 9ဒီးနမၤတၢ်အၢနးန့ၢ်ကယဲၢ်ပှၤလၢအအိၣ်ဝဲလၢနမဲာ်ညါ,ဒီးနလဲၤတၢ်,ဒီးတ့ကစၢ်အဂၤတဖၣ်,ဒီးတၢ်ဂီၤသိအသး,ဒီးမၤသးထီၣ်ယၤ,ဒီးကွံာ်တ့ၢ်ကွံာ်ယၤလၢနချၢဃံန့ၣ်လီၤ. 10မၤသးဒ်န့ၣ်ဒီး,ကွၢ်ကွၢ်,ယကဒုးဟဲဘၣ်တၢ်အၢလၢစီၤယၤရၤဘၣ်အပှၤဟံၣ်ဖိ,ဒီးလၢစီၤယၤရၤဘၣ်န့ၣ်ယကဒီၣ်တဲာ်ကွံာ်ကယဲၢ်ပိာ်ခွါ,ပှၤလၢအဘၣ်ကးတံာ်ဃာ်အခံ,ဒီးအိၣ်လီၤတဲာ်သဘျ့လၢအံၣ်စရ့လးအပူၤ,ဒီးယကဟံးထီၣ်ကွံာ်စီၤယၤရၤဘၣ်အတၢ်အိၣ်လီၤတဲာ်,ဒ်ပှၤဟံးထီၣ်ကွံာ်တၢ်အ့ၣ်တၢ်ဆံၣ်တုၤအလၢာ်အသိးန့ၣ်လီၤ. 11ဒီးပှၤဘၣ်ဃးဒီးစီၤယၤရၤဘၣ်လၢအသံဝဲလၢဝ့ၢ်ပူၤန့ၣ်ထွံၣ်ကအီၣ်ကွံာ်အီၤ,ဒီးပှၤလၢအသံဝဲလၢပှၢ်လၢ်ကျါန့ၣ်,ထိၣ်ဧိၤလံၣ်ဧိၤလၢတၢ်ဖးဖီကအီၣ်ကွံာ်အီၤလီၤ.အဂ့ၢ်ဒ်အံၤ,ယွၤကတိၤတ့ၢ်ဝဲလီၤ. 12ဒီးဂဲၤဆၢထၢၣ်နဲ,ဒီးက့ၤဆူနဟံၣ်ဒၣ်နဲတက့ၢ်.တုၤနခီၣ်နုာ်ဘၣ်လၢဝ့ၢ်ပူၤဒီး,ဖိသၣ်ကသံဝဲလီၤ. 13ဒီးအံၣ်စရ့လးကဒဲလီၤအသးနါပှၢ်,ဒီးခူၣ်လီၤကွံာ်အီၤလီၤ.အဂ့ၢ်ဒ်အံၤ,လၢပှၤဘၣ်ဃးဒီးစီၤယၤရၤဘၣ်အကျါန့ၣ်ထဲအဝဲဒၣ်ကဟဲဆူသွၣ်ခိၣ်ပူၤဧိၤလီၤ.အဂ့ၢ်ဒ်အံၤ,တၢ်ထံၣ်န့ၢ်တၢ်ဂ့ၤလၢယွၤအဂီၢ်လၢအဝဲဒၣ်အပူၤလၢယၤရၤဘၣ်အပှၤဟံၣ်ဖိအကျါလီၤ. 14ဒီးယွၤကဒုးဂဲၤဆၢထၢၣ်စီၤပၤလၢအံၣ်စရ့လးအဖီခိၣ်လၢအဂီၢ်လၢအကဒီၣ်တဲာ်ကွံာ်ယၤရၤဘၣ်အပှၤဟံၣ်ဖိလၢမုၢ်တနံၤန့ၣ်,ဒီးမနုၤလဲၣ်,ခဲကနံၣ်အံၤဒၣ်လဲာ်လီၤ. 15ဒီးယွၤကကျီကွံာ်အံၣ်စရ့လးဒ်တပိၢ်ဟူးဝးဝဲလၢထံကျါအသိးန့ၣ်,ဒီကထဲးကွံာ်အံၣ်စရ့လးလၢကီၢ်ဂ့ၤတဘ့ၣ်အံၤအပူၤလၢအဟ့ၣ်လီၤအပၢ်တဖၣ်,ဒီးကမၤလီၤပြံလီၤပြါအီၤလၢထံမိၢ်ပှၢ်အဝၢ်ဘးခီလီၤ.အဂ့ၢ်ဒ်အံၤ,တ့န့ၢ်အရှ့ရၤလၢအဂီၢ်,ဒီးမၤသးထီၣ်ယွၤလီၤ. 16ဒီးကဟ့ၣ်လီၤကွံာ်အံၣ်စရ့လးလၢစီၤယၤရၤဘၣ်အတၢ်ဒဲးဘးအဃိ,လၢအမၤတၢ်ဒဲးဘး,ဒီးဒုးမၤအံၣ်စရ့လးလၢတၢ်ဒဲးဘးလီၤ. 17ဒီးစီၤယၤရၤဘၣ်အမါဂဲၤဆၢထၢၣ်,ဒီးဟးထီၣ်ကွံာ်,ဒီးဟဲဆူတံးရစၢ်လီၤ.ဖဲအတုၤလၢကျဲစၢၤအကျိၤထံးဒီးဖိသၣ်သံဝဲလီၤ. 18ဒီးခူၣ်လီၤကွံာ်အီၤ,ဒီးအံၣ်စရ့လးခဲလၢာ်ဒဲလီၤအသးနါပှၢ်,ဒီးဟီၣ်ဝဲလၢအဃိ,ဒ်ယွၤအကလုၢ်လၢအကတိၤတၢ်လၢအခ့အပှၤဝံအဃံယၤအစုပူၤအသိးန့ၣ်လီၤ. 19ဒီးတၢ်အိၣ်လီၤတဲာ်ဘၣ်ဃးဒီးစီၤယၤရၤဘၣ်လၢအဒုးသုးအဂ့ၢ်အကျိၤ,လၢအမၤစီၤပၤအတၢ်အဂ့ၢ်အကျိၤန့ၣ်,ကွၢ်ကွၢ်,ကွဲးအသးလၢအံၣ်စရ့လးအစီၤပၤအလံာ်ကွဲးနီၣ်တၢ်အပူၤန့ၣ်လီၤ. 20ဒီးမုၢ်နံၤတဖၣ်လၢစီၤယၤရၤဘၣ်ကဲစီၤပၤန့ၣ်မ့ၢ်ခံဆံခံနံၣ်,ဒီးမံဝဲဒီးအပၢ်တဖၣ်,ဒီးအဖိခွါစီၤနၤဒးကဲထီၣ်စီၤပၤလၢအလီၢ်လီၤ. 21ဒီးစီၤၡလိၤမိၤအဖိခွါစီၤရဃၤဘၣ်ကဲစီၤပၤလၢယူဒၤအပူၤလီၤ.လၢစီၤရဃၤဘၣ်ကဲသီစီၤပၤန့ၣ်အသးပှၢ်လွံၢ်ဆံတနံၣ်,ဒီးကဲစီၤပၤတဆံနွံနံၣ်လၢယရူၤၡလ့ၣ်အပူၤ,ဝ့ၢ်လၢယွၤဃုထၢလၢအံၣ်စရ့လးအဒူၣ်ခဲလၢာ်အကျါဒ်သိးအကပာ်အမံၤဖဲန့ၣ်လီၤ.ဒီးအမိၢ်အမံၤန့ၣ်မ့ၢ်နီၢ်နၤဧမၤ,ပှၤဧၣ်မိၣ်မုၣ်လီၤ. 22ဒီးပှၤယူဒၤဖိမၤတၢ်အၢလၢယွၤအမဲာ်ညါ,ဒီးထိၣ်ဂဲၤယွၤအသးက့ၣ်လၢအတၢ်ဒဲးဘးလၢအမၤဝဲလၢအပၢ်တဖၣ်မၤတ့ၢ်ခဲလၢာ်အဖီခိၣ်န့ၣ်လီၤ. 23အဝဲသ့ၣ်တဖၣ်န့ၣ်မၤစ့ၢ်ကီးဝဲလၢအလီၢ်ထီၣ်ထီတဖၣ်,ဒီးတၢ်ဂီၤ,ဒီးအရှ့ရၤလၢတၢ်စိခိၣ်ထီခဲလၢာ်အလိၤ,ဒီးလၢသ့ၣ်သံကစဲာ်ခဲလၢာ်အဖီလာ်လီၤ. 24ဒီးပှၤအဲၣ်ပကၢၤဖိအိၣ်စ့ၢ်ကီၤဝဲလၢထံဧိၤကီၢ်ဧိၤအပူၤ,ဒီးမၤဝဲဒ်ကယဲၢ်တၢ်သးဘၣ်အၢတဖၣ်ဘၣ်ဃးဒီးပှၤကလုာ်တဖၣ်လၢယွၤဟီထီၣ်ကွံာ်အီၤလၢပှၤအံၣ်စရ့လးဖိအမဲာ်ညါအသိးန့ၣ်လီၤ. 25ဒီးတၢ်မၤအသးလၢစီၤပၤရဃၤဘၣ်အနံၣ်ပှဲၤထီၣ်ယဲၢ်နံၣ်တနံၣ်န့ၣ်အဲၤကူပတူးအစီၤပၤၡံၡးဟဲထီဒါယရူၤၡလ့ၣ်လီၤ. 26ဒီးဟံးထီၣ်ကွံာ်ယွၤအဟံၣ်အတၢ်လုၢ်ဒိၣ်ပှ့ၤဒိၣ်,ဒီးစီၤပၤအဟံၣ်အတၢ်လုၢ်ဒိၣ်ပှ့ၤဒိၣ်,ဒီးစိာ်ထီၣ်ကွံာ်ဝဲခဲလၢာ်,ဒီးစိာ်ထီၣ်ကွံာ်ကယဲၢ်ကတီၤထူလၢစီၤၡလိၤမိၤမၤဝဲခဲလၢာ်လီၤ. 27ဒီးစီၤပၤရဃၤဘၣ်တ့ကတီၤတိၢ်လၢအလီၢ်,ဒီးဟ့ၣ်လီၤအီၤလၢပှၤပၢၤတၢ်ဖိအခိၣ်အစုပူၤ,လၢအပၢၤစီၤပၤအဟံၣ်အတြဲၤလီၤ. 28ဒီးတုၤစီၤပၤလဲၤနုာ်လၢယွၤအဟံၣ်ပူၤဒီး,တၢ်မၤအသးလၢပှၤပၢၤတၢ်ဖိစိာ်ဝဲဒီးအီၤ,ဒီးဟဲက့ၤစိာ်အီၤဆူပှၤပၢၤတၢ်ဖိအဒၢးပူၤလီၤ. 29ဒီးတၢ်အိၣ်လီၤတဲာ်ဘၣ်ဃးဒီးစီၤရယၤဘၣ်,ဒီးကယဲၢ်တၢ်လၢအမၤဝဲန့ၣ်ကွဲးအသးလၢယူဒၤအစီၤပၤအလံာ်ကွဲးနီၣ်တၢ်အပူၤ,တမ့ၢ်ဘၣ်ဧါ. 30ဒီးတၢ်ဒုးသုးအိၣ်ဝဲလၢစီၤရဃၤဘၣ်,ဒီးစီၤယၤရၤဘၣ်အဘၢၣ်စၢၤတစိၤဒၣ်အီၤလီၤ. 31ဒီးစီၤရဃၤဘၣ်မံဝဲဒီးအပၢ်တဖၣ်ဒီးပှၤခူၣ်လီၤကွံာ်အီၤဒီးအပၢ်တဖၣ်လၢစီၤဒၤဝံးအဝ့ၢ်ပူၤလီၤ.အမိၢ်အမံၤမ့ၢ်နီၢ်နၤဧမၤပှၤဧၣ်မိၣ်ဖိ,ဒီးအဖိခွါစီၤအဘံယၣ်ကဲထီၣ်စီၤပၤလၢအလီၢ်န့ၣ်လီၤ.
Copyright information for
KswSKMB