1 Kings 19
1ဒီးစီၤအၤဃာ်စံးဘၣ်နီၢ်အံၤစ့ဘ့ၤလးလၢကယဲၢ်တၢ်လၢစီၤအ့ၤလံယၤမၤဝဲ,ဒီးကယဲၢ်တၢ်ဘၣ်ဃးဒီးအမၤသံဝံခဲလၢာ်လၢနးလီၤ. 2ဒီးနီၢ်အံၤစ့ဘ့ၤလးမၢကလူးတဂၤဆူစီၤအ့ၤလံယၤအအိၣ်,ဒီးစံးဝဲဒၣ်,တုၤခဲဂီၤဆၢအလီၢ်ခဲအံၤ,ယမ့ၢ်တပာ်ဘၣ်နသးဒ်ပှၤတဂၤလၢအကျါအသိးန့ၣ်ဘၣ်ဒီး,မ်ကစၢ်တဖၣ်မၤယၤဒ်န့ၣ်သိး,ဒီးနးန့ၢ်အန့ၣ်တက့ၢ်. 3ဒီးအဝဲဒၣ်ထံၣ်ဘၣ်ဝဲ,ဒီးလဲၤတၢ်လၢအသးသမူအဂီၢ်,ဒီးဟဲဆူဘ့ၢ်ၡဘၤလၢအဘၣ်ဃးဒီးယူဒၤ,ဒီးပာ်လီၤတဲာ်အခ့အပှၤဖဲန့ၣ်လီၤ. 4ဒီးလဲၤဝဲအကစၢ်ဒၣ်ဝဲတနံၤကျဲလၢပှၢ်မုၢ်ကနၢ,ဒီးဟဲဆ့ၣ်နီၤလၢပထိးသ့ၣ်ရီသ့ၣ်အဖီလာ်,ဒီးဃ့ဝဲလၢအသးဒ်သိးအကသံလီၤ.ဒီးစံးဝဲဒၣ်,အါလံ.ခဲကနံၣ်အံၤ,ယွၤဧၢ,ဟံးထီၣ်ယသးတက့ၢ်.အဂ့ၢ်ဒ်အံၤ,ယတဂ့ၤန့ၢ်ဘၣ်ယပၢ်တဖၣ်ဘၣ်. 5ဒီးမံလီၤ,ဒီးမံသပ့ၤလၢသ့ၣ်ပထိးသ့ၣ်ရီသ့ၣ်အဖီလာ်,ဒီးကွၢ်ကွၢ်,ကလူးတဂၤထိးဘၣ်အီၤဒီးစံးဘၣ်အီၤ,ဂဲၤဆၢထၢၣ်အီၣ်တၢ်တက့ၢ်. 6ဒီးကွၢ်ဝဲ,ဒီးကွၢ်ကွၢ်,ကိၣ်ဘ့ၣ်ဘၣ်တဘ့ၣ်ကုၢ်အသးလၢလၢၢ်ကိၢ်အဖီခိၣ်,ဒီးထံတပလီအိၣ်ဝဲလၢအခိၣ်အဃၢၤလီၤ.ဒီးအီၣ်တၢ်,ဒီးအီတၢ်,ဒီးမံလီၤကဒီးလီၤ. 7ဒီးယွၤအကလူးဟဲက့ၤခံဘျီတဘျီ,ဒီးထိးဘၣ်အီၤ,ဒီးစံးဝဲဒၣ်,ဂဲၤဆၢထၢၣ်အီၣ်တၢ်တက့ၢ်.အဂ့ၢ်ဒ်အံၤ,ကျဲဧိၤကပူၤဧိၤယံၤကဲၣ်ဆိးလၢနဂီၢ်လီၤ. 8ဒီးဂဲၤဆၢထၢၣ်,ဒီးအီၣ်တၢ်ဒီးအီတၢ်,ဒီးလဲၤဝဲလၢတၢ်အီၣ်န့ၣ်အဂံၢ်အဘါအနံၤလွံၢ်ဆံဒီးအနၤလွံၢ်ဆံပၢၢ်လၢကစၢ်အကစၢၢ်ဃိးရ့းန့ၣ်လီၤ. 9ဒီးဟဲဝဲဖဲန့ၣ်ဆူတၢ်အိပူၤ,ဒီးအိၣ်ဝဲဖဲန့ၣ်သီတနၤကျၢၤ,ဒီးကွၢ်ကွၢ်,ယွၤအကလုၢ်ဘၣ်အီၤ,ဒီးစံးဘၣ်အီၤ,တၢ်ဘၣ်ဃးဒီးနၤဖဲအံၤအိၣ်မနုၤလဲၣ်,စီၤအ့ၤလံယၤဧၢ. 10ဒီးစံးဝဲဒၣ်,ယသးဆူၣ်လၢယွၤတၢ်သုးမုၢ်အကစၢ်အဂီၢ်ဆူၣ်ဆူၣ်ကလဲာ်လီၤ.အဂ့ၢ်ဒ်အံၤ,ပှၤအံၣ်စရ့လးဖိလဲၤသဒၣ်နတၢ်အၢၣ်လီၤအီလီၤ,မၤလီၤပှီၢ်ကွံာ်နတၢ်လုၢ်လီၢ်,ဒီးမၤသံနဝံတဖၣ်လၢနး,ဒီးအိၣ်လီၤတဲာ်ထဲယၤတဂၤဧိၤလီၤ.ဒီးအဝဲသ့ၣ်တဖၣ်န့ၣ်ဃုယသးသမူဒ်သိးအကဟံးထီၣ်ကွံာ်အီၤလီၤ. 11ဒီးစံးဘၣ်အီၤ,ဟးထီၣ်ဒီးဆၢထၢၣ်လၢကစၢၢ်လိၤ,လၢယွၤအမဲာ်ညါတက့ၢ်.ဒီးကွၢ်ကွၢ်,ယွၤလဲၤပူၤကွံာ်,ဒီးကလံၤမုၢ်ဆူၣ်မၤသ့ၣ်ဖးကစၢၢ်တဖၣ်,ဒီးမၤလီၤကလဲလၢၢ်တဖၣ်လၢယွၤအမဲာ်ညါလီၤ.ယွၤတအိၣ်ဘၣ်လၢကလံၤန့ၣ်အပူၤဘၣ်.ဒီးလၢကလံၤအလီၢ်ခံန့ၣ်ဟီၣ်ခိၣ်ဟူးဝးဝဲလီၤ.ယွၤတအိၣ်ဘၣ်လၢဟီၣ်ခိၣ်ဟူးဝးန့ၣ်အပူၤဘၣ်. 12ဒီးလၢဟီၣ်ခိၣ်ဟူးဝးအလီၢ်ခံန့ၣ်မ့ၣ်အူကဲၤထီၣ်လီၤ.ယွၤတအိၣ်ဘၣ်လၢမ့ၣ်အူန့ၣ်အပူၤဘၣ်,ဒီးလၢမ့ၣ်အူအလီၢ်ခံန့ၣ်တၢ်အသီၣ်ဖိနဲဒီးကပုာ်လုးအိၣ်ထီၣ်လီၤ. 13ဒီးတုၤစီၤအ့ၤလံယၤနၢ်ဟူဒီး,တၢ်မၤအသးလၢအကးဘၢအမဲာ်လၢအယၣ်ပူၤ,ဒီးလဲၤထီၣ်,ဒီးဆၢထၢၣ်လၢတၢ်အိပူၤအခိၣ်ထိးလီၤ.ဒီးကွၢ်ကွၢ်,တၢ်သီၣ်အိၣ်ထီၣ်ဒီးအီၤ,ဒီးစံးဝဲဒၣ်,တၢ်ဘၣ်ဃးဒီးနၤဖဲအံၤအိၣ်မနုၤလဲၣ်,စီၤအ့ၤလံယၤဧၢ. 14ဒီးစံးဝဲဒၣ်,ယသးဆူၣ်လၢယွၤတၢ်သုးမုၢ်အကစၢ်အဂီၢ်ဆူၣ်ဆူၣ်ကလဲာ်လီၤ.အဂ့ၢ်ဒ်အံၤ,ပှၤအံၣ်စရ့လးဖိလဲၤသဒၣ်နတၢ်အၢၣ်လီၤအီလီၤ,မၤလီၤပှီၢ်ကွံာ်နတၢ်လုၢ်အလီၢ်,ဒီးမၤသံဝံတဖၣ်လၢနး,ဒီးအိၣ်လီၤတဲာ်ထဲယၤတဂၤဧိၤလီၤ.ဒီးအဝဲသ့ၣ်တဖၣ်န့ၣ်ဃုယသးသမူဒ်သိးအကဟံးထီၣ်ကွံာ်အီၤလီၤ. 15ဒီးယွၤစံးဘၣ်အီၤ,လဲၤတၢ်,က့ၤပိာ်နကျဲဆူဒၤမ့ၤစ့းအပှၢ်မုၢ်ကနၢ,ဒီးတုၤနဟဲတုၤဒီး,ဖှူစီၤဃစ့လးလၢစီၤပၤလၢစူၤရံအဖီခိၣ်တက့ၢ်. 16ဒီးစီၤနံၣ်ၡံၤအဖိခွါစီၤယ့ၤဟူန့ၣ်နဘၣ်ဖှူအီၤလၢစီၤပၤလၢအံၣ်စရ့လးအဖီခိၣ်,ဒီးစီၤၡၤဖးအဖိခွါစီၤအလံၤၡါဘၣ်ဃးဒီးအၤဘ့လးမဃိလၤတဂၤန့ၣ်နဘၣ်ဖှူအီၤလၢဝံလၢနလီၢ်လီၤ. 17ဒီးတၢ်ကမၤအသးလၢပှၤလၢအပူၤဖျဲးဒီးစီၤဃစ့လးအနးန့ၣ်စီၤယ့ၤဟူကမၤသံအီၤ,ဒီးပှၤလၢအပူၤဖျဲးဒီးစီၤယ့ၤဟူအနးန့ၣ်စီၤအလံၤၡါကမၤသံအီၤလီၤ. 18ဒီးယပာ်လီၤတဲာ်ပှၤနွံကထိလၢအံၣ်စရ့လးအကျါလီၤ.ကယဲၢ်အခီၣ်လ့ၢ်ခိၣ်ခဲလၢာ်တချံးလီၤဘၣ်အသးလၢဘဧၤလးအမဲာ်ညါ,ဒီးကယဲၢ်အထးခိၣ်ခဲလၢာ်တနၢမူဘၣ်အီၤဘၣ်လီၤ. 19ဒီးဟးထီၣ်ဖဲန့ၣ်,ဒီးထံၣ်န့ၢ်စီၤၡၤဖးအဖိခွါစီၤအလံၤၡါလၢအထဲၣ်တၢ်ဒီးတၢ်တဆံခံဆိလၢအမဲာ်ညါ,ဒီးအဝဲဒၣ်အိၣ်ဒီးအတၢ်တဆံခံဆိတဆိ,ဒီးစီၤအ့ၤလံယၤလဲၤပူၤကွံာ်အီၤ,ဒီးကွံာ်ဃီၤအယၣ်လၢအလိၤလီၤ. 20ဒီးအဝဲဒၣ်လဲၤသဒၣ်ဂီၤဖံးတဖၣ်,ဒီးဃ့ၢ်ပိာ်စီၤအ့ၤလံယၤအခံ,ဒီးစံးဝဲဒၣ်,ဒုးနၢမူယၤလၢယမိၢ်ယပၢ်တက့ၢ်.ဒီးယကပိာ်နခံလီၤ.ဒီးစံးဘၣ်အီၤ,က့ၤကဒါက့ၤတက့ၢ်.အဂ့ၢ်ဒ်အံၤ,ယမၤနၤလၢမနုၤလဲၣ်. 21ဒီးက့ၤကဒါက့ၤလၢအအိၣ်,ဒီးဟံးန့ၢ်ဂီၤဖံးတဆိ,ဒီးမၤသံအီၤ,ခီဖျိအညၣ်လၢဂီၤဖံးအဃၢၤအဃိၢ်,ဒီးဟ့ၣ်လီၤပှၤဂီၢ်မုၢ်,ဒီးအဝဲသ့ၣ်အီၣ်ဝဲ,ဒီးဂဲၤဆၢထၢၣ်,ဒီးလူၤပိာ်စီၤအ့ၤလံယၤအခံ,ဒီးမၤအခ့အပှၤအတၢ်လီၤ.
Copyright information for
KswSKMB