1Pe 1 | KswSKMB | STEP | ယ့ၣ်ရှူးခရံာ်အပှၤတၢ်မၢဖိ,ယၤစီၤပ့းတရူး,ယစံးဘၣ်ပှၤတမှံၤဘၣ်ဃးဒီးတၢ်လီၤပြံလီၤပြါလၢပီၣ်တူး,လၢကလၤတံ,လၢကးပၤဒကံ,လၢအၤစံ,ဒီးလၢဘံၤသူၤနံအပူၤန့ၣ်,

‏ 1 Peter 1

1 ယ့ၣ်ရှူးခရံာ်အပှၤတၢ်မၢဖိ,ယၤစီၤပ့းတရူး,ယစံးဘၣ်ပှၤတမှံၤဘၣ်ဃးဒီးတၢ်လီၤပြံလီၤပြါလၢပီၣ်တူး,လၢကလၤတံ,လၢကးပၤဒကံ,လၢအၤစံ,ဒီးလၢဘံၤသူၤနံအပူၤန့ၣ်, 2 ပှၤဘၣ်တၢ်ဃုထၢအီၤဒ်ပၢ်ယွၤအတၢ်သ့ၣ်ညါပာ်အသိး,လၢသးအတၢ်မၤစီဆှံအပူၤ,လၢအကစူၢ်တၢ်ဒီးဒိးဖှံအသးလၢယ့ၣ်ရှူးခရံာ်အသွံၣ်န့ၣ်,မ်တၢ်ဘျုးတၢ်ဖှိၣ်,ဒီးတၢ်ဃူတၢ်ဖိးအါထီၣ်ဒီးသုတက့ၢ်.

3 ယွၤ,ပကစၢ်ယ့ၣ်ရှူးခရံာ်အပၢ်,မ်အဘၣ်တၢ်ဆိၣ်ဂ့ၤတက့ၢ်.အဝဲဒၣ်,ဒ်အတၢ်သးကညီၤဒိၣ်အသိး,မၤလိၣ်ထီၣ်ကဒီးပှၤလၢတၢ်မုၢ်လၢ်အမူအပူၤ,လၢယ့ၣ်ရှူးခရံာ်အတၢ်ဂဲၤဆၢထၢၣ်လၢတၢ်သံအဃိ, 4 ဆူတၢ်န့ၢ်သါလၢအတဟးဂီၤဘၣ်,ဒီးတဘၣ်အၢဘၣ်,ဒီးတလီၤညွံးဘၣ်အပူၤ,လၢတၢ်ပာ်ဝဲလၢသုဂီၢ်လၢမူခိၣ်လီၤ. 5 သုဘၣ်တၢ်ပၢၤသုလၢယွၤအစိအကမီၤလၢတၢ်နာ်အဃိ,ပၢၢ်လၢတၢ်အုၣ်က့ၤခီၣ်က့ၤလၢအအိၣ်ကတဲာ်ကတီၤအသးလၢအကဘၣ်တၢ်လီၣ်ဖျါထီၣ်အီၤဖဲတၢ်ကတၢၢ်အဆၢအကတီၢ်လီၤ. 6 လၢအဝဲန့ၣ်အဃိသုသူၣ်ဖှံသးညီ,ဘၣ်ဆၣ်ခဲကနံၣ်အံၤအလီၢ်မ့ၢ်အိၣ်ဒီး,သုသူၣ်အုးသးအုးတစိၢ်လၢတၢ်လ့ပစီအါမံၤအဃိ, 7 ဒ်သိးသုတၢ်နာ်အတၢ်မၤကွၢ်အီၤ,လၢအမ့ၢ်တၢ်လုၢ်တၢ်ပှ့ၤဒိၣ်န့ၢ်ထူ,လၢအဘၣ်တၢ်မၤကွၢ်အီၤလၢမ့ၣ်အူနာ်သက့ဒီးဟးဂီၤဝဲန့ၣ်,ကအိၣ်ဖျါထီၣ်လၢတၢ်စံးထီၣ်ပတြၢၤ,ဒီးတၢ်ယူးတၢ်ယီၣ်,ဒီးတၢ်လၤကပီၤအဂီၢ်,ဖဲယ့ၣ်ရှူးခရံာ်အတၢ်အိၣ်ဖျါထီၣ်န့ၣ်လီၤ. 8 အဝဲဒၣ်န့ၣ်သုတထံၣ်ဘၣ်အီၤဘၣ်ဒီးသုအဲၣ်အီၤလီၤ.ခဲကနံၣ်အံၤသုတထံၣ်ဘၣ်နာ်သက့ဒီး,သုနာ်အီၤဒီး,သုသးခုဒီးတၢ်သးခုလၢပစံးတသ့ဘၣ်,ဒီးလၢပှဲၤဝဲဒီးတၢ်လၤကပီၤ,ဒီးသုဒိးန့ၢ်သုတၢ်နာ်အကတၢၢ်န့ၣ်, 9 တၢ်အုၣ်က့ၤခီၣ်က့ၤသုသးလီၤ.

10 လၢတၢ်အုၣ်က့ၤခီၣ်က့ၤန့ၣ်အဂ့ၢ်အကျိၤ,ဝံတဖၣ်ဃုကွၢ်,ဒီးသံကွၢ်လီၤတံၢ်လီၤဆဲး,ဖဲအကတိၤတၢ်လၢဝံအကျိာ်လၢတၢ်ဘျုးတၢ်ဖှိၣ်ဘၣ်ဃးဒီးသုန့ၣ်လီၤ. 11 ဒီးဖဲအအုၣ်ပာ်အသးလၢခရံာ်အတၢ်ဖှီၣ်တၢ်နးအဂ့ၢ်အကျိၤဒီးတၢ်လၤကပီၤလၢအဝဲန့ၣ်အလီၢ်ခံအဂ့ၢ်အကျိၤန့ၣ်ဒီးခရံာ်အသးအိၣ်လၢအပူၤ,ဒုးနဲၣ်တၢ်မနုၤလဲၣ်,ဒီးအကတီၢ်ဆံးယံာ်လဲၣ်န့ၣ်,အဝဲသ့ၣ်ကွၢ်ထံကွၢ်ဆးလီၤ. 12 ဒီးတၢ်လီၣ်ဖျါထီၣ်လၢအီၤလၢအမၤတၢ်န့ၣ်,တမ့ၢ်ဘၣ်လၢအဂီၢ်ဒၣ်ဝဲဘၣ်,မ့ၢ်လၢသုဂီၢ်လီၤ.ဒီးခဲကနံၣ်အံၤတၢ်န့ၣ်တဖၣ်ဘၣ်တၢ်စံၣ်တဲၤတဲလီၤသုလၢပှၤလၢအစံၣ်တဲၤတဲလီၤတၢ်သးခုအကစီၣ်,လၢသးစီဆှံလၢတၢ်မၢလီၤအီၤလၢမူခိၣ်လီၤ.ဒီးဆူအဝဲန့ၣ်အပူၤကလူးတဖၣ်တၢ်မိၣ်ကွၢ်ထံကွၢ်ဆးအသးလီၤ.

13 မၤသးဒ်န့ၣ်ဒီး,ကံၢ်တူာ်ထီၣ်သုသးအယီၢ်ဒ့,ဒီးကီၤသုသး,ဒီးမုၢ်လၢ်သပှၢ်ပှၢ်တၢ်ဘျုးတၢ်ဖှိၣ်လၢတၢ်ကဟဲစိာ်န့ၢ်သု,ဖဲယ့ၣ်ရှူးခရံာ်ကအိၣ်ဖျါထီၣ်န့ၣ်တက့ၢ်. 14 ဒ်ဖိသၣ်လၢအနၢ်လိၤအသိးန့ၣ်,ဒုးမၤက့ၤသုက့ၢ်သုဂီၤဒ်တၢ်သးကွံအခီၣ်ထံးလၢသုတသ့ၣ်ညါဘၣ်တၢ်ဘၣ်အပူၤအသိးန့ၣ်တဂ့ၤ. 15 မ့မ့ၢ်ဒ်ပှၤလၢအကိးန့ၢ်သု,မ့ၢ်အစီအဆှံအသိးန့ၣ်,ကဲထီၣ်သုဝဲစ့ၢ်ကီးလၢအစီအဆှံလၢသုမၤတၢ်ဖံးတၢ်ကိးအမံၤဒဲးအပူၤတက့ၢ်. 16 အဂ့ၢ်ဒ်အံၤ,တၢ်ကွဲးအသး,ကဲထီၣ်ပှၤစီဆှံတက့ၢ်.အဂ့ၢ်ဒ်အံၤ,ယမ့ၢ်ပှၤစီဆှံလီၤ. ^{▼▼1:16 ၃မိၤ.၁၁း၄၄}

17 ဒီးသုမ့ၢ်ကိးထီၣ်ပၢ်လၢအတကွၢ်မဲာ်ဘၣ်တၢ်ဘၣ်ဒီး,စံၣ်ညီၣ်ပှၤကိးဂၤဒဲးဒ်အမၤတၢ်အသိးန့ၣ်ဒီး,အကတီၢ်လၢသုအိၣ်သုဆိးဒံးန့ၣ်,မ်သုအိၣ်ဒီးတၢ်သူၣ်ပျံၤသးပျံၤတက့ၢ်. 18 အဂ့ၢ်ဒ်အံၤ,သုသ့ၣ်ညါလၢတၢ်တပှ့ၤက့ၤသုလၢတၢ်အုၣ်သံကျၣ်သံ,ဒ်စ့ဒီးထူအသိးလၢသုလုၢ်သုလၢ်လၢမိၢ်စိၤပၤစိၤအပူၤဘၣ်. 19 မ့မ့ၢ်တၢ်ပှ့ၤက့ၤသုလၢခရံာ်အသွံၣ်,လၢအလုၢ်ဒိၣ်ပှ့ၤဒိၣ်,ဒ်လၢသိဖိလၢအတၢ်သံၣ်သူမီၢ်ကျာ်,ဒီးအတၢ်မဲၣ်သူမဲၣ်ဂီၤတအိၣ်ဘၣ်အသိးလီၤ. 20 အဝဲဒၣ်ဘၣ်တၢ်သ့ၣ်ညါပာ်အီၤလၢဟီၣ်ခိၣ်အခီၣ်ထံးတချုးအိၣ်ဒံးဘၣ်,ဘၣ်ဆၣ်ဒီးလၢတၢ်ကတၢၢ်အဆၢအကတီၢ်အံၤ,အိၣ်ဖျါထီၣ်ဝဲလၢသုဂီၢ်လီၤ. 21 မ့ၢ်အဝဲဒၣ်သတးဒီး,သုနာ်ယွၤ,လၢအဒုးဂဲၤဆၢထၢၣ်က့ၤအီၤလၢတၢ်သံအပူၤ,ဒီးမၤလၤကပီၤအီၤလီၤ. 22 မ့ၢ်သုမၤစီဆှံသုသးလၢသုစူၢ်တၢ်မ့ၢ်တၢ်တီလၢသးအဃိပၢၢ်လၢတၢ်အဲၣ်ဒီပုၢ်ဝဲၢ်နီၢ်နီၢ်သတးဒီး,မ်သုအဲၣ်လိာ်ကွံလိာ်သုသးလၢသုသးကဆှီသပှၢ်တၢၢ်တက့ၢ်. 23 သုတအိၣ်ဖျဲၣ်ကဒီးဘၣ်လၢတၢ်အချံလၢအအုၣ်သံကျၣ်သံဘၣ်,မ့ၢ်လၢတၢ်တအုၣ်သံကျၣ်သံဘၣ်,လၢယွၤအကလုၢ်အကထါလၢအမူဝဲ,ဒီးအိၣ်ဝဲဆိးဝဲလီၤထူလီၤယိာ်လီၤ. 24 အဂ့ၢ်ဒ်အံၤ,

တၢ်ဖံးတၢ်ညၣ်ခဲလၢာ်န့ၣ်,မၤအသးဒ်နီၣ်ဧိၤမံၤဧိၤအသိး,
ဒီးအလၤကပီၤခဲလၢာ်ဒ်နီၣ်ဧိၤမံၤဧိၤအဖီအသိးလီၤ.
နီၣ်ဧိၤမံၤဧိၤဃ့ထီၣ်ကွံာ်ဝဲ,ဒီးအဖီလီၤပလ့ၤကွံာ်လီၤ.
25 မ့မ့ၢ်ယွၤအကလုၢ်အကထါန့ၣ်,အိၣ်ဝဲဆိးဝဲလီၤထူလီၤယိာ်လီၤ. ^{▼▼1:25 ၡါ.၄၀း၆-၈}

ဒီးအဝဲန့ၣ်မ့ၢ်အကလုၢ်အကထါလၢပှၤစံၣ်တဲၤတဲလီၤသုလၢတၢ်သးခုအကစီၣ်န့ၣ်လီၤ.