1Pe 3 | KswSKMB | STEP | ဒ်န့ၣ်အသိးပိာ်မုၣ်သ့ၣ်ဧၢ,ပာ်သုသးလၢသုဝၤဒၣ်သုဝဲအဖီလာ်,ဒ်သိးအဝဲသ့ၣ်တဂၤဂၤမ့ၢ်တစူၢ်ဘၣ်တၢ်အကလုၢ်အကထါဘၣ်ဒီး,တၢ်အကလုၢ်အကထါတအိၣ်ဘၣ်ဒီး,ကဘၣ်တၢ်မၤန့ၢ်အီၤလၢအမါအတကဲာ်ပဝးအဃိ,

‏ 1 Peter 3

1 ဒ်န့ၣ်အသိးပိာ်မုၣ်သ့ၣ်ဧၢ,ပာ်သုသးလၢသုဝၤဒၣ်သုဝဲအဖီလာ်,ဒ်သိးအဝဲသ့ၣ်တဂၤဂၤမ့ၢ်တစူၢ်ဘၣ်တၢ်အကလုၢ်အကထါဘၣ်ဒီး,တၢ်အကလုၢ်အကထါတအိၣ်ဘၣ်ဒီး,ကဘၣ်တၢ်မၤန့ၢ်အီၤလၢအမါအတကဲာ်ပဝးအဃိ, 2 ဖဲအထံၣ်သုတကဲာ်ပဝးအစီအဆှံအိၣ်ဒီးပျံၤတၢ်န့ၣ်တက့ၢ်. 3 ပိာ်မုၣ်တဖၣ်အကယၢကယဲန့ၣ်,မ်အသုတမ့ၢ်တၢ်အိၣ်လၢခိ,တၢ်သံၣ်ခိၣ်သူ,ဒီးတၢ်ဃၢၤထူဃၢၤလွဲ,ဒီးတၢ်သိးအကူအသိးန့ၣ်တဂ့ၤ. 4 မ်အမ့ၢ်တၢ်လၢအပှၤလၢညါဘၣ်ဃးဒီးပသး,တၢ်လၢအတအုၣ်သံကျၣ်သံဘၣ်,ဒီးအတၢ်သူၣ်စူၤသးစူၤ,ဒီးတၢ်သူၣ်ဘှီၣ်သးဘှီၣ်,လၢအမ့ၢ်တၢ်လုၢ်ဒိၣ်ပှ့ၤဒိၣ်လၢယွၤအမဲာ်ညါန့ၣ်တက့ၢ်. 5 အဂ့ၢ်ဒ်အံၤ,ပိာ်မုၣ်စီဆှံလၢထံးလၢပျၢၤ,လၢအမုၢ်လၢ်တၢ်လၢယွၤန့ၣ်,ကယၢကယဲအသး,လၢတၢ်ပာ်အသးလၢအဝၤဒၣ်ဝဲအဖီလာ်လီၤ. 6 ဒ်နီၢ်စၤရါဒိကနၣ်စီၤအၤဘြၤဟၣ်အကလုၢ်ဒီးကိးအီၤလၢကစၢ်အသိး,ဒီးသုမ့ၢ်မၤတၢ်ဂ့ၤ,ဒီးတပျံၤဘၣ်လၢတၢ်ပျံၤနီတမံၤဘၣ်ဒီး,သုကကဲလၢအဖိလီၤ.

7 ဒ်န့ၣ်အသိးပိာ်ခွါသ့ၣ်ဧၢ,ဒ်သိးသုတၢ်ဘါထုကဖၣ်သုတဘၣ်တၢ်တြီအီၤတဂ့ၤဒီး,အိၣ်ဒီးသုမါဒ်တၢ်သ့ၣ်ညါအသိး,ဒီးယူးယီၣ်ပိာ်မုၣ်န့ၣ်ဒ်တၢ်လၢအဂံၢ်အဘါစၢ်တက့ၢ်အသိး,ဒီးဒ်ပှၤဒိးန့ၢ်ဃုာ်တၢ်ဟ့ၣ်သါလၢတၢ်မူအဘျုးအဖှိၣ်အသိးန့ၣ်တက့ၢ်. 8 လၢခံကတၢၢ်န့ၣ်,မ်ပှၤခဲလၢာ်ကဲထီၣ်ပှၤသးတဖျၢၣ်ဃီ,ပှၤဒိးဃုာ်တၢ်,ပှၤအဲၣ်ဒီပုၢ်ဝဲၢ်,ပှၤသးကညီၤတၢ်,ပှၤဆီၣ်လီၤအသးန့ၣ်တက့ၢ်. 9 လၢတၢ်အၢအဃိန့ၣ်,ဟ့ၣ်ကၣ်တၢ်အၢတဂ့ၤ.လၢတၢ်ဒုၣ်ဒွဲၣ်အဃိန့ၣ်,ဟ့ၣ်ကၣ်တၢ်ဒုၣ်ဒွဲၣ်တဂ့ၤ,အခိၣ်တလိာ်တၢ်ဆိၣ်ဂ့ၤန့ၣ်တက့ၢ်.အဂ့ၢ်ဒ်အံၤ,သုဘၣ်တၢ်ကိးန့ၢ်သုလၢတၢ်အံၤအဂီၢ်,ဒ်သိးသုကန့ၢ်ဘၣ်သါတၢ်ဆိၣ်ဂ့ၤန့ၣ်လီၤ.

10 အဂ့ၢ်ဒ်အံၤ,ပှၤလၢအသးအဲၣ်တၢ်မူ,ဒီးဆၢထံၣ်အနံၤအသီလၢအဂ့ၤတဖၣ်န့ၣ်,မ်အတြီဃာ်အပျ့ၤလၢတၢ်အၢ,ဒီးအပျူၤလၢတၢ်ကတိၤလီတၢ်န့ၣ်တက့ၢ်.မ်အဟးဆှဲးတၢ်အၢ,ဒီးမၤတၢ်ဂ့ၤတက့ၢ်. 11 မ်အဃုတၢ်ဃူတၢ်ဖိး,ဒီးလူၤအီၤတက့ၢ်. 12 အဂ့ၢ်ဒ်အံၤ,ယွၤအမဲာ်အိၣ်လၢပှၤတီပှၤလိၤအလိၤ,ဒီးအနၢ်အိၣ်လၢပှၤလၢအဃ့ကညးတၢ်အဂီၢ်လီၤ.ဒီးယွၤအမဲာ်ထီဒါပှၤမၤတၢ်အၢန့ၣ်လီၤ. ^{▼▼3:12 စံး.၃၄း၁၂-၁၆} 13 ဒီးသုမ့မ့ၢ်ပှၤလၢအသးဆူၣ်လၢတၢ်ဂ့ၤအဂီၢ်ဒီး,မ့ၢ်မတၤကမၤအၢသုတဂၤလဲၣ်. 14 မ့မ့ၢ်သုမ့ၢ်ဘၣ်တၢ်ဖှီၣ်တၢ်နးလၢတၢ်တီတၢ်လိၤအဃိဒီး,သုဘၣ်ဆိၣ်ဂ့ၤလီၤ.ဒီးသုတပျံၤအဝဲသ့ၣ်အတၢ်မၤပျံၤန့ၣ်တဂ့ၤ,ဒီးသူၣ်ကိၢ်သးဂီၤတဂ့ၤ. 15 ဒီးပာ်စီဆှံကစၢ်ခရံာ်လၢသုသးကံၢ်ပူၤတက့ၢ်. ^{▼▼3:15 ၡါ.၈း၁၂}ဒီးကယဲၢ်ပှၤလၢအသံကွၢ်သုလၢတၢ်မုၢ်လၢ်အိၣ်လၢသုပူၤအဂ့ၢ်အကျိၤကိးဂၤဒဲးန့ၣ်,အိၣ်ကတီၤသုသးထီဘိလၢတၢ်စံးဆၢ,မ့မ့ၢ်လၢတၢ်သူၣ်စူၤသးစူၤဒီးတၢ်ပျံၤတၢ်ဖုးတက့ၢ်. 16 အိၣ်ဒီးသုသးလၢအသ့ၣ်ညါဒၣ်တၢ်အဂ့ၤ,ဒ်သိးတၢ်လၢအဝဲသ့ၣ်စံးအၢသု,ဒ်ပှၤမၤအၢတၢ်အသိး,ပှၤလၢအကတိၤတရီတပါသုမၤတၢ်အဂ့ၤလၢခရံာ်အပူၤအံၤ,ကမဲာ်ဆှးဝဲလီၤ. 17 အဂ့ၢ်ဒ်အံၤ,မ့ၢ်ဘၣ်ယွၤအသးဒီး,ပဘၣ်တၢ်နးတၢ်ဖှီၣ်လၢပမၤတၢ်ဂ့ၤအဃိ,ဂ့ၤန့ၢ်ပဘၣ်တၢ်လၢပမၤတၢ်အၢအဃိန့ၣ်တက့ၢ်လီၤ. 18 အဂ့ၢ်ဒ်အံၤ,ခရံာ်ဒိးတၢ်စ့ၢ်ကီးတဘျီလၢတၢ်ဒဲးဘးအဃိ,ပှၤတီပှၤလိၤလၢပှၤတတီတလိၤအဂီၢ်,ဒ်သိးအကဆှၢန့ၢ်ပှၤဆူယွၤအအိၣ်လီၤ.အဂ့ၢ်ဒ်အံၤ,ဒိးသံအသးလၢတၢ်ဖံးတၢ်ညၣ်အပူၤဘၣ်ဆၣ်ဒီး,ဒိးတၢ်မၤမူထီၣ်က့ၤအီၤလၢသးန့ၣ်လီၤ. 19 လၢအဝဲန့ၣ်စ့ၢ်ကီးလဲၤစံၣ်တဲၤတဲလီၤတၢ်လၢသးတဖၣ်အိၣ်ဝဲလၢဃိာ်ပူၤ, 20 ဖဲအဝဲသ့ၣ်တဖၣ်လၢထံးလၢပျၢၤတစူၢ်ဘၣ်တၢ်ဘၣ်,ဖဲယွၤအတၢ်ဝံသးစူၤဆူလၢ်ဟူတၢ်လၢစီၤနိအၤအစိၤ,လၢတၢ်တ့ကဘီအဖၢမုၢ်န့ၣ်လီၤ.လၢအပူၤန့ၣ်ပှၤစှၤဂၤ,ဒ်ပစံးတၢ်အသိး,ပှၤအသးဃိးဂၤ,တုၤလၢတၢ်အုၣ်က့ၤခီၣ်က့ၤအီၤလၢထံလီၤ. 21 လၢအဝဲန့ၣ်အဒိအတဲာ်တၢ်ဒိးဘျၢ ^{▼▼3:21 လၢဟ့းလ့ၣ်အကျိာ်"ဘးပတံစၢ်."}ပသးအုၣ်က့ၤခီၣ်က့ၤစ့ၢ်ကီးပှၤခဲကနံၣ်အံၤ,တမ့ၢ်ဘၣ်တၢ်ပာ်ကွံာ်ပဖံးပညၣ်,အတၢ်ဘၣ်အၢဘၣ်.မ့ၢ်ပသးသ့ၣ်ညါဒၣ်တၢ်အဂ့ၤအမံသူၣ်မံသးဘၣ်ဃးဒီးယွၤလၢယ့ၣ်ရှူးခရံာ်အတၢ်ဂဲၤဆၢထၢၣ်က့ၤအဃိလီၤ. 22 အဝဲဒၣ်န့ၣ်က့ၤထီၣ်ဆူမူခိၣ်,ဒီးအိၣ်ဝဲလၢယွၤအစုထွဲတခီ,ဒီးတၢ်ပာ်ကလူးတဖၣ်,ဒီးတၢ်အစိအကမီၤ,ဒီးတၢ်အကဟုအကညီၢ်တဖၣ်လၢအဖီလာ်လီၤ.