1 Peter 5
1ပှၤသးပှၢ်အိၣ်လၢသုကျါတဖၣ်န့ၣ်,ယဃ့ကညးအီၤလီၤ.ယဲဒၣ်အံၤယမ့ၢ်စ့ၢ်ကီးအသကိးသးပှၢ်တဂၤ,ဒီးပှၤအုၣ်အသးလၢခရံာ်အတၢ်နးတၢ်ဖှီၣ်အဂ့ၢ်အကျိၤ,ဒီးပှၤန့ၢ်ဃုာ်တၢ်လၤကပီၤလၢတၢ်ကလီၣ်ဖျါထီၣ်န့ၣ်လီၤ. 2ဘုၣ်အီၣ်ဘုၣ်အီယွၤအသိတဖုအိၣ်လၢသုကျါ,ဒီးကွၢ်အီၤလၢတၢ်မၢဆူၣ်သုအဃိတမ့ၢ်ဘၣ်,မ့ၢ်လၢသုသးအိၣ်ထီၣ်ဒၣ်တၢ်အဃိတက့ၢ်.လၢစ့ဘၣ်ဃးဒီးတၢ်မဲာ်ဆှးအဃိတမ့ၢ်ဘၣ်,မ့ၢ်လၢသုသးအိၣ်သပှၢ်တၢၢ်အဃိတက့ၢ်. 3ဒ်ပှၤပာ်ကစၢ်အသးလၢတၢ်န့ၢ်သါအဖီခိၣ်တမ့ၢ်ဘၣ်,မ့ၢ်ဒ်ပှၤကဲထီၣ်သိတဖုအဒိအတဲာ်အသိးတက့ၢ်. 4ဒီးတုၤပှၤကွၢ်သိအခိၣ်အိၣ်ဖျါထီၣ်ဒီး,သုကန့ၢ်ဘၣ်တၢ်လၤကပီၤအခိၣ်သလုးလၢအတလီၤညွံးဘၣ်န့ၣ်လီၤ. 5ဒ်န့ၣ်အသိးပှၤလၢအသးစၢ်သ့ၣ်ဧၢ,ပာ်သုသးလၢပှၤသးပှၢ်သ့ၣ်အဖီလာ်တက့ၢ်.ဒီးသုဝဲသ့ၣ်ခဲလၢာ်,ပာ်လိာ်သုသးလၢသုဖီလာ်သကိးသကိး,ဒီးကူထီၣ်သိးထီၣ်တၢ်ဆီၣ်လီၤပသးတက့ၢ်.အဂ့ၢ်ဒ်အံၤ,ယွၤတြီဃာ်ပှၤပာ်ထီၣ်ထီအသး,ဒီးဟ့ၣ်လီၤတၢ်ဘျုးတၢ်ဖှိၣ်လၢပှၤဆီၣ်လီၤအသးလီၤ. ▼▼5:5 ကတိၤ.၃း၃၄
6မၤသးဒ်န့ၣ်ဒီးဆီၣ်လီၤသုသးလၢယွၤအစုကညီၢ်အဖီလာ်,ဒ်သိးတုၤအဆၢကတီၢ်ဘၣ်ဒီး,ကပာ်ထီၣ်ထီသုန့ၣ်တက့ၢ်. 7ကယဲၢ်သုတၢ်ဘၣ်ယိၣ်ဘၣ်ဘီန့ၣ်,ပာ်ထီၣ်လၢအဝဲဒၣ်အလိၤခဲလၢာ်တက့ၢ်.အဂ့ၢ်ဒ်အံၤ,အသးအိၣ်သုလီၤ. 8ကီၤသုသးတက့ၢ်.ဆိးသီတက့ၢ်.အဂ့ၢ်ဒ်အံၤ,ဒ်ခ့ယုၢ်ကညီၤရုၢ်ရုၢ်အသိးန့ၣ်,သုဒုၣ်သုဒါမုၣ်ကီၤလံၢ်ဟးဝ့ၤဝီၤဃုပှၤလၢအကယူၢ်လီၤဝဲလီၤ. 9အိၣ်ဂၢၢ်အိၣ်ကျၢၤလၢတၢ်နာ်အပူၤ,ဒီးတြီအဝဲဒၣ်တက့ၢ်.အဂ့ၢ်ဒ်အံၤ,သုသ့ၣ်ညါလၢသုဒီပုၢ်ဝဲၢ်ခဲလၢာ်ဘၣ်တၢ်နးတၢ်ဖှီၣ်တမံၤဃီအံၤလၢဟီၣ်ခိၣ်ချၢလီၤ. 10ဒီးသုဒိးတၢ်တစိၢ်ဝံၤဒီး,ကယဲၢ်တၢ်ဘျုးတၢ်ဖှိၣ်ခဲလၢာ်အကစၢ်လၢအကိးန့ၢ်ပှၤဆူအလၤကပီၤအထူအယိာ်လၢယ့ၣ်ရှူးခရံာ်အပူၤန့ၣ်,အကစၢ်ဒၣ်ဝဲ,ကမၤလၢထီၣ်ပှဲၤထီၣ်,ဂၢၢ်ထီၣ်ကျၢၤထီၣ်,ဆူၣ်ထီၣ်ချ့ထီၣ်သု,ဒီးသူၣ်ထီၣ်သုခၢၣ်သနၢၣ်န့ၣ်လီၤ. 11တၢ်လၤကပီၤဒီးတၢ်အစိအကမီၤန့ၣ်,မ်အအိၣ်ဒီးအီၤအစိၤစိၤအဃၣ်ဃၣ်တက့ၢ်.အၤမ့ၣ်. 12လၢစီၤစံၤလဝ့ၤနုၤ,လၢယဆိကမိၣ်အမ့ၢ်ဒီပုၢ်ဝဲၢ်အကလုၢ်တီတဂၤအစုပူၤ,ယကွဲးန့ၢ်သုလၢတၢ်စှၤကိာ်အံၤဒီးယသဆၣ်ထီၣ်သုခံ,ဒီးယအုၣ်ယသးလၢတၢ်အံၤလၢသုဆၢထၢၣ်လၢအပူၤန့ၣ်,မ့ၢ်ယွၤအဘျုးအဖှိၣ်နီၢ်နီၢ်လီၤ. 13တၢ်အိၣ်ဖှိၣ်လၢဘၤဘူၤလိၣ်အပူၤ,လၢအဘၣ်တၢ်ဃုထၢဃုာ်ဒီးသု,ဒီးယဖိခွါစီၤမၢ်ကူးန့ၣ်,ကတိၤဒိၣ်သုလီၤ. 14ကတိၤဒိၣ်လိာ်သုသးလၢတၢ်အဲၣ်တၢ်ကွံအနၢမူတက့ၢ်.ပှၤအိၣ်လၢယ့ၣ်ရှူးခရံာ်အပူၤ,သုဝဲသ့ၣ်ခဲလၢာ်န့ၣ်,မ်တၢ်ဃူတၢ်ဖိးအိၣ်ဒီးသုတက့ၢ်.အၤမ့ၣ်.
Copyright information for
KswSKMB