1Sa 21 | KswSKMB | STEP | ဒီးစီၤဒၤဝံးဟဲဝဲဆူနိၤဘးအပူၤ,ဆူပှၤလုၢ်တၢ်အဒိၣ်စီၤအဃံၤမ့လ့းအအိၣ်လီၤ.ဒီးမ့ၢ်အဘၣ်သဃိာ်ဒီးစီၤဒၤဝံးဒီး,စီၤအဃံၤမ့လ့းပျံၤဝဲ,ဒီးစံးဘၣ်အီၤ,နအိၣ်တဂၤဃီ,ဒီးပှၤတအိၣ်ဘၣ်ဒီးနၤနီတဂၤဘၣ်န့ၣ်မ့ၢ်အဘၣ်မနုၤလဲၣ်.

‏ 1 Samuel 21

1 ဒီးစီၤဒၤဝံးဟဲဝဲဆူနိၤဘးအပူၤ,ဆူပှၤလုၢ်တၢ်အဒိၣ်စီၤအဃံၤမ့လ့းအအိၣ်လီၤ.ဒီးမ့ၢ်အဘၣ်သဃိာ်ဒီးစီၤဒၤဝံးဒီး,စီၤအဃံၤမ့လ့းပျံၤဝဲ,ဒီးစံးဘၣ်အီၤ,နအိၣ်တဂၤဃီ,ဒီးပှၤတအိၣ်ဘၣ်ဒီးနၤနီတဂၤဘၣ်န့ၣ်မ့ၢ်အဘၣ်မနုၤလဲၣ်.

2 ဒီးစီၤဒၤဝံးစံးဘၣ်ပှၤလုၢ်တၢ်အဒိၣ်စီၤအဃံၤမ့လ့း,စီၤပၤမၤလိာ်ယၤလၢတၢ်တမံၤ,ဒီးစံးဘၣ်ယၤ,ဒုးသ့ၣ်ညါပှၤလၢတၢ်လၢယမၢနမၤတၢ်အဂ့ၢ်အကျိၤ,ဒီးတၢ်လၢယမၤလိာ်နၤန့ၣ်နီတဂၤတဂ့ၤ,ဒီးယပာ်လီၤယခ့ယပှၤဖဲအံၤဖဲနုၤလီၤ. 3 ဒီးခဲကနံၣ်အံၤတၢ်အိၣ်လၢနစုအဖီလာ်န့ၣ်မ့ၢ်မနုၤတမံၤလဲၣ်.ဟ့ၣ်လီၤယၤလၢကိၣ်ယဲၢ်လိၣ်လၢယစုပူၤတက့ၢ်.မ့တမ့ၢ်ဘၣ်ဒ်န့ၣ်ဒီး,တၢ်လၢနထံၣ်န့ၢ်ဘၣ်တဖၣ်န့ၣ်လီၤ.

4 ဒီးပှၤလုၢ်တၢ်အဒိၣ်စံးဆၢစီၤဒၤဝံးဒီးစံးဘၣ်အီၤ,ကိၣ်အတစီတဆှံတအိၣ်ဘၣ်လၢယစုအဖီလာ်ဘၣ်.ပှၤဖိၣ်သၣ်ခွါတဖၣ်န့ၣ်မ့ၢ်ထဲအဟးဆှဲးပိာ်မုၣ်န့ၣ်ဒီး,ကိၣ်စီဆှံအိၣ်ဝဲလီၤ.

5 ဒီးစီၤဒၤဝံးစံးဆၢပှၤလုၢ်တၢ်အဒိၣ်ဒီးစံးဘၣ်အီၤ,လၢယဟးထီၣ်န့ၣ်ပိာ်မုၣ်တအိၣ်ဒီးပှၤသၢနံၤညါဃၣ်ဃၣ်,ဒီးပှၤဖိၣ်သၣ်ခွါအလီခီတဖၣ်န့ၣ်စီဆှံဝဲ,ဒီးကိၣ်န့ၣ်မၤသးဒ်အတစီတဆှံဘၣ်အသိးလီၤ.အဂ့ၢ်ဒ်အံၤ,အဂၤတဖၣ်ဘၣ်တၢ်ပာ်စီဆှံအီၤလၢလီၤခီပူၤလၢမုၢ်မဆါတနံၤအံၤလီၤ.

6 ဒီးပှၤလုၢ်တၢ်အဒိၣ်န့ၣ်ဟ့ၣ်အီၤလၢတၢ်အစီအဆှံလီၤ.အဂ့ၢ်ဒ်အံၤ,ကိၣ်တအိၣ်ဘၣ်ဖဲန့ၣ်ဘၣ်.အိၣ်ထဲတၢ်မဲာ်ညါကိၣ်လၢတၢ်ဟံးန့ၢ်ဝဲလၢယွၤအမဲာ်ညါဒ်သိးအကပာ်က့ၤကိၣ်လၢမုၢ်တနံၤလၢအဟံးန့ၢ်ဝဲန့ၣ်လီၤ.

7 ဒီးတၢ်လၢမုၢ်တနံၤန့ၣ်မတၤတဂၤစီၤစီလူးအခ့အပှၤတဂၤ,ဘၣ်တၢ်တြီအလဲၤတၢ်,ဒီးအိၣ်ဝဲလၢယွၤအမဲာ်ညါ,ဒီးအမံၤမ့ၢ်စီၤဒိအ့း,ဒီးမ့ၢ်ပှၤအဒိၣ်ဖိ,ဒီးစီၤစီလူးအပှၤကွၢ်ဂီၤဖံးတဖၣ်အခိၣ်လီၤ.

8 ဒီးစီၤဒၤဝံးစံးဘၣ်စီၤအဃံၤမ့လ့း,ဘီမ့ၢ်ဂ့ၤ,နးမ့ၢ်ဂ့ၤ,တအိၣ်ဘၣ်လၢနစုအဖီလာ်ဘၣ်ဧါ.အဂ့ၢ်ဒ်အံၤ,ယနးမ့ၢ်ဂ့ၤ,ယစုကဝဲၤမ့ၢ်ဂ့ၤ,ယတဟဲစိာ်ဘၣ်.အဂ့ၢ်ဒ်အံၤ,စီၤပၤအတၢ်န့ၣ်ဘၣ်မၤဝဲချ့သဒံးလီၤ.

9 ဒီးပှၤလုၢ်တၢ်အဒိၣ်စံးဝဲဒၣ်,ပှၤဖလ့ၡသးဖိစီၤကၤလယးလၢနမၤသံအီၤလၢတၢ်ပၢၤခိၣ်အ့လးတဂၤအနးန့ၣ်,ကွၢ်ကွၢ်,အိၣ်ဝဲဘိၣ်အသးလၢတၢ်ကံးညာ်လၢအ့ဖိးအချၢဃံန့ၣ်လီၤ.မ့ၢ်ဘၣ်နသးလၢနဟံးန့ၢ်အဝဲန့ၣ်ဒီး,ဟံးန့ၢ်တက့ၢ်.အဂ့ၢ်ဒ်အံၤ,လၢအဝဲတဘ့ၣ်အမဲာ်ညါန့ၣ်အဂၤတအိၣ်ဘၣ်ဖဲအံၤဘၣ်.ဒီးစီၤဒၤဝံးစံးဝဲဒၣ်,တၢ်ဒ်အဝဲတဘ့ၣ်အသိးန့ၣ်တအိၣ်ဘၣ်.ဟ့ၣ်လၢ်ယၤတက့ၢ်.

10 ဒီးစီၤဒၤဝံးဂဲၤဆၢထၢၣ်,ဒီးဃ့ၢ်လၢမုၢ်တနံၤန့ၣ်လၢတၢ်ပျံၤစီၤစီလူးအဃိ,ဒီးလဲၤဝဲဆူကၤသးအစီၤပၤစီၤအၤကံၣ်အအိၣ်လီၤ.

11 ဒီးစီၤအၤကံၣ်အခ့အပှၤစံးဘၣ်အီၤ,ပှၤတဂၤအံၤမ့ၢ်ထံဧိၤကီၢ်ဧိၤအစီၤပၤဒၤဝံးတမ့ၢ်ဘၣ်ဧါ.ပှၤစံးဆၢလိာ်အသးလၢတၢ်ဂဲၤကလံၣ်,

စီၤစီလူးမၤသံလံအပှၤကထိတဖၣ်,
ဒီးစီၤဒၤဝံးန့ၣ်အပှၤကလးတဖၣ်လံန့ၣ်,
တန့ၢ်ဘၣ်ဧါ.

12 ဒီးစီၤဒၤဝံးပာ်တၢ်ကတိၤတဖၣ်န့ၣ်လၢအသးကံၣ်ပူၤ,ဒီးပျံၤကၤသးအစီၤပၤစီၤအၤကံၣ်ဒိၣ်မးလီၤ. 13 ဒီးလဲက့ၤအသးလၢအမဲာ်ညါ,ဒီးပာ်ပျုၢ်အသးလၢအစုပူၤ,ဒီးကွဲးတၢ်ကလီကလီလၢပဲတရီအတြဲၤလိၤ,ဒီးအထူးပျ့ၤထံယွၤလီၤလၢအခၣ်ဆူၣ်အလိၤလီၤ.

14 ဒီးစီၤအၤကံၣ်စံးဘၣ်အခ့အပှၤ,ကွၢ်ကွၢ်,ပှၤတဂၤအံၤမ့ၢ်ပှၤအပျုၢ်လီၤ.သုဟဲစိာ်အီၤဆူယအိၣ်မ့ၢ်အဘၣ်မနုၤလဲၣ်. 15 မ့ၢ်လၢပှၤပျုၢ်တအိၣ်ဒီးယၤဘၣ်ဒီး,သုဟဲစိာ်ပှၤတဂၤအံၤဒ်သိးအကမၤပှၤပျုၢ်အတၢ်လၢယမဲာ်ညါဧါ.ပှၤတဂၤအံၤကဟဲနုာ်လၢယဟံၣ်ပူၤဧါ.