1 Samuel 24
1ဒီးစီၤစီလူးလူၤပှၤဖလ့ၡသးဖိန့ၣ်တုၤအဟဲက့ၤကဒါက့ၤဒီး,တၢ်မၤအသးလၢပှၤဒုးနဲၣ်အီၤ,ဒီးစံးဝဲဒၣ်,ကွၢ်ကွၢ်,စီၤဒၤဝံးအိၣ်ဝဲလၢပှၢ်လၢ်ကျါဧ့ၣ်က့ဒံၤလီၤ. 2ဒီးစီၤစီလူးဟံးန့ၢ်ပှၤဃုထၢဖိလၢအံၣ်စရ့လးခဲလၢာ်အကျါသၢကထိ,ဒီးလဲၤဃုစီၤဒၤဝံးဒီးအပှၤကညီတဖၣ်လၢမဲာ်တဲးလဲးမံၤအလ့လိၤလီၤ. 3ဒီးလဲၤပၢၢ်ဝဲလၢသိအကရၢတဖၣ်အိၣ်ဝဲလၢကျဲပူၤ,ဖဲတၢ်အိပူၤအိၣ်ဝဲလီၤ.ဒီးစီၤစီလူးလဲၤနုာ်ဝဲဒ်သိးအကလုးဘၢအခီၣ်,ဒီးစီၤဒၤဝံးဒီးအပှၤကညီတဖၣ်အိၣ်ဝဲလၢတၢ်အိပူၤအကတၢၢ်န့ၣ်လီၤ. 4ဒီးစီၤဒၤဝံးအပှၤကညီတဖၣ်စံးဘၣ်အီၤ,ကွၢ်ကွၢ်,မုၢ်တနံၤလၢယွၤစံးဘၣ်နၤ,ကွၢ်ကွၢ်,ယကဟ့ၣ်လီၤကွံာ်နဒုၣ်နဒါလၢနစုပူၤဒ်သိးနကမၤအီၤဖဲအဂ့ၤလၢနမဲာ်လီၤ.ဒီးစီၤဒၤဝံးဂဲၤဆၢထၢၣ်,ဒီးကူးတဲာ်ခူသူၣ်စီၤစီလူးအဆ့အခီၣ်ထံးလီၤ. 5ဒီးလၢခံက့ၤဒီးတၢ်မၤအသးလၢစီၤဒၤဝံးအသးသိၣ်ဃီၣ်အီၤလၢအကူးတဲာ်စီၤစီလူးအဆ့အခီၣ်ထံးအဃိလီၤ. 6ဒီးစံးဘၣ်အပှၤကညီတဖၣ်,မ်ယွၤအသုတဒုးမၤယၤလၢတၢ်တမံၤအံၤလၢယကစၢ်,ယွၤအပှၤဒိးဖှူအသးလၢယကယူာ်ထီၣ်ယစုထီဒါအီၤန့ၣ်တဂ့ၤ.အဂ့ၢ်ဒ်အံၤ,မ့ၢ်ယွၤအပှၤဒိးဖှူအသးလီၤ. 7ဒီးစီၤဒၤဝံးတြီအပှၤကညီလၢတၢ်ကတိၤတဖၣ်န့ၣ်,ဒီးတဟ့ၣ်အဂဲၤဆၢထၢၣ်ထီဒါစီၤစီလူးဘၣ်.ဒီးစီၤစီလူးဂဲၤဆၢထၢၣ်ဒီးလဲၤပိာ်အကျဲလီၤ. 8ဒီးစီၤဒၤဝံးဂဲၤဆၢထၢၣ်စ့ၢ်ကီးလၢအလီၢ်ခံန့ၣ်,ဒီးဟးထီၣ်လၢတၢ်အိပူၤ,ဒီးကိးထီၣ်လၢစီၤစီလူးအလီၢ်ခံဒီးစံးဝဲဒၣ်,ယကစၢ်စီၤပၤဧၢ,ဒီးတုၤစီၤစီလူးကွၢ်တၢ်လၢအလီၢ်ခံန့ၣ်ဒီး,စီၤဒၤဝံးဆုးလီၤအခိၣ်ဆူဟီၣ်ခိၣ်ဒီးတီၤလီၤဝဲလီၤ. 9ဒီးစီၤဒၤဝံးစံးဘၣ်စီၤစီလူး,နဒိကနၣ်ပှၤကညီအကလုၢ်လၢအစံး,ကွၢ်ကွၢ်,စီၤဒၤဝံးဃုမၤအၢနၤန့ၣ်မ့ၢ်အဘၣ်မနုၤလဲၣ်. 10ကွၢ်ကွၢ်,တၢ်လၢမုၢ်မဆါတနံၤအံၤ,နမဲာ်ထံၣ်ဘၣ်လၢယွၤဟ့ၣ်လီၤကွံာ်နၤလၢယစုပူၤလၢတၢ်အိပူၤ,ဒီးပှၤမၤလိာ်မၤသံနၤ,ဘၣ်ဆၣ်ဒီးယသးလီနၤ,ဒီးယစံးယတယူာ်ထီၣ်ဘၣ်ယစုထီဒါယကစၢ်ဘၣ်.အဂ့ၢ်ဒ်အံၤ,မ့ၢ်ယွၤအပှၤဒိးဖှူအသးလီၤ. 11ဒီးယပၢ်ဧၢ,ကွၢ်,ဒီးထံၣ်နဆ့အခီၣ်ထံးအိၣ်ဝဲလၢယစုပူၤန့ၣ်တက့ၢ်.မ့ၢ်ယကူးတဲာ်နဆ့အခီၣ်ထံးဒီး,ယတမၤသံဘၣ်နၤဘၣ်ဒီး,သ့ၣ်ညါ,ဒီးကွၢ်လၢတၢ်အၢဒီးတၢ်ကမၣ်တအိၣ်ဘၣ်လၢယစုပူၤ,ဒီးယတမၤကမၣ်ဘၣ်နၤဘၣ်န့ၣ်တက့ၢ်.ဘၣ်ဆၣ်ဒီးနလူၤယသးသမူဒ်သိးနကမၤန့ၢ်အီၤလီၤ. 12မ်ယွၤစံၣ်ညီၣ်တၢ်လၢယၤဒီးနၤအဘၢၣ်စၢၤဒီးယွၤမၤဆၢနၤလၢတၢ်အၢလၢယဂီၢ်တက့ၢ်.မ့မ့ၢ်ယစုတအိၣ်ဘၣ်လၢနလိၤဘၣ်. 13ဒ်ပမှံၤပပှၢ်အတၢ်ကတိၤဒိစံးဝဲအသိးန့ၣ်,တၢ်အၢဟဲထီၣ်လၢပှၤအၢဖိလီၤ.မ့မ့ၢ်ယစုတအိၣ်ဘၣ်လၢနလိၤဘၣ်. 14အံၣ်စရ့လးအစီၤပၤဟဲပိာ်မတၤတဂၤအခံလဲၣ်.နလူၤမတၤလဲၣ်.ထွံၣ်သံတဒုဧါ.ကျံတဘ့ၣ်ဧါ. 15ဒီးမ်ယွၤစံၣ်ညီၣ်တၢ်လၢယၤဒီးနၤအဘၢၣ်စၢၤ,ဒီးကွၢ်တၢ်,ဒီးလိာ်ယကွီၢ်,ဒီးမၤပူၤမၤဖျဲးယၤလၢနစုပူၤန့ၣ်တက့ၢ်. 16ဒီးစီၤဒၤဝံးကတိၤတၢ်ကတိၤတဖၣ်ဒီးစီၤစီလူးဝံၤဒီး,တၢ်မၤအသးလၢစီၤစီလူးစံးဝဲဒၣ်,မ့ၢ်နကလုၢ်ဧါ,ယဖိခွါစီၤဒၤဝံးဧၢ.ဒီးစီၤစီလူးထုထီၣ်အကလုၢ်,ဒီးဟီၣ်ဝဲလီၤ. 17ဒီးစံးဘၣ်စီၤဒၤဝံး,နတီန့ၢ်လိၤန့ၢ်ယၤတက့ၢ်လီၤ.အဂ့ၢ်ဒ်အံၤ,နဟ့ၣ်လီၤယၤလၢတၢ်ဂ့ၤ,မ့မ့ၢ်ယၤအံၤ,ယဟ့ၣ်လီၤနၤလၢတၢ်အၢလီၤ. 18ဒီးတၢ်လၢမုၢ်မဆါတနံၤအံၤနဒုးနဲၣ်လၢနမၤဂ့ၤတ့ၢ်ယၤလီၤ.အဂ့ၢ်ဒ်အံၤ,လၢယွၤဟ့ၣ်လီၤကွံာ်ယၤလၢနစုပူၤန့ၣ်နတမၤသံဘၣ်ယၤဘၣ်, 19အဂ့ၢ်ဒ်အံၤ,ပှၤမ့ၢ်ထံၣ်န့ၢ်အဒုၣ်အဒါဒီး,ကပျၢ်အီၤမုာ်မုာ်စ့ၢ်ကီးဧါ.ဒီးမ်ယွၤဟ့ၣ်ကၣ်နၤလၢတၢ်ဂ့ၤလၢတၢ်လၢနမၤယၤလၢမုၢ်မဆါတနံၤအံၤအဃိန့ၣ်တက့ၢ်. 20ဒီးခဲကနံၣ်အံၤ,ကွၢ်ကွၢ်,ယသ့ၣ်ညါသပှၢ်တၢၢ်လၢနကကဲထီၣ်စီၤပၤ,ဒီးလၢအံၣ်စရ့လးအဘီအမုၢ်ကအိၣ်ဂၢၢ်ဆိးကျၢၤလၢနစုပူၤလီၤ. 21ဒီးခဲကနံၣ်အံၤဆိၣ်တၢ်ဒီးယၤလၢယွၤအမဲာ်ညါလၢနတဒီၣ်တဲာ်ကွံာ်ဘၣ်ယချံယသၣ်လၢယလီၢ်ခံဘၣ်,ဒီးလၢနတမၤဟးဂီၤဘၣ်ယမံၤလၢယပၢ်အဟံၣ်ပူၤဘၣ်န့ၣ်တက့ၢ်. 22ဒီးစီၤဒၤဝံးဆိၣ်တၢ်ဒီးစီၤစီလူးလီၤ.ဒီးစီၤစီလူးက့ၤက့ၤဝဲဆူအဟံၣ်,ဒီးစီၤဒၤဝံးဒီးအပှၤကညီတဖၣ်လဲၤထီၣ်ဝဲဆူတိာ်ပူၤန့ၣ်လီၤ.
Copyright information for
KswSKMB