1 Samuel 3
1ဒီးဖိသၣ်စီၤၡမူၤအ့လးမၤယွၤအခ့အပှၤအတၢ်လၢစီၤဧ့လံၤအမဲာ်ညါလီၤ.ဒီးတၢ်လၢမုၢ်နံၤတဖၣ်န့ၣ်ယွၤအကလုၢ်ကထါမ့ၢ်တၢ်လုၢ်ဒိၣ်ပှ့ၤဒိၣ်လီၤ.တၢ်ထံၣ်တၢ်လၢညါခီန့ၣ်တအါဘၣ်. 2ဒီးတၢ်လၢမုၢ်တနံၤန့ၣ်,လီၤဧ့လံၤမံလီၤလၢအလီၢ်ဒၣ်ဝဲအပူၤ,ဒီးအမဲာ်ယုာ်သီ,ဒီးထံၣ်တၢ်တသ့ဘၣ်. 3ဒီးယွၤအမ့ၣ်အူဒၢတချုးလီၤပံာ်ဒံးဘၣ်လၢယွၤအနူၢ်ပူၤဖဲယွၤအတလါအိၣ်ဝဲ,ဒီးစီၤၡမူၤအ့လးမံလီၤဝဲဒီး, 4ယွၤကိးစီၤၡမူၤအ့လး,ဒီးစံးဆၢဝဲ,ကွၢ်ကွၢ်,ယၤလီၤ. 5ဒီးဃ့ၢ်ဝဲဆူစီၤဧ့လံၤအအိၣ်,ဒီးစံးဝဲဒၣ်,ကွၢ်ကွၢ်,ယၤလီၤ.အဂ့ၢ်ဒ်အံၤ,နကိးယၤလီၤ.ဒီးစံးဝဲဒၣ်,ယတကိးဘၣ်,မံလီၤကဒီးတက့ၢ်.ဒီးက့ၤက့ၤဝဲ,ဒီးမံလီၤဝဲလီၤ. 6ဒီးယွၤကိးကဒီးစီၤၡမူၤအ့လး,ဒီးစီၤၡမူၤအ့လးဂဲၤဆၢထၢၣ်,ဒီးလဲၤဝဲဆူစီၤဧ့လံၤအအိၣ်,ဒီးစံးဝဲဒၣ်,ကွၢ်ကွၢ်,ယၤလီၤ.အဂ့ၢ်ဒ်အံၤ,နကိးယၤလီၤ.ဒီးစံးဆၢဝဲဒၣ်,ယတကိးဘၣ်,ယဖိခွါဧၢ,မံလီၤကဒီးတက့ၢ်. 7ဒီးစီၤၡမူၤအ့လးတသ့ၣ်ညါဒံးဘၣ်ယွၤဘၣ်,ဒီးတၢ်တလီၣ်ဖျါဒံးဘၣ်ယွၤအကလုၢ်ကထါလၢအီၤဘၣ်. 8ဒီးယွၤကိးက့ၤကဒီးစီၤၡမူၤအ့လးသၢဘျီတဘျီ,ဒီးဂဲၤဆၢထၢၣ်,ဒီးလဲၤဝဲဆူစီၤဧ့လံၤအအိၣ်,ဒီးစံးဝဲဒၣ်,ကွၢ်ကွၢ်,ယၤလီၤ.အဂ့ၢ်ဒ်အံၤ,နကိးယၤလီၤ.ဒီးစီၤဧ့လံၤအနၢ်ပၢၢ်လၢယွၤကိးတ့ၢ်ဖိသၣ်န့ၣ်လီၤ. 9ဒီးစီၤဧ့လံၤစံးဘၣ်စီၤၡမူၤအ့လး,က့ၤမံလီၤတက့ၢ်,ဒီးတၢ်မ့ၢ်ကိးနၤဒီး,တၢ်ကမၤအသးလၢနဘၣ်စံး,ကတိၤတၢ်တက့ၢ်,ယွၤဧၢ,အဂ့ၢ်ဒ်အံၤ,နခ့နပှၤဒိကနၣ်တၢ်လီၤ.စီၤၡမူၤအ့လးန့ၣ်က့ၤမံလီၤလၢအလီၢ်ဒၣ်ဝဲလီၤ. 10ဒီးယွၤဟဲ,ဒီးဆၢထၢၣ်,ဒီးကိးဒ်တဘျီတဘျီအသိးန့ၣ်,ၡမူၤအ့လးဧၢ,ၡမူၤအ့လးဧၢ,ဒီးစီၤၡမူၤအ့လးစံးဆၢတၢ်,ကတိၤလၢ်တၢ်တက့ၢ်.အဂ့ၢ်ဒ်အံၤ,နခ့နပှၤဒိကနၣ်တၢ်လီၤ. 11ဒီးယွၤစံးဘၣ်စီၤၡမူၤအ့လး,ကွၢ်ကွၢ်,ယကမၤတၢ်တမံၤလၢအံၣ်စရ့လးအကျါလၢအကမၤဆါကယဲၢ်ပှၤလၢအနၢ်ဟူဝဲတဖၣ်အနၢ်ခံခီလိာ်လီၤ. 12တၢ်လၢမုၢ်တနံၤန့ၣ်ယကဒုးအိၣ်ထီဒါစီၤဧ့လံၤလၢကယဲၢ်တၢ်လၢယကတိၤတ့ၢ်လၢအပှၤဟံၣ်ဖိအဂ့ၢ်အကျိၤလီၤ,ယမၤထီၣ်သီ,ဒီးယကမၤဝံၤလီၤ. 13ဒီးယဒုးနဲၣ်လံအီၤလၢယကစံၣ်ညီၣ်အပှၤဟံၣ်ဖိလီၤစိၤလီၤထီလၢတၢ်အၢလၢအသ့ၣ်ညါအီၤအဃိန့ၣ်လီၤ.အဂ့ၢ်ဒ်အံၤ,အဖိခွါတဖၣ်ဒုးဘၣ်လီၤအသးလၢတၢ်ဆိၣ်အၢဘၣ်ဆၣ်ဒီး,အဝဲဒၣ်တတြီဘၣ်အီၤဘၣ်. 14မၤသးဒ်န့ၣ်ဒီးယဆိၣ်တၢ်ဒီးစီၤဧ့လံၤအပှၤဟံၣ်ဖိ,လၢစီၤဧ့လံၤအပှၤဟံၣ်ဖိအတၢ်အၢန့ၣ်တပူၤဖျဲးဘၣ်လၢတၢ်လုၢ်ဒီးတၢ်မၤဘူၣ်အဃိလီၤထူလီၤယိာ်န့ၣ်လီၤ. 15ဒီးစီၤၡမူၤအ့လးန့ၣ်မံလီၤတုၤမုၢ်ဆ့ၣ်ထီၣ်,ဒီးအိးထီၣ်ယွၤအဟံၣ်အတြဲၤ,ဒီးစီၤၡမူၤအ့လးဒုးနဲၣ်စီၤဧ့လံၤလၢတၢ်လီၣ်ဖျါတဘူၣ်ဘၣ်. 16ဒီးစီၤဧ့လံၤကိးန့ၢ်စီၤၡမူၤအ့လး,ဒီးစံးဝဲဒၣ်,စီၤၡမူၤအ့လးယဖိခွါဧၢ,ဒီးစံးဆၢဝဲ,ကွၢ်ကွၢ်,ယၤလီၤ. 17ဒီးအဝဲဒၣ်စံး,တၢ်လၢယွၤစံးဘၣ်နၤတမံၤန့ၣ်မ့ၢ်မနုၤတမံၤလဲၣ်.ပာ်ခူသူၣ်ဒီးယၤတဂ့ၤ.လၢကယဲၢ်တၢ်လၢအစံးဘၣ်နၤအကျါန့ၣ်နမ့ၢ်ပာ်ခူသူၣ်တၢ်တမံၤမံၤဒီး,မ်ယွၤမၤနၤဒ်န့ၣ်ဒီးအါန့ၢ်အန့ၣ်တက့ၢ်. 18ဒီးစီၤၡမူၤအ့လးဒုးနဲၣ်အီၤလၢတၢ်ခဲလၢာ်,ဒီးတပာ်ခူသူၣ်ဒီးအီၤလၢတၢ်နီတမံၤဘၣ်.ဒီးအဝဲဒၣ်စံး,မ့ၢ်ယွၤလီၤ.ကမၤဒၣ်ဝဲတၢ်လၢအဂ့ၤလၢအမဲာ်တက့ၢ်. 19ဒီးစီၤၡမူၤအ့လးဒိၣ်ထီၣ်,ဒီးယွၤအိၣ်ဒီးအီၤ,ဒီးတဒုးလီၤတဲာ်ဘၣ်အတၢ်ကတိၤဆူဟီၣ်ခိၣ်နီတထံၣ်ဘၣ်. 20ဒီးအံၣ်စရ့လးခဲလၢာ်လၢဒၣ်ပၢၢ်လၢဘ့ၢ်ၡဘၤန့ၣ်သ့ၣ်ညါဝဲလၢစီၤၡမူၤအ့လးမ့ၢ်ယွၤအဝံဂၢၢ်ဂၢၢ်ကျၢၤကျၢၤန့ၣ်လီၤ. 21ဒီးယွၤလီၣ်ဖျါထီၣ်ကဒီးအသးလၢၡံလိၤအပူၤလီၤ.အဂ့ၢ်ဒ်အံၤ,ယွၤလီၣ်ဖျါထီၣ်အသးလၢစီၤၡမူၤအ့လးလၢယွၤအကလုၢ်အကထါလၢၡံလိၤအပူၤလီၤ.
Copyright information for
KswSKMB