‏ 1 Samuel 17

1ဒီးပှၤဖလ့ၡသးဖိဒုးအိၣ်ဖှိၣ်အပှၤသုးမုၢ်ဒ်သိးအကဒုးသုးတၢ်,ဒီးအိၣ်ဖှိၣ်ရိဖှိၣ်ဖဲၡိကိၤလၢအဘၣ်ဃးဒီးယူဒၤ,ဒီးသူၣ်ဒဲလၢၡိကိၤဒီးဧစ့ကၤအဘၢၣ်စၢၤလၢအ့ဖ့းစဒးမံၣ်အပူၤလီၤ.

2ဒီးစီၤစီလူးဒီးပှၤအံၣ်စရ့လးဖိအိၣ်ဖှိၣ်ရိဖှိၣ်,ဒီးသူၣ်ဒဲလၢတၢ်ပၢၤခိၣ်အ့လၤ,ဒီးကတဲာ်ကတီၤတၢ်ဒ်သိးအကသဂၢၢ်ဒုးသုးဒီးပှၤဖလ့ၡသးဖိလီၤ.

3ဒီးပှၤဖလ့ၡသးဖိဆၢထၢၣ်ဝဲလၢကစၢၢ်လိၤလၢအဝဲတခီ,ဒီးအံၣ်စရ့လးဆၢထၢၣ်လၢကစၢၢ်လိၤလၢအဝဲတခီ,ဒီးကစၢၢ်ကဆူးအိၣ်ဝဲလၢအဘၢၣ်စၢၤလီၤ.

4ဒီးပှၤလၢခံခီအဘၢၣ်စၢၤတဂၤဟဲထီၣ်လၢပှၤဖလ့ၡသးဖိသူၣ်ဒဲအလီၢ်လီၤ.အမံၤမ့ၢ်စီၤကၤလယးလၢကၤသး,ဒီးအနီၢ်ထီဃုပျၢ်ဒီးတထါလီၤ.

5ဒီးအိၣ်ဒီးအခိၣ်ဖျီၣ်သုးတိၢ်လၢအခိၣ်,ဒီးသိးဒီးဆ့သဃိး,ဒီးဆ့သဃိးန့ၣ်လီၤတယၢၢ်ၡက့လးတိၢ်ယဲၢ်ကထိ, 6ဒီးသဃိးအိၣ်ဝဲလၢအခီၣ်ဒုၣ်အလိၤ,ဒီးဘီဖိတိၢ်အိၣ်ဝဲလၢအဖံဘၣ်ခိၣ်န့ၣ်လီၤ. 7ဒီးအဘီအတိၢ်မၤသးဒ်ထၣ်အဘီတဘိအသိး,ဒီးအဘီအကနၣ်န့ၣ်လီၤသယၢၢ်ၡက့လးထးဃုကယၤလီၤ.ဒီးပှၤစိာ်ကတီၤတဘ့ၣ်လဲၤလၢအမဲာ်ညါလီၤ.

8ဒီးဆၢထၢၣ်ဝဲ,ဒီးကိးထီၣ်ဆူအံၣ်စရ့လးအသုးမုၢ်,ဒီးစံးဘၣ်အီၤ,သုဟဲထီၣ်ကတဲာ်ကတီၤတၢ်ဒ်သိးသုကဒုးသုးဘၣ်မနုၤလဲၣ်.ယမ့ၢ်ပှၤဖ့လၡသးဖိ,ဒီးသုမ့ၢ်စီၤစီလူးအခ့အပှၤ,တမ့ၢ်ဘၣ်ဧါ.ဃုထၢပှၤတဂၤလၢသုဂီၢ်,ဒီးဒုးဟဲလီၤအီၤဆူယအိၣ်တက့ၢ်. 9ဒုးတၢ်ဒီးယၤမ့ၢ်သ့,ဒီးမ့ၢ်မၤသံယၤဒီး,ပကကဲထီၣ်သုကုၢ်သုပှၤလီၤ.မ့မ့ၢ်ပမ့ၢ်မၤနၢၤအီၤ,ဒီးမၤသံအီၤဒီး,သုကကဲထီၣ်ပကုၢ်ပပှၤ,ဒီးမၤပတၢ်လီၤ.

10ဒီးပှၤဖလ့ၡသးဖိတဂၤန့ၣ်စံးဝဲဒၣ်,ယမၤတရီတပါအံၣ်စရ့လးအသုးမုၢ်လၢမုၢ်မဆါတနံၤအံၤလီၤ.ဟ့ၣ်ယၤလၢပှၤတဂၤဒ်သိးပကဒုးလိာ်ပသးတက့ၢ်.

11ဒီးတုၤစီၤစီလူးဒီးအံၣ်စရ့လးခဲလၢာ်နၢ်ဟူပှၤဖလ့ၡသးဖိအတၢ်ကတိၤန့ၣ်ဒီး,အသူၣ်အုးသးအုး,ဒီးပျံၤတၢ်ဒိၣ်မးလီၤ.

12ဒီးစီၤဒၤဝံးအပၢ်မ့ၢ်ပှၤအ့ဖရးသးဖိလၢဘ့ၤသလ့ဃ့ၣ်ယူဒၤအပူၤ,ဒီးအမံၤမ့ၢ်စီၤယံးၡဲလီၤ.ဒီးအိၣ်ဒီးအဖိခွါဃိးဂၤ,ဒီးလၢစီၤစီလူးအမုၢ်နံၤတဖၣ်န့ၣ်မ့ၢ်ပှၤသးပှၢ်လၢပှၤကညီအကျါလီၤ.

13ဒီးစီၤယံးၡဲအဖိခွါလၢအသးပှၢ်ကတၢၢ်သၢဂၤပိာ်စီၤစီလူးအခံဆူတၢ်ဒုးသုးအပူၤလီၤ.ဒီးပှၤလၢအလဲၤဆူတၢ်ဒုးသုးအပူၤတဖၣ်န့ၣ်အဝဲၢ်ကိအမံၤမ့ၢ်စီၤအ့လံအာ်တဂၤ,ဒီးစီၤအဘံနဒာ်ခံဂၤတဂၤ,ဒီးစီၤၡးမၤသၢဂၤတဂၤလီၤ. 14ဒီးစီၤဒၤဝံးမ့ၢ်ပှၤအသးစၢ်ကတၢၢ်,ဒီးပှၤအသးပှၢ်ကတၢၢ်သၢဂၤန့ၣ်ပိာ်စီၤစီလူးအခံလီၤ.

15ဒီးစီၤဒၤဝံးလဲၤတၢ်ဒီးက့ၤတၢ်လၢစီၤစီလူးအအိၣ်,ဒ်သိးအကကွၢ်အပၢ်အသိဒီးမဲးတဲးလဲးတဖၣ်လၢဘ့ၤသလ့ဃ့ၣ်အပူၤလီၤ.

16ဒီးပှၤဖလ့ၡသးဖိတဂၤန့ၣ်သုးဘူးအသးလၢမုၢ်ဂီၤတဘျီ,ဒီးမုၢ်ဟါတဘျီ,ဒီးပာ်ဆၢထၢၣ်အသးအနံၤလွံၢ်ဆံလီၤ.

17ဒီးစီၤယံးၡဲစံးဘၣ်အဖိခွါစီၤဒၤဝံး,ဟံးန့ၢ်ဘုဝဲာ်အသးအံၤပှဲၤထီၣ်တအ့ဖးလၢနဒီပုၢ်ဝဲၢ်အဂီၢ်,ဒီးကိၣ်ဆံဆဲၣ်လိၣ်အံၤ,ဒီးဃ့ၢ်ဆူပှၤသူၣ်ဒဲအလီၢ်ဆူနဒီပုၢ်ဝဲၢ်အအိၣ်တက့ၢ်. 18ဒီးစိာ်တၢ်နုၢ်ထံလီၤသကၤဆံဆဲၣ်လိၣ်ဆူပှၤတကထိအခိန့ၣ်,ဒီးကွၢ်နဒီပုၢ်ဝဲၢ်အအိၣ်မုာ်အဂ့ၢ်,ဒီးဟံးန့ၢ်အပနီၣ်တမံၤတက့ၢ်.

19ဒီးစီၤစီလူးဒီးအဝဲၢ်သ့ၣ်ဒီးအံၣ်စရ့လးအပှၤကညီခဲလၢာ်အိၣ်ဝဲလၢတၢ်ပၢၤခိၣ်အ့လၤ,ဒီးဒုးသုးဒီးပှၤဖလ့ၡသးဖိလီၤ.

20ဒီးလၢမုၢ်ဆ့ၣ်ထီၣ်န့ၣ်စီၤဒၤဝံးဂဲၤဆၢထၢၣ်ဂီၤဂီၤ,ဒီးပာ်လီၤတဲာ်သိဒီးမဲာ်တဲးလဲးအိၣ်ဒီးပှၤကွၢ်သိဖိတဂၤ,ဒီးဟံးန့ၢ်တၢ်,ဒီးလဲၤတၢ်ဒ်စီၤယံးၡဲမၤလိာ်အီၤအသိးန့ၣ်,ဒီးဟဲတုၤဝဲလၢလ့ၣ်အိၣ်ဖှိၣ်အလီၢ်ဖဲပှၤသုးမုၢ်လဲၤဒုးသုး,ဒီးကိးပသူထီၣ်လၢဒုးသုးအဖၢမုၢ်လီၤ. 21အဂ့ၢ်ဒ်အံၤ,အံၣ်စရ့လးဒီးပှၤဖလ့ၡသးဖိကတဲာ်ကတီၤလၢတၢ်ဒုးသုးအဂီၢ်,ဒ်သိးတၢ်သုးမုၢ်န့ၣ်ကလဲၤသဂၢၢ်လိာ်အသးလီၤ.

22ဒီးစီၤဒၤဝံးပာ်လီၤတဲာ်အတၢ်ဖိတၢ်လံၤလၢပှၤကွၢ်တၢ်ဖိတၢ်လံၤအစုပူၤ,ဒီးဃ့ၢ်ဝဲဆူပှၤသုးမုၢ်အကျါ,ဒီးဟဲကတိၤဒိၣ်အဒီပုၢ်ဝဲၢ်လီၤ.

23ဒီးကတိၤတၢ်ဒီးအီၤအဖၢမုၢ်ဒီး,ကွၢ်ကွၢ်,ပှၤလၢခံခီအဘၢၣ်စၢၤတဂၤဟဲထီၣ်,(ပှၤဖလ့ၡသးဖိလၢကၤသးန့ၣ်အမံၤမ့ၢ်စီၤကၤလယး,)လၢပှၤဖလ့ၡသးဖိအသုးမုၢ်အကျါ,ဒီးကတိၤတၢ်ကတိၤတဖၣ်ဒ်လီၢ်လီၢ်လီၤ.ဒီးစီၤဒၤဝံးနၢ်ဟူဝဲလီၤ.

24ဒီးကယဲၢ်အံၣ်စရ့လးအပှၤကညီခဲလၢာ်,တုၤအထံၣ်ဘၣ်ပှၤတဂၤန့ၣ်ဒီး,ဃ့ၢ်ဝဲလၢအအိၣ်,ဒီးပျံၤတၢ်ဒိၣ်မးလီၤ.

25ဒီးအံၣ်စရ့လးအပှၤကညီစံးဝဲဒၣ်,ပှၤလၢအဟဲထီၣ်တဂၤန့ၣ်သုထံၣ်ဘၣ်လံဧါ.မ့ၢ်ဒ်သိးအကမၤတရီတပါအံၣ်စရ့လးဒီး,ဟဲထီၣ်ဝဲလီၤ.ဒီးပှၤလၢအမၤသံအီၤတဂၤ,တၢ်ကမၤအသးလၢစီၤပၤကဒုးထူးဒုးတီၤအီၤအိၣ်ဒီးတၢ်ထူးတၢ်တီၤဖးဒိၣ်ဒီးကဟ့ၣ်လီၤအီၤလၢအဖိမုၣ်,ဒီးကပာ်အပၢ်အပှၤဟံၣ်ဖိလၢပှၤသဘျ့ဖိလၢအံၣ်စရ့လးအကျါလီၤ.

26ဒီးစီၤဒၤဝံးကတိၤတၢ်ဒီးပှၤလၢအဆၢထၢၣ်လၢအဃၢၤတဖၣ်,ဒီးစံးဝဲဒၣ်,ပှၤလၢအမၤသံပှၤဖလ့ၡသးဖိတဂၤန့ၣ်,ဒီးစိာ်ထီၣ်ကွံာ်တၢ်ဒုၣ်ဒွဲၣ်လၢအံၣ်စရ့လးအလိၤန့ၣ်တၢ်ကမၤအီၤဒ်လဲၣ်.အဂ့ၢ်ဒ်အံၤ,ပှၤဖလ့ၡသးဖိလၢအတဒိးဘၣ်တၢ်ကူးတရံးတဂၤ,ဒ်သိးအကမၤတရီတပါယွၤလၢအမူဝဲတဂၤအသုးမုၢ်န့ၣ်မ့ၢ်မတၤတဂၤလဲၣ်.

27ဒီးပှၤဂီၢ်မုၢ်စံးဆၢအီၤဒ်တၢ်ကတိၤန့ၣ်အသိး,ဒီးစံးဝဲဒၣ်,တၢ်ကမၤပှၤလၢအမၤသံအီၤတဂၤဒ်န့ၣ်လီၤ.

28ဒီးလၢအကတိၤတၢ်ဒီးပှၤကညီန့ၣ်အဝဲအဝဲၢ်ကိစီၤအ့လံအာ်နၢ်ဟူဝဲ,ဒီးစီၤအ့လံအာ်အသးထီၣ်ကဲၤထီၣ်ဘၣ်စီၤဒၤဝံး,ဒီးစံးဝဲဒၣ်,နဟဲလီၤဖဲအံၤဘၣ်မနုၤလဲၣ်.ဒီးနပာ်လီၤတဲာ်သိဒီးမဲာ်တဲးလဲးစှၤဒုန့ၣ်လၢပှၢ်လၢ်ကျါဒီးမတၤတဂၤလဲၣ်.ယသ့ၣ်ညါနသးထီၣ်ထီ,ဒီးတၢ်အၢလၢနသးကံၢ်ပူၤလီၤ.အဂ့ၢ်ဒ်အံၤ,နဟဲလီၤဒ်သိးနကထံၣ်ဘၣ်တၢ်ဒုးသုးလီၤ.

29ဒီးစီၤဒၤဝံးစံးဝဲဒၣ်,ယမၤတၢ်ခဲကနံၣ်အံၤလၢမနုၤလဲၣ်.အဂ့ၢ်တအိၣ်ဘၣ်ဧါ. 30ဒီးဃၣ်အသးဆူပှၤတဂၤဒၣ်အအိၣ်,ဒီးကတိၤတၢ်ဒ်လီၢ်လီၢ်,ဒီးပှၤဂီၢ်မုၢ်စံးဆၢအီၤ,ဒ်လၢအဂံၢ်ခိၣ်ထံးအသိးန့ၣ်လီၤ.

31ဒီးပှၤနၢ်ဟူတၢ်ကတိၤလၢစီၤဒၤဝံးကတိၤဝဲ,ဒီးဃဲၤဘၣ်ဝဲလၢစီၤစီလူးအမဲာ်ညါ,ဒီးအဝဲဒၣ်ကိးအီၤလီၤ.

32ဒီးစီၤဒၤဝံးစံးဘၣ်စီၤစီလူး,မ်ပှၤအသးသုတလီၤဘှါလၢအဃိနီတဂၤတဂ့ၤ.နခ့နပှၤကလဲၤဒုးတၢ်ဒီးပှၤဖလ့ၡသးဖိတဂၤန့ၣ်လီၤ.

33ဒီးစီၤစီလူးစံးဘၣ်စီၤဒၤဝံးနလဲၤဒုးတၢ်ဒီးပှၤဖလ့ၡသးဖိန့ၣ်တသ့ဘၣ်.အဂ့ၢ်ဒ်အံၤ,နဖိၣ်သၣ်ခွါဒံးလီၤ.မ့မ့ၢ်အဝဲဒၣ်တဂၤန့ၣ်မ့ၢ်ပှၤသုးဖိလၢအဖိၣ်သၣ်ခွါထီၣ်လံၤလံၤလီၤ.

34ဒီးစီၤဒၤဝံးစံးဘၣ်စီၤစီလူး,နခ့နပှၤကွၢ်အပၢ်အသိဒီးမဲာ်တဲးလဲး,ဒီးခ့ယုၢ်ဒီးတၤသူဟဲမၤန့ၢ်သိဖိလၢသိဒီးမဲာ်တဲးလဲးတဖုအကျါလီၤ. 35ဒီးယလူၤအီၤ,ဒီးမၤထူၣ်ဖျဲးအီၤလၢအထးခိၣ်,ဒီးတုၤအဂဲၤဆၢထၢၣ်ထီဒါယၤဒီး,ယဖီၣ်န့ၢ်အီၤလၢအခၣ်ဆူၣ်,ဒီးကျီကွံာ်အီၤ,ဒီးမၤသံအီၤလီၤ. 36နခ့နပှၤမၤသံခ့ယုၢ်ဒီးတၤသူ,ဒီးပှၤဖလ့ၡသးဖိလၢအတဒိးဘၣ်တၢ်ကူးတရံးတဂၤန့ၣ်,ကကဲထီၣ်ဒ်တၢ်န့ၣ်တဒုအသိးလီၤ.အဂ့ၢ်ဒ်အံၤ,မၤတရီတပါယွၤလၢအမူဝဲအပှၤသုးမုၢ်လီၤ. 37ဒီးစီၤဒၤဝံးစံးဝဲဒၣ်,ယွၤလၢအမၤပူၤဖျဲးယၤဒီးခ့ယုၢ်အစု,ဒီးတၤသူအစုန့ၣ်ကမၤပူၤဖျဲးယၤဒီးပှၤဖလ့ၡသးဖိတဂၤန့ၣ်အစုပူၤလီၤ.ဒီးစီၤစီလူးစံးဝဲဒၣ်,လဲၤတၢ်,ဒီးမ်ယွၤအိၣ်ဒီးနၤတက့ၢ်. 38ဒီးစီၤစီလူးဒုးသိးစီၤဒၤဝံးဒီးအဆ့ဒၣ်ဝဲ,ဒီးပာ်ခိၣ်ဖျီၣ်သုးတိၢ်လၢအခိၣ်,ဒီးဒုးသိးအီၤဒီးသဃိးလီၤ.

39ဒီးစီၤဒၤဝံးကံၢ်ဃာ်အနးတဘ့ၣ်လၢသဃိးအဖီခိၣ်ဒီးလဲၤဒိးကွၢ်ဝဲလီၤ.အဂ့ၢ်ဒ်အံၤ,တမၤကွံာ်ဒံးဘၣ်အီၤဘၣ်.ဒီးစီၤဒၤဝံးစံးဘၣ်စီၤစီလူး,ယလဲၤတၢ်ဒီးတၢ်အံၤတဖၣ်တသ့ဘၣ်.အဂ့ၢ်ဒ်အံၤ,တမၤကွၢ်ဒံးဘၣ်အီၤဘၣ်.ဒီးစီၤဒၤဝံးဘ့ၣ်ကွံာ်အီၤလီၤ.

40ဒီးဟံးန့ၢ်အနီၣ်ထိးဘိလၢအစုပူၤ,ဒီးဃုန့ၢ်လၢၢ်ဘျ့ယဲၢ်ဖျၢၣ်လၢထံလိာ်ပူၤ,ဒီးဒၢနုာ်ဝဲလၢပှၤကွၢ်သိအထၢၣ်လၢအအိၣ်ဒီးအီၤ,အပူၤန့ၣ်လီၤ.ဒီးနီၣ်ဘျုးတၢ်အိၣ်လၢအစုပူၤ,ဒီးသုးဘူးအသးဆူပှၤဖလ့ၡသးဖိအအိၣ်န့ၣ်လီၤ.

41ဒီးပှၤဖလ့ၡသးဖိတဂၤန့ၣ်ဟဲဝဲ,ဒီးသုးဘူးအသးဆူစီၤဒၤဝံးအအိၣ်,ဒီးပှၤလၢအစိာ်အကတီၤတဘ့ၣ်န့ၣ်အိၣ်လၢအမဲာ်ညါလီၤ.

42ဒီးပှၤဖလ့ၡသးဖိကွၢ်ဝဲ,ဒီးထံၣ်စီၤဒၤဝံး,ဒီးတပးကဲဘၣ်အီၤဘၣ်.အဂ့ၢ်ဒ်အံၤ,စီၤဒၤဝံးမ့ၢ်ပှၤဖိၣ်သၣ်ခွါ,ဒီးဂီၤဝဲ,ဒီးအက့ၢ်အဂီၤဂ့ၤလီၤ.

43ဒီးပှၤဖ့ၡသးဖိန့ၣ်စံးဘၣ်စီၤဒၤဝံး,ယမ့ၢ်ထွံၣ်တဒုဧါ.အဂ့ၢ်ဒ်အံၤ,နဟဲဆူယအိၣ်ဒီးနီၣ်ထိးလီၤ.ဒီးပှၤဖလ့ၡသးဖိန့ၣ်ဆိၣ်အၢစီၤဒၤဝံးလၢအကစၢ်တဖၣ်အမဲာ်ညါလီၤ.

44ဒီးပှၤဖလ့ၡသးဖိစံးဘၣ်စီၤဒၤဝံး,ဟဲဆူယအိၣ်တက့ၢ်,ဒီးယကဟ့ၣ်နဖံးနညၣ်လၢထိၣ်ဧိၤလံာ်ဧိၤလၢမူကပိာ်လိၤ,ဒီးလၢဆၣ်ဖိကီၢ်ဖိလၢတၢ်ပျီပူၤလီၤ.

45ဒီးစီၤဒၤဝံးစံးဘၣ်ပှၤဖလ့ၡသးဖိ,နဟဲဆူယအိၣ်ဒီးနး,ဒီးဘီ,ဒီးကတီၤလီၤ.မ့မ့ၢ်ယဲဒၣ်အံၤယဟဲဆူနအိၣ်လၢတၢ်သုးမုၢ်ဂီၢ်မုၢ်အယွၤအမံၤ,အံၣ်စရ့လးအပှၤသုးမုၢ်ဂီၢ်မုၢ်အကစၢ်လၢနမၤတရီတပါအီၤလီၤ. 46တၢ်လၢမုၢ်မဆါတနံၤအံၤယွၤကဟ့ၣ်လီၤနၤလၢယစုပူၤ,ဒီးယကကျီကွံာ်နၤ,ဒီးယကဒီၣ်တဲာ်ကွံာ်နခိၣ်လၢနလိၤ,ဒီးယကဟ့ၣ်လီၤပှၤဖလ့ၡသးဖိအပှၤသုးမုၢ်အစိၣ်တဖၣ်လၢမုၢ်မဆါတနံၤအံၤဆူထိၣ်ဧိၤလံၣ်ဧိၤလၢမူကပိာ်လိၤ,ဒီးဆူဆၣ်ဖိကီၢ်ဖိလၢဟီၣ်ခိၣ်ချၢ,ဒ်သိးပှၤဟီၣ်ခိၣ်ဖိခဲလၢာ်ကသ့ၣ်ညါလၢကစၢ်တဂၤအိၣ်ဝဲလၢအံၣ်စရ့လးအကျါလီၤ. 47ကယဲၢ်တၢ်အိၣ်ဖှိၣ်အံၤခဲလၢာ်ကသ့ၣ်ညါဝဲလၢယွၤတအုၣ်က့ၤခီၣ်က့ၤဘၣ်တၢ်ဒီးဘီဒီးနးဘၣ်.အဂ့ၢ်ဒ်အံၤ,တၢ်ဒုးတၢ်အံၤမ့ၢ်ယွၤအတၢ်လီၤ.ဒီးကဟ့ၣ်လီၤသုလၢပစုပူၤလီၤ.

48ဒီးတၢ်မၤအသးတုၤပှၤဖလ့ၡသးဖိန့ၣ်ဂဲဆၢထၢၣ်,ဒီးသုးဘူးအသးဒ်သိးအကသဂၢၢ်စီၤဒၤဝံးဒီး,ဒီးစီၤဒၤဝံးမၤဝဲချ့ချ့,ဒီးဃ့ၢ်ဆူပှၤသုးမုၢ်အအိၣ်ဒ်သိးအကသဂၢၢ်ပှၤဖလ့ၡသးဖိတဂၤန့ၣ်လီၤ.

49ဒီးစီၤဒၤဝံးဒၢနုာ်အစုလၢအထၢၣ်ပူၤ,ဒီးဟံးထီၣ်န့ၢ်လၢၢ်တဖျၢၣ်ဖဲန့ၣ်,ဒီးဘျုးဝဲ,ဒီးဘၣ်ပှၤဖလ့ၡသးဖိတဂၤလၢအမဲာ်တူၢ်ခိၣ်,ဒီးလၢၢ်တဖျၢၣ်န့ၣ်လီၤဘျၢလၢအမဲာ်တူၢ်ခိၣ်အပူၤ,ဒီးလီၤဃံၤအီထီလာ်လၢဟီၣ်ခိၣ်လိၤလီၤ.

50ဒီးစီၤဒၤဝံးမၤနၢၤပှၤဖလ့ၡသးဖိလၢအနီၣ်ဘျုးတဘိ,ဒီးလၢၢ်တဖျၢၣ်,ဒီးကျီကွံာ်ပှၤဖလ့ၡသးဖိန့ၣ်,ဒီးမၤသံအီၤလီၤ.ဒီးနးတအိၣ်ဘၣ်လၢစီၤဒၤဝံးအစုပူၤဘၣ်. 51ဒီးစီၤဒၤဝံးဃ့ၢ်ဝဲ,ဒီးဆၢထၢၣ်လၢပှၤဖလ့ၡသးဖိအဖီခိၣ်,ဒီးဟံးန့ၢ်အနး,ဒီးဘီၣ်ထီၣ်ဝဲလၢအတြိးပူၤ,ဒီးမၤသံအီၤ,ဒီးဒီၣ်တဲာ်ကွံာ်အကိာ်လၢအီၤလီၤ.ဒီးတုၤပှၤဖလ့ၡသးဖိတဖၣ်ထံၣ်ဝဲလၢပှၤလၢခံခီအဘၢၣ်စၢၤတဂၤသံတ့ၢ်ဝဲဒီး,ဃ့ၢ်ထီၣ်ကွံာ်ဝဲလီၤ. 52ဒီးအံၣ်စရ့လးဒီးယူဒၤအပှၤကညီဂဲၤဆၢထၢၣ်ဝဲ,ဒီးကိးပသူထီၣ်,ဒီးလူၤပှၤဖလ့ၡသးဖိတုၤနလဲၤတုၤလၢဧ့ကြိၣ်အကစၢၢ်ကဆူး,ဒီးအပဲတရီတဖၣ်န့ၣ်,ဒီးပှၤဖလ့ၡသးဖိလၢအဘၣ်တၢ်ဆဲးအီၤတဖၣ်လီၤဃံၤဝဲလၢၡၤရဲၣ်အကျဲပူၤပၢၢ်လၢကၤသး,ဒီးဧ့ကြိၣ်လီၤ. 53ဒီးပှၤအံၣ်စရ့လးဖိလၢအလူၤပှၤဖလ့ၡသးဖိန့ၣ်ဟဲက့ၤဝဲ,ဒီးမၤန့ၢ်ဆူၣ်သူၣ်ဒဲအလီၢ်အတၢ်လီၤ. 54ဒီးစီၤဒၤဝံးဟံးန့ၢ်ပှၤဖလ့ၡသးဖိတဂၤန့ၣ်အခိၣ်,ဒီးဟဲစိာ်ဆူယရူၤၡလ့ၣ်,ဒီးပာ်အစုကဝဲၤလၢအဒဲပူၤလီၤ. 55ဒီးတုၤစီၤစီလူးထံၣ်စီၤဒၤဝံးလဲၤသဂၢၢ်ပှၤဖလ့ၡသးဖိတဂၤန့ၣ်ဒီး,စံးဘၣ်ပှၤသုးမုၢ်အခိၣ်စီၤအဘံန့ၢ်,စီၤအဘံန့ၢ်ဧၢ,ဖိၣ်သၣ်ခွါတဂၤန့ၣ်မ့ၢ်မတၤအဖိခွါလဲၣ်.ဒီးစီၤအဘံန့ၢ်စံးဝဲဒၣ်,နသးမူဝဲ,စီၤပၤဧၢ,ယတသ့ၣ်ညါဘၣ်. 56ဒီးစီၤပၤစံးဝဲဒၣ်,ဖိၣ်သၣ်ခွါတဂၤအံၤမ့ၢ်မတၤမတၤအဖိခွါလဲၣ်န့ၣ်သံကွၢ်တက့ၢ်. 57ဒီးတုၤစီၤဒၤဝံးဟဲက့ၤကဒါက့ၤလၢအမၤသံတ့ၢ်ပှၤဖလ့ၡသးဖိဒီး,စီၤအဘံန့ၢ်ဟံးန့ၢ်အီၤ,ဒီးဆှၢအီၤဆူစီၤစီလူးအမဲာ်ညါအိၣ်ဒီးပှၤဖလ့ၡသးဖိတဂၤန့ၣ်အခိၣ်လၢအစုပူၤလီၤ. 58ဒီးစီၤစီလူးစံးဘၣ်အီၤ,ဖိၣ်သၣ်ခွါဧၢ,နမ့ၢ်မတၤအဖိခွါလဲၣ်.ဒီးစီၤဒၤဝံးစံးဆၢဝဲဒၣ်,ယမ့ၢ်နခ့နပှၤပှၤဘ့ၤသလ့ဃ့ၣ်ဖိစီၤယံးၡဲအဖိခွါလီၤ.