‏ 1 Samuel 20

1ဒီးစီၤဒၤဝံးဃ့ၢ်ကွံာ်ဝဲလၢနၤဝိးလၢရၤမါအပူၤ,ဒီးဟဲဝဲ,ဒီးစံးလၢစီၤယိနၤသၣ်အမဲာ်ညါ,ယမၤတ့ၢ်မနုၤတမံၤလဲၣ်.ဒီးယတၢ်အၢမ့ၢ်မနုၤလဲၣ်တမံၤလဲၣ်.ဒီးယတၢ်ဒဲးဘးလၢနပၢ်အမဲာ်ညါလၢအဃုနၢ်ယသးသမူန့ၣ်မ့ၢ်မနုၤတမံၤလဲၣ်.

2ဒီးအဝဲဒၣ်စံးဘၣ်အီၤ,မ်တၢ်သုတမၤအသးဒ်န့ၣ်တဂ့ၤ.နတသံဘၣ်.ကွၢ်ကွၢ်,အဒိၣ်မ့ၢ်ဂ့ၤ,အဆံးမ့ၢ်ဂ့ၤ,တဒုးနဲၣ်ဘၣ်ယၤဒီး,ယပၢ်တမၤဘၣ်တၢ်နီတမံၤဘၣ်.ဒီးယပၢ်ပာ်ခူသူၣ်တၢ်တမံၤအံၤဒီးယၤမ့ၢ်အဘၣ်မနုၤလဲၣ်.တၢ်တမံၤအံၤတဒ်န့ၣ်ဘၣ်.

3ဒီးစီၤဒၤဝံးဆိၣ်တၢ်ဒီးစံးဝဲဒၣ်,နပၢ်သ့ၣ်ညါသပှၢ်တၢၢ်လၢယဘၣ်ဘျုးဘၣ်ဖှိၣ်လၢနမဲာ်,ဒီးစံးဝဲဒၣ်,မ်စီၤယိနၤသၣ်အသုတသ့ၣ်ညါတၢ်တမံၤအံၤတဂ့ၤ,ကသူၣ်အုးသးအုးဘၣ်ဖုးလီၤ.ဒီးယွၤမူဝဲ,ဒီးနသးမူဝဲန့ၣ်,အိၣ်ထဲခါတၢ်တခါလၢယၤဒီးတၢ်သံအဘၢၣ်စၢၤလီၤ.

4ဒီးစီၤယိနၤသၣ်စံးဘၣ်စီၤဒၤဝံး,ဖဲဒၣ်နသးဆၢတၢ်တမံၤလၢ်လၢ်န့ၣ်ယကမၤလၢနဂီၢ်လီၤ.

5ဒီးစီၤဒၤဝံးစံးဘၣ်စီၤယိနၤသၣ်,ကွၢ်ကွၢ်,ခဲဂီၤတနံၤမ့ၢ်လါထီၣ်သီအနံၤ,ဒီးယဂ့ၤဆ့ၣ်နီၤဒီးစီၤပၤလၢအအီၣ်တၢ်လီၤ.ဘၣ်ဆၣ်ဒီးပျၢ်ယၤဒ်သိးယကပာ်ခူသူၣ်ယသးလၢတၢ်ပျီပူၤ,တုၤအပှဲၤထီၣ်သၢနံၤတနံၤလၢမုၢ်ဟါန့ၣ်တက့ၢ်.

6ဒီးနပၢ်မ့ၢ်ထံၣ်ယၤယတအိၣ်ဘၣ်ဒီးစံး,စီၤဒၤဝံးဃ့ယၤသပှၢ်တၢၢ်ဒ်သိးအကဃ့ၢ်ဆူအဝ့ၢ်ဘ့ၤသလ့ဃ့ၣ်အပူၤလီၤ.အဂ့ၢ်ဒ်အံၤ,တၢ်မၤဘူၣ်တနံၣ်တစုတနံၣ်တစုအိၣ်ဝဲဖဲန့ၣ်လၢအပှၤဟံၣ်ဖိခဲလၢာ်အဂီၢ်လီၤ. 7ဒီးမ့ၢ်စံးဒ်အံၤ,ဂ့ၤလံဒီး,နခ့နပှၤကအိၣ်မုာ်လီၤ.မ့မ့ၢ်အသးထီၣ်မ့ၢ်ကဲၤထီၣ်ဆူၣ်ဆူၣ်ကလဲာ်ဒီး,သ့ၣ်ညါလၢအတိာ်တၢ်အၢလၢယဂီၢ်တက့ၢ်.

8ဒီးမၤနခ့နပှၤလၢတၢ်ဘျုးတၢ်ဖှိၣ်တက့ၢ်.အဂ့ၢ်ဒ်အံၤ,နအၢၣ်လီၤအီလီၤတၢ်ဒီးနခ့နပှၤဘၣ်ဃးဒီးယွၤလီၤ.ဘၣ်ဆၣ်ဒီးတၢ်အၢမ့ၢ်အိၣ်လၢယပူၤဒီး,မၤသံယၤနကစၢ်ဒၣ်နဲတက့ၢ်.အဂ့ၢ်ဒ်အံၤ,နကစိာ်ယၤဆူနပၢ်အအိၣ်မ့ၢ်အဘၣ်မနုၤလဲၣ်.

9ဒီးစီၤယိနၤသၣ်စံးဝဲဒၣ်,မ်အသုတဘၣ်နၤတဂ့ၤ.အဂ့ၢ်ဒ်အံၤ,ယမ့ၢ်သ့ၣ်ညါနီၢ်နီၢ်လၢယပၢ်တိာ်တၢ်အၢဒ်သိးအကဘၣ်နၤဒီး,ယကစံးဘၣ်တဲဘၣ်နၤ,တမ့ၢ်ဘၣ်ဧါ.

10ဒီးစီၤဒၤဝံးစံးဘၣ်စီၤယိနၤသၣ်,ဒီးနပၢ်မ့ၢ်စံးဆၢဘၣ်ဖုးနၤဆူၣ်ဆူၣ်ကလဲာ်ဒီး,မ့ၢ်မတၤကစံးဘၣ်ယၤတဂၤလဲၣ်.

11ဒီးစီၤယိနၤသၣ်စံးဘၣ်စီၤဒၤဝံး,ဟဲ,လဲၤသကိးဆူတၢ်ပျီပူၤတက့ၢ်.ဒီးလဲၤတၢ်ခံဂၤလိာ်ဆူတၢ်ပျီပူၤလီၤ.

12ဒီးစီၤယိနၤသၣ်စံးဘၣ်စီၤဒၤဝံး,ယွၤအံၣ်စရ့လးအကစၢ်ဧၢ,ခဲဂီၤဂ့ၤခဲတဂီၤဂ့ၤ,တုၤယဃုကွၢ်ယပၢ်ဒီး,ကွၢ်ကွၢ်,တၢ်ဂ့ၤမ့ၢ်အိၣ်လၢစီၤဒၤဝံးအဂီၢ်,ဒီးယမ့ၢ်တမၤဘၣ်တၢ်ဆူနအိၣ်,ဒီးတဒုးနဲၣ်ဘၣ်နၤဒီး. 13မ်ယွၤမၤဒ်န့ၣ်ဒီးအါန့ၢ်အန့ၢ်လၢစီၤယိနၤသၣ်တက့ၢ်.ဒီးမ့ၢ်ဘၣ်ယပၢ်အသးလၢအကမၤနၤလၢတၢ်အၢဒီး,ယကဒုးနဲၣ်အီၤလၢနၤ,ဒီးပျၢ်နၤဒ်သိးနကဟးထီၣ်ကွံာ်မုာ်မုာ်လီၤ.ဒီးမ်ယွၤအိၣ်ဒီးနၤဒ်အအိၣ်တ့ၢ်ဒီးယပၢ်အသိးန့ၣ်တက့ၢ်.

14ဒီးနကဒုးနဲၣ်ယၤလၢယွၤအဘျုးအဖှိၣ်ထဲလၢယမူဒံးလၢယသုတသံတဂ့ၤဧိၤန့ၣ်တမ့ၢ်ဘၣ်. 15မ့မ့ၢ်တုၤယွၤဒီၣ်တဲာ်ကွံာ်စီၤဒၤဝံးအဒုၣ်အဒါလၢဟီၣ်ခိၣ်ချၢကိးအဂၤဒဲးဒီး,နတဒီၣ်တဲာ်ကွံာ်ဘၣ်နဘျုးနဖှိၣ်ဒီးယပှၤဟံၣ်ဖိလီၤစိၤလီၤထီလီၤ.

16ဒီးစီၤယိနၤသၣ်အၢၣ်လီၤအီလီၤတၢ်ဒီးစီၤဒၤဝံးအပှၤဟံၣ်ဖိ,ဒီးစံးဝဲဒၣ်,မ်ယွၤဃုတၢ်လၢစီၤဒၤဝံးအဒုၣ်အဒါအစုပူၤတက့ၢ်. 17ဒီးစီၤယိနၤသၣ်ဒုးဆိၣ်ကဒီးစီၤဒၤဝံးလၢအအဲၣ်အီၤအဃိလီၤ.အဂ့ၢ်ဒ်အံၤ,အဲၣ်အီၤဒ်အအဲၣ်လီၤအသးဒၣ်ဝဲအသိးန့ၣ်လီၤ.

18ဒီးစီၤယိနၤသၣ်စံးဘၣ်စီၤဒၤဝံး,ခဲဂီၤတနံၤမ့ၢ်လါထီၣ်သီအနံၤ,ဒီးပှၤကထံၣ်လၢနတအိၣ်ဘၣ်လီၤ.အဂ့ၢ်ဒ်အံၤ,နလီၢ်ဆ့ၣ်နီၤကအိၣ်ကလီလီၤ. 19ဒီးနအိၣ်သၢနံၤဝံၤဒီးလဲၤလီၤချ့ချ့,ဒီးလဲၤတုၤလၢတၢ်အလီၢ်ဖဲနပာ်ခူသူၣ်တ့ၢ်နသးလၢမၤတၢ်အမုၢ်တနံၤန့ၣ်,ဒီးနဘၣ်အိၣ်လၢလၢၢ်အၤစ့းလးအဃၢၤလီၤ.

20ဒီးယကခးပျၢ်သၢဘ့ၣ်လၢအကပၤ,ဒ်ယခးလၢတၢ်ပနီၣ်အသိးန့ၣ်လီၤ. 21ဒီးကွၢ်ကွၢ်,ယကမၢလီၤပှၤဖိၣ်သၣ်ခွါတဂၤ,ဒီးစံး,လဲၤဃုန့ၢ်ပျၢ်တက့ၢ်.ယမ့ၢ်စံးဘၣ်ပှၤဖိၣ်သၣ်ခွါန့ၣ်,ကွၢ်ကွၢ်,ပျၢ်တဖၣ်အိၣ်ဝဲလၢနအိၣ်ဆူအံၤတခီ,ဟံးန့ၢ်အီၤတက့ၢ်န့ၣ်ဒီး,ဟဲထီၣ်တက့ၢ်.အဂ့ၢ်ဒ်အံၤ,တၢ်အမုာ်အိၣ်ဒီးနၤ,ဒီးတၢ်အၢတအိၣ်ဘၣ်,ယွၤမူဝဲလီၤ. 22ဒီးယမ့ၢ်စံးဘၣ်ပှၤဖိၣ်သၣ်ခွါ,ကွၢ်ကွၢ်,ပျၢ်တဖၣ်အိၣ်လၢညါန့ၣ်ဒီး,လဲၤတၢ်တက့ၢ်.အဂ့ၢ်ဒ်အံၤ,ယွၤပျၢ်ကွံာ်နၤလီၤ.

23ဒီးတၢ်လၢပကတိၤတၢ်ယၤဒီးနၤလၢအဂ့ၢ်န့ၣ်,ကွၢ်ကွၢ်,မ်ယွၤအိၣ်လၢနၤဒီးယၤအဘၢၣ်စၢၤန့ၣ်လီၤထူလီၤယိာ်တက့ၢ်.

24ဒီးစီၤဒၤဝံးပာ်ခူသူၣ်အသးလၢတၢ်ပျီပူၤ,ဒီးတုၤလါထီၣ်သီအနံၤဒီး,စီၤပၤဆ့ၣ်နီၤဒ်သိးအကအီၣ်တၢ်လီၤ. 25ဒီးစီၤပၤဆ့ၣ်နီၤလၢအလီၢ်ဆ့ၣ်နီၤဒ်လီၢ်လီၢ်,လၢအလီၢ်ဆ့ၣ်နီၤလၢတၢ်ဒူၣ်အဃၢၤ,ဒီးစီၤယိနၤသၣ်ဂဲၤဆၢထၢၣ်,ဒီးစီၤအဘံန့ၢ်အိၣ်ဝဲလၢစီၤစီလူးအဃၢၤဒီးစီၤဒၤဝံးအလီၢ်အိၣ်ကလီလီၤ. 26ဘၣ်ဆၣ်ဒီးတၢ်လၢမုၢ်တနံၤန့ၣ်စီၤစီလူးတကတိၤဘၣ်တၢ်ဘၣ်.အဂ့ၢ်ဒ်အံၤ,ဆိကမိၣ်ဝဲ,တၢ်ဘၣ်အီၤတမံၤမံၤ,ဒီးတကဆှီဘၣ်,မ့ၢ်မးတကဆှီဘၣ်လီၤ.

27ဒီးတၢ်မၤအသးလၢမုၢ်ဆ့ၣ်ထီၣ်တနံၤန့ၣ်,လါထီၣ်ခံနံၤတနံၤန့ၣ်စီၤဒၤဝံးအလီၢ်အိၣ်ကလီ,ဒီးစီၤစီလူးစံးလၢအဖိခွါစီၤယိနၤသၣ်,မဟါတနံၤမ့ၢ်ဂ့ၤ,အအံၤတနံၤမ့ၢ်ဂ့ၤ,စီၤယံးၡဲအဖိခွါတဟဲအီၣ်တၢ်မ့ၢ်အဘၣ်မနုၤလဲၣ်.

28ဒီးစီၤယိနၤသၣ်စံးဆၢစီၤစီလူး,စီၤဒၤဝံးဃ့ယၤသပှၢ်တၢၢ်ဒ်သိးအကလဲၤတၢ်ဆူဘ့ၤသလ့ဃ့ၣ်, 29ဒီးစံးဝဲဒၣ်,ပျၢ်ယၤတက့ၢ်.အဂ့ၢ်ဒ်အံၤ,ပပှၤဟံၣ်ဖိမၤဘူၣ်တၢ်လၢဝ့ၢ်ပူၤ,ဒီးယဒီပုၢ်ဝဲၢ်မၤလိာ်ယၤ,ဒီးယမ့ၢ်ဘၣ်ဘျုးဘၣ်ဖှိၣ်လၢနမဲာ်ဒီး,ပျၢ်လၢ်ယၤဒ်သိးယကထံၣ်ယဒီပုၢ်ဝဲၢ်တဖၣ်န့ၣ်တက့ၢ်.မၤသးဒ်န့ၣ်ဒီးတဟဲဘၣ်ဝဲဆူစီၤပၤအစီၢ်နီၤခိၣ်ဘၣ်.

30ဒီးစီၤစီလူးအသးထီၣ်ဘၣ်စီၤယိနၤသၣ်,ဒီးစံးဘၣ်အီၤ,နဲဒၣ်ပှၤအနၢ်က့ၣ်,ဒီးတၢ်ပူထီၣ်အဖိဧၢ,နဃုထၢစီၤယံးၡဲအဖိခွါလၢနမဲာ်ဆှးဒၣ်နဲအဂီၢ်,ဒီးလၢနမိၢ်အတၢ်အိၣ်ဘ့ၣ်ဆ့အတၢ်မဲာ်ဆှးအဂီၢ်န့ၣ်,ယတသ့ၣ်ညါဘၣ်ဧါ. 31အဂ့ၢ်ဒ်အံၤ,မုၢ်နံၤတဖၣ်လၢစီၤယံးၡဲအဖိခွါမူဝဲလၢဟီၣ်ခိၣ်ချၢခဲလၢာ်န့ၣ်နဲဒၣ်မ့ၢ်ဂ့ၤ,နဘီနမုၢ်မ့ၢ်ဂ့ၤ,တအိၣ်ကျၢၤဘၣ်.ဒီးခဲကနံၣ်အံၤ,မၢလီၤတၢ်,ဒီးဟဲစိာ်အီၤဆူယအိၣ်တက့ၢ်.အဂ့ၢ်ဒ်အံၤ,မ့ၢ်တၢ်သံဖိလီၤ.

32ဒီးစီၤယိနၤသၣ်စံးဆၢအပၢ်စီၤစီလူး,ဒီးစံးဘၣ်အီၤ,ကဘၣ်တၢ်မၤသံအီၤမ့ၢ်အဘၣ်မနုၤလဲၣ်,မ့ၢ်အမၤမနုၤတမံၤလဲၣ်.

33ဒီးစီၤစီလူးဆဲးဘီတဘ့ၣ်ဒ်သိးအကဆဲးဘၣ်အီၤလီၤ.ဒီးစီၤယိနၤသၣ်သ့ၣ်ညါဝဲလၢအပၢ်တိာ်ဝဲလၢအကမၤသံစီၤဒၤဝံးလီၤ. 34ဒီးစီၤယိနၤသၣ်အသးထီၣ်ကဲၤထီၣ်,ဒီးဂဲၤဆၢထၢၣ်လၢစီၢ်နီၤခိၣ်,ဒီးလါထီၣ်ခံနံၤတနံၤန့ၣ်တအီၣ်ဘၣ်တၢ်ဘၣ်.အဂ့ၢ်ဒ်အံၤ,အသးတမုာ်ဘၣ်လၢစီၤဒၤဝံးအဃိလီၤ.အဂ့ၢ်ဒ်အံၤ,အပၢ်ဒုးမဲာ်ဆှးအီၤလီၤ.

35ဒီးမုၢ်ဆ့ၣ်ထီၣ်န့ၣ်တၢ်မၤအသးလၢစီၤယိနၤသၣ်ဖဲအဆၢအကတီၢ်လၢအသ့ၣ်ပာ်ဒီးစီၤဒၤဝံးန့ၣ်လဲၤထီၣ်ဆူတၢ်ပျီပူၤ,ဒီးဖိၣ်သၣ်ခွါတဂၤအိၣ်ဒီးအီၤလီၤ.

36ဒီးစံးဘၣ်ဖိၣ်သၣ်ခွါတဂၤန့ၣ်ဃ့ၢ်ဃုန့ၢ်ပျၢ်တဖၣ်လၢယကခးအီၤတက့ၢ်.ဒီးဖိၣ်သၣ်ခွါဃ့ၢ်အဖၢမုၢ်ဒီး,ခးဝဲပျၢ်တဘ့ၣ်လၢအမဲာ်ညါလီၤ.

37ဒီးတုၤဖိၣ်သၣ်ခွါလဲၤတုၤလၢပျၢ်လၢစီၤယိနၤသးခးဝဲအလီၢ်ဒီး,စီၤယိနၤသၣ်ကိးထီၣ်ထွဲဖိၣ်သၣ်ခွါအခံ,ဒီးစံးဝဲဒၣ်,ပျၢ်အိၣ်လၢညါတမ့ၢ်ဘၣ်ဧါ. 38ဒီးစီၤယိနၤသၣ်ကိးထီၣ်ထွဲဖိၣ်သၣ်ခွါအခံ,မၤချ့ချ့,ဃ့ၢ်,အိၣ်ဒၣ်ကလိာ်တဂ့ၤ.ဒီးစီၤယိနၤသၣ်အဖိၣ်သၣ်ခွါထၢထီၣ်အပျၢ်တဖၣ်,ဒီးဟဲက့ၤဆူအကစၢ်အအိၣ်လီၤ.

39ဒီးဖိၣ်သၣ်ခွါန့ၣ်တသ့ၣ်ညါဘၣ်တၢ်ဘၣ်,သ့ၣ်ညါထဲစီၤယိနၤသၣ်ဒီးစီၤဒၤဝံးဧိၤလီၤ. 40ဒီးစီၤယိနၤသၣ်ဟ့ၣ်အစုကဝဲၤလၢဖိၣ်သၣ်ခွါလၢအအိၣ်ဒီးအီၤ,ဒီးစံးဘၣ်အီၤ,လဲၤစိာ်ဆူဝ့ၢ်ပူၤတက့ၢ်.

41ဒီးဖိၣ်သၣ်ခွါန့ၣ်ဟးထီၣ်ကွံာ်ဝံၤဒီး,စီၤဒၤဝံးဂဲၤဆၢထၢၣ်လၢအလီၢ်လၢကလံၤထံးတခီ,ဒီးထိၣ်လီၤပှီၤအသး,ဒီးဆုးလီၤအခိၣ်သၢစု,ဒီးနၢမူလိာ်အသး,ဒီးအမဲာ်ထံလီၤဝဲခံဂၤလိာ်,ဒီးစီၤဒၤဝံးမၤအါတက့ၢ်လီၤ.

42ဒီးစီၤယိနၤသၣ်စံးဘၣ်စီၤဒၤဝံး,လဲၤတၢ်မုာ်မုာ်တက့ၢ်.အဂ့ၢ်ဒ်အံၤပဆိၣ်တၢ်ခံဂၤလိာ်လၢယွၤအမံၤ,ဒီးစံးမ်ယွၤအိၣ်ဒီးယၤဒီးနၤအဘၢၣ်စၢၤ,ဒီးလၢယချံယသၣ်ဒီးနချံနသၣ်အဘၢၣ်စၢၤ,လီၤထူလီၤယိာ်တက့ၢ်.ဒီးစီၤဒၤဝံးဂဲၤဆၢထၢၣ်,ဒီးဟးဝဲ,ဒီးစီၤယိနၤသၣ်က့ၤကဒါက့ၤဆူဝ့ၢ်ပူၤလီၤ.