1 Thessalonians 2
1အဂ့ၢ်ဒ်အံၤ,ပုၢ်သ့ၣ်ဝဲၢ်သ့ၣ်ဧၢ,သုသ့ၣ်ညါသုကစၢ်ဒၣ်သုဝဲ,လၢပလဲၤနုာ်ဆူသုအိၣ်တမ့ၢ်ဘၣ်တၢ်ကလီကလီဘၣ်. 2မ့မ့ၢ်ဒ်သုသ့ၣ်ညါအသိး,ပဘၣ်တၢ်နးတၢ်ဖှီၣ်,ဒီးတၢ်မၤအၢမၤနးပှၤလၢဖံလံးပံၤအပူၤနာ်သက့ဒီး.ပအိၣ်ဒီးပသးခူတလ့ၢ်လၢပယွၤအပူၤဒ်သိးပကစံၣ်တဲၤတဲလီၤသုလၢယွၤအတၢ်သးခုအကစီၣ်,လၢတၢ်ဂ့ၤလိာ်ဘှီလိာ်အါအါကလဲာ်အပူၤလီၤ. 3အဂ့ၢ်ဒ်အံၤ,ပသဆၣ်ထီၣ်သုခံန့ၣ်တဟဲဘၣ်လၢတၢ်နာ်ကမၣ်,တၢ်အဲၣ်တလ့ၤအဲၣ်တဘီ,ဒီးတၢ်လီတၢ်ဝ့ၤဘၣ်. 4မ့မ့ၢ်ဒ်ယွၤပာ်ပှၤလၢအဂ့ၤအးလီၤတၢ်သးခုအကစီၣ်လၢပစုပူၤအသိးန့ၣ်,ပကတိၤတၢ်ဒ်န့ၣ်သိးလီၤ.ဒ်သိးပကမၤဘၣ်ပှၤကညီအသးတမ့ၢ်ဘၣ်,မ့ၢ်ယွၤလၢအမၤကွၢ်ပသူၣ်ပသးတဂၤအသးလီၤ. 5အဂ့ၢ်ဒ်အံၤ,ဒ်သုသ့ၣ်ညါတၢ်အသိးန့ၣ်,ပတကတိၤလွဲဘၣ်တၢ်နီတစုဘၣ်,ပတသးကွံဘၣ်တၢ်ဘၣ်ဃးဒီးတၢ်လီတၢ်ဝ့ၤဘၣ်,ယွၤမ့ၢ်တၢ်အုၣ်အသးလၢပဂီၢ်လီၤ. 6ပမ့ၢ်ခရံာ်အပှၤတၢ်မၢဖိသတးဒီး,ပပာ်ဒိၣ်ပာ်ထီပသးသ့ဘၣ်ဆၣ်ဒီးလၢသုမ့ၢ်ဂ့ၤ,လၢပှၤဂၤမ့ၢ်ဂ့ၤ,ပတဃုဘၣ်တၢ်လၤတၢ်ကပီၤလၢပှၤကညီဘၣ်. 7မ့မ့ၢ်ပမ့ၢ်ပှၤအသးစူၤလၢသုကျါဒ်ပှၤကွၢ်ဖိအံးက့ၤကွၢ်က့ၤအဖိဒၣ်ဝဲအသိးလီၤ. 8ဒ်န့ၣ်အသိး,မ့ၢ်ပအဲၣ်သုဒီး,ပသးအိၣ်ထဲလၢပကဟ့ၣ်သုလၢယွၤအတၢ်သးခုအကစီၣ်ဧိၤတမ့ၢ်ဘၣ်,မ့ၢ်လၢပသးသမူဒၣ်လဲာ်စ့ၢ်ကီးလီၤ.အဂ့ၢ်ဒ်အံၤ,သုမ့ၢ်ပှၤလၢပအဲၣ်အီၤလီၤ. 9အဂ့ၢ်ဒ်အံၤ,ပုၢ်သ့ၣ်ဝဲၢ်သ့ၣ်ဧၢ,ပမၤတၢ်သပှၢ်ပှၢ်ဒီးပမၤတၢ်တုၤတၢ်ဘှံးပသးန့ၣ်,သုသ့ၣ်နီၣ်ထီၣ်က့ၤလီၤ.ပမၤတၢ်လၢမုၢ်ဆါဆဲးလၢမုၢ်နၤ,ဒ်သိးပသုတပာ်တၢ်ဃၢလၢသုလိၤနီတဂၤတဂ့ၤဒီး,ပစံၣ်တဲၤတဲလီၤသုလၢယွၤအတၢ်သးခုအကစီၣ်န့ၣ်လီၤ. 10သုမ့ၢ်ပှၤအုၣ်အသး,ဒီးယွၤစ့ၢ်ကီး,လၢပအိၣ်စီစီဆှံဆှံ,ဒီးတီတီလိၤလိၤ,ဒီးတၢ်ပာ်တၢ်ကမၣ်လၢပလိၤအလီၢ်တအိၣ်ဘၣ်လၢပှၤစူၢ်က့ၤနာ်က့ၤသုဝဲအကျါဒ်လဲၣ်ဒ်လဲၣ်န့ၣ်လီၤ. 11ဒ်န့ၣ်အသိး,သုသ့ၣ်ညါလၢပသဆၣ်ထီၣ်သုခံတဂၤဒီးတဂၤ,ဒီးပမၤမုာ်ထီၣ်က့ၤသုသး,ဒီးပအုၣ်ပသးလၢသုဒ်လဲၣ်ဒ်လဲၣ်,ဒ်ပၢ်မၤအဖိဒၣ်ဝဲအသိး, 12ဒ်သိးသုကလဲၤတၢ်ဒ်အကြၢးဒီးယွၤလၢအကိးက့ၤသုဆူအဘီအမုၢ်,ဒီးအလၤကပီၤအပူၤအသိးန့ၣ်လီၤ. 13မ်ဒ်န့ၣ်ဒီး,ပစံးထီၣ်ပတြၢၤယွၤအဘျုးအဖှိၣ်တထံၣ်ဃီစ့ၢ်ကီးလီၤ.အဂ့ၢ်ဒ်အံၤ,လၢသုဒိးန့ၢ်ယွၤအကလုၢ်အကထါလၢသုနၢ်ဟူလၢပှၤန့ၣ်သုတဒိးန့ၢ်ဘၣ်အီၤဒ်ပှၤကညီအကလုၢ်အသိးဘၣ်.မ့မ့ၢ်သုဒိးန့ၢ်အီၤဒ်အမ့ၢ်နီၢ်နီၢ်အသိး,လၢယွၤလၢအမၤတၢ်လၢပှၤစူၢ်က့ၤနာ်က့ၤတၢ်သုဝဲအပူၤအကလုၢ်န့ၣ်လီၤ. 14အဂ့ၢ်ဒ်အံၤ,ပုၢ်သ့ၣ်ဝဲၢ်သ့ၣ်ဧၢ,သုကဲထီၣ်ပှၤကွၢ်လိယွၤအတၢ်အိၣ်ဖှိၣ်တဖၣ်လၢယ့ၣ်ရှူးခရံာ်အပူၤလၢကီၢ်ယူဒၤလီၤ.အဂ့ၢ်ဒ်အံၤ,သုဘၣ်တၢ်စ့ၢ်ကီးလၢသုပှၤကလုာ်ဒၣ်သုဝဲအစုပူၤ,ဒ်အဝဲသ့ၣ်ဘၣ်တၢ်လၢပှၤယူဒၤဖိအစုပူၤ, 15လၢအမၤသံကစၢ်ယ့ၣ်ရှူးဒီးဝံတဖၣ်,ဒီးမၤအၢမၤနးပှၤ,ဒီးတလူၤဘၣ်ယွၤအသးဘၣ်,ဒီးကဲထီၣ်ပှၤခဲလၢာ်အဒုၣ်အဒါတဖၣ်, 16ဒီးတြီပှၤဒ်သိးပသုတစံၣ်တဲၤတဲလီၤတၢ်လၢပှၤကလုာ်တဖၣ်လၢအကတုၤလၢတၢ်အုၣ်က့ၤခီၣ်က့ၤအီၤတဂ့ၤသတးဒီး,မၤပှဲၤထီၣ်အတၢ်ကမၣ်တဘိယူၢ်ဃီလီၤ.ဘၣ်ဆၣ်ဒီးတၢ်သးဒိၣ်ထီၣ်ဟဲဘၣ်လၢအလိၤတုၤအလၢာ်န့ၣ်လီၤ. 17ဒီးပုၢ်သ့ၣ်ဝဲၢ်သ့ၣ်ဧၢ,ပဝဲဒၣ်အံၤပလီၤဖးဒီးသုတမ့ၢ်ဘၣ်လၢပသူၣ်ပသးဘၣ်,မ့ၢ်လၢပမဲာ်န့ၣ်လီၤ.ဒီးပသးသယုၢ်ဘၣ်သုဒိၣ်မး,ဒီးဒ်သိးပကထံၣ်ဘၣ်သုမဲာ်ဒီး,ပကျဲးစၢးတၢ်သပှၢ်ပှၢ်လီၤ. 18မၤသးဒ်န့ၣ်ဒီး,ပသးအိၣ်လၢပကလဲၤဆူသုအိၣ်,ယၤစီၤပီလူး,တဘျီဒီးခံဘျီ,ဒီးမုၣ်ကီၤလံၢ်တြီပှၤလီၤ. 19အဂ့ၢ်ဒ်အံၤ,ပတၢ်မုၢ်လၢ်မ့ၢ်ဂ့ၤ,ပတၢ်သးခုမ့ၢ်ဂ့ၤ,ပတၢ်သူၣ်ဖှံသးညီအခိၣ်သလုးမ့ၢ်ဂ့ၤ,မ့ၢ်တၢ်မနုၤလဲၣ်.မ့ၢ်သုဝဲလၢကစၢ်ယ့ၣ်ရှူးခရံာ်အမဲာ်ညါဖဲအဟဲန့ၣ်တမ့ၢ်ဘၣ်ဧါ. 20အဂ့ၢ်ဒ်အံၤ,သုဝဲဒၣ်အံၤ,သုမ့ၢ်ပလၤကပီၤ,ဒီးပတၢ်သးခုန့ၣ်လီၤ.
Copyright information for
KswSKMB