1Ti 3 | KswSKMB | STEP | တၢ်ကတိၤလၢအမ့ၢ်အတီတထံၣ်မ့ၢ်အအံၤ,ပှၤတဂၤဂၤမ့ၢ်ဆၢကဲထီၣ်လၢပှၤကွၢ်တၢ်ဒီး,မ့ၢ်အဆၢတၢ်မၤလၢအဂ့ၤတမံၤလီၤ.

‏ 1 Timothy 3

1 တၢ်ကတိၤလၢအမ့ၢ်အတီတထံၣ်မ့ၢ်အအံၤ,ပှၤတဂၤဂၤမ့ၢ်ဆၢကဲထီၣ်လၢပှၤကွၢ်တၢ်ဒီး,မ့ၢ်အဆၢတၢ်မၤလၢအဂ့ၤတမံၤလီၤ. 2 မၤသးဒ်န့ၣ်ဒီးပှၤကွၢ်တၢ်န့ၣ်ဘၣ်မ့ၢ်ပှၤလၢတၢ်ပာ်တၢ်ကမၣ်လၢအလိၤအလီၢ်တအိၣ်ဘၣ်,ပှၤအိၣ်ဒီးအမါတဂၤဧိၤ,ပှၤခိးအသး,ပှၤပာ်အသးသပှၢ်ပှၢ်,ပှၤကဒုလီၤတံၢ်,ပှၤအဲၣ်ပှၤတမှံၤ,ပှၤသိၣ်လိတၢ်သ့လီၤ. 3 တမ့ၢ်ဘၣ်ပှၤအိၣ်လၢစပံးထံအဃၢၤ,ဒီးပှၤတီၢ်တၢ်ဘၣ်.မ့ၢ်ပှၤပာ်အသးခုၣ်ခုၣ်မုာ်မုာ်,ပှၤတအ့ၣ်လိာ်ဆိးက့ဘၣ်,ပှၤတသးကွံစ့လၢအလၤကပီၤတအိၣ်ဘၣ်, 4 ပှၤလၢအစံၣ်ညီၣ်အဟံၣ်ဒၣ်ဝဲဂ့ၤဂ့ၤဘၣ်ဘၣ်,ပှၤလၢအသိၣ်နၢၤအဖိအလံၤ,အိၣ်ဒီးအသူၣ်ဂၢၢ်သးကျၢၤခဲလၢာ်လီၤ. 5 အဂ့ၢ်ဒ်အံၤ,ပှၤဂ့ၤစံၣ်ညီၣ်အဟံၣ်ဒၣ်ဝဲဒ်လဲၣ်ဒ်လဲၣ်န့ၣ်,မ့ၢ်တသ့ၣ်ညါဘၣ်ဒီး,ကွၢ်ယွၤအတၢ်အိၣ်ဖှိၣ်ကသ့ဒ်လဲၣ်. 6 တမ့ၢ်ဘၣ်ပှၤကဲထီၣ်သီအပျဲၢ်အဘီၣ်ဘၣ်ဒ်သိးအသုတပာ်ထီၣ်ထီအသး,ဒီးလီၤတဲာ်ဆူမုၣ်ကီၤလံၢ်အတၢ်လီၤကမၣ်အပူၤတဂ့ၤလီၤ. 7 ဒီးဘၣ်အိၣ်ဒီးတၢ်အုၣ်အသးဂ့ၤလၢပှၤအိၣ်လၢခိစ့ၢ်ကီး,ဒ်သိးတၢ်ဒုၣ်ဒွဲၣ်,ဒီးမုၣ်ကီၤလံၢ်အပျံၤသကွီၤသုတဘၣ်အီၤတဂ့ၤလီၤ.

8 ဒ်န့ၣ်အသိးတၢ်အိၣ်ဖှိၣ်အခ့အပှၤတဖၣ်န့ၣ်,ဘၣ်မ့ၢ်ပှၤလၢအသူၣ်ဂၢၢ်သးကျၢၤ,တမ့ၢ်ဘၣ်ပှၤအပျ့ၤခံဘ့ၣ်,ပှၤအီစပံးထံလၢအအါ,ပှၤမၤတၢ်လၢအလၤအကပီၤတအိၣ်ဒ်သိးအကန့ၢ်စ့ဘၣ်. 9 ဒီးဘၣ်ဟံးဃာ်တၢ်ခူသူၣ်ဘၣ်ဃးဒီးတၢ်နာ်,လၢအသးလၢအသ့ၣ်ညါဒၣ်တၢ်လၢအဂ့ၤအပူၤလီၤ. 10 ဒီးပှၤတဖၣ်အံၤစ့ၢ်ကီး,မ်အဘၣ်ဆိတၢ်မၤကွၢ်အီၤဒီး,လၢခံက့ၤ,ပာ်တၢ်ကမၣ်လၢအလိၤအလီၢ်မ့ၢ်တအိၣ်ဘၣ်ဒီး,မ်အမၤတၢ်အိၣ်ဖှိၣ်အခ့အပှၤအတၢ်တက့ၢ်.

11 ဒ်န့ၣ်အသိးပိာ်မုၣ်တဖၣ်န့ၣ်,ဘၣ်မ့ၢ်ပှၤလၢအသူၣ်ဂၢၢ်သးကျၢၤ,တမ့ၢ်ဘၣ်ပှၤဒုၣ်ဒွဲၣ်တၢ်ဘၣ်,ဘၣ်မ့ၢ်ပှၤခိးအသး,ပှၤလၢအကလုၢ်တီလၢတၢ်ခဲလၢာ်န့ၣ်လီၤ.

12 တၢ်အိၣ်ဖှိၣ်အခ့အပှၤန့ၣ်,မ်အအိၣ်ဒီးအမါတဂၤဧိၤတက့ၢ်.မ်အစံၣ်ညီၣ်အဖိအလံၤ,ဒီးအဟံၣ်ဒၣ်ဝဲဂ့ၤဂ့ၤဘၣ်ဘၣ်တက့ၢ်. 13 အဂ့ၢ်ဒ်အံၤ,ပှၤလၢအမၤတၢ်အိၣ်ဖှိၣ်အခ့အပှၤအတၢ်ဂ့ၤဂ့ၤဘၣ်ဘၣ်တဖၣ်န့ၣ်,န့ၢ်ဘၣ်အလီၢ်ဂ့ၤလၢအကစၢ်ဒၣ်ဝဲအဂီၢ်,ဒီးအသးခူတလ့ၢ်အါလၢတၢ်နာ်ယ့ၣ်ရှူးခရံာ်အပူၤလီၤ.

14 ယမုၢ်လၢ်လၢယကဟဲဆူနအိၣ်ချ့ချ့ဘၣ်ဆၣ်ဒီး,ယကွဲးန့ၢ်နၤလၢတၢ်န့ၣ်တဖၣ်, 15 ဒ်သိးယမ့ၢ်အိၣ်ဃဲးဃဲးနာ်သက့ဒီး,နကသ့ၣ်ညါလၢနဂ့ၤမၤနသးဒ်လဲၣ်ဒ်လဲၣ်လၢယွၤအဟံၣ်ပူၤ,လၢအမ့ၢ်ယွၤလၢအမူဝဲအတၢ်အိၣ်ဖှိၣ်,တၢ်မ့ၢ်တၢ်တီအထူၣ်,ဒီးအခီၣ်ထံးလီၤ. 16 ဒီးပဘၣ်အၢၣ်လီၤအီလီၤလၢတၢ်ခူသူၣ်ဘၣ်ဃးဒီးတၢ်ယူးတၢ်ယီၣ်ယွၤန့ၣ်,မ့ၢ်အဒိၣ်အယိာ်လီၤ.ယွၤအိၣ်ဖျါထီၣ်လၢတၢ်ဖံးတၢ်ညၣ်အပူၤ,ဘၣ်တၢ်ပာ်တီပာ်လိၤအီၤလၢသးန့ၣ်,ဘၣ်တၢ်ထံၣ်ဘၣ်အီၤလၢကလူးတဖၣ်,ဘၣ်တၢ်စံၣ်တဲၤတဲလီၤအီၤလၢပှၤကလုာ်တဖၣ်အကျါ,ဘၣ်တၢ်စူၢ်က့ၤနာ်က့ၤအီၤလၢဟီၣ်ခိၣ်ချၢ,ဘၣ်တၢ်ဟံးထီၣ်က့ၤအီၤဆူတၢ်လၤတၢ်ကပီၤအပူၤန့ၣ်လီၤ.