2 Chronicles 14
1ဒီးစီၤအဘံယၤမံဝဲဒီးအပၢ်တဖၣ်,ဒီးပှၤခူၣ်လီၤကွံာ်အီၤလၢစီၤဒၤဝံးအဝ့ၢ်ပူၤ,ဒီးအဖိခွါစီၤအၤစါကဲထီၣ်စီၤပၤလၢအလီၢ်န့ၣ်လီၤ.လၢအမုၢ်နံၤတဖၣ်န့ၣ်ထံဧိၤကီၢ်ဧိၤအိၣ်မုာ်ဝဲဆံဆဲၣ်နံၣ်လီၤ. 2ဒီးစီၤအၤစါမၤတၢ်လၢအဂ့ၤ,ဒီးတၢ်လၢအလိၤလၢယွၤအကစၢ်အမဲာ်လီၤ. 3ဒီးမၤဟးဂီၤကွံာ်ပှၤတခီဘီမုၢ်ဖိအတၢ်လုၢ်လီၢ်တဖၣ်,ဒီးတၢ်အလီၢ်ထီၣ်ထီတဖၣ်,ဒီးမၤကၢ်လီၤကလဲကွံာ်တၢ်ဂီၤတဖၣ်,ဒီးကူာ်ကွံာ်အရှ့ရၤ, 4ဒီးမၤလိာ်ယူဒၤဒ်သိးအကဃုန့ၢ်ယွၤအပၢ်တဖၣ်အကစၢ်,ဒီးတိၢ်န့ၢ်တၢ်သိၣ်တၢ်သီ,ဒီးတၢ်မၤလိာ်လီၤ. 5ဒီးမၤဟးဂီၤကွံာ်တၢ်အလီၢ်ထီၣ်ထီတဖၣ်,ဒီးတၢ်ဂီၤတဖၣ်လၢယူဒၤအဝ့ၢ်ခဲလၢာ်အပူၤ,ဒီးဘီမုၢ်အိၣ်ဘှီၣ်ကလာ်လၢအမဲာ်ညါလီၤ. 6ဒီးတ့ဝ့ၢ်အိၣ်ဝဲဒီးအခိၣ်ဒူတဖၣ်လၢယူဒၤအပူၤလီၤ.အဂ့ၢ်ဒ်အံၤ,ထံဧိၤကီၢ်ဧိၤအိၣ်ဘှံးဝဲလီၤ.ဒီးတၢ်ဒုးတၢ်တအိၣ်လၢၤဘၣ်လၢနံၣ်တဖၣ်အပူၤဘၣ်.အဂ့ၢ်ဒ်အံၤ,ယွၤဒုးအိၣ်ဘှံးအီၤလီၤ. 7ဒီးစံးလၢယူဒၤ,မ်ပတ့ဝ့ၢ်တဖၣ်အံၤ,ဒီးမၤဝးတရံးအီၤလၢခိၣ်ဒူ,ဒီးတၢးထီ,ဒီးတြဲၤ,ဒီးနီၣ်ဘိတက့ၢ်.ထံဧိၤကီၢ်ဧိၤအိၣ်ဒံးလၢပမဲာ်ညါလီၤ.အဂ့ၢ်ဒ်အံၤ,ပဃုယွၤပကစၢ်လီၤ.ပဃုအီၤ,ဒီးဒုးအိၣ်ဘှံးပှၤတခီလၢ်လၢ်လီၤ.ဒီးတ့ဝဲ,ဒီးဘီၣ်ထီၣ်ညီထီၣ်လီၤ. 8ဒီးစီၤအၤစါအိၣ်ဝဲဒီးပှၤသုးမုၢ်လၢအစိာ်ကတီၤ,ဒီးဘီဧိၤနးဧိၤ,လၢယူဒၤအကျါန့ၣ်ပှၤသၢကလီၤ,ဒီးပှၤလၢအစိာ်ကတီၤ,ဒီးသူထီၣ်ချံၣ်လၢဘံၣ်ယၤမံၣ်အကျါန့ၣ်ပှၤခံကလီၤဃိးကလးလီၤ.အဝဲသ့ၣ်တဖၣ်န့ၣ်ခဲလၢာ်မ့ၢ်ပှၤအဒိၣ်အဆူၣ်လီၤ. 9ဒီးပှၤကူၤၡးဖိစီၤစ့ရၤဟဲထီၣ်ထီဒါအီၤ,အိၣ်ဒီးပှၤသုးဖိတကကွဲၢ်,ဒီးလ့ၣ်ကဟၣ်သၢကယၤ,ဒီးဟဲဝဲဆူမရ့ၡၤလီၤ. 10ဒီးစီၤအၤစါလဲၤထီၣ်ထီဒါအီၤ,ဒီးကတဲာ်ကတီၤတၢ်ဒုးသုးလၢကစၢၢ်ကဆူးစဖၤသးလၢမရ့ၡၤအပူၤလီၤ. 11ဒီးစီၤအၤစါကိးထီၣ်ယွၤအကစၢ်ဒီးစံးဝဲဒၣ်,ယွၤဧၢ,လၢအအါမ့ၢ်ဂ့ၤ,လၢအစှၤမ့ၢ်ဂ့ၤ,နမၤစၢၤတၢ်ဒ်သိးသိးလီၤ.မၤစၢၤပှၤတက့ၢ်,ယွၤပကစၢ်ဧၢ,အဂ့ၢ်ဒ်အံၤ,ပသန့ၤပသးလၢနၤ,ဒီးပလဲၤထီဒါပှၤဂီၢ်မုၢ်ဖးဒိၣ်အံၤလၢနမံၤလီၤ.ယွၤဧၢ,နမ့ၢ်ပကစၢ်လီၤ.မ်ပှၤကညီအသုတမၤနၢၤနၤတဂ့ၤ. 12ဒီးယွၤကျီကွံာ်ပှၤကူၤၡးဖိလၢစီၤအၤစါအမဲာ်ညါ,ဒီးလၢယူဒၤအမဲာ်ညါ,ဒီးပှၤကူၤၡးဖိဃ့ၢ်ကွံာ်ဝဲလီၤ. 13ဒီးစီၤအၤစါ,ဒီးပှၤဂီၢ်မုၢ်လၢအအိၣ်ဒီးအီၤန့ၣ်လူၤအီၤပၢၢ်လၢကရၢ်,ဒီးပှၤကူၤၡးဖိလီၤဃံၤဝဲ,ဒီးမူထီၣ်က့ၤဝဲတသ့ဘၣ်.အဂ့ၢ်ဒ်အံၤ,ဟးဂီၤဝဲလၢယွၤအမဲာ်ညါ,ဒီးလၢအပှၤသုးမုၢ်အမဲာ်ညါလီၤ.ဒီးပှၤစိာ်ထီၣ်ကွံာ်တၢ်ဂုာ်န့ၢ်အါအါကလဲာ်လီၤ. 14ဒီးကျီကွံာ်ဝ့ၢ်အိၣ်ဝးတရံးကရၢ်ခဲလၢာ်လီၤ.အဂ့ၢ်ဒ်အံၤ,တၢ်ပျံၤယွၤလီၤဘၣ်အီၤလီၤ.ဒီးဂုာ်န့ၢ်ဝ့ၢ်ခဲလၢာ်အတၢ်ဖိတၢ်လံၤလီၤ.မ့ၢ်အတၢ်ဖိတၢ်လံၤအိၣ်ဝဲလၢအပူၤအါအါကလဲာ်အဂ့ၢ်လီၤ. 15ဒီးကျီကွံာ်ဆၣ်ဖိကီၢ်ဖိအဒၢတဖၣ်အဒဲ,ဒီးစိာ်ထီၣ်ကွံာ်သိ,ဒီးမဲာ်တဲးလဲး,ဒီးကီၤလၤအူးအါအါကလဲာ်,ဒီးက့ၤက့ၤဝဲဆူယရူၤၡလ့ၣ်လီၤ.
Copyright information for
KswSKMB