2Ch 16 | KswSKMB | STEP | ဒီးလၢစီၤအၤစါကဲစီၤပၤသၢဆံဃုနံၣ်တနံၣ်န့ၣ်အံၣ်စရ့လးအစီၤပၤဘါၡၤန့ၣ်လဲၤထီဒါယူဒၤ,ဒီးတ့ရၤမါဒ်သိးအကတြီပှၤလဲၤထီၣ်,ဒီးဟဲနုာ်လၢယူဒၤအစီၤပၤအၤစါအအိၣ်လီၤ.

‏ 2 Chronicles 16

1 ဒီးလၢစီၤအၤစါကဲစီၤပၤသၢဆံဃုနံၣ်တနံၣ်န့ၣ်အံၣ်စရ့လးအစီၤပၤဘါၡၤန့ၣ်လဲၤထီဒါယူဒၤ,ဒီးတ့ရၤမါဒ်သိးအကတြီပှၤလဲၤထီၣ်,ဒီးဟဲနုာ်လၢယူဒၤအစီၤပၤအၤစါအအိၣ်လီၤ.

2 ဒီးစီၤအၤစါဟံးန့ၢ်ကျိၣ်ဧိၤစ့ဧိၤ,ဒီးထူဧိၤလွဲဧိၤလၢယွၤအဟံၣ်အပာ်ဖှိၣ်အပူၤ,ဒီးလၢစီၤပၤအဟံၣ်အပာ်ဖှိၣ်အလီၢ်ပူၤ,ဒီးဟ့ၣ်ယုၢ်ဝဲဆူစူၤရံအစီၤပၤဘ့ၣ်ဟဒးလၢအအိၣ်ဝဲဆိးဝဲလၢဒၤမ့ၤစ့းအပူၤ,ဒီးစံးဝဲဒၣ်, 3 တၢ်အၢၣ်လီၤအီလီၤအိၣ်ဝဲဒီးယၤဒီးနၤ,ဒ်ယပၢ်ဒီးနပၢ်အသိးန့ၣ်လီၤ.ကွၢ်ကွၢ်,ယဟ့ၣ်ယုၢ်နၤလၢကျိၣ်ဧိၤစ့ဧိၤ,ဒီးထူဧိၤလွဲဧိၤလီၤ.ဒီးမၤဟးဂီၤနတၢ်အၢၣ်လီၤအီလီၤဒီးအံၣ်စရ့လးအစီၤပၤဘါၡၤဒ်သိးအကဟးထီၣ်ကွံာ်လၢယအိၣ်တက့ၢ်.

4 ဒီးစီၤဘ့ၣ်ဟဒးဒိကနၣ်စီၤပၤအၤစါအကလုၢ်,ဒီးမၢလီၤအပှၤသုးမုၢ်အခိၣ်တဖၣ်ထီဒါအံၣ်စရ့လးအဝ့ၢ်တဖၣ်,ဒီးကျီကွံာ်ဧံၤယိၣ်,ဒီးဒၣ်,ဒီးအၤဘ့ၤလးမဲၣ်,ဒီးနးသၤလံအဝ့ၢ်ပာ်ဖှိၣ်တၢ်ခဲလၢာ်လီၤ.

5 ဒီးတုၤစီၤဘါၡၤနၢ်ဟူဝဲဒီး,တၢ်မၤအသးလၢအတ့ရၤမါန့ၣ်အိၣ်ကတီၢ်ဝဲ,ဒီးပာ်တ့ၢ်အတၢ်မၤလီၤ.

6 ဒီးစီၤပၤအၤစါဟံးန့ၢ်ယူဒၤခဲလၢာ်,ဒီးပှၤစိာ်ထီၣ်ကွံာ်ရၤမါအလၢၢ်တဖၣ်,ဒီးအသ့ၣ်တဖၣ်လၢစီၤဘါၡၤမၤဝဲလၢအီၤလီၤ.ဒီးတ့က့ဘၢ်,ဒီးမံးစပၤလၢအီၤလီၤ.

7 ဒီးလၢအကတီၢ်ဖဲန့ၣ်ပှၤထံၣ်တၢ်စီၤဃနၤနံဟဲဝဲဆူယူဒၤအစီၤပၤအၤစါအအိၣ်,ဒီးစံးဘၣ်အီၤ,မ့ၢ်နသန့ၤနသးလၢစူၤရံအစီၤပၤ,ဒီးတသန့ၤဘၣ်နသးလၢယွၤနကစၢ်ဘၣ်ဒီး,စူၤရံအစီၤပၤအပှၤသုးမုၢ်ပူၤဖျဲးလၢနစုပူၤလီၤ. 8 ပှၤကူၤၡးဖိ,ဒီးပှၤလူဘးဖိမ့ၢ်ပှၤသုးမုၢ်ဂီၢ်မုၢ်အိၣ်ဒီးလ့ၣ်ကဟၣ်,ဒီးပှၤကသ့ၣ်သုးဖိအါအါကလဲာ်,တမ့ၢ်ဘၣ်ဧါ.ဘၣ်ဆၣ်ဒီးမ့ၢ်နသန့ၤနသးလၢယွၤသတးဒီး,ယွၤဟ့ၣ်လီၤကွံာ်ဝဲလၢနစုပူၤလီၤ. 9 အဂ့ၢ်ဒ်အံၤ,ယွၤအမဲာ်ဟးဝ့ၤဝီၤတၢ်လၢဟီၣ်ခိၣ်ချၢဒီဘ့ၣ်ညါ,ဒ်သိးအကပာ်ဆူၣ်ထီၣ်အသးလၢပှၤလၢအအိၣ်ဒီးအသးဒီဖျၢၣ်ဒီးအီၤတဖၣ်အဂီၢ်န့ၣ်လီၤ.လၢတၢ်န့ၣ်တမံၤအဂ့ၢ်န့ၣ်မ့ၢ်နမၤတၢ်ကလီကလီလီၤ.မၤသးဒ်န့ၣ်ဒီးတုၤအံၤဆူညါနကအိၣ်ဒီးတၢ်ဒုးသုးလီၤ.

10 ဒီးစီၤအၤစါသးထီၣ်ဘၣ်ပှၤထံၣ်တၢ်တဂၤန့ၣ်,ဒီးဒၢနုာ်အီၤလၢဃိာ်ပူၤလီၤ.အဂ့ၢ်ဒ်အံၤ,အသးဒိၣ်ထီၣ်ဆူၣ်ဆူၣ်ကလဲာ်လၢတၢ်န့ၣ်တမံၤအဃိလီၤ.ဒီးလၢအဆၢအကတီၢ်ဖဲန့ၣ်စီၤအၤစါမၤကိၢ်မၤဂီၤပှၤလၢပှၤဂီၢ်မုၢ်အကျါတဖၣ်န့ၣ်လီၤ.

11 ဒီးကွၢ်ကွၢ်,တၢ်ဘၣ်ဃးဒီးစီၤအၤစါ,တၢ်အခီၣ်ထံးဒီးတၢ်အကတၢၢ်န့ၣ်,ကွၢ်ကွၢ်,ကွဲးအသးလၢယူဒၤ,ဒီးအံၣ်စရ့လးအစီၤပၤအလံာ်ပူၤလီၤ.

12 ဒီးစီၤအၤစါကဲစီၤပၤသၢဆံခွံနံၣ်တနံၣ်န့ၣ်အခီၣ်ဆါထီၣ်,ဒီးအတၢ်ဆါဒိၣ်ထီၣ်ဘၣ်ဆၣ်ဒီး,လၢအဘၣ်တၢ်ဆါန့ၣ်တဃုဘၣ်ယွၤဘၣ်.မ့ၢ်အဃုကသံၣ်သရၣ်တဖၣ်တခီလီၤ.

13 ဒီးစီၤအၤစါမံဝဲဒီးအပၢ်တဖၣ်,ဒီးလၢအကဲစီၤပၤလွံၢ်ဆံတနံၣ်န့ၣ်သံဝဲလီၤ.

14 ဒီးပှၤခူၣ်လီၤကွံာ်အီၤလၢအတၢ်သွၣ်ခိၣ်ဒၣ်ဝဲအပူၤလၢအခူၣ်လီၤဝဲလၢအဂီၢ်ဒၣ်ဝဲလၢစီၤဒၤဝံးအဝ့ၢ်ပူၤ,ဒီးပာ်လီၤအီၤလၢလီၢ်မံတပူၤလၢအပှဲၤဝဲဒီးတၢ်နၢမူ,ပှၤတိၢ်မၤဃါဃုာ်တၢ်သိနၢမူအတၢ်မၤအကလုာ်ကလုာ်,ဒီးပှၤဆိၣ်ကဲၤတၢ်ဆိၣ်ကဲၤဖးဒိၣ်လၢအဂီၢ်လီၤ.