‏ 2 Chronicles 18

1ဒီးစီၤယဟိၡၤဖးအိၣ်ဝဲဒီးတၢ်ထူးတၢ်တီၤ,ဒီးတၢ်လၤကပီၤအါအါကလဲာ်,ဒီးဒီသိၣ်ဒီသီဒီးစီၤအၤဃာ်လီၤ.

2ဒီးလၢနံၣ်တဖၣ်အလီၢ်ခံန့ၣ်လဲၤလီၤဝဲဆူစီၤအၤဃာ်အအိၣ်လၢၡၤမရံအပူၤ,ဒီးစီၤအၤဃာ်မၤသံသိဒီးဂီၤဖံးလၢအဂီၢ်အါအါကလဲာ်,ဒီးလၢပှၤဂီၢ်မုၢ်လၢအအိၣ်ဒီးအီၤအဂီၢ်,ဒီးသဆၣ်ထီၣ်အခံဒ်သိးအကလဲၤထီၣ်ဒီးအီၤဆူရၤမိးကံးလဧးန့ၣ်လီၤ.

3ဒီးအံၣ်စရ့လးအစီၤပၤအၤဃာ်စံးလၢယူဒၤအစီၤပၤယဟိၡၤဖး,နကလဲၤတၢ်ဒီးယၤဆူရၤမိးကံးလဧးန့ၣ်ဧါ.ဒီးစံးဆၢအီၤ,ယဲဒၣ်အံၤယမၤသးဒ်နၤအသိးန့ၣ်,ဒီးယပှၤဂီၢ်မုၢ်ဒ်နပှၤဂီၢ်မုၢ်အသိးန့ၣ်,ဒီးကအိၣ်ဒီးနၤလၢတၢ်ဒုးသုးအပူၤလီၤ.

4ဒီးစီၤယဟိၡၤဖးစံးဘၣ်အံၣ်စရ့လးအစီၤပၤ,သံကွၢ်လၢ်လၢယွၤအကလုၢ်ကထါလၢမုၢ်မဆါတနံၤအံၤတက့ၢ်.

5ဒီးအံၣ်စရ့လးအစီၤပၤဒုးအိၣ်ဖှိၣ်ရိဖှိၣ်ဝံတဖၣ်,ပှၤလွံၢ်ကယၤ,ဒီးစံးဘၣ်အီၤ,ပဘၣ်လဲၤထီၣ်ဆူရၤမိးကံးလဧးဒ်သိးပကဒုးတၢ်,ပကဘၣ်အိၣ်လဲၣ်.ဒီးစံးဝဲဒၣ်,လဲၤထီၣ်တက့ၢ်.အဂ့ၢ်ဒ်အံၤ,ယွၤကဟ့ၣ်လီၤကွံာ်အီၤလၢစီၤပၤအစုပူၤလီၤ.

6ဒီးစီၤယဟိၡၤဖးစံးဝဲဒၣ်,ယွၤအဝံတအိၣ်လၢၤဘၣ်ဖဲအံၤတဂၤဂၤ,ဒ်သိးပကသံကွၢ်အီၤစ့ၢ်ကီးဧါ.

7ဒီးအံၣ်စရ့လးအစီၤပၤစံးဆၢစီၤယဟိၡၤဖး,ပှၤလၢပကသံကွၢ်ယွၤလၢအီၤအိၣ်ဒံးတဂၤ,စီၤယံးမလၤအဖိခွါစီၤမံၤကါယၤလီၤ.ဘၣ်ဆၣ်ဒီးယသးဟ့အီၤလီၤ.အဂ့ၢ်ဒ်အံၤ,တကတိၤတၢ်ဂ့ၤလၢဝံအကျိာ်လၢယဂ့ၢ်ယကျိၤနီတဘျီဘၣ်,မ့ၢ်တၢ်အၢကိးဘျီဒဲးလီၤ.ဒီးစီၤယဟိၡၤဖးစံးဝဲဒၣ်,မ်စီၤပၤအသုတစံးဒ်န့ၣ်တဂ့ၤ.

8ဒီးအံၣ်စရ့လးအစီၤပၤကိးန့ၢ်ပှၤဒ့ဒံၣ်တဂၤ,ဒီးစံးဝဲဒၣ်,ဒုးဟဲစီၤယံးမလၤအဖိခွါစီၤမံၤကါယၤချ့ချ့တက့ၢ်.

9ဒီးအံၣ်စရ့လးအစီၤပၤ,ဒီးယူဒၤအစီၤပၤယဟိၡၤဖးကၤအယၣ်,ဒီးဆ့ၣ်နီၤတဂၤလၢအလီၢ်ပစိာ်,တဂၤလၢအလီၢ်ပစိာ်,လၢတၢ်အလီၢ်ဖဲတၢ်လဲၤနုာ်ဆူၡၤမရံအပဲတရီပူၤန့ၣ်,ဒီးဝံခဲလၢာ်ကတိၤတၢ်လၢဝံအကျိာ်လၢအမဲာ်ညါလီၤ.

10ဒီးစီၤကနၤနါအဖိခွါစီၤစံးဒကံယၤတဂၤတ့နၢၤထးတဖၣ်လၢအဂီၢ်,ဒီးစံးဝဲဒၣ်,ယွၤစံးဒ်အံၤ,နကဘျၢၣ်ပှၤစူၤရံဖိလၢအဝဲအံၤ,တုၤနမၤလၢာ်အီၤလီၤ. 11ဒီးဝံခဲလၢာ်န့ၣ်ကတိၤတၢ်လၢဝံအကျိာ်ဒ်န့ၣ်အသိး,ဒီးစံးဝဲဒၣ်,လဲၤထီၣ်ဆူရၤမိးကံးလဧး,ဒီးဘီၣ်ထီၣ်ညီထီၣ်တက့ၢ်.အဂ့ၢ်ဒ်အံၤ,ယွၤကဟ့ၣ်လီၤကွံာ်ဝဲလၢစီၤပၤအစုပူၤလီၤ.

12ဒီးကလူးလၢအလဲၤကိးန့ၢ်စီၤမံၤကါယၤတဂၤန့ၣ်ကတိၤတၢ်ဒီးအီၤ,ဒီးစံးဝဲဒၣ်,ကွၢ်ကွၢ်,ဝံတဖၣ်အတၢ်ကတိၤမ့ၢ်တၢ်ဂ့ၤလၢစီၤပၤအဂ့ၢ်လၢအထးခိၣ်တပူၤဃီလီၤ.မ်နတၢ်ကတိၤကမၤသးဒ်ပှၤလၢအကျါတဂၤအတၢ်ကတိၤအသိးန့ၣ်,ဒီးကတိၤတၢ်ဂ့ၤတက့ၢ်.

13ဒီးစီၤမံၤကါယၤစံးဝဲဒၣ်,ယွၤမူဝဲန့ၣ်,တၢ်လၢယွၤစံးဘၣ်ယၤန့ၣ်ယကကတိၤတၢ်န့ၣ်လီၤ.

14ဒီးဟဲဝဲဆူစီၤပၤအအိၣ်,ဒီးစီၤပၤစံးဝဲ,စီၤမံၤကါယၤဧၢ,ပဘၣ်လဲၤထီၣ်ထီဒါရၤမိးကံးလဧးဒ်သိးပကဒုးသုးဧါ,မ့ၢ်ယဘၣ်အိၣ်လဲၣ်.ဒီးစံးဘၣ်အီၤ,လဲၤထီၣ်,ဒီးဘီၣ်ထီၣ်ညီထီၣ်တက့ၢ်.ဒီးတၢ်ကဟ့ၣ်လီၤကွံာ်ဝဲဆူသုစုပူၤလီၤ.

15ဒီးစီၤပၤစံးဘၣ်အီၤ,ဒ်သိးနကစံးဘၣ်ယၤထဲတၢ်မ့ၢ်တၢ်တီလၢယွၤအမံၤန့ၣ်,ယဘၣ်ဒုးဆိၣ်နၤပှံၤဘျီလဲၣ်.

16ဒီးစံးဝဲဒၣ်,ယထံၣ်ဘၣ်အံၣ်စရ့လးခဲလၢာ်လီၤပြံလီၤပြါလၢကစၢၢ်လိၤ,ဒ်သိလၢအပှၤကွၢ်သိတအိၣ်ဘၣ်အသိးန့ၣ်,ဒီးယွၤစံးဝဲဒၣ်,အဝဲသ့ၣ်တဖၣ်အံၤအကစၢ်တအိၣ်ဘၣ်.မ်ပှၤက့ၤက့ၤတဂၤဆူအဟံၣ်ဒၣ်ဝဲ,တဂၤဆူအဟံၣ်ဒၣ်ဝဲမုာ်မုာ်တက့ၢ်.

17ဒီးအံၣ်စရ့လးအစီၤပၤစံးဘၣ်စီၤယဟိၡၤဖး,ယစံးဘၣ်နၤလၢအတကတိၤဘၣ်လၢဝံအကျိာ်လၢတၢ်ဂ့ၤလၢယဂ့ၢ်ဘၣ်.မ့ၢ်လၢတၢ်အၢန့ၣ်တမ့ၢ်ဘၣ်ဧါ.

18ဒီးစံးဝဲဒၣ်,မၤသးဒ်န့ၣ်ဒီးဒိကနၣ်ယွၤအကလုၢ်တက့ၢ်.ယထံၣ်ဘၣ်ယွၤဆ့ၣ်နီၤလၢအလီၢ်ပစိာ်,ဒီးမူခိၣ်အသုးမုၢ်ဂီၢ်မုၢ်ခဲလၢာ်ဆၢထၢၣ်လၢအဃၢၤ,လၢအစုထွဲတခီ,ဒီးလၢအစုစ့ၣ်တခီလီၤ.

19ဒီးယွၤစံးဝဲဒၣ်,မ့ၢ်မတၤကလွဲန့ၢ်အံၣ်စရ့လးအစီၤပၤစီၤအၤဃာ်ဒ်သိးအကလဲၤထီၣ်,ဒီးလီၤဃံၤလၢရၤမိးကံးလဧးအပူၤတဂၤလဲၣ်.ဒီးတဂၤစံးဒ်အံၤ,ဒီးတဂၤစံးဒ်နုၤလီၤ.

20ဒီးသးတဂၤဟဲထီၣ်,ဒီးဆၢထၢၣ်လၢယွၤအမဲာ်ညါ,ဒီးစံးဝဲဒၣ်,ယကလွဲန့ၢ်အီၤလီၤ.

21ဒီးယွၤစံးလၢအီၤ,လၢမနုၤတမံၤလဲၣ်.ဒီးစံးဆၢအီၤ,ယကလဲၤထီၣ်,ဒီးယကကဲထီၣ်သးကဘျံးကဘျၣ်လၢအဝံခဲလၢာ်အကိာ်ပူၤလီၤ.ဒီးစံးဝဲဒၣ်,နကလွဲန့ၢ်အီၤ,ဒီးမၤနၢၤတၢ်စ့ၢ်ကီးလီၤ.လဲၤထီၣ်,ဒီးမၤဒ်န့ၣ်တက့ၢ်.

22ဒီးခဲကနံၣ်အံၤ,ကွၢ်ကွၢ်,ယွၤပာ်သးကဘျံးကဘျၣ်လၢနဝံခဲလၢာ်အံၤအကိာ်ပူၤ,ဒီးယွၤကတိၤတၢ်အၢလၢနဂ့ၢ်နကျိၤလီၤ.

23ဒီးစီၤကနၤနါအဖိခွါစီၤစံးဒကံယၤသုးဘူးအသး,ဒီးဒဲစီၤမံၤကါယၤအဘိး,ဒီးစံးဝဲဒၣ်,ဒ်သိးအကကတိၤတၢ်ဒီးနၤဒီး,ယွၤအသးဟးထီၣ်လၢယၤဖဲလဲၣ်ခီလဲၣ်.

24ဒီးစီၤမံၤကါယၤစံးဝဲဒၣ်,ကွၢ်ကွၢ်,မုၢ်တနံၤလၢနလဲၤနုာ်လၢဒၢးလၢညါတဒၢး,ဒ်သိးနကပာ်ခူသူၣ်နသးန့ၣ်နကသ့ၣ်ညါလီၤ.

25ဒီးအံၣ်စရ့လးအစီၤပၤစံးဝဲဒၣ်,ဟံးန့ၢ်စီၤမံၤကါယၤ,ဒီးစိာ်ကဒါက့ၤအီၤဆူဝ့ၢ်အခိၣ်စီၤအၤမိၣ်,ဒီးစီၤပၤအဖိခွါစီၤယိၤအၣ်အအိၣ်, 26ဒီးစံး,စီၤပၤစံးဒ်အံၤ,ပာ်ပှၤတဂၤအံၤလၢဃိာ်ပူၤ,ဒီးလုၢ်အီၣ်လုၢ်အီၤလၢတၢ်နးတၢ်ဖှီၣ်အကိၣ်,ဒီးတၢ်နးတၢ်ဖှီၣ်အထံတုၤယဟဲက့ၤမုာ်မုာ်တက့ၢ်.

27ဒီးစီၤမံၤကါယၤစံးဝဲဒၣ်,နမ့ၢ်ဟဲက့ၤမုာ်မုာ်သပှၢ်တၢၢ်ဒီး,ယွၤတကတိၤဘၣ်တၢ်လၢယၤဘၣ်.ဒီးစံးဝဲဒၣ်,ပှၤဂီၢ်မုၢ်သ့ၣ်ဧၢ,ဒိကနၣ်ကိးဂၤဒဲးတက့ၢ်.

28ဒီးအံၣ်စရ့လးအစီၤပၤ,ဒီးယူဒၤအစီၤပၤစီၤယဟိၡၤဖးလဲၤထီၣ်ဆူရၤမိးကံးလဧးလီၤ.

29ဒီးအံၣ်စရ့လးအစီၤပၤစံးလၢစီၤယဟိၡၤဖး,ယကမၤလီၤဆီယသး,ဒီးလဲၤနုာ်လၢတၢ်ဒုးသုးအပူၤလီၤ.မ့မ့ၢ်နဲဒၣ်အံၤကၤနယၣ်တက့ၢ်.ဒီးအံၣ်စရ့လးအစီၤပၤမၤလီၤဆီအသး,ဒီးလဲၤနုာ်လၢတၢ်ဒုးသုးအပူၤလီၤ.

30ဒီးစူၤရံအစီၤပၤမၤလိာ်အလ့ၣ်ကဟၣ်အခိၣ်တဖၣ်ဒီးစံးဝဲဒၣ်,အဒိၣ်ဂ့ၤ,အဆံးဂ့ၤ,ဒုးတၢ်ဒီးအီၤတဂ့ၤ.ဒုးတၢ်ထဲလၢအံၣ်စရ့လးအစီၤပၤတဂၤဧိၤတက့ၢ်.

31ဒီးတုၤလ့ၣ်ကဟၣ်အခိၣ်တဖၣ်ထံၣ်ဘၣ်စီၤယဟိၡၤဖးဒီး,တၢ်မၤအသးလၢအစံးဝဲဒၣ်,မ့ၢ်ဝဲလၢအံၣ်စရ့လးအစီၤပၤလီၤ.ဒီးဃၣ်အသးဒ်သိးအကဒုးတၢ်ဒီးအီၤ,ဒီးစီၤယဟိၡၤဖးကိးထီၣ်တၢ်,ဒီးယွၤမၤစၢၤအီၤ,ဒီးဒုးဃၣ်ကွံာ်အဝဲသ့ၣ်လၢအီၤလီၤ.

32ဒီးတုၤလ့ၣ်ကဟၣ်အခိၣ်တဖၣ်ထံၣ်ဝဲလၢအတမ့ၢ်ဘၣ်အံၣ်စရ့လးအစီၤပၤဒီး,တၢ်မၤအသးလၢအဃၣ်ကွံာ်အသးဒီးတလူၤလၢၤဘၣ်အီၤဘၣ်လီၤ.

33ဒီးပှၤတဂၤခးနါစိၤတၢ်,ဒီးဘၣ်လၢအံၣ်စရ့လးအစီၤပၤအသဃိးအဆၢ,ဒီးအဝဲဒၣ်စံးဘၣ်အလ့ၣ်ကဟၣ်အခိၣ်,ဃၣ်ဃီၤနစု,ဒီးစိာ်ထီၣ်ကွံာ်ယၤလၢပှၤသုးမုၢ်အကျါတက့ၢ်.အဂ့ၢ်ဒ်အံၤ,ယဘၣ်တၢ်ဆဲးယၤလီၤ.

34ဒီးတၢ်ဒုးသုးန့ၣ်အါထီၣ်လၢမုၢ်တနံၤန့ၣ်,ဒီးပှၤဝံၣ်ဆၢထၢၣ်စီၤပၤလၢအလ့ၣ်ကဟၣ်အပူၤထီဒါပှၤစူၤရံဖိတုၤမုၢ်ဟါ,ဒီးတုၤမုၢ်လီၤနုာ်ဒီး,သံဝဲလီၤ.

Copyright information for KswSKMB