2 Chronicles 19
1ဒီးယူဒၤအစီၤပၤစီၤယဟိၡၤဖးက့ၤက့ၤဝဲဆူအဟံၣ်မုာ်မုာ်လၢယရူၤၡလ့ၣ်အပူၤလီၤ. 2ဒီးပှၤထံၣ်တၢ်စီၤဃနၤနံအဖိခွါစီၤယ့ၤဟူလဲၤသဂၢၢ်ထီၣ်အီၤ,ဒီးစံးဘၣ်စီၤပၤယဟိၡၤဖး,နကမၤစၢၤပှၤတတီတလိၤ,ဒီးအဲၣ်ပှၤလၢအသးဟ့ယွၤန့ၣ်ဧါ.တၢ်သးထီၣ်ဘၣ်နၤလၢယွၤအမဲာ်ညါလၢတၢ်န့ၣ်အဃိလီၤ. 3ဘၣ်ဆၣ်ဒီးတၢ်အဂ့ၤတဖၣ်န့ၣ်တၢ်ထံၣ်န့ၢ်ဝဲလၢနပူၤလီၤ.အဂ့ၢ်ဒ်အံၤ,နမၤဟးဂီၤကွံာ်အရှ့ရၤတဖၣ်လၢကီၢ်ပူၤ,ဒီးနကတဲာ်ကတီၤလံနသးဒ်သိးနကဃုယွၤလီၤ. 4ဒီးစီၤယဟိၡၤဖးအိၣ်ဝဲဆိးဝဲလၢယရူၤၡလ့ၣ်အပူၤ,ဒီးလဲၤထီၣ်ကဒီးလၢပှၤဂီၢ်မုၢ်အကျါလၢဘ့ၢ်ၡဘၤပၢၢ်လၢကစၢၢ်အ့ဖရဲၣ်,ဒီးဒုးဃၣ်လိၤအသးဆူယွၤအပၢ်တဖၣ်အကစၢ်အအိၣ်လီၤ. 5ဒီးပာ်အပှၤစံၣ်ညီၣ်ကွီၢ်လၢထံဧိၤကီၢ်ဧိၤအပူၤလၢဝ့ၢ်အိၣ်ဒီးအခိၣ်ဒူလၢယူဒၤအပူၤကိးဖျၢၣ်ဒဲး,တဝ့ၢ်ဘၣ်တဝ့ၢ်လီၤ. 6ဒီးစံးဘၣ်ပှၤစံၣ်ညီၣ်ကွီၢ်,သုမၤဒ်လဲၣ်ဒ်လဲၣ်န့ၣ်ကွၢ်တက့ၢ်.အဂ့ၢ်ဒ်အံၤ,သုစံၣ်ညီၣ်တၢ်လၢပှၤကညီအဂီၢ်တမ့ၢ်ဘၣ်.မ့ၢ်လၢယွၤအဂီၢ်လၢအအိၣ်ဝဲဒီးသုလၢစံၣ်ညီၣ်တၢ်အပူၤလီၤ. 7ဒီးခဲကနံၣ်အံၤ,မ်တၢ်ပျံၤယွၤအိၣ်လၢသုလိၤတက့ၢ်,ပလီၢ်သုသးဒီးမၤတၢ်တက့ၢ်.အဂ့ၢ်ဒ်အံၤ,တၢ်အၢမ့ၢ်ဂ့ၤ,တၢ်ကွၢ်မဲာ်မ့ၢ်ဂ့ၤ,တၢ်ဟံးန့ၢ်ခိၣ်မ့ၢ်ဂ့ၤ,တအိၣ်ဘၣ်ဒီးယွၤပကစၢ်ဘၣ်. 8ဒီးလၢယရူၤၡလ့ၣ်အပူၤစ့ၢ်ကီး,စီၤယဟိၡၤဖးပာ်ပှၤလ့ၤဝံဖိ,ဒီးပှၤလုၢ်တၢ်အဒိၣ်တဖၣ်,ဒီးအံၣ်စရ့လးအပၢ်တဖၣ်အခိၣ်တဖၣ်လၢယွၤအတၢ်စံၣ်ညီၣ်အဂီၢ်,ဒီးလၢတၢ်လိာ်ကွီၢ်အဂီၢ်,ဒီးက့ၤက့ၤဝဲဆူယရူၤၡလ့ၣ်လီၤ. 9ဒီးမၤလိာ်ဝဲ,ဒီးစံးဝဲဒၣ်,သုဘၣ်မၤလၢတၢ်ပျံၤယွၤအပူၤဒ်အံၤ,လၢသုကလုၢ်တီ,ဒီးလၢသုသးဒီဖျၢၣ်လီၤ. 10ဒီးဖဲဒၣ်တၢ်လိာ်ကွီၢ်တမံၤမံၤကဟဲဆူသုမဲာ်ညါဘၣ်ဃးဒီးသုဒီပုၢ်ဝဲၢ်လၢအအိၣ်အဆိးလၢအဝ့ၢ်ပူၤလၢတၢ်သွံၣ်ဒီးတၢ်သွံၣ်အဘၢၣ်စၢၤ,လၢတၢ်သိၣ်တၢ်သီ,ဒီးတၢ်မၤလိာ်,သိၣ်တၢ်သီတၢ်,ဒီးစံၣ်ညီၣ်တၢ်အဘၢၣ်စၢၤ,သုဘၣ်သိၣ်က့ၤသီက့ၤအီၤ,ဒ်သိးအသုတမၤကမၣ်ဘၣ်ယွၤ,ဒီးတၢ်သးထီၣ်အသုတဘၣ်သု,ဒီးသုဒီပုၢ်ဝဲၢ်တဂ့ၤ.မၤဒ်န့ၣ်တက့ၢ်,ဒီးသုတမၤကမၣ်ဘၣ်တၢ်ဘၣ်, 11ဒီးကွၢ်ကွၢ်,ပှၤလုၢ်တၢ်အဒိၣ်အခိၣ်စီၤအမၤရယၤအိၣ်ဝဲလၢသုဖီခိၣ်လၢကယဲၢ်တၢ်ဘၣ်ဃးဒီးယွၤ,ဒီးယူဒၤအပှၤဟံၣ်ဖိအခိၣ်စီၤယံးၡမၤဧ့လးအဖိခွါစီၤစဘၤဒယၤလၢကယဲၢ်တၢ်ဘၣ်ဃးဒီးစီၤပၤ,ဒီးပှၤလ့ၤဝံဖိကကဲထီၣ်ပဒိၣ်တဖၣ်လၢသုမဲာ်ညါလီၤ.ပာ်ဆူၣ်ထီၣ်သုသး,ဒီးမၤတၢ်တက့ၢ်.ဒီးယွၤကအိၣ်ဒီးပှၤအဂ့ၤလီၤ.
Copyright information for
KswSKMB