2 Chronicles 25
1လၢစီၤအမၤစယါကဲသီစီၤပၤန့ၣ်အသးပှၢ်ခံဆံယဲၢ်နံၣ်,ဒီးကဲစီၤပၤလၢယရူၤၡလ့ၣ်အပူၤခံဆံနွံနံၣ်,ဒီးအမိၢ်အမံၤမ့ၢ်နီၢ်ယဟိဧဒၣ်လၢယရူၤၡလ့ၣ်န့ၣ်လီၤ. 2ဒီးမၤတၢ်လၢအလိၤလၢယွၤအမဲာ်ဘၣ်ဆၣ်ဒီး,တမၤဘၣ်လၢအသးဒီဖျၢၣ်ဘၣ်. 3ဒီးတုၤအဘီအမုၢ်အိၣ်ဂၢၢ်ဆိးကျၢၤလၢအစုပူၤဒီး,တၢ်မၤအသးလၢအမၤသံအခ့အပှၤတဖၣ်လၢအမၤသံအပၢ်န့ၣ်လီၤ. 4ဘၣ်ဆၣ်ဒီးတမၤသံဘၣ်အဖိတဖၣ်န့ၣ်ဘၣ်,ဒ်တၢ်ကွဲးအသးလၢစီၤမိၤရှ့အတၢ်သိၣ်တၢ်သီအလံာ်ပူၤအသိးဖဲယွၤမၤလိာ်တၢ်ဒီးစံးဝဲဒၣ်,ပၢ်တဖၣ်တဘၣ်သံဘၣ်လၢဖိတဖၣ်အဃိဘၣ်.ဖိတဖၣ်တဘၣ်သံဘၣ်လၢပၢ်တဖၣ်အဃိဘၣ်.မ့မ့ၢ်ပှၤဘၣ်သံစုာ်စုာ်လၢအတၢ်ဒဲးဘးဒၣ်ဝဲအဃိန့ၣ်လီၤ. 5ဒီးစီၤအမၤစယါဒုးအိၣ်ဖှိၣ်ယူဒၤ,ဒီးပာ်ပှၤတကထိအခိၣ်,ဒီးပှၤတကယၤအခိၣ်ဒ်အပၢ်အဟံၣ်အသိးန့ၣ်လၢယူဒၤဒီးဘံၣ်ယၤမံၣ်ခဲလၢာ်အကျါ,ဒီးဂံၢ်ပှၤလၢအသးပှၢ်အနံၣ်ခံဆံဒီးအါန့ၢ်အန့ၣ်တက့ၢ်,ဒီးထံၣ်န့ၢ်ပှၤဃုထၢဖိသၢကလီၤလၢအလဲၤဒုးသုး,ဒီးဟံးဘီ,ဒီးအကတီၤလီၤ. 6ဒီးငါပှၤအဒိၣ်အဆူၣ်လၢအံၣ်စရ့လးအကျါတကလီၤလၢစ့အကံကၢ်တကယၤလီၤ. 7ဒီးယွၤအပှၤကညီတဂၤဟဲဆူအအိၣ်,ဒီးစံးဝဲဒၣ်,စီၤပၤဧၢ,ဒုးလဲၤအံၣ်စရ့လးအပှၤသုးမုၢ်ဒီးနၤတဂ့ၤ.အဂ့ၢ်ဒ်အံၤ,ယွၤတအိၣ်ဘၣ်ဒီးအံၣ်စရ့လး,အ့ဖရဲၣ်အဖိခဲလၢာ်ဘၣ်. 8မ့ၢ်လဲၤဒီး,နကဆူၣ်ထီၣ်လၢဒုးတၢ်အဂီၢ်ဘၣ်ဆၣ်ဒီး,ယွၤကဒုးလီၤဃံၤနၤလၢနဒုၣ်နဒါအမဲာ်ညါလီၤ.အဂ့ၢ်ဒ်အံၤ,ယွၤအိၣ်ဝဲဒီးအစိအကမီၤဒ်သိးအကမၤစၢၤတၢ်,ဒီးဒ်သိးအကဒုးလီၤဃံၤတၢ်လီၤ. 9ဒီးစီၤအမၤစယါစံးဘၣ်ယွၤအပှၤကညီ,ဒီးစ့ကံကၢ်တကယၤလၢယဟ့ၣ်လီၤအံၣ်စရ့လးအပှၤသုးမုၢ်န့ၣ်ပကမၤဒ်လဲၣ်.ဒီးယွၤအပှၤကညီစံးဝဲဒၣ်,ယွၤဟ့ၣ်လီၤနၤအါန့ၢ်အန့ၣ်သ့လီၤ. 10ဒီးစီၤအမၤစယါမၤလီၤဖးပှၤသုးမုၢ်လၢအဟဲဆူအအိၣ်လၢအ့ဖရဲၣ်ဒ်သိးအက့ၤက့ၤဆူအလီၢ်ဒၣ်ဝဲ,ဒီးအသးထီၣ်ဘၣ်ယူဒၤဒိၣ်ဒိၣ်ကလဲာ်,ဒီးက့ၤက့ၤဝဲဆူအလီၢ်လၢအသးထီၣ်ကဲၤထီၣ်လီၤ. 11ဒီးစီၤအမၤစယါမၤဆူၣ်ထီၣ်အသး,ဒီးဆှၢထီၣ်အပှၤဂီၢ်မုၢ်,ဒီးလဲၤဝဲဆူကစၢၢ်ကဆူးအံသၣ်,ဒီးကျီကွံာ်ပှၤစ့ဧၢ်ဖိတကလးလီၤ. 12ဒီးပှၤမူတကလးန့ၣ်ပှၤယူဒၤဖိစိာ်အီၤဆူလၢၢ်ဧိၤလ့ဧိၤတဖျၢၣ်အဖီခိၣ်,ဒီးတ့ၢ်လီၤကွံာ်အီၤလၢလၢၢ်န့ၣ်အခိၣ်စိၣ်ဒီးပှၤကၢ်လီၤကလဲကွံာ်ဝဲခဲလၢာ်လီၤ. 13ဒီးပှၤတဖုလၢစီၤအမၤစယါမၢအက့ၤကဒါက့ၤဒ်သိးအသုတလဲၤဒီးအီၤဆူတၢ်ဒုးသုးတဂ့ၤတဖၣ်န့ၣ်ကျီကွံာ်ယူဒၤအဝ့ၢ်တဖၣ်လၢၡၤမရံပၢၢ်လၢဘ့ၤသဃိရိၣ်,ဒီးကျီကွံာ်ပှၤသၢကထိလၢအကျါ,ဒီးမၤန့ၢ်တၢ်ဖိတၢ်လံၤအါအါကလဲာ်လီၤ. 14ဒီးစီၤအမၤစယါဟဲဝဲလၢတၢ်မၤသံပှၤအဒိၣ်ဖိအလီၢ်ခံန့ၣ်တၢ်မၤအသးလၢအဟဲစိာ်ပှၤစ့ဧၢ်ဖိအကစၢ်တဖၣ်,ဒီးပာ်အီၤလၢအကစၢ်တဖၣ်,ဒီးဘူၣ်တၢ်ဘါတၢ်လၢအမဲာ်ညါ,ဒီးဆိၣ်ကဲၤတၢ်နၢမူလၢအဂီၢ်လီၤ. 15ဒီးယွၤအသးထီၣ်ကဲၤထီၣ်ဘၣ်စီၤအမၤစယါ,ဒီးမၢလီၤဝံတဂၤဆူအအိၣ်လၢအစံးဘၣ်အီၤ,နဃုတၢ်လၢပှၤတကလုာ်အကစၢ်တဖၣ်လၢအမၤပူၤမၤဖျဲးအပှၤဂီၢ်မုၢ်ဒၣ်ဝဲလၢနစုပူၤတသ့ဘၣ်န့ၣ်မ့ၢ်အဘၣ်မနုၤလဲၣ်. 16ဒီးကတိၤတၢ်ဒီးအီၤအဖၢမုၢ်န့ၣ်ဒီး,တၢ်မၤအသးလၢစီၤပၤစံးဘၣ်အီၤ,နကဲထီၣ်ပှၤကူၣ်လိာ်အသးဒီးစီၤပၤန့ၣ်ဧါ,အိၣ်ဃိကလာ်တက့ၢ်.နကဘၣ်တၢ်ကျီနၤမ့ၢ်အဘၣ်မနုၤလဲၣ်.ဒီးဝံတဂၤန့ၣ်အိၣ်ဃိဝဲ,ဒီးစံးဝဲဒၣ်,ယသ့ၣ်ညါလၢယွၤတိာ်ဝဲလၢအကမၤဟးဂီၤနၤလီၤ.အဂ့ၢ်ဒ်အံၤ,နမၤတၢ်တမံၤန့ၣ်,ဒီးတဒိကနၣ်ဘၣ်ယတၢ်ကူၣ်လိာ်ဘၣ်လီၤ. 17ဒီးယူဒၤအစီၤပၤစီၤအမၤစယါကူၣ်ထီၣ်ဖးလီၤတၢ်,ဒီးမၢလီၤကလူးတဂၤဆူအံၣ်စရ့လးအစီၤပၤယ့ၤဟူအဖိခွါ,စီၤယဟိအါဃးအဖိခွါ,စီၤယိၤအၣ်,ဒီးစံးဝဲဒၣ်,ဟဲ,ကွၢ်လိာ်မဲာ်သကိးသကိးတက့ၢ်. 18ဒီးအံၣ်စရ့လးအစီၤပၤယိၤအၣ်မၢလီၤတၢ်ဆူယူဒၤအစီၤပၤအမၤစယါဒီးစံးဝဲဒၣ်,တၤဆှုၣ်လၢလဘၤနိၣ်အလိၤ,မၢလီၤတၢ်ဆူသ့ၣ်ဆှိအ့ရ့းလၢလဘၤနိၣ်အလိၤဒီးစံးဝဲဒၣ်,ဟ့ၣ်လီၤနဖိမုၣ်လၢယဖိခွါအမါတက့ၢ်.ဒီးဆၣ်ဖိကီၢ်ဖိအမံၤလၢလဘၤနိၣ်အလိၤတဒုလဲၤပူၤတၢ်,ဒီးယီၢ်တံၢ်လီၤတၤဆှုၣ်န့ၣ်လီၤ. 19နစံး,ကွၢ်ကွၢ်,နကျီကွံာ်လံပှၤအဒိၣ်ဖိလံ,ဒီးနသးပာ်ထီၣ်ထီနၤဒ်သိးနကပာ်ကဖၢလၢနသးလီၤ.ဒီးအိၣ်လၢနဟံၣ်တက့ၢ်.နကမၤတၢ်လၢနတၢ်အၢအဂီၢ်,ဒီးလီၤဃံၤနဝဲဒၣ်,ဒီးယူဒၤအိၣ်ဒီးနၤန့ၣ်မ့ၢ်အဘၣ်မနုၤလဲၣ်. 20ဒီးစီၤအမၤစယါတဒိကနၣ်ဘၣ်တၢ်ဘၣ်,အဂ့ၢ်ဒ်အံၤ,တၢ်မၤအသးလၢယွၤဒ်သိးအကဟ့ၣ်လီၤကွံာ်အီၤလၢပှၤအစုပူၤလၢအဃုတၢ်လၢအဒိၣ်အကစၢ်တဖၣ်အဃိန့ၣ်လီၤ. 21ဒီးအံၣ်စရ့လးအစီၤပၤယိၤအၣ်လဲၤထီၣ်,ဒီးအဝဲဒၣ်ဒီးယူဒၤအစီၤပၤအမၤစယါကွၢ်လိာ်အမဲာ်လၢဘ့ၤသရှ့မ့ၣ်ဘၣ်ဃးဒီးယူဒၤလီၤ. 22ဒီးယူဒၤဃၣ်ဝဲလၢအံၣ်စရ့လးအမဲာ်ညါ,ဒီးပှၤဃ့ၢ်ကွံာ်ဝဲတဂၤဆူအဒဲဒၣ်ဝဲ,တဂၤဆူအဒဲဒၣ်ဝဲန့ၣ်လီၤ. 23ဒီးအံၣ်စရ့လးအစီၤပၤစီၤယိၤအၣ်မၤန့ၢ်ယူဒၤအစီၤပၤစီၤယဟိအါဃးအဖိခွါ,စီၤယိၤအၣ်အဖိခွါ,စီၤအမၤစယါလၢဘ့ၤသရှ့မ့ၣ်အပူၤ,ဒီးဟဲစိာ်ဝဲဆူယရူၤၡလ့ၣ်,ဒီးမၤလီၤပှီၢ်ယရူၤၡလ့ၣ်အခိၣ်ဒူအပျၢ်လွံၢ်ကယၤလၢပဲတရီအ့ဖရဲၣ်ပၢၢ်လၢတၢ်အသနၢၣ်အပဲတရီလီၤ. 24ဒီးမၤန့ၢ်ထူဧိၤလွဲဧိၤ,ဒီးကျိၣ်ဧိၤစ့ဧိၤခဲလၢာ်,ဒီးတၢ်အဃၢၤအဃိၢ်လၢအထံၣ်န့ၢ်ဝဲလၢယွၤအဟံၣ်ပူၤအိၣ်ဒီးစီၤဧိးဘ့ၤအ့ဒိၣ်ခဲလၢာ်,ဒီးတၢ်လုၢ်ဒိၣ်ပှ့ၤဒိၣ်လၢစီၤပၤအဟံၣ်ပူၤ,ဒီးပှၤအုၣ်ကီၤအသးတဖၣ်,ဒီးက့ၤကဒါက့ၤဝဲဆူၡၤမရံလီၤ. 25ဒီးလၢအံၣ်စရ့လးအစီၤပၤယဟိအါဃးအဖိခွါ,စီၤယိၤအၣ်သံဝဲအလီၢ်ခံန့ၣ်ယူဒၤအစီၤပၤယိၤအၣ်အဖိခွါစီၤအမၤစယါမူဒံးတဆံယဲၢ်နံၣ်လီၤ. 26တၢ်အိၣ်လီၤတဲာ်ဘၣ်ဃးဒီးစီၤအမၤစယါ,တၢ်အခီၣ်ထံးဒီးတၢ်တကတၢၢ်န့ၣ်,ကွၢ်ကွၢ်,ကွဲးအသးလၢယူဒၤ,ဒီးဘံၣ်ယၤမံၣ်အစီၤပၤအလံာ်ပူၤန့ၣ်တမ့ၢ်ဘၣ်ဧါ. 27ဒီးလၢအဆၢကတီၢ်လၢစီၤအမၤစယါဃၣ်ကဒါကွံာ်အသးလၢအလူၤယွၤန့ၣ်ပှၤကူၣ်တၢ်ထီဒါအီၤလၢယရူၤၡလ့ၣ်အပူၤ,ဒီးအဝဲဒၣ်ဃ့ၢ်ဆူလၤကံၣ်,ဒီးပှၤမၢလီၤတၢ်ပိာ်အခံ,ဒီးမၤသံအီၤဖဲန့ၣ်လီၤ. 28ဒီးပှၤဟဲစိာ်အီၤလၢကသ့ၣ်အလိၤ,ဒီးခူၣ်လီၤကွံာ်အီၤဒီးအပၢ်တဖၣ်လၢယူဒၤအဝ့ၢ်ပူၤလီၤ.
Copyright information for
KswSKMB