2 Chronicles 34
1လၢစီၤယိၤၡံယၤကဲသီစီၤပၤန့ၣ်အသးပှၢ်ဃိးနံၣ်,ဒီးကဲစီၤပၤလၢယရူၤၡလ့ၣ်အပူၤသၢဆံတနံၣ်လီၤ. 2ဒီးမၤတၢ်အလိၤလၢယွၤအမဲာ်,ဒီးပိာ်အပၢ်စီၤဒၤဝံးအကျဲတဖၣ်,ဒီးဆူစုထွဲဂ့ၤ,ဆူစုစ့ၣ်ဂ့ၤ,တဃၣ်ကပၤဘၣ်အသးဘၣ်. 3ဒီးလၢအကဲစီၤပၤပှဲၤထီၣ်ဃိးနံၣ်တနံၣ်,အသးစၢ်ဒံးန့ၣ်ဃုထီၣ်သီအပၢ်စီၤဒၤဝံးအကစၢ်,ဒီးလၢအနံၣ်ပှဲၤထီၣ်တဆံခံနံၣ်တနံၣ်န့ၣ်မၤကဆှီထီၣ်သီယူဒၤ,ဒီးယရူၤၡလ့ၣ်လၢတၢ်အလီၢ်ထီၣ်ထီ,ဒီးအရှ့ရၤ,ဒီးတၢ်ဂီၤစိးပျၤအသး,ဒီးတၢ်ဂီၤသိအသးသ့ၣ်တဖၣ်လီၤ. 4ဒီးပှၤမၤလီၤပှီၢ်ကွံာ်ဘဧၤလးအတၢ်လုၢ်လီၢ်လၢအမဲာ်ညါ,ဒီးတၢ်ဂီၤဃမၣ်လၢအအိၣ်ထီၣ်ထီလၢအဖီခိၣ်န့ၣ်ကူာ်လီၤကွံာ်ဝဲလီၤ.ဒီးအရှ့ရၤ,ဒီးတၢ်ဂီၤစိးပျၤအသး,ဒီးတၢ်ဂီၤသိအသးန့ၣ်မၤလီၤကလဲကွံာ်ဝဲ,ဒီးမၤဝဲလၢတၢ်အကမူၣ်,ဒီးဖှံဝဲလၢပှၤလၢအလုၢ်တၢ်လၢအီၤတဖၣ်အသွၣ်ခိၣ်အဖီခိၣ်န့ၣ်လီၤ. 5ဒီးဆူးထီၣ်ကွံာ်ပှၤလုၢ်တၢ်အဒိၣ်တဖၣ်အဃံလၢအတၢ်လုၢ်လီၢ်အဖီခိၣ်,ဒီးမၤကဆှီထီၣ်ယူဒၤ,ဒီးယရူၤၡလ့ၣ်လီၤ. 6ဒီးဒ်န့ၣ်အသိးလၢမနၤရှ့ၤဒီးအ့ဖရဲၣ်,ဒီးစူၤမ့းအိၣ်အဝ့ၢ်တဖၣ်အပူၤပၢၢ်လၢနးသၤလံန့ၣ်မၤဝဲလၢအတၢ်ဟးဂီၤတဖၣ်ဝးတရံးဝဲလီၤ. 7ဒီးမၤလီၤပှီၢ်ကွံာ်တၢ်လုၢ်လီၢ်တဖၣ်,ဒီးအရှ့ၤရၤတဖၣ်,ဒီးတီၢ်လီၤကလဲတၢ်ဂီၤစိးပျၤအသး,ဒီးကူာ်လီၤကွံာ်တၢ်ဂီၤဃမၣ်ခဲလၢာ်လၢအံၣ်စရ့လးအကီၢ်ဒီဘ့ၣ်ညါဝံၤဒီး,က့ၤကဒါက့ၤဝဲဆူယရူၤၡလ့ၣ်လီၤ. 8ဒီးလၢစီၤယိၤၡံယၤကဲစီၤပၤတဆံဃိးနံၣ်တနံၣ်န့ၣ်တုၤအမၤကဆှီထီၣ်ထံဧိၤကီၢ်ဧိၤ,ဒီးဟံၣ်န့ၢ်ဝံၤဒီး,တၢ်မၤအသးလၢစီၤပၤမၢလီၤပှၤကွဲးလံာ်စီၤအစါလံယၤအဖိခွါစီၤၡၤဖၣ်,ဒီးဝ့ၢ်အခိၣ်စီၤမၤစယၤ,ဒီးပှၤကွဲးနီၣ်တၢ်စီၤယဟါအါဃးအဖိခွါစီၤယိအၤသ့ၣ်တဖၣ်ဒ်သိးအကမၤက့ၤယွၤအကစၢ်အဟံၣ်လီၤ. 9ဒီးဟဲဝဲဆူပှၤလုၢ်တၢ်အခိၣ်စီၤဃံးလကံယၤအအိၣ်,ဒီးဟ့ၣ်လီၤစ့လၢပှၤဟဲစိာ်ဆူယွၤအဟံၣ်ပူၤ,လၢပှၤလ့ၤဝံဖိလၢအပၢၤတြဲၤတဖၣ်ထၢဖှိၣ်လၢမနၤရှ့ၤ,ဒီးအ့ဖရဲၣ်အစုပူၤ,ဒီးလၢပှၤအိၣ်လီၤတဲာ်လၢအံၣ်စရ့လးအကျါခဲလၢာ်,ဒီးလၢယူဒၤ,ဒီးဘံၣ်ယၤမံၣ်ခဲလၢာ်,ဒီးလၢပှၤအိၣ်ဝဲဆိးဝဲလၢယရူၤၡလ့ၣ်အပူၤလီၤ. 10ဒီးဟ့ၣ်လီၤဝဲလၢပှၤမၤတၢ်ဖိလၢအကွၢ်ယွၤအဟံၣ်တဖၣ်အစုပူၤ,ဒီးအဝဲသ့ၣ်ဟ့ၣ်လီၤက့ၤတသါလၢပှၤမၤတၢ်ဖိလၢအမၤတၢ်လၢယွၤအဟံၣ်ပူၤ,ဒ်သိးအကဘှီက့ၤ,ဒီးမၤဂ့ၤထီၣ်ဟံၣ်န့ၣ်လီၤ. 11ဟ့ၣ်လီၤဝဲလၢပှၤစိးပျၤတၢ်ဖိ,ဒီးလၢပှၤသူၣ်တၢ်ဖိဒ်သိးအကပှ့ၤလၢၢ်စိးပျၤအသး,ဒီးသ့ၣ်လၢတၢ်အဆၢတဖၣ်အဂီၢ်,ဒီးလၢအကမၤက့ၤကျိၤတဖၣ်လၢဟံၣ်တဖၣ်အဂီၢ်လၢယူဒၤအစီၤပၤတဖၣ်မၤဟးဂီၤတ့ၢ်ဝဲလီၤ. 12ဒီးပှၤကညီတဖၣ်န့ၣ်မၤဝဲလၢအကလုၢ်တီလီၤ.ဒီးပှၤအိၣ်ဝဲလၢအဖီခိၣ်မ့ၢ်စီၤယၤဃး,ဒီးစီၤဧိၤဘါဒယၤ,ပှၤလ့ၤဝံဖိလၢစီၤမရၤရံၤအဖိခွါအကျါ,ဒီးစီၤစကၤရယၤ,ဒီးစီၤမရှူလၣ်လၢပှၤကဃးဖိအဖိခွါအကျါန့ၣ်ဒုးမၤတၢ်လီၤ.ပှၤလ့ၤဝံဖိအဂၤလၢအသ့ဒံၣ်ဒၢပီၤဒွါခဲလၢာ်လီၤ. 13ဒီးအိၣ်ဝဲလၢပှၤဝံတၢ်ယိးတၢ်ဖိအဖီခိၣ်,ဒီးမ့ၢ်ကယဲၢ်ပှၤမၤတၢ်တမံၤမံၤခဲလၢာ်အခိၣ်တဖၣ်,ဒီးပှၤကွဲးလံာ်,ဒီးပဒိၣ်,ဒီးပှၤပၢၤပဲတရီသ့ၣ်တဖၣ်န့ၣ်မ့ၢ်ပှၤလ့ၤဝံဖိလီၤ. 14ဒီးတုၤပှၤဟဲစိာ်ထီၣ်စ့လၢပှၤစိာ်နုာ်လၢယွၤအဟံၣ်ပူၤဒီး,ပှၤလုၢ်တၢ်အဒိၣ်စီၤဃံးလကံယၤထံၣ်န့ၢ်ယွၤအလံာ်တၢ်သိၣ်တၢ်သီလၢစီၤမိၤရှ့အစုပူၤလီၤ. 15ဒီးစီၤဃံးလကံယၤကတိၤတၢ်,ဒီးစံးဘၣ်ပှၤကွဲးလံာ်စီၤၡၤဖၣ်,ယထံၣ်န့ၢ်လံလံာ်တၢ်သိၣ်တၢ်သီလၢယွၤအဟံၣ်ပူၤလံ,ဒီးစီၤဃံးလကံယၤဟ့ၣ်စီၤၡၤဖၣ်လၢလံာ်န့ၣ်လီၤ. 16ဒီးစီၤၡၤဖၣ်စိာ်ထီၣ်လံာ်န့ၣ်ဆူစီၤပၤအအိၣ်,ဒီးဟဲက့ၤစိာ်တၢ်ကတိၤဆူစီၤပၤအအိၣ်,ဒီးစံးဝဲဒၣ်,ကယဲၢ်တၢ်ပာ်လီၤလၢနခ့နပှၤအစုပူၤခဲလၢာ်န့ၣ်ပှၤမၤဝဲလီၤ. 17ဒီးထၢဖှိၣ်လံစ့လၢအထံၣ်န့ၢ်ဝဲလၢယွၤအဟံၣ်ပူၤ,ဒီးဟ့ၣ်လီၤလံလၢပှၤကွၢ်တၢ်တဖၣ်အစုပူၤ,ဒီးလၢပှၤမၤတၢ်ဖိလံ. 18ဒီးပှၤကွဲးလံာ်စီၤၡၤဖၣ်ဒုးနဲၣ်တၢ်လၢစီၤပၤ,ဒီးစံးဝဲဒၣ်,ပှၤလုၢ်တၢ်အဒိၣ်စီၤဃံးလကံယၤန့ၣ်ဟ့ၣ်လီၤယၤလၢလံာ်တကတြူၢ်လီၤ.ဒီးစီၤၡၤဖၣ်ဖးဝဲလၢစီၤပၤအမဲာ်ညါလီၤ. 19ဒီးတုၤစီၤပၤနၢ်ဟူလံာ်တၢ်သိၣ်တၢ်သီအကလုၢ်ကထါဒီး,တၢ်မၤအသးလၢအဖှီအဆ့လီၤ. 20ဒီးစီၤပၤမၤလိာ်စီၤဃံးလကံယၤ,ဒီးစီၤၡၤဖၣ်အဖိခွါစီၤအဃံကၣ်,ဒီးစီၤမံၤကါအဖိခွါစီၤဧးဘဒိၣ်,ဒီးပှၤကွဲးလံာ်စီၤၡၤဖၣ်,ဒီးစီၤပၤအခ့အပှၤစီၤဧစါယၤ,ဒီးစံးဝဲဒၣ်, 21လဲၤသံကွၢ်တၢ်လၢယွၤလၢယဂီၢ်,ဒီးလၢပှၤလၢအအိၣ်လီၤတဲာ်လၢအံၣ်စရ့လးဒီးယူဒၤတဖၣ်အဂီၢ်လၢလံာ်တကတြူၢ်လၢပထံၣ်န့ၢ်အီၤအကလုၢ်ကထါ,အဂ့ၢ်အကျိၤတက့ၢ်.အဂ့ၢ်ဒ်အံၤ,ယွၤအတၢ်သးထီၣ်လၢအလူလီၤအသးလၢပဖီခိၣ်မ့ၢ်အဒိၣ်မးလီၤ.အဂ့ၢ်ဒ်အံၤ,ပပၢ်တဖၣ်တတိၢ်န့ၢ်ဘၣ်လံာ်အံၤအကလုၢ်ကထါ,ဒ်သိးအကမၤဝဲဒ်ကယဲၢ်တၢ်ကွဲးအသးလၢလံာ်အံၤအပူၤဘၣ်. 22ဒီးစီၤဃံးလကံယၤ,ဒီးပှၤလၢစီၤပၤပာ်လီၤဝဲတဖၣ်န့ၣ်လဲၤဆူပှၤပၢၤတၢ်ကူတၢ်သိးစီၤဃၤစရၤအဖိခွါစီၤတံးကဝၤအဖိခွါစီၤၡၣ်လူၣ်အမါဝံပိာ်မုၣ်နီၢ်ဃုလဒါတဂၤအအိၣ်,ဒီးကတိၤတၢ်ဒီးအီၤလီၤ.အဝဲဒၣ်အိၣ်ဝဲလၢယရူၤၡလ့ၣ်လၢတၢ်အလီၢ်ခံတီၤတတီၤန့ၣ်လီၤ. 23ဒီးပိာ်မုၣ်န့ၣ်စံးဘၣ်အီၤ,ယွၤအံၣ်စရ့လးအကစၢ်စံးဒ်အံၤ,စံးဘၣ်တဲဘၣ်ပှၤလၢအမၢလီၤသုဆူယအိၣ်, 24ယွၤစံးဒ်အံၤ,ကွၢ်ကွၢ်,ယကဒုးဟဲဘၣ်တၢ်အလီၢ်တပူၤအံၤဒီးပှၤလၢအအိၣ်ဝဲဆိးဝဲလၢအပူၤလၢတၢ်အၢ,ကယဲၢ်တၢ်ဆိၣ်အၢခဲလၢာ်လၢအကွဲးအသးလၢလံာ်ပူၤလၢပှၤဖးဝဲလၢယူဒၤအစီၤပၤအမဲာ်ညါလီၤ. 25အဂ့ၢ်ဒ်အံၤ,လဲၤသဒၣ်ယၤ,ဒီးဆိၣ်ကဲၤတၢ်နၢမူလၢကစၢ်အဂၤတဖၣ်,ဒ်သိးအကဒုးသးထီၣ်ယၤလၢအစုအမၤတၢ်ခဲလၢာ်အဃိလီၤ.ဒီးယသးထီၣ်ကလူလီၤအသးလၢတၢ်အလီၢ်တပူၤအံၤ,ဒီးတစၢ်လီၤဘၣ်. 26မ့မ့ၢ်ယူဒၤအစီၤပၤလၢအမၢသုဟဲသံကွၢ်တၢ်လၢယွၤန့ၣ်,သုဘၣ်စံးဘၣ်အီၤ,ယွၤအံၣ်စရ့လးအကစၢ်စံးဒ်အံၤ,တၢ်ကတိၤလၢနနၢ်ဟူန့ၣ်, 27မ့ၢ်နသးစူၤ,ဒီးဆီၣ်လီၤနသးလၢယွၤအမဲာ်ညါဖဲနနၢ်ဟူတၢ်ကတိၤလၢအကတိၤထီဒါတၢ်အလီၢ်တပူၤအံၤ,ဒီးထီဒါပှၤလၢအအိၣ်အဆိးလၢအပူၤဒီး,နဆီၣ်လီၤနသးလၢယမဲာ်ညါ,ဒီးနဖှီနဆ့ဒီးနမဲာ်ထံလီၤလၢယမဲာ်ညါသတးဒီး,ယဲဒၣ်အံၤယဒိကနၣ်လံစ့ၢ်ကီးနၤလံ. 28ကွၢ်ကွၢ်,ယကပာ်ဖှိၣ်နၤဒီးနပၢ်တဖၣ်,ဒီးတၢ်ကပာ်ဖှိၣ်နၤလၢနတၢ်သွၣ်ခိၣ်ပူၤမုာ်မုာ်,ဒီးနမဲာ်တထံၣ်ဘၣ်တၢ်အၢခဲလၢာ်လၢယကဒုးဟဲဘၣ်တၢ်အလီၢ်အံၤ,ဒီးပှၤလၢအအိၣ်အဆိးလၢအပူၤဘၣ်.ဒီးအဝဲသ့ၣ်တဖၣ်န့ၣ်ဟဲစိာ်န့ၢ်စီၤပၤလၢတၢ်ကတိၤန့ၣ်လီၤ. 29ဒီးစီၤပၤမၢလီၤတၢ်,ဒီးပှၤဒုးအိၣ်ဖှိၣ်ယူဒၤအပှၤသူၣ်က့သးပှၢ်,ဒီးယရူၤၡလ့ၣ်အပှၤသူၣ်က့သးပှၢ်ခဲလၢာ်လီၤ. 30ဒီးစီၤပၤလဲၤထီၣ်ဆူယွၤအဟံၣ်ပူၤ,ဒီးယူဒၤအပှၤကညီခဲလၢာ်,ဒီးပှၤအိၣ်ဝဲဆိးဝဲလၢယရူၤၡလ့ၣ်အပူၤခဲလၢာ်အိၣ်ဝဲဒီးအီၤ,ဒီးပှၤလုၢ်တၢ်အဒိၣ်,ဒီးပှၤလ့ၤဝံဖိ,ဒီးပှၤဂီၢ်မုၢ်ခဲလၢာ်ဒီးဒိၣ်ဒီးဆံး,ဒီးဖးဝဲလၢအနၢ်ပူၤ,လၢကယဲၢ်တၢ်ကတိၤလၢလံာ်တၢ်အၢၣ်လီၤအီလီၤအတၢ်ကတိၤလၢပှၤထံၣ်န့ၢ်ဝဲလၢယွၤအဟံၣ်ပူၤန့ၣ်လီၤ. 31ဒီးစီၤပၤဆၢထၢၣ်လၢတၢ်ဆၢထၢၣ်အလီၢ်ဒီးအၢၣ်လီၤအီလီၤတၢ်လၢယွၤအမဲာ်ညါလၢအကလဲၤပိာ်ယွၤအကျဲ,ဒီးတိၢ်န့ၢ်အတၢ်မၤလိာ်,ဒီးအတၢ်အုၣ်အသး,ဒီးအတၢ်သိၣ်တၢ်သီတဖၣ်,လၢအသးဒီဖျၢၣ်ညါ,ဒီးလၢအသးလၢအဆိကမိၣ်တၢ်တုၤအလၢာ်,ဒ်သိးအကမၤတၢ်အၢၣ်လီၤအီလီၤအတၢ်ကတိၤအံၤလၢအကွဲးအသးလၢလံာ်အံၤအပူၤလီၤ. 32ဒီးဒုးမၤဂၢၢ်မၤကျၢၤဝဲလၢကယဲၢ်ပှၤလၢအအိၣ်လၢယရူၤၡလ့ၣ်,ဒီးလၢပှၤဘံၣ်ယၤမံၣ်ဖိအကျါန့ၣ်လီၤ.ဒီးပှၤအိၣ်ဝဲဆိးဝဲလၢယရူၤၡလ့ၣ်အပူၤတဖၣ်မၤဝဲဒ်ယွၤ,အပၢ်အကစၢ်အတၢ်အၢၣ်လီၤအီလီၤအသိးန့ၣ်လီၤ. 33ဒီးစီၤယိၤၡံယၤသုးကွံာ်ကယဲၢ်တၢ်သးဘၣ်အၢလၢကီၢ်ကိးဘ့ၣ်ဒဲးအပူၤလၢအဘၣ်ဃးဒီးပှၤအံၣ်စရ့လးဖိ,ဒီးဒုးမၤကယဲၢ်ပှၤလၢအအိၣ်လၢအံၣ်စရ့လးအကျါ,ဒုးမၤအီၤလၢယွၤအကစၢ်အတၢ်မၤလီၤ.ဒီးလၢအဝဲဒၣ်အမုၢ်နံၤခဲလၢာ်အတီၢ်ပူၤအဝဲသ့ၣ်ပိာ်ယွၤ,အပၢ်တဖၣ်အကစၢ်အခံ,ဒီးတလဲၤသဒၣ်ဘၣ်ဝဲဘၣ်လီၤ.
Copyright information for
KswSKMB