‏ 2 Chronicles 6

1တုၤနုၤတစုစီၤၡလိၤမိၤစံးဝဲဒၣ်,ယွၤစံးဝဲလၢသါကအိၣ်ကဆိးလၢတၢ်ခံးတီၣ်အပူၤလီၤ. 2ယမၤတၢ်အိၣ်အလီၢ်အဟံၣ်လၢနဂီၢ်,ဒီးတၢ်အလီၢ်ဖဲနကအိၣ်ကဆိးလၢအပူၤလီၤထူလီၤယိာ်လီၤ.

3ဒီးစီၤပၤဃၣ်ဃီၤအမဲာ်,ဒီးဆိၣ်ဂ့ၤအံၣ်စရ့လးအတၢ်အိၣ်ဖှိၣ်ခဲလၢာ်,(ဒီးအံၣ်စရ့လးအတၢ်အိၣ်ဖှိၣ်ဆၢထၢၣ်ခဲလၢာ်), 4ဒီးစံးဝဲဒၣ်,ယွၤအံၣ်စရ့လးအကစၢ်လၢအကတိၤတၢ်လၢအထးခိၣ်ဒီးယပၢ်စီၤဒၤဝံး,ဒီးမၤပှဲၤထီၣ်ဝဲလၢအစုတဂၤန့ၣ်,မ်အဘၣ်တၢ်စံးထီၣ်ပတြၢၤတက့ၢ်.ဒီးစံးဝဲဒၣ်, 5လၢမုၢ်တနံၤလံၤလံၤလၢယဟဲစိာ်ယပှၤဂီၢ်မုၢ်အံၣ်စရ့လးလၢကီၢ်အဲၤကူပတူးအပူၤန့ၣ်ယတဃုထၢဘၣ်ဝ့ၢ်တဖျၢၣ်လၢအံၣ်စရ့လးအဒူၣ်ခဲလၢာ်အကျါလၢပှၤကမၤဟံၣ်ဒ်သိးယမံၤကအိၣ်လၢအပူၤနီတဖျၢၣ်ဘၣ်.ဒီးယတဃုထၢဘၣ်ပှၤတဂၤဒ်သိးအကကဲဒိၣ်လၢယပှၤဂီၢ်မုၢ်အံၣ်စရ့လးအဖီခိၣ်ဘၣ်. 6မ့မ့ၢ်ယဃုထၢယရူၤၡလ့ၣ်ဒ်သိးယမံၤကအိၣ်ဖဲန့ၣ်,ဒီးယဃုထၢစီၤဒၤဝံးဒ်သိးအကအိၣ်လၢယပှၤဂီၢ်မုၢ်အံၣ်စရ့လးအဖီခိၣ်လီၤ.

7ဒီးအိၣ်ဝဲလၢယပၢ်စီၤဒၤဝံးအသးလၢအကမၤဟံၣ်တဖျၢၣ်လၢယွၤအံၣ်စရ့လးအကစၢ်အမံၤအဂီၢ်လီၤ. 8ဒီးယွၤစံးဘၣ်ယပၢ်စီၤဒၤဝံး,မ့ၢ်တၢ်အိၣ်လၢနသးလၢနကမၤဟံၣ်လၢယမံၤအဂီၢ်ဒီး,နမၤဂ့ၤတၢ်လၢအအိၣ်လၢနသးအဃိလီၤ. 9ဘၣ်ဆၣ်ဒီးနတဘၣ်မၤဘၣ်ဟံၣ်န့ၣ်ဘၣ်.မ့မ့ၢ်နဖိခွါလၢအကဟဲထီၣ်လၢနယီၢ်ဒ့ပူၤတဂၤန့ၣ်,အဝဲဒၣ်ကမၤဟံၣ်တဖျၢၣ်န့ၣ်လၢယဂီၢ်လီၤ. 10ဒီးယွၤမၤလၢမၤပှဲၤအကလုၢ်လၢအကတိၤဝဲ,ဒီးယဂဲၤဆၢထၢၣ်လၢယပၢ်စီၤဒၤဝံးအလီၢ်,ဒီးဆ့ၣ်နီၤလၢအံၣ်စရ့လးအလီၢ်ပစိာ်အဖီခိၣ်ဒ်ယွၤစံးပာ်တၢ်အသိး,ဒီးမၤဟံၣ်လၢယွၤ,အံၣ်စရ့လးအကစၢ်အမံၤအဂီၢ်လီၤ. 11ဒီးယပာ်ဖဲန့ၣ်တလါဖဲယွၤအတၢ်အၢၣ်လီၤအီလီၤအိၣ်လၢအပူၤလၢအအၢၣ်လီၤအီလီၤဒီးပှၤအံၣ်စရ့လးဖိလီၤ.

12ဒီးစီၤၡလိၤမိၤဆၢထၢၣ်လၢယွၤအတၢ်လုၢ်လီၢ်အမဲာ်ညါလၢအံၣ်စရ့လးအတၢ်အိၣ်ဖှိၣ်ခဲလၢာ်အမဲာ်ညါ,ဒီးယူာ်ထီၣ်အစု, 13(အဂ့ၢ်ဒ်အံၤ,စီၤၡလိၤမိၤမၤတၢ်အလီၢ်တိၢ်,အထီယဲၢ်ပျၢ်,ဒီးအဒီၣ်ဃီၤယဲၢ်ပျၢ်,ဒီးအကစီၤထီၣ်သၢပျၢ်,ဒီးပာ်ဝဲလၢဂၢၤအသးကံၢ်ပူၤ,ဒီးဆၢထၢၣ်ဝဲလၢအဖီခိၣ်,ဒီးချံးလီၤအခီၣ်လၢအံၣ်စရ့လးအတၢ်အိၣ်ဖှိၣ်ခဲလၢာ်အမဲာ်ညါ,ဒီးယူာ်ထီၣ်အစုဆူမူခိၣ်,) 14ဒီးစံးဝဲဒၣ်,ယွၤအံၣ်စရ့လးအကစၢ်ဧၢ,လၢမူခိၣ်ပူၤ,ဒီးလၢဟီၣ်ခိၣ်ချၢကစၢ်ဒ်နၤအသိးန့ၣ်တအိၣ်ဘၣ်,လၢအတိၢ်န့ၢ်တၢ်အၢၣ်လီၤအီလီၤ,ဒီးတၢ်ဘျုးတၢ်ဖှိၣ်,ဒီးနခ့နပှၤလၢအလဲၤတၢ်လၢနမဲာ်ညါလၢအသးဒီဖျၢၣ်ညါ, 15လၢအတိၢ်န့ၢ်တၢ်ဒီးနခ့နပှၤယပၢ်စီၤဒၤဝံးလၢတၢ်လၢနစံးပာ်တၢ်လီၤ.ဒီးနကတိၤတၢ်လၢနထးခိၣ်,ဒီးနမၤလၢထီၣ်ပှဲၤထီၣ်တၢ်လၢစု,ဒ်လၢမုၢ်မဆါတနံၤအံၤအသိးန့ၣ်လီၤ.

16ဒီးခဲကနံၣ်အံၤယွၤအံၣ်စရ့လးအကစၢ်ဧၢ,တိၢ်န့ၢ်တၢ်ဒီးနခ့နပှၤယပၢ်စီၤဒၤဝံးလၢတၢ်လၢနကတိၤတၢ်ဒီးအီၤတက့ၢ်.နစံး,ပှၤဘၣ်ဃးဒီးနၤလၢအကဆ့ၣ်နီၤလၢအံၣ်စရ့လးအလီၢ်ပစိာ်တဂၤတဟါမၢ်ဘၣ်လၢယမဲာ်ညါဘၣ်,ထဲအံၤတမံၤ,မ်နဖိနလံၤတိၢ်န့ၢ်အကျဲဒ်သိးအကလဲၤတၢ်လၢယတၢ်သိၣ်တၢ်သီအပူၤ,ဒ်နလဲၤတၢ်လၢယမဲာ်ညါအသိးန့ၣ်တက့ၢ်.

17ဒီးခဲကနံၣ်အံၤအံၣ်စရ့လးအကစၢ်ဧၢ,မ်နမၤတီလၢ်နကလုၢ်လၢနကတိၤတၢ်ဒီးနခ့နပှၤစီၤဒၤဝံးတက့ၢ်. 18အဂ့ၢ်ဒ်အံၤ,ကစၢ်ကအိၣ်ကဆိးနီၢ်နီၢ်ဒီးပှၤကညီလၢဟီၣ်ခိၣ်ချၢစ့ၢ်ကီးဧါ.ကွၢ်ကွၢ်,မူခိၣ်ဒီးမူခိၣ်အထီကတၢၢ်န့ၣ်တတြီၢ်ဘၣ်နၤဘၣ်.ဟံၣ်လၢယမၤတဖျၢၣ်အံၤဆံးန့ၢ်အန့ၣ်ဆံးဒိၣ်လဲၣ်.

19ဘၣ်ဆၣ်ဒီးဃၣ်ဃီၤနမဲာ်ဆူနခ့နပှၤအတၢ်ထုကဖၣ်,ဒီးအတၢ်ဃ့ကညး,ယွၤယကစၢ်ဧၢ,တၢ်ကိးပသူထီၣ်,ဒီးတၢ်ဘါထုကဖၣ်လၢနခ့နပှၤဘါထုကဖၣ်လၢနမဲာ်ညါ, 20ဒ်သိးနမဲာ်ကအိၣ်အိးထီၣ်အသးဆူဟံၣ်တဖျၢၣ်အံၤလၢမုၢ်ဆါဆဲးလၢမုၢ်နၤဆူတၢ်အလီၢ်လၢနစံးလၢအဂ့ၢ်လၢနမံၤကအိၣ်ဖဲန့ၣ်,ဒ်သိးနကဒိကနၣ်တၢ်ဘါထုကဖၣ်လၢနခ့နပှၤဘါထုကဖၣ်ဝဲဆူတၢ်အလီၢ်အံၤတက့ၢ်.

21တုၤအဘါထုကဖၣ်တၢ်ဆူတၢ်အလီၢ်အံၤဒီး,ဒိကနၣ်နခ့နပှၤ,ဒီးနပှၤဂီၢ်မုၢ်အံၣ်စရ့လးအတၢ်ဃ့ကညးတက့ၢ်.ဒိကနၣ်တၢ်လၢမူခိၣ်နအိၣ်နဆိးအလီၢ်,ဒီးတုၤနနၢ်ဟူတၢ်ဒီး,ပျၢ်တၢ်တက့ၢ်.

22ပှၤတဂၤမ့ၢ်မၤကမၣ်အပှၤလၢအဃၢၤ,ဒီးမ့ၢ်ဃ့ဝဲတၢ်ဆိၣ်တၢ်လၢအီၤ,ဒီးဒုးဆိၣ်တၢ်,ဒီးတၢ်ဆိၣ်န့ၣ်ဟဲဝဲလၢနတၢ်လုၢ်လီၢ်အမဲာ်ညါလၢဟံၣ်တဖျၢၣ်အံၤအပူၤဒီး, 23ဒိကနၣ်နဲလၢမူခိၣ်,ဒီးမၤတၢ်,ဒီးစံၣ်ညီၣ်နခ့နပှၤ,ဒ်သိးနကဟ့ၣ်တၢ်ဒဲးဘးလၢပှၤတတီတလိၤ,ဒ်သိးနကဟ့ၣ်အကျဲလၢအခိၣ်ဒၣ်ဝဲအဖီခိၣ်,ဒီးဒ်သိးနကပာ်တီပာ်လိၤပှၤတီပှၤလိၤ,ဒ်သိးနကဟ့ၣ်လီၤအီၤလၢတၢ်ဒ်အတၢ်တီတၢ်လိၤအသိးန့ၣ်တက့ၢ်.

24တုၤနပှၤဂီၢ်မုၢ်အံၣ်စရ့လးဘၣ်တၢ်ကျီကွံာ်အီၤလၢအဒုၣ်အဒါအမဲာ်ညါလၢအမၤကမၣ်ဘၣ်နၤအဃိ,ဒီးဃၣ်ဃီၤအသးဆူနအိၣ်,ဒီးအၢၣ်လီၤအီလီၤနမံၤ,ဒီးဘါထုကဖၣ်တၢ်,ဒီးဃ့ကညးတၢ်လၢနၤဆူဟံၣ်အံၤဒီး, 25ဒိကနၣ်နဲလၢမူခိၣ်,ဒီးပျၢ်နပှၤဂီၢ်မုၢ်အံၣ်စရ့လးအတၢ်ဒဲးဘး,ဒီးဒုးဟဲက့ၤအီၤဆူကီၢ်လၢနဟ့ၣ်လီၤအပၢ်တဖၣ်န့ၣ်တက့ၢ်.

26တုၤမူခိၣ်ကးတံာ်ဃာ်အသး,ဒီးတၢ်တဟဲစူၤဘၣ်လၢအမၤကမၣ်ဘၣ်နၤအဃိဒီး,မ့ၢ်ဘါထုကဖၣ်ဝဲဆူတၢ်အလီၢ်အံၤ,ဒီးအၢၣ်လီၤအီလီၤနမံၤ,ဒီးတုၤနမၤနးမၤဖှီၣ်အီၤဒီး,ဃၣ်ကဒါက့ၤလၢအတၢ်ဒဲးဘးအအိၣ်ဒီး, 27ဒိကနၣ်နဲလၢမူခိၣ်,ဒီးပျၢ်နခ့နပှၤ,ဒီးနပှၤဂီၢ်မုၢ်အံၣ်စရ့လးအတၢ်ဒဲးဘး,ဒ်သိးနကသိၣ်လိအီၤလၢကျဲအဂ့ၤဖဲအကပိာ်ဝဲ,ဒီးဒုးဟဲလီၤတၢ်စူၤလၢကီၢ်ပူၤလၢနဟ့ၣ်လီၤတ့ၢ်နပှၤဂီၢ်မုၢ်လၢတၢ်န့ၢ်သါအဂီၢ်န့ၣ်တက့ၢ်.

28တၢ်သၣ်ဝံၤလီၤဒိမ့ၢ်အိၣ်လၢကီၢ်ပူၤ,တၢ်သံသတြိာ်,ကလံၤအူမၤဟးဂီၤတၢ်,ဘုအတၢ်ဆါ,ဒွဲၣ်အၢ်ဘၤမ့ၢ်အိၣ်,ဒီးဒွဲၣ်ဃစံမ့ၢ်အိၣ်,ဒီးအဒုၣ်အဒါမ့ၢ်ကဝီၤဃာ်အီၤလၢအကီၢ်အဝ့ၢ်ပူၤ,ဒီးဖဲဒၣ်တၢ်တီၢ်,ဒီးဖဲဒၣ်တၢ်ဆါတမံၤမံၤမ့ၢ်အိၣ်ဒီး, 29ကယဲၢ်တၢ်ထုကဖၣ်,ကယဲၢ်တၢ်ဃ့ကညးလၢပှၤတဂၤဂၤမ့ၢ်ဂ့ၤ,လၢနပှၤဂီၢ်မုၢ်ခဲလၢာ်မ့ၢ်ဂ့ၤ,မၤဝဲလၢအသ့ၣ်ညါအတၢ်တီၢ်,ဒီးအတၢ်ကိၢ်တၢ်ဂီၤအဖၢမုၢ်န့ၣ်,ဒီးယူာ်ထီၣ်အစုဆူဟံၣ်အံၤဒီး, 30ကနၣ်နဲလၢမူခိၣ်နအိၣ်ဆိးအလီၢ်,ဒီးပျၢ်တၢ်,ဒီးဟ့ၣ်လီၤပှၤကညီလၢနသ့ၣ်ညါအသးတဂၤလၢ်လၢ်ဒ်အကျဲခဲလၢာ်အသိးန့ၣ်,(အဂ့ၢ်ဒ်အံၤ,နသ့ၣ်ညါပှၤကညီဖိအသးနဲဒၣ်တဂၤဃီဧိၤလီၤ), 31ဒ်သိးအကပျံၤနၤဒီးပိာ်နကျဲတဖၣ်ကယဲၢ်မုၢ်နံၤမုၢ်နၤလၢအမူဝဲလၢကီၢ်ပူၤလၢနဟ့ၣ်လီၤပပၢ်တဖၣ်န့ၣ်တက့ၢ်.

32ဒီးပှၤတခီဘီမုၢ်ဖိစ့ၢ်ကီးလၢအတမ့ၢ်ဘၣ်နပှၤဂီၢ်မုၢ်အံၣ်စရ့လးအဖိဘၣ်,ဒီးဟဲဝဲလၢထံယံၤကီၢ်ယံၤလၢနမံၤအဃိလၢနစုဆူၣ်အဃိ,ဒီးလၢနစုဒုၣ်ယူာ်ထီၣ်အသးအဃိ,မ့ၢ်ဟဲဘါထုကဖၣ်လၢဟံၣ်အံၤဒီး, 33ဒိကနၣ်နဲလၢမူခိၣ်နအိၣ်နဆိးအလီၢ်,ဒီးမၤတၢ်ဒ်ကယဲၢ်တၢ်လၢပှၤတခီဘီမုၢ်ဖိကိးထီၣ်ဆူနၤတမံၤလၢ်လၢ်အသိး,ဒ်သိးပှၤဂီၢ်မုၢ်လၢဟီၣ်ခိၣ်ချၢခဲလၢာ်ကသ့ၣ်ညါနမံၤ,ဒီးပျံၤနၤဒ်နပှၤဂီၢ်မုၢ်အံၣ်စရ့လးအသိးန့ၣ်,ဒီးဒ်သိးအကသ့ၣ်ညါလၢဟံၣ်တဖျၢၣ်အံၤလၢယမၤအီၤဘၣ်တၢ်ကိးအီၤလၢနမံၤန့ၣ်တက့ၢ်.

34နပှၤဂီၢ်မုၢ်မ့ၢ်လဲၤထီၣ်ဒုးတၢ်ဒီးအဒုၣ်အဒါဒီး,ဖဲဒၣ်ကျဲလၢနကမၢလီၤအီၤဒီး,မ့ၢ်ဘါထုကဖၣ်နၤဆူဝ့ၢ်တဖျၢၣ်အံၤလၢနဃုထၢအီၤ,ဒီးဆူဟံၣ်လၢယမၤလၢနမံၤအဃိဒီး, 35ဒိကနၣ်နဲအတၢ်ထုကဖၣ်,ဒီးအတၢ်ဃ့ကညး,ဒီးစံၣ်ညီၣ်တၢ်လၢအဂီၢ်န့ၣ်တက့ၢ်.

36မ့ၢ်မၤကမၣ်ဘၣ်နၤ,(အဂ့ၢ်ဒ်အံၤ,ပှၤလၢအတမၤကမၣ်ဘၣ်တၢ်န့ၣ်တအိၣ်ဘၣ်,)ဒီးနသးထီၣ်ဘၣ်အီၤ,ဒီးနဟ့ၣ်လီၤကွံာ်အီၤလၢအဒုၣ်အဒါ,ဒီးအဝဲသ့ၣ်စိာ်မၢကဲကုၢ်အီၤဆူကီၢ်လၢအယံၤဂ့ၤ,လၢအဘူးဂ့ၤဒီး, 37မ့ၢ်ဟဲက့ၤကဒါက့ၤလၢအသးဆူကီၢ်ပူၤဖဲတၢ်စိာ်မၢကဲကုၢ်အီၤ,ဒီးပီၢ်ယၢ်လီၤက့ၤအသး,ဒီးဃ့ကညးနၤလၢပှၤအကီၢ်ပူၤလၢအစိာ်မၢကဲကုၢ်အီၤဒီးစံးဝဲ,ပမၤကမၣ်လံတၢ်လံ,ဒီးမၤလံတၢ်အၢလံ,ပမၤလံတၢ်ဒဲးဘးလံ, 38ဒီးဟဲက့ၤကဒါက့ၤဆူနအိၣ်လၢအသးဒီဖျၢၣ်ညါ,ဒီးလၢအသးတုၤအလၢာ်လၢအကဲကုၢ်အကီၢ်ပူၤဖဲပှၤစိာ်မၢကဲကုၢ်အီၤ,ဒီးမ့ၢ်ဘါထုကဖၣ်တၢ်ဆူကီၢ်လၢနဟ့ၣ်လီၤအပၢ်တဖၣ်,ဆူဝ့ၢ်လၢနဃုထၢအီၤ,ဒီးဆူဟံၣ်လၢယမၤလၢနမံၤအဃိဒီး, 39ကနၣ်နဲအတၢ်ဘါထုကဖၣ်,ဒီးအဃ့ကညးတၢ်လၢမူခိၣ်နအိၣ်နဆိးအလီၢ်,ဒီးစံၣ်ညီၣ်တၢ်လၢအဂီၢ်,ဒီးမၤပူၤမၤဖျဲးနပှၤဂီၢ်မုၢ်လၢအမၤကမၣ်ဘၣ်နၤတက့ၢ်.

40ခဲကနံၣ်အံၤယကစၢ်ဧၢ,မ်နမဲာ်အိၣ်အိးထီၣ်အသး,ဒီးမ်နနၢ်ဒိကနၣ်တၢ်ထုကဖၣ်လၢတၢ်အလီၢ်အံၤတက့ၢ်.

41ဒီးခဲကနံၣ်အံၤကစၢ်ယွၤဧၢ,ဂဲၤဆၢထၢၣ်ဆူနအိၣ်ဘှံးအလီၢ်,နဲဒၣ်ဒီးနစိနကမီၤအတလါန့ၣ်တက့ၢ်.မ်နပှၤလုၢ်တၢ်အဒိၣ်တဖၣ်သိးဒီးတၢ်အုၣ်က့ၤခီၣ်က့ၤ,ဒီးနပှၤစီဆှံသူၣ်ခုသးခုလၢတၢ်ဂ့ၤတၢ်ဝါအပူၤန့ၣ်တက့ၢ်.

42ကစၢ်ယွၤဧၢ,ဘိးဃၣ်ကွံာ်နပှၤဒိးဖှူအသးတဂၤအမဲာ်တဂ့ၤ.သ့ၣ်နီၣ်ထီၣ်က့ၤတၢ်ဘျုးတၢ်ဖှိၣ်ဘၣ်ဃးဒီးစီၤဒၤဝံးတက့ၢ်.