2 Chronicles 15
1ဒီးယွၤအသးလီၤဘၣ်စီၤဧိၤဒ့းအဖိခွါစီၤဧစၤရယၤအလိၤ, 2ဒီးလဲၤထီၣ်သဂၢၢ်စီၤအၤစါ,ဒီးစံးဝဲ,ကနၣ်ယကလုၢ်တက့ၢ်,စီၤအၤစါ,ဒီးယူဒၤ,ဒီးဘံၣ်ယၤမံၣ်ခဲလၢာ်သ့ၣ်ဧၢ,တုၤသုအိၣ်ဒီးယွၤဒီး,ယွၤအိၣ်ဒီးသုလီၤ.ဒီးသုမ့ၢ်ဃုအီၤဒီး,သုကထံၣ်န့ၢ်အီၤလီၤ.ဒီးသုမ့ၢ်လဲၤသဒၣ်အီၤဒီး,ကလဲၤသဒၣ်သုလီၤ. 3ဒီးအါနံၤအါသီန့ၣ်အံၣ်စရ့လးတအိၣ်ဘၣ်ဒီးကစၢ်အမ့ၢ်အတီ,ဒီးတအိၣ်ဘၣ်ဒီးပှၤလုၢ်တၢ်အဒိၣ်သိၣ်လိတၢ်,ဒီးတအိၣ်ဘၣ်ဒီးတၢ်သိၣ်တၢ်သီဘၣ်. 4ဘၣ်ဆၣ်ဒီးတုၤအဘၣ်တၢ်ကိၢ်တၢ်ဂီၤဒီး,ဃၣ်က့ၤအသးဆူယွၤအံၣ်စရ့လးအကစၢ်အအိၣ်,ဒီးဃုအီၤ,ဒီးထံၣ်န့ၢ်အီၤလီၤ. 5ဒီးလၢအကတီၢ်ဖဲန့ၣ်ပှၤလၢအဟးထီၣ်မ့ၢ်ဂ့ၤ,ပှၤလၢအဟဲနုာ်မ့ၢ်ဂ့ၤ,အတၢ်ခုၣ်တၢ်မုာ်တအိၣ်ဘၣ်.တၢ်ကိၢ်တၢ်ဂီၤဒိၣ်ဒိၣ်ကလဲာ်အိၣ်လၢပှၤအအိၣ်အဆိးလၢကီၢ်တဖၣ်အပူၤခဲလၢာ်လီၤ. 6ဒီးပှၤတကလုာ်မၤဟးဂီၤပှၤတကလုာ်,ဒီးဝ့ၢ်တဝ့ၢ်မၤဟးဂီၤဝ့ၢ်တဝ့ၢ်လီၤ.အဂ့ၢ်ဒ်အံၤ,ယွၤမၤနးမၤဖှီၣ်အီၤလၢတၢ်ကိၢ်တၢ်ဂီၤအကလုာ်ကလုာ်လီၤ. 7ဒီးပာ်ဆူၣ်သုသးတက့ၢ်.မ်သုစုအသုတလီၤဘှါတဂ့ၤ.အဂ့ၢ်ဒ်အံၤ,သုမၤတၢ်ကအိၣ်ဝဲဒီးအဘူးအလဲလီၤ. 8ဒီးတုၤစီၤအၤစါနၢ်ဟူတၢ်ကတိၤတဖၣ်န့ၣ်,ဒီးဝံဧိၤဒ့းကတိၤတၢ်လၢဝံအကျိာ်ဒီး,ပာ်ဆူၣ်ထီၣ်အသး,ဒီးမၤဟးဂီၤကွံာ်တၢ်ဂီၤသးဘၣ်အၢလၢယူဒၤ,ဒီးဘံၣ်ယၤမံၣ်အကီၢ်ပူၤ,ဒီးလၢဝ့ၢ်တဖၣ်အပူၤလၢအမၤန့ၢ်လၢကစၢၢ်အ့ဖရဲၣ်,ဒီးမၤက့ၤယွၤအတၢ်လုၢ်လီၢ်လၢအအိၣ်ဝဲလၢယွၤအဟံၣ်အတၢ်ခိၣ်ဒုးထီၣ်အသးအမဲာ်ညါလီၤ. 9ဒီးဒုးအိၣ်ဖှိၣ်ရိဖှိၣ်ယူဒၤဒီးဘံၣ်ယၤမံၣ်ခဲလၢာ်,ဒီးပှၤတခီဘီမုၢ်ဖိလၢအအိၣ်ဝဲဒီးအီၤလၢအ့ဖရဲၣ်,ဒီးမနၤရှ့ၤအကျါ,ဒီးလၢစူၤမ့းအိၣ်အကျါလီၤ.(အဂ့ၢ်ဒ်အံၤ,တုၤပှၤထံၣ်ဝဲလၢယွၤ,အကစၢ်အိၣ်ဝဲဒီးအီၤဒီးပှၤလီၤဘၣ်ဆူအအိၣ်တခီလၢအံၣ်စရ့လးအကျါအါအါကလဲာ်လီၤ.) 10ဒီးလၢစီၤအၤစါကဲစီၤပၤတဆံယဲၢ်နံၣ်တနံၣ်,လါသၢလါတလါန့ၣ်,ပှၤအိၣ်ဖှိၣ်ရိဖှိၣ်ဝဲလၢယရူၤၡလ့ၣ်အပူၤလီၤ. 11ဒီးတၢ်လၢမုၢ်တနံၤန့ၣ်လုၢ်ယွၤလၢဂီၤဖံးနွံကယၤ,ဒီးသိနွံကထိ,လၢတၢ်ဂုာ်န့ၢ်လၢအဟဲစိာ်ဝဲတဖၣ်အကျါလီၤ. 12ဒီးအၢၣ်လီၤအီလီၤတၢ်လၢအကဃုယွၤအပၢ်တဖၣ်အကစၢ်လၢအသးဒီဖျၢၣ်ညါ,ဒီးလၢအသးတုၤအလၢာ်, 13ဒီးပှၤလၢအတဃုဘၣ်ယွၤတဂၤလၢ်လၢ်န့ၣ်,အဒိၣ်ဂ့ၤ,အဆံးဂ့ၤ,ပိာ်မုၣ်ဂ့ၤ,ပိာ်ခွါဂ့ၤ,ကဘၣ်တၢ်မၤသံအီၤလီၤ. 14ဒီးဆိၣ်တၢ်ဒီးယွၤလၢအသီၣ်ဖးဒိၣ်,ဒီးလၢတၢ်ကိးပသူထီၣ်,ဒီးလၢကွဲၤ,ဒီးလၢတနွဲလီၤ. 15ဒီးယူဒၤခဲလၢာ်အသးခုဝဲလၢတၢ်ဆိၣ်အဃိလီၤ.အဂ့ၢ်ဒ်အံၤ,ဆိၣ်ဝဲလၢအသးဒီဖျၢၣ်ညါ,ဒီးဃုယွၤလၢအဆၢတၢ်တုၤအလၢာ်,ဒီးထံၣ်န့ၢ်ဝဲ,ဒီးယွၤဒုးအိၣ်ဘှံးအီၤဝးတရံးဝဲလီၤ. 16ဒီးစီၤပၤအၤစါသုးကွံာ်အမိၢ်ဒၣ်လဲာ်နီၢ်မၤကၤလၢနီၢ်ပၤမုၣ်အလီၢ်လၢအတၢ်တ့အရှ့ရၤအဂီၤအဃိန့ၣ်လီၤ.ဒီးစီၤအၤစါကူာ်လီၤကွံာ်အတၢ်ဂီၤ,ဒီးယီၢ်လီၤတံၢ်ဝဲ,ဒီးဆူးထီၣ်ကွံာ်ဝဲလၢထံကျိကံဒြိၣ်အနံၤလီၤ. 17ဒီးတၢ်အလီၢ်ထီၣ်ထီတဖၣ်န့ၣ်တဘၣ်တၢ်သုးကွံာ်ဘၣ်,ဘၣ်ဆၣ်ဒီးစီၤအၤစါအသးအိၣ်ဝဲဒီဖျၢၣ်တစိၤဒၣ်အီၤလီၤ. 18ဒီးဟဲစိာ်တၢ်လၢအပၢ်မၤဘူၣ်ဝဲ,ဒီးတၢ်လၢအမၤဘူၣ်အကစၢ်ဒၣ်ဝဲတဖၣ်ဆူယွၤအဟံၣ်ပူၤ,ကျိၣ်ဧိၤစ့ဧိၤ,ဒီးထူဧိၤလွဲဧိၤ,ဒီးတၢ်အဃၢၤအဃိၢ်လီၤ. 19ဒီးတၢ်ဒုးသုးတအိၣ်ဘၣ်တုၤလီၤစီၤအၤစါကဲစီၤပၤအနံၣ်ပှဲၤထီၣ်သၢဆံယဲၢ်နံၣ်န့ၣ်လီၤ.
Copyright information for
KswSKMB