‏ 2 Chronicles 20

1ဒီးလၢတၢ်န့ၣ်တဖၣ်အလီၢ်ခံတၢ်မၤအသးလၢပှၤမိၤအးဖိ,ဒီးပှၤဧၣ်မိၣ်ဖိ,ဒီးပှၤမူနးဖိအိၣ်ဒီးအီၤသ့ၣ်တဖၣ်ဟဲဝဲဆူစီၤယဟိၡၤဖးအအိၣ်,ဒ်သိးအကဒုးတၢ်လီၤ.

2ဒီးပှၤဟဲဝဲ,ဒီးဒုးနဲၣ်စီၤယဟိၡၤဖးဒီးစံးဝဲဒၣ်,ပှၤဂီၢ်မုၢ်ဖးဒိၣ်,ဟဲထီဒါနၤလၢပီၣ်လဲၣ်ဝၢ်ဘးခီလၢအဒိၣ်,ကွၢ်ကွၢ်,အိၣ်ဝဲလၢဃၤဃစိၣ်တါမၢ်အပူၤ,အဝဲန့ၣ်မ့ၢ်ဧ့ၣ်က့ဒံၤလီၤ.

3ဒီးစီၤယဟိၡၤဖးပျံၤတၢ်,ဒီးဃၣ်အသးဒ်သိးအကဃုယွၤလီၤ.ဒီးကိးထီၣ်တၢ်ဒုၣ်တၢ်အီၣ်လၢယူဒၤဖိခဲလၢာ်အကျါလီၤ.

4ဒီးပှၤယူဒၤဖိအိၣ်ဖှိၣ်ရိဖှိၣ်ဒ်သိးအကဃ့တၢ်လၢယွၤ,ဒီးလၢယူဒၤအဝ့ၢ်ခဲလၢာ်န့ၣ်ဟဲဃုယွၤလီၤ.

5ဒီးစီၤယဟိၡၤဖးဆၢထၢၣ်ဝဲလၢယူဒၤ,ဒီးယရူၤၡလ့ၣ်အတၢ်အိၣ်ဖှိၣ်အကျါလၢယွၤအဟံၣ်ပူၤ,လၢတၢ်ဂၢၤအသီအမဲာ်ညါလီၤ. 6ဒီးစံးဝဲဒၣ်,ယွၤပပၢ်အကစၢ်ဧၢ,နမ့ၢ်ကစၢ်လၢမူခိၣ်,တမ့ၢ်ဘၣ်ဧါ.ဒီးနပၢပှၤကလုာ်တဖၣ်လၢဘီမုၢ်ခဲလၢာ်,တမ့ၢ်ဘၣ်ဧါ.ဒီးတၢ်အစိအကမီၤ,ဒီးတၢ်အဂံၢ်အဘါအိၣ်ဝဲလၢနစုပူၤ,ဒီးပှၤပာ်ဆၢထၢၣ်အသးထီဒါနၤတအိၣ်ဘၣ်,တမ့ၢ်ဘၣ်ဧါ. 7နမ့ၢ်ပကစၢ်လၢအဟီထီၣ်ကွံာ်ပှၤလၢအအိၣ်ဝဲဆိးဝဲလၢကီၢ်အံၤအပူၤလၢနပှၤဂီၢ်မုၢ်အံၣ်စရ့လးအမဲာ်ညါ,ဒီးဟ့ၣ်လီၤဝဲလၢနတံၤနသကိးစီၤအၤဘြၤဟၣ်အချံအသၣ်လီၤထူလီၤယိာ်,တမ့ၢ်ဘၣ်ဧါ. 8ဒီးပှၤအိၣ်ဝဲဆိးဝဲလၢအပူၤ,ဒီးသူၣ်န့ၢ်နၤလၢတၢ်အလီၢ်စီဆှံလၢအပူၤလၢနမံၤအဂီၢ်,ဒီးစံးဝဲဒၣ်, 9နးဧိၤဘီဧိၤဂ့ၤ,တၢ်စံၣ်ညီၣ်ဂ့ၤ,တၢ်သံသတြိာ်ဂ့ၤ,တၢ်သၣ်ဝံၤလီၤဒိဂ့ၤ,တၢ်အၢမ့ၢ်ဘၣ်ပှၤ,ဒီးပဆၢထၢၣ်လၢဟံၣ်အံၤအမဲာ်ညါ,ဒီးလၢနမဲာ်ညါ,(အဂ့ၢ်ဒ်အံၤ,နမံၤအိၣ်ဝဲလၢဟံၣ်အံၤအပူၤ),ဒီးကိးထီၣ်နၤလၢပဘၣ်တၢ်ကိၢ်တၢ်ဂီၤအဖၢမုၢ်ဒီး,နကဒိကနၣ်,ဒီးမၤစၢၤတၢ်လီၤ.

10ဒီးခဲကနံၣ်အံၤကွၢ်ကွၢ်,ပှၤဧၣ်မိၣ်ဖိဒီးပှၤမိၤအးဖိဒီးပှၤကစၢၢ်စ့ဧၢ်ဖိလၢနတဟ့ၣ်အံၣ်စရ့လးလဲၤနုာ်လၢအကျါဖဲအဟဲထီၣ်လၢကီၢ်အဲၤကူပတူး,မ့မ့ၢ်ဃၣ်တရံးဝဲလၢအအိၣ်,ဒီးတမၤဟးဂီၤဘၣ်အီၤဘၣ်, 11ကွၢ်,မ့ၢ်အဝဲသ့ၣ်ဟ့ၣ်ကၣ်ပှၤဒ်လဲၣ်,အဂ့ၢ်ဒ်အံၤ,ဟဲလံဒ်သိးအကဟီထီၣ်ကွံာ်ပှၤလၢနတၢ်န့ၢ်သါအပူၤလၢနဒုးန့ၢ်သါပှၤလီၤ.

12ပကစၢ်ဧၢ,နတစံၣ်ညီၣ်အီၤဘၣ်ဧါ.အဂ့ၢ်ဒ်အံၤ,ပဂံၢ်ပဘါတအိၣ်ဘၣ်လၢပှၤဂီၢ်မုၢ်ဖးဒိၣ်အမဲာ်ညါလၢအဟဲထီဒါပှၤအံၤဘၣ်.ဒီးပကမၤဒ်လဲၣ်ဒ်လဲၣ်န့ၣ်ပတသ့ၣ်ညါဘၣ်.မ့မ့ၢ်ပမဲာ်အိၣ်ဝဲဆူနအိၣ်လီၤ. 13ဒီးပှၤယူဒၤဖိဆၢထၢၣ်လၢယွၤအမဲာ်ညါခဲလၢာ်အိၣ်ဒီးအဖိဆံး,ဒီးအဖိအမါ,ဒီးအဖိဒံဖိသၣ်လီၤ.

14ဒီးပှၤလ့ၤဝံဖိစီၤမးတၤနယၤအဖိခွါ,စီၤယံးအ့လးအဖိခွါ,စီၤဘနါယၤအဖိခွါ,စီၤစကၤရယၤအဖိခွါ,စီၤယၤဃစအ့လးလၢစီၤအၤစာ်အဖိခွါအကျါတဂၤန့ၣ်ယွၤအသးဟဲလီၤလၢအလိၤလၢတၢ်အိၣ်ဖှိၣ်အကျါ, 15ဒီးစံးဝဲဒၣ်,ကယဲၢ်ယူဒၤဖိ,ဒီးပှၤအိၣ်ဝဲဆိးဝဲလၢယရူၤၡလ့ၣ်အပူၤသုဝဲဒၣ်,ဒီးနဲဒၣ်စီၤပၤယဟိၡၤဖးဧၢ,ကနၣ်တက့ၢ်.ယွၤစံးဘၣ်သုဒ်အံၤ,ပျံၤတၢ်တဂ့ၤ.ဒီးဘၣ်ယိၣ်တၢ်လၢပှၤဂီၢ်မုၢ်ဖးဒိၣ်အံၤအဃိတဂ့ၤ.အဂ့ၢ်ဒ်အံၤ,တၢ်ဒုးသုးန့ၣ်တမ့ၢ်ဘၣ်သုတၢ်ဘၣ်,မ့ၢ်ယွၤအတၢ်လီၤ. 16ခဲဂီၤတနံၤန့ၣ်လဲၤလီၤဆူအအိၣ်တက့ၢ်.ကွၢ်ကွၢ်,ဟဲထီၣ်ဝဲလၢစံာ်အစိခိၣ်,ဒီးသုကထံၣ်န့ၢ်အီၤလၢထံကျိဖိအကတၢၢ်လၢပှၢ်မုၢ်ကနၢယရူၤအ့လးအမဲာ်ညါလီၤ. 17သုတဒုးသုးဘၣ်လၢတၢ်အံၤအပူၤဘၣ်.ပာ်ဆၢထၢၣ်သုသး,ဒီးဆၢထၢၣ်,ဒီးထံၣ်ဘၣ်ယွၤအတၢ်အုၣ်က့ၤခီၣ်က့ၤအိၣ်ဒီးသုတက့ၢ်.ယူဒၤ,ဒီးယရူၤၡလ့ၣ်ဧၢ,ပျံၤတၢ်တဂ့ၤ.ဘၣ်ယိၣ်တၢ်တဂ့ၤ,ခဲဂီၤကိာ်န့ၣ်လဲၤထီၣ်ဆူအအိၣ်တက့ၢ်.အဂ့ၢ်ဒ်အံၤ,ယွၤအိၣ်ဝဲဒီးသုလီၤ.

18ဒီးစီၤယဟိၡၤဖးဆုးလီၤအခိၣ်ဆူဟီၣ်ခိၣ်,ဒီးယူဒၤဖိခဲလၢာ်,ဒီးပှၤအိၣ်ဝဲဆိးဝဲလၢယရူၤၡလ့ၣ်အပူၤသ့ၣ်တဖၣ်န့ၣ်ထိၣ်လီၤပှီၤအသးလၢယွၤအမဲာ်ညါဒီးဘူၣ်ထီၣ်ဘါထီၣ်ယွၤလီၤ.

19ဒီးပှၤလ့ၤဝံဖိလၢပှၤကဃးဖိအကျါ,ဒီးလၢပှၤကိၤရးဖိအကျါသ့ၣ်တဖၣ်ဆၢထၢၣ်စံးထီၣ်ပတြၢၤယွၤအံၣ်စရ့လးအကစၢ်လၢအသီၣ်ဖးဒိၣ်လၢတၢ်ထီၣ်ထီန့ၣ်လီၤ.

20ဒီးမုၢ်ဆ့ၣ်ထီၣ်န့ၣ်ဂဲၤဆၢထၢၣ်ဂီၤဂီၤ,ဒီးလဲၤထီၣ်ဆူပှၢ်မုၢ်ကနၢတကိၤ,ဒီးတုၤအလဲၤထီၣ်ဒီး,စီၤယဟိၡၤဖးဆၢထၢၣ်ဒီးစံးဝဲဒၣ်,ကနၣ်ယကလုၢ်တက့ၢ်.ယူဒၤဖိ,ဒီးပှၤအိၣ်ဝဲဆိးဝဲလၢယရူၤၡလ့ၣ်သ့ၣ်ဧၢ,နာ်က့ၤယွၤသုကစၢ်တက့ၢ်.ဒီးသုကအိၣ်ဂၢၢ်ဆိးကျၢၤလီၤ.နာ်အဝံတဖၣ်တက့ၢ်.ဒီးသုကဘီၣ်ထီၣ်ညီထီၣ်လီၤ.

21ဒီးကူၣ်လိာ်အသးဒီးပှၤဂီၢ်မုၢ်ဝံၤဒီး,ပာ်ပှၤသးဝံၣ်ယွၤဖိ,ဒီးပှၤလၢအကစံးထီၣ်ပတြၢၤတၢ်စီဆှံအဃံအလၤ,ဖဲအလဲၤထီၣ်လၢပှၤသုးမုၢ်အမဲာ်ညါအဖၢမုၢ်ဒီးစံး,စံးထီၣ်ပတြၢၤယွၤတက့ၢ်.အဂ့ၢ်ဒ်အံၤ,အဘျုးအဖှိၣ်အိၣ်ဝဲလီၤစိၤလီၤထီလီၤ.

22ဒီးအဆၢအကတီၢ်လၢပှၤအုၣ်သီတၢ်,ဒီးစံးထီၣ်ပတြၢၤတၢ်န့ၣ်ယွၤပာ်တၢ်အိၣ်ခူသူၣ်ထီဒါပှၤဧၣ်မိၣ်ဖိ,ဒီးပှၤမိၤအးဖိ,ဒီးပှၤကစၢၢ်စ့ဧၢ်ဖိလၢအဟဲထီဒါယူဒၤ,ဒီးအဝဲသ့ၣ်ဘၣ်တၢ်တီၢ်အီၤလီၤ.

23ဒီးပှၤဧၣ်မိၣ်ဖိ,ဒီးပှၤမိၤအးဖိဆၢထၢၣ်ထီဒါပှၤအိၣ်ဝဲဆိးဝဲလၢကစၢၢ်စ့ဧၢ်ဒ်သိးအကမၤသံကွံာ်,ဒီးမၤဟးဂီၤကွံာ်အီၤလီၤ.ဒီးတုၤအမၤလၢာ်ပှၤအိၣ်ဝဲဆိးဝဲလၢစ့ဧၢ်ဒီး,မၤစၢၤလိာ်အသးဒ်သိးအကမၤသံလိာ်အသးသကိးသကိးလီၤ.

24ဒီးယူဒၤဟဲဝဲဆူတိာ်ပၢၤတၢ်လၢပှၢ်မုၢ်ကနၢ,ဒီးကွၢ်ပှၤဂီၢ်မုၢ်,ဒီးကွၢ်ကွၢ်,အဝဲသ့ၣ်တဖၣ်န့ၣ်မ့ၢ်ပှၤအစိၣ်တဖၣ်လီၤဃံၤလၢဟီၣ်ခိၣ်,ဒီးပှၤတပူၤတဖျဲးဘၣ်နီတဂၤဘၣ်.

25ဒီးစီၤယဟိၡၤဖး,ဒီးအပှၤဂီၢ်မုၢ်ဟဲဂုာ်န့ၢ်အတၢ်ဖိတၢ်လံၤ,ဒီးလၢအကျါန့ၣ်ထံၣ်န့ၢ်တၢ်အါအါကလဲာ်,တၢ်ထူးတၢ်တီၤ,ဒီးတၢ်ကူတၢ်သိး,ဒီးတၢ်ကယၢကယဲအလုၢ်ဒိၣ်ပှ့ၤဒိၣ်,ဒီးဘ့ၣ်ကွံာ်ဝဲလၢအဂီၢ်ဒၣ်ဝဲအါတုၤအစိာ်ထီၣ်တသ့ဘၣ်လီၤ.ဒီးမ့ၢ်တၢ်ဖိတၢ်လံၤအိၣ်အါဒီး,ထၢထီၣ်တၢ်ဂုာ်န့ၢ်သၢနံၤညါလီၤ.

26ဒီးလွံၢ်နံၤတနံၤန့ၣ်အိၣ်ဖှိၣ်ရိဖှိၣ်လၢကစၢၢ်ကဆူးဘရၤကးလီၤ.အဂ့ၢ်ဒ်အံၤ,စံးထီၣ်ပတြၢၤယွၤအမံၤဖဲန့ၣ်လီၤ.မၤသးဒ်န့ၣ်ဒီးတၢ်ယုၢ်ဝဲတၢ်အလီၢ်န့ၣ်အမံၤလၢဘရၤကၤတုၤမုၢ်မဆါတနံၤအံၤလီၤ.

27ဒီးယူဒၤ,ဒီးယရူၤၡလ့ၣ်အပှၤကညီက့ၤက့ၤဝဲကိးဂၤဒဲး,ဒီးစီၤယဟိၡၤဖးအိၣ်လၢအမဲာ်ညါဒ်သိးအကက့ၤက့ၤဆူယရူၤၡလ့ၣ်အိၣ်ဒီးတၢ်သးခုလီၤ.အဂ့ၢ်ဒ်အံၤ,ယွၤဒုးသးခုအီၤလၢအဒုၣ်အဒါအဖီခိၣ်န့ၣ်လီၤ. 28ဒီးဟဲဝဲဆူယရူၤၡလ့ၣ်အိၣ်ဒီးသီတူၢ်,ဒီးတနၢ်,ဒီးကွဲၤဆူယွၤအဟံၣ်လီၤ.

29ဒီးတုၤကီၢ်တဖၣ်န့ၣ်အပှၤဘီမုၢ်ဖိနၢ်ဟူဝဲလၢယွၤဒုးတၢ်ဒီးအံၣ်စရ့လးအဒုၣ်အဒါဒီး,တၢ်ပျံၤယွၤအိၣ်ဝဲလၢအလိၤလီၤ.

30ဒီးစီၤယဟိၡၤဖးအဘီမုၢ်အိၣ်ဘှ့ၣ်ကလာ်လီၤ.အဂ့ၢ်ဒ်အံၤ,အကစၢ်ဟ့ၣ်လီၤအီၤလၢတၢ်အိၣ်ဘှံးဝးတရံးဝဲလီၤ.

31ဒီးစီၤယဟိၡၤဖးကဲစီၤပၤလၢယူဒၤအဖီခိၣ်,ဒီးလၢအကဲသီစီၤပၤန့ၣ်အသးပှၢ်သၢဆံယဲၢ်နံၣ်,ဒီးကဲစီၤပၤလၢယရူၤၡလ့ၣ်အပူၤန့ၣ်ခံဆံယဲၢ်နံၣ်လီၤ.ဒီးအမိၢ်အမံၤမ့ၢ်နီၢ်ဧစူဘၤ,စီၤၡံးလဃံအဖိမုၣ်လီၤ.

32ဒီးပိာ်အပၢ်စီၤအၤစါအကျဲ,ဒ်သိးအကမၤတၢ်ဂ့ၤလၢယွၤအမဲာ်,ဒီးတဃၣ်ကပၤအသးလၢအဝဲန့ၣ်ဘၣ်. 33မ့မ့ၢ်တမၤဟးဂီၤဘၣ်တၢ်အလီၢ်ထီၣ်ထီဘၣ်,ဒီးပှၤဂီၢ်မုၢ်တကတဲာ်ကတီၤဒံးဘၣ်အသးလၢယွၤအပၢ်တဖၣ်အကစၢ်အဂီၢ်ဘၣ်.

34ဒီးတၢ်အိၣ်လီၤတဲာ်ဘၣ်ဃးဒီးစီၤယဟိၡၤဖး,တၢ်အခီၣ်ထံးဒီးတၢ်အကတၢၢ်န့ၣ်,ကွၢ်ကွၢ်,ကွဲးအသးလၢစီၤဃနၤနံအဖိခွါစီၤယ့ၤဟူအလံာ်ပူၤလၢအဂ့ၢ်အကျိၤအိၣ်ဝဲလၢအံၣ်စရ့လးအစီၤပၤအလံာ်ကွဲးနီၣ်တၢ်အပူၤလီၤ.

35ဒီးတၢ်တဖၣ်အလီၢ်ခံန့ၣ်ယူဒၤအစီၤပၤစီၤယဟိၡၤဖးဒီတံၤဒီသကိးဒီးအံၣ်စရ့လးအစီၤပၤစီၤအဃၤစယၤလၢအမၤတၢ်တတီတလိၤဘၣ်လီၤ.

36ဒီးဒီတံၤဒီသကိးဒီးအီၤဒ်သိးအကမၢလီၤကဘီဆူတၢ်ၡံၣ်လီၤ.ဒီးတ့ကဘီလၢဧ့းစယိၣ်က့ဘ့ၢ်အပူၤလီၤ.

37ဒီးပှၤမရ့ၡၤဖိ,စီၤဒိဒၤဝၤအဖိခွါစီၤအလၤဧစၢ်တဂၤကတိၤတၢ်လၢဝံကျိာ်ထီဒါစီၤယဟိၡၤဖးဒီးစံးဝဲဒၣ်,မ့ၢ်နဒီတံၤဒီသကိးဒီးစီၤအဃၤစယၤဒီး,ယွၤမၤဟးဂီၤကွံာ်လံနတၢ်မၤလံ.ဒီးကဘီဟးဂီၤ,ဒီးလဲၤဝဲဆူတၢ်ၡံၣ်တသ့ဘၣ်.