‏ 2 Chronicles 29

1လၢစီၤဃံးစကံယၤကဲသီစီၤပၤန့ၣ်အသးပှၢ်ခံဆံယဲၢ်နံၣ်,ဒီးကဲစီၤပၤလၢယရူၤၡလ့ၣ်အပူၤခံဆံခွံနံၣ်လီၤ.ဒီးအမိၢ်အမံၤန့ၣ်မ့ၢ်နီၢ်အဘံယၤ,စီၤစကၤရယၤအဖိမုၣ်လီၤ.

2ဒီးအဝဲဒၣ်မၤတၢ်အလိၤလၢယွၤအမဲာ်,ဒ်ကယဲၢ်တၢ်လၢအပၢ်စီၤဒၤဝံးမၤဝဲအသိးန့ၣ်လီၤ. 3အဝဲဒၣ်လၢအကဲစီၤပၤအခီၣ်ထံးတနံၣ်,လၢလါခီၣ်ထံးတလါန့ၣ်အိးထီၣ်ယွၤအဟံၣ်အတြဲၤ,ဒီးမၤက့ၤအီၤလီၤ. 4ဒီးဒုးဟဲနုာ်ပှၤလုၢ်တၢ်အဒိၣ်,ဒီးပှၤလ့ၤဝံဖိတဖၣ်,ဒီးဒုးအိၣ်ဖှိၣ်ရိဖှိၣ်အီၤလၢကျဲလၢမုၢ်ထီၣ်တခီအပူၤလီၤ. 5ဒီးစံးဘၣ်အီၤ,ပှၤလ့ၤဝံဖိသ့ၣ်ဧၢ,ကနၣ်ယကလုၢ်,မၤစီဆှံသုသး,ဒီးမၤစီဆှံယွၤသုပၢ်အကစၢ်အဟံၣ်,ဒီးစိာ်ထီၣ်ကွံာ်တၢ်မၤဘၣ်အၢလၢတၢ်အလီၢ်စီဆှံအပူၤန့ၣ်တက့ၢ်.

6အဂ့ၢ်ဒ်အံၤ,ပပၢ်တဖၣ်မၤကမၣ်တၢ်,ဒီးမၤတၢ်အၢလၢယွၤပကစၢ်အမဲာ်,ဒီးလဲၤသဒၣ်အီၤ,ဒီးဃၣ်ကွံာ်အမဲာ်လၢယွၤအိၣ်ဝဲဆိးဝဲအလီၢ်,ဒီးဃၣ်ဒူၣ်ချၢအသးလီၤ. 7ဒီးကးတံာ်ဃာ်တၢ်ခိၣ်ဒုးထီၣ်အသးအတြဲၤ,ဒီးမၤလီၤပံာ်မ့ၣ်အူဒၢ,ဒီးတဆိၣ်ကဲၤဘၣ်တၢ်နၢမူ,ဒီးတလုၢ်ဘၣ်အံၣ်စရ့လးအကစၢ်လၢတၢ်လုၢ်မ့ၣ်အူလၢတၢ်အလီၢ်စီဆှံအပူၤဘၣ်.

8ဒီးယွၤအသးထီၣ်ဘၣ်ယူဒၤ,ဒီးယရူၤၡလ့ၣ်,ဒီးဟ့ၣ်လီၤကွံာ်အီၤဆူတၢ်ကိၢ်တၢ်ဂီၤ,ဒီးပာ်အီၤလၢတၢ်ကမၢကမၣ်အလီၢ်,လၢတၢ်ၡံအလီၢ်န့ၣ်ဒ်သုထံၣ်ဘၣ်လၢသုမဲာ်အသိးန့ၣ်လီၤ. 9ကွၢ်ကွၢ်,ပပၢ်တဖၣ်လီၤဃံၤလၢနး,ဒီးပဖိခွါ,ဒီးပဖိမုၣ်,ဒီးပမါတဖၣ်ကဲကုၢ်လၢတၢ်န့ၣ်အဃိလီၤ. 10ဒီးခဲကနံၣ်အံၤယသးအိၣ်လၢယကအၢၣ်လီၤတၢ်ဒီးယွၤအံၣ်စရ့လးအကစၢ်ဒ်သိးအသးထီၣ်ဆူၣ်ကဃၣ်ကွံာ်အသးလၢပအိၣ်လီၤ.

11ယဖိခွါသ့ၣ်ဧၢ,ခဲကနံၣ်အံၤတပလီၢ်ဘၣ်သုသးဘၣ်ဒီးအိၣ်တဂ့ၤ.ယွၤဃုထၢသုဒ်သိးသုကဆၢထၢၣ်လၢအမဲာ်ညါ,လၢသုကမၤအတၢ်,ဒီးဒ်သိးသုကမၤတၢ်အခ့အပှၤအတၢ်,ဒီးဆိၣ်ကဲၤတၢ်နၢမူလီၤ.

12ဒီးပှၤလ့ၤဝံဖိဂဲၤဆၢထၢၣ်,စီၤဧမၤစဲအဖိခွါစီၤမၤဃး,ဒီးစီၤဧစၤရယၤအဖိခွါစီၤယိၤအ့လး,ဒီးပှၤလၢကဃးဖိအဖိခွါအကျါ,စီၤဧၤဘ့းဒံအဖိခွါစီၤကံၣ်,ဒီးစီၤယဟးလ့ၤလ့လးအဖိခွါစီၤဧစၤရယၤလၢပှၤမရၤရံၤဖိအဖိခွါအကျါ,ဒီးစီၤစံးမၤအဖိခွါစီၤယိၤအၤ,ဒီးစီၤယိၤအၤအဖိခွါစီၤဧ့ၤဒ့ၣ်လၢပှၤက့ရၡိၣ်ဖိအကျါ, 13ဒီးလၢစီၤအလံစဖၣ်အဖိခွါအကျါန့ၣ်စီၤၡံးမရံ,ဒီးစီၤယံးအ့လး,ဒီးလၢစီၤအၤစာ်အဖိခွါအကျါန့ၣ်စီၤစကၤရယၤ,ဒီးစီၤမးတၤနယၤ, 14ဒီးလၢစီၤဟ့မၣ်အဖိခွါအကျါန့ၣ်,စီၤယဃ့အ့လး,ဒီးစီၤၡံးမံၤ,ဒီးလၢစီၤယဒူသူၣ်အဖိခွါအကျါန့ၣ်စီၤၡမါယၤ,ဒီးစီၤဧူးစံၤအ့လးလီၤ.

15ဒီးဒုးအိၣ်ဖှိၣ်ရိဖှိၣ်အဒီပုၢ်ဝဲၢ်တဖၣ်,ဒီးမၤစီဆှံအသး,ဒီးဟဲဝဲဒ်စီၤပၤအတၢ်မၤလိာ်လၢယွၤအကလုၢ်အသိးန့ၣ်,ဒ်သိးအကမၤကဆှီထီၣ်ယွၤအဟံၣ်လီၤ.

16ဒီးပှၤလုၢ်တၢ်အဒိၣ်လဲၤနုာ်လၢယွၤအဟံၣ်လၢညါခီဒ်သိးအကမၤကဆှီထီၣ်အီၤ,ဒီးဟဲက့ၤစိာ်ကယဲၢ်တၢ်မၤတကဆှီဘၣ်တဖၣ်လၢအထံၣ်န့ၢ်လၢယွၤအနူၢ်ပူၤဆူယွၤအဟံၣ်အဂၢၤပူၤ,ဒီးပှၤလ့ၤဝံဖိဟံးန့ၢ်စိာ်ထီၣ်ဝဲဆူခိ,ဆူထံကျိကံဒြိၣ်အပူၤလီၤ.

17ဒီးလၢလါခီၣ်ထံးလါထီၣ်တနံၤန့ၣ်မၤထီၣ်သီဒ်သိးအကမၤစီဆှံထီၣ်,ဒီးလၢလါထီၣ်ဃိးနံၤတနံၤန့ၣ်ဟဲဝဲဆူယွၤအတၢ်ခိၣ်ဒုးထီၣ်အသး,ဒီးမၤစီဆှံယွၤအဟံၣ်လၢဃိးနံၤအပူၤ,ဒီးလါခီၣ်ထံးတဆံဃုနံၤတနံၤန့ၣ်မၤတုၤအလၢာ်လီၤ.

18ဒီးလဲၤဝဲဆူစီၤပၤဃံးစကံယၤအအိၣ်,ဒီးစံးဝဲဒၣ်,ပမၤကဆှီထီၣ်လံယွၤအဟံၣ်ဒီဟံၣ်ညါ,ဒီးတၢ်လုၢ်လီၢ်မ့ၣ်အူ,ဒီးအဃၢၤအဃိၢ်,ဒီးတၢ်မဲာ်ညါကိၣ်အစီၢ်နီၤခိၣ်,ဒီးအဃၢၤအဃိၢ်ခဲလၢာ်လံ, 19ဒီးကယဲၢ်အဃၢၤအဃိၢ်လၢစီၤပၤအၤဃးကွံာ်တ့ၢ်ကွံာ်လၢအမၤကမၣ်တၢ်အပူၤခဲလၢာ်န့ၣ်ပကတဲာ်ကတီၤလံ,ဒီးမၤစီဆှံလံ,ဒီးကွၢ်ကွၢ်,အိၣ်ဝဲလၢယွၤအတၢ်လုၢ်လီၢ်အမဲာ်ညါလီၤ.

20ဒီးစီၤပၤဃံးစကံယၤဂဲၤဆၢထၢၣ်ဂီၤဂီၤ,ဒီးဒုးအိၣ်ဖှိၣ်ရိဖှိၣ်ဝ့ၢ်အပဒိၣ်ဖးဒိၣ်တဖၣ်,ဒီးလဲၤထီၣ်ဝဲဆူယွၤအဟံၣ်ပူၤလီၤ.

21ဒီးဟဲစိာ်ဂီၤဖံးဖါနွံဒု,ဒီးသိဖါနွံဒု,ဒီးသိဖိနွံဒု,ဒီးမဲာ်တဲးလဲးဖါနွံဒုလၢတၢ်လုၢ်တၢ်ဒဲးဘးအဂီၢ်,လၢဘီမုၢ်အဂီၢ်,ဒီးလၢတၢ်အလီၢ်စီဆှံအဂီၢ်,ဒီးလၢယူဒၤအဂီၢ်,ဒီးမၤလိာ်ပှၤလုၢ်တၢ်အဒိၣ်,စီၤအၤဟရိၣ်အဖိခွါတဖၣ်လၢအကလုၢ်အီၤလၢယွၤအတၢ်လုၢ်လီၢ်အဖီခိၣ်လီၤ.

22ဒီးပှၤမၤသံဂီၤဖံးတဖၣ်,ဒီးပှၤလုၢ်တၢ်အဒိၣ်တဖၣ်ဒိးန့ၢ်တၢ်သွံၣ်,ဒီးဖှံဝဲလၢတၢ်လုၢ်လီၢ်အဖီခိၣ်လီၤ.ဒီးမၤသံသိဖါ,ဒီးဖှံတၢ်သွံၣ်လၢတၢ်လုၢ်လီၢ်အဖီခိၣ်,ဒီးမၤသံသိဖိ,ဒီးဖှံတၢ်သွံၣ်လၢတၢ်လုၢ်လီၢ်အဖီခိၣ်လီၤ.

23ဒီးဟဲစိာ်မဲာ်တဲးလဲးဖါတဖၣ်လၢတၢ်လုၢ်တၢ်ဒဲးဘးအဂီၢ်ဆူစီၤပၤဒီးတၢ်အိၣ်ဖှိၣ်အမဲာ်ညါ,ဒီးအဝဲသ့ၣ်ပာ်အစုလၢအဖီခိၣ်န့ၣ်လီၤ.

24ဒီးပှၤလုၢ်တၢ်အဒိၣ်မၤသံအီၤ,ဒီးမၤတၢ်လၢတၢ်ဒဲးဘးအဃိလၢအသွံၣ်လၢတၢ်လုၢ်လီၢ်အဖီခိၣ်ဒ်သိးအကမၤတၢ်ပူၤဖျဲးလၢအံၣ်စရ့လးခဲလၢာ်အဂီၢ်လီၤ.အဂ့ၢ်ဒ်အံၤ,စီၤပၤမၤလိာ်ဝဲလၢတၢ်လုၢ်မ့ၣ်အူ,ဒီးတၢ်လုၢ်တၢ်ဒဲးဘးန့ၣ်ကဘၣ်တၢ်လုၢ်အီၤလၢအံၣ်စရ့လးခဲလၢာ်အဂီၢ်လီၤ.

25ဒီးပာ်ပှၤလ့ၤဝံဖိလၢယွၤအဟံၣ်ပူၤအိၣ်ဝဲဒီးစှၢၣ်စှံး,ဒီးသီတူၢ်,ဒီးတနၢ်ဒ်စီၤဒၤဝံး,ဒီးစီၤပၤအပှၤထံၣ်တၢ်စီၤကး,ဒီးဝံနၤသၣ်အတၢ်မၤလိာ်အသိးန့ၣ်လီၤ.အဂ့ၢ်ဒ်အံၤ,ယွၤမၤလိာ်တၢ်န့ၣ်လၢဝံတဖၣ်အစုပူၤလီၤ.

26ဒီးပှၤလ့ၤဝံဖိဆၢထၢၣ်ဒီးစီၤဒၤဝံးအဒံၣ်ဒၢပီၤဒွါ,ဒီးပှၤလုၢ်တၢ်အဒိၣ်အိၣ်ဒီးကွဲၤတဖၣ်လီၤ.

27ဒီးစီၤဃံးစကံယၤမၤလိာ်ဝဲလၢအကလုၢ်တၢ်လုၢ်မ့ၣ်အူလၢတၢ်လုၢ်လီၢ်အဖီခိၣ်,ဒီးအကတီၢ်လၢအလုၢ်ထီၣ်သီတၢ်လုၢ်မ့ၣ်အူန့ၣ်ယွၤအတၢ်သးဝံၣ်ထီၣ်သီအိၣ်ဒီးကွဲၤ,ဒီးဒံၣ်ဒၢပီၤဒွါလၢအံၣ်စရ့လးအစီၤပၤစီၤဒၤဝံးမၤလိာ်ဝဲလီၤ.

28ဒီးတၢ်အိၣ်ဖှိၣ်ခဲလၢာ်ဘူၣ်ထီၣ်ဘါထီၣ်,ဒီးပှၤသးဝံၣ်တၢ်ဖိသးဝံၣ်တၢ်,ဒီးကွဲၤသီၣ်,ဒီးတၢ်ခဲလၢာ်န့ၣ်အိၣ်ဝဲတုၤအလုၢ်တၢ်လုၢ်မ့ၣ်အူဝံၤလီၤ.

29ဒီးတုၤအလုၢ်တၢ်လုၢ်ခဲလၢာ်ဝံၤဒီး,စီၤပၤဒီးကယဲၢ်ပှၤအိၣ်ဝဲဒီးအီၤခဲလၢာ်န့ၣ်ဆုးလီၤအခိၣ်ဒီးဘူၣ်ထီၣ်ဘါထီၣ်ဝဲလီၤ.

30ဒီးစီၤပၤဃံးစကံယၤ,ဒီးပဒိၣ်ဖးဒိၣ်တဖၣ်န့ၣ်မၤလိာ်ပှၤလ့ၤဝံဖိဒ်သိးအကစံးထီၣ်ပတြၢၤယွၤလၢစီၤဒၤဝံး,ဒီးပှၤထံၣ်တၢ်စီၤအၤစာ်အတၢ်ကတိၤန့ၣ်လီၤ.ဒီးအဝဲသ့ၣ်သးဝံၣ်တၢ်လၢအသူၣ်ခုသးခု,ဒီးဆုးလီၤအခိၣ်ဒီးဘူၣ်ထီၣ်ဘါထီၣ်ဝဲလီၤ.

31ဒီးစီၤဃံးစကံယၤကတိၤတၢ်ဒီးစံးဝဲဒၣ်,ခဲကနံၣ်အံၤသုမၤစီဆှံလံသုသးလၢယွၤအဂီၢ်လံ.သုးဘူးသုသး,ဒီးဟဲစိာ်တၢ်လုၢ်တဖၣ်,ဒီးတၢ်လုၢ်စံးထီၣ်ပတြၢၤတဖၣ်ဆူယွၤအဟံၣ်ပူၤတက့ၢ်.ဒီးပှၤအိၣ်ဖှိၣ်ဖိတဖၣ်န့ၣ်ဟဲစိာ်တၢ်လုၢ်တဖၣ်,ဒီးတၢ်လုၢ်စံးထီၣ်ပတြၢၤ,ဒီးဖဲဒၣ်ပှၤလၢအသးအိၣ်တီနံဒၣ်တၢ်တဂၤဂၤန့ၣ်ဟဲစိာ်တၢ်လုၢ်မ့ၣ်အူလီၤ.

32ဒီးတၢ်လုၢ်မ့ၣ်အူလၢပှၤအိၣ်ဖှိၣ်ဖိဟဲစိာ်ဝဲတဖၣ်အတၢ်ဂံၢ်န့ၣ်မ့ၢ်ဂီၤဖံးဖါနွံဆံ,သိဖါတကယၤ,သိဖိခံကယၤလီၤ.အဝဲသ့ၣ်ခဲလၢာ်န့ၣ်အိၣ်ဝဲလၢတၢ်လုၢ်ယွၤအတၢ်လုၢ်မ့ၣ်အူအဂီၢ်လီၤ. 33ဒီးတၢ်မၤဘူၣ်န့ၣ်မ့ၢ်ဂီၤဖံးဖါဃုကယၤ,ဒီးသိသၢကထိလီၤ.

34ဒီးပှၤလုၢ်တၢ်အဒိၣ်အိၣ်စှၤကဲၣ်ဆိး,ဒီးအုၣ်ကွံာ်တၢ်လုၢ်မ့ၣ်အူခဲလၢာ်အဖံးတသ့ဘၣ်.ဒီးအဒီပုၢ်ဝဲၢ်ပှၤလ့ၤဝံဖိမၤစၢၤအီၤတုၤတၢ်မၤန့ၣ်ဝံၤဝဲ,ဒီးတုၤပှၤလုၢ်တၢ်အဒိၣ်တဖၣ်မၤစီဆှံထီၣ်အသးလီၤ.အဂ့ၢ်ဒ်အံၤ,ပှၤလ့ၤဝံဖိအသးလိၤဂ့ၤန့ၢ်ပှၤလုၢ်တၢ်အဒိၣ်တက့ၢ်,ဒ်သိးအကမၤစီဆှံအသးလီၤ.

35ဒီးတၢ်လုၢ်မ့ၣ်အူအိၣ်စ့ၢ်ကီးဝဲအါအါကလဲာ်,ဒီးတၢ်လုၢ်မၤဃူမၤဖိးတဖၣ်အတၢ်သိ,ဒီးတၢ်မၤဘူၣ်တၢ်အီလၢတၢ်လုၢ်မ့ၣ်အူအဂီၢ်လီၤ.ဒီးယွၤအဟံၣ်အတၢ်မၤန့ၣ်ကတဲာ်ကတီၤလံအသးလီၤ.

36ဒီးစီၤဃံးစကံယၤသူၣ်ခုသးခု,ဒီးပှၤဂီၢ်မုၢ်ခဲလၢာ်လၢယွၤကတဲာ်ကတီၤပှၤဂီၢ်မုၢ်အဃိန့ၣ်လီၤ.အဂ့ၢ်ဒ်အံၤ,မၤအသးသတူၢ်ကလာ်လီၤ.