2 Corinthians 1
1ယ့ၣ်ရှူးခရံာ်အတၢ်မၢဖိဖဲဒၣ်ယွၤအသး,ယၤ,စီၤပီလူး,ဒီးဒီပုၢ်ဝဲၢ်စီၤတံၤမသ့း,စံးဘၣ်ယွၤအတၢ်အိၣ်ဖှိၣ်လၢအအိၣ်လၢကရံၣ်သူးအပူၤ,ဒီးကယဲၢ်ပှၤစီဆှံခဲလၢာ်လၢအအိၣ်လၢအဃါယၤဒီကီၢ်ညါန့ၣ်, 2မ်တၢ်ဘျုးတၢ်ဖှိၣ်,ဒီးတၢ်ဃူတၢ်ဖိးလၢပပၢ်ယွၤ,ဒီးကစၢ်ယ့ၣ်ရှူးခရံာ်အအိၣ်န့ၣ်ဘၣ်သုတက့ၢ်. 3ယွၤပကစၢ်ယ့ၣ်ရှူးခရံာ်အပၢ်,တၢ်သးကညီၤအပၢ်,ဒီးတၢ်မၤမုာ်ခဲလၢာ်အကစၢ်,မ်အဘၣ်တၢ်စံးထီၣ်ပတြၢၤအီၤတက့ၢ်. 4အဝဲဒၣ်မၤမုာ်ထီၣ်ပှၤလၢပတၢ်နးတၢ်ဖှီၣ်ခဲလၢာ်အပူၤ,ဒ်သိးပကမၤမုာ်ထီၣ်ပှၤလၢအဘၣ်တၢ်နးတၢ်ဖှီၣ်တမံၤမံၤ,လၢတၢ်မုာ်လၢယွၤမၤမုာ်ပသးန့ၣ်လီၤ. 5အဂ့ၢ်ဒ်အံၤ,ဒ်ခရံာ်အတၢ်နးတၢ်ဖှီၣ်အါဝဲဂီၢ်ဝဲလၢပပူၤအသိးန့ၣ်,တၢ်မၤမုာ်ထီၣ်ပှၤလၢခရံာ်အဃိ,အါဝဲဂီၢ်ဝဲဒ်န့ၣ်အသိးလီၤ. 6ဒီးပမ့ၢ်ဘၣ်တၢ်နးတၢ်ဖှီၣ်ဒီး,မ့ၢ်တၢ်မၤမုာ်ထီၣ်က့ၤသု,ဒီးတၢ်အုၣ်က့ၤခီၣ်က့ၤသုဂီၢ်,ဒီးပမ့ၢ်ဘၣ်တၢ်မၤမုာ်ထီၣ်က့ၤပှၤဒီး,မ့ၢ်တၢ်မၤမုာ်ထီၣ်က့ၤလၢအကဲထီၣ်ဝဲလၢသုဝံသးစူၤတၢ်နးတၢ်ဖှီၣ်တမံၤဃီလၢပဘၣ်ပဝဲစ့ၢ်ကီးန့ၣ်လီၤ.ဒီးပတၢ်မုၢ်လၢ်လၢသုဂီၢ်န့ၣ်အိၣ်ဂၢၢ်ဆိးကျၢၤလီၤ. 7အဂ့ၢ်ဒ်အံၤ,ပသ့ၣ်ညါ,ဒ်သုဘၣ်ဃးဒီးတၢ်နးတၢ်ဖှီၣ်အသိးန့ၣ်,သုဘၣ်ဃးစ့ၢ်ကီးဒီးတၢ်မၤမုာ်ထီၣ်က့ၤန့ၣ်လီၤ. 8အဂ့ၢ်ဒ်အံၤ,ပုၢ်သ့ၣ်ဝဲၢ်သ့ၣ်ဧၢ,ပသးတအိၣ်ဘၣ်လၢသုတသ့ၣ်ညါဘၣ်တၢ်နးတၢ်ဖှီၣ်လၢအဘၣ်ပှၤလၢအၤစံ,လၢပဘၣ်တၢ်နးကဲၣ်ဆိးတုၤပဒိးတကဲဘၣ်,တုၤဒၣ်လဲာ်ပတမုၢ်လၢ်လၢၤဘၣ်လၢပကမူဘၣ်. 9မ့မ့ၢ်ပအိၣ်ဒီးတၢ်စံၣ်ညီၣ်သံပှၤလၢပပူၤဒၣ်ပဝဲ,ဒ်သိးပသုတနာ်လီၤပသးတဂ့ၤ,မ့ၢ်ယွၤ,လၢအမၤဂဲၤဆၢထၢၣ်က့ၤပှၤသံန့ၣ်လီၤ. 10အဝဲဒၣ်ထုးထီၣ်ပှၤလၢတၢ်သံဆူၣ်ပှဲၤန့ၣ်,ဒီးခဲကနံၣ်အံၤထုးထီၣ်ပှၤ,ဒီးမ့ၢ်သုမၤစၢၤဃုာ်စ့ၢ်ကီးလၢတၢ်ထုကဖၣ်အဃိဒီး,ပမုၢ်လၢ်လၢအကထုးထီၣ်ဒံးပှၤ, 11ဒ်သိးပဘၣ်ဘျုးဘၣ်ဖှိၣ်လၢပှၤအါဂၤအဃိဒီး,ပှၤအါဂၤကစံးထီၣ်ပတြၢၤတၢ်အဘျုးအဖှိၣ်လၢပဃိလီၤ. 12အဂ့ၢ်ဒ်အံၤ,ပပာ်ပသးကဖၢလၢအလီၢ်မ့ၢ်အအံၤ,ပသးလၢအသ့ၣ်ညါဒၣ်တၢ်န့ၣ်,အုၣ်အသးလၢပမၤတၢ်လၢဟီၣ်ခိၣ်ချၢ,ဒီးအါတက့ၢ်လၢသုဂီၢ်မ့ၢ်လၢတၢ်စီဆှံဒီးတၢ်တီတၢ်လိၤဘၣ်ဃးဒီးယွၤအပူၤ,တမ့ၢ်ဘၣ်လၢတၢ်ကူၣ်သ့ဘၣ်ဃးဒီးတၢ်ဖံးတၢ်ညၣ်ဘၣ်,မ့ၢ်လၢယွၤအဘျုးအဖှိၣ်လီၤ. 13အဂ့ၢ်ဒ်အံၤ,ပကွဲးန့ၢ်သုထဲတၢ်တဖၣ်လၢသုဖး,ဒီးသုအၢၣ်လီၤအီလီၤ,ဒီးယမုၢ်လၢ်လၢသုကအၢၣ်လီၤတုၤအကတၢၢ်န့ၣ်လီၤ. 14ဒ်န့ၣ်သိးစ့ၢ်ကီး,သုအၢၣ်လီၤအီလီၤတ့ၢ်တနီၤလၢပမ့ၢ်သုပာ်သုသးကဖၢလၢအလီၢ်,ဒ်သုမ့ၢ်စ့ၢ်ကီးလၢပတၢ်အသိး,လၢကစၢ်ယ့ၣ်ရှူးခရံာ်အမုၢ်တနံၤန့ၣ်လီၤ. 15ဒီးလၢတၢ်နာ်အံၤအပူၤယပာ်လီၤယသးလၢယကလဲၤဆိတက့ၢ်ဆူသုအိၣ်,ဒ်သိးသုကန့ၢ်ဘၣ်တၢ်ဘျုးခံဘျီတဘျီလီၤ. 16ဒီးယကလဲၤပူၤကွံာ်သုဆူမၤက့းဒနံ,ဒီးယကဟဲက့ၤကဒါလၢမၤက့းဒနံဆူသုအိၣ်,ဒီးသုကဆှၢယၤလၢညါဆူကီၢ်ယူဒၤလီၤ. 17မၤသးဒ်န့ၣ်ဒီး,ယသးအိၣ်ဒ်န့ၣ်,မ့ၢ်ယမၤမှံတၢ်န့ၣ်ဧါ.တၢ်လၢယတိာ်န့ၣ်,မ့ၢ်ယတိာ်ဒ်တၢ်ဖံးတၢ်ညၣ်အသိး,ဒ်သိးတၢ်မ့ၢ်လီၤမ့ၢ်လီၤ,ဒီးတၢ်တမ့ၢ်ဘၣ်တမ့ၢ်ဘၣ်န့ၣ်,ကအိၣ်ဒီးယၤန့ၣ်ဧါ. 18ဘၣ်ဆၣ်ဒီး,ဒ်ယွၤမၤအကလုၢ်တီအသိးန့ၣ်,ပကတိၤတၢ်ဒီးသုတမ့ၢ်ဘၣ်,တၢ်မ့ၢ်ဒီးတၢ်တမ့ၢ်ဘၣ်န့ၣ်ဘၣ်. 19အဂ့ၢ်ဒ်အံၤ,ယွၤအဖိခွါယ့ၣ်ရှူးခရံာ်,လၢပဝဲဒၣ်,ယၤဒီးစီၤစံၤလဝ့နုၤ,ဒီးစီၤတံၤမသ့း,စံၣ်တဲၤတဲလီၤအီၤလၢသုကျါ,တကဲထီၣ်တၢ်မ့ၢ်ဒီးတၢ်တမ့ၢ်ဘၣ်န့ၣ်ဘၣ်.မ့ၢ်တၢ်မ့ၢ်ကဲထီၣ်လံလၢအဝဲဒၣ်အပူၤလီၤ. 20အဂ့ၢ်ဒ်အံၤ,ဖဲဒၣ်ယွၤစံးပာ်တၢ်တဖၣ်,မ့ၢ်တၢ်မ့ၢ်လၢအဝဲဒၣ်အပူၤ,သတးဒီး,မ့ၢ်စ့ၢ်ကီးအၤမ့ၣ်လၢအဝဲဒၣ်အဃိ,လၢယွၤအလၤကပီၤအဂီၢ်လၢပဝဲဒၣ်အဃိလီၤ. 21ဒီးပှၤလၢအမၤအိၣ်စံာ်အိၣ်ကျၢၤပှၤဒီးသုလၢခရံာ်အပူၤ,ဒီးဖှူပှၤန့ၣ်,မ့ၢ်ယွၤ, 22လၢအစဲဃာ်ပနီၣ်ပှၤ,ဒီးဟ့ၣ်လီၤသးအတၢ်ဟ့ၣ်ကီၤလၢပသးကံၢ်ပူၤလီၤ. 23ဒီးယကိးထီၣ်ယွၤဒ်သိးအကအုၣ်အသးလၢယသးအဖီခိၣ်,လၢယသးလီသုအဃိဒီး,ယတဟဲဒံးဘၣ်ဆူကရံၣ်သူးဘၣ်လီၤ. 24တမ့ၢ်ဘၣ်လၢပကဲကစၢ်လၢသုတၢ်နာ်အဖီခိၣ်ဘၣ်,မ့ၢ်ပမ့ၢ်ပှၤမၤစၢၤသုသးခုတၢ်လီၤ.အဂ့ၢ်ဒ်အံၤ,သုအိၣ်ဆၢထၢၣ်လၢတၢ်နာ်လီၤ.
Copyright information for
KswSKMB