2 Corinthians 11
1ဘၣ်ယသးလၢသုကဝံသးစူၤယၤလၢယတၢ်ဟးဂီၤတစဲးလီၤ.ဒီးဝံသးစူၤယၤတက့ၢ်. 2အဂ့ၢ်ဒ်အံၤ,ယသးက့ၣ်သုလၢတၢ်သးက့ၣ်ဘၣ်ဃးဒီးယွၤလီၤ.အဂ့ၢ်ဒ်အံၤ,ယဒုးအဲၣ်တီသုဒီးဝၤတဂၤ,ဒ်သိးယကပာ်သုလၢမုၣ်ကနီၤစီဆှံလၢခရံာ်အမဲာ်ညါလီၤ. 3ဘၣ်ဆၣ်ဒီးဒ်ဂုၢ်လီန့ၢ်နီၢ်အံၣ်အုလၢအတၢ်လီတၢ်ဝ့ၤအသိးန့ၣ်,ယဘၣ်ယိၣ်လၢတၢ်ကမၤဟးဂီၤကွံာ်သုသးလၢတၢ်တီတၢ်လိၤဘၣ်ဃးဒီးခရံာ်လီၤ. 4အဂ့ၢ်ဒ်အံၤ,ပှၤလၢအဟဲန့ၣ်,မ့ၢ်စံၣ်တဲၤတဲလီၤယ့ၣ်ရှူးအဂၤတဂၤ,လၢပတစံၣ်တဲၤတဲလီၤဘၣ်ပဝဲမ့ၢ်ဂ့ၤ,သုမ့ၢ်ဒိးန့ၢ်သးအဂၤ,လၢသုတဒိးန့ၢ်ဒံးဘၣ်မ့ၢ်ဂ့ၤ,သုမ့ၢ်တူၢ်လိာ်တၢ်သးခုအကစီၣ်အဂၤ,လၢသုတတူၢ်လိာ်ဒံးဘၣ်မ့ၢ်ဂ့ၤဒီး,ဂ့ၤလၢသုဝံသးစူၤတၢ်လီၤ. 5အဂ့ၢ်ဒ်အံၤ,ယဆိကမိၣ်လီၤယသးလၢယတဆံးန့ၢ်ဘၣ်ပှၤတၢ်မၢဖိလၢအဒိၣ်ကတၢၢ်တဖၣ်န့ၣ်,လၢတၢ်နီတမံၤဘၣ်လီၤ. 6ဒီးယမ့ၢ်ပှၤအမံၤလၢတၢ်ကတိၤနာ်သက့ဒီး,ယတမ့ၢ်ဘၣ်လၢတၢ်သ့ၣ်ညါန့ၣ်ဘၣ်.မ့မ့ၢ်လၢတၢ်ခဲလၢာ်အပူၤ,ပဒုးအိၣ်ဖျါထီၣ်အီၤလၢသုဂီၢ်လၢပှၤခဲလၢာ်အကျါလီၤ. 7မ့ၢ်ယစံၣ်တဲၤတဲလီၤသုလၢယွၤအတၢ်သးခုအကစီၣ်လၢအဘူးအလဲတအိၣ်ဘၣ်,ဒီးဆီၣ်လီၤယသးဒ်သိးသုကဘၣ်တၢ်ထီၣ်ထီဒီး,မ့ၢ်ယမၤကမၣ်တၢ်ဧါ. 8ယဂုာ်န့ၢ်တၢ်အိၣ်ဖှိၣ်အဂုၤအဂၤတဖၣ်အတၢ်,ဒီးဟံးန့ၢ်တၢ်အဘူးအလဲဒ်သိးယကမၤသုတၢ်လီၤ. 9ဒီးဖဲယအိၣ်ဒီးသုအဖၢမုၢ်ဒီး,ယတၢ်တလၢတပှဲၤဘၣ်ဆၣ်ဒီး,ယတအိၣ်ဃၢလၢသုလိၤနီတဂၤဘၣ်.အဂ့ၢ်ဒ်အံၤ,ယတၢ်တလၢဘၣ်တဖၣ်န့ၣ်,ဒီပုၢ်ဝဲၢ်လၢအဟဲလၢမၤက့းဒနံတဖၣ်,မၤပှဲၤထီၣ်ဝဲလီၤ.ဒီးဒ်သိးယသုတမၤဃၢယတၢ်လၢသုလိၤလၢတၢ်နီတမံၤတဂ့ၤဒီး,ယပလီၢ်ယသးဒီးယကပလီၢ်ဒံးယသးလီၤ. 10ဒ်ခရံာ်အတၢ်မ့ၢ်တၢ်တီအိၣ်လၢယပူၤအသိးန့ၣ်,ယပာ်ယသးကဖၢလၢလၢကီၢ်အဃါယၤအပူၤန့ၣ်,ယတတူၢ်မးတၢ်တြီယၤလၢပှၤနီတဂၤဘၣ်. 11မ့ၢ်အဘၣ်မနုၤလဲၣ်,မ့ၢ်ယတအဲၣ်ဘၣ်သုအဃိဧါ.ယွၤသ့ၣ်ညါဝဲဒၣ်လီၤ. 12ဘၣ်ဆၣ်ဒီးတၢ်လၢယမၤန့ၣ်,ယကမၤဒံးစ့ၢ်ကီး,ဒ်သိးယကမၤတူာ်ကွံာ်ပှၤအလီၢ်လၢအဃုအလီၢ်,ဒ်သိးတၢ်လၢအဝဲသ့ၣ်ပာ်အသးကဖၢလၢလၢအဃိန့ၣ်,အဝဲသ့ၣ်ကအိၣ်ဖျါဒ်ပဝဲအသိးလီၤ. 13အဂ့ၢ်ဒ်အံၤ,ပှၤဒ်န့ၣ်သိးတဖၣ်,မ့ၢ်ပှၤတၢ်မၢဖိအဘျၣ်,ပှၤမၤလီတၢ်,ဒီးပျိာ်လဲအသးလၢခရံာ်အပှၤတၢ်မၢဖိလီၤ. 14ဒီးပကမၢကမၣ်အလီၢ်တအိၣ်ဘၣ်.အဂ့ၢ်ဒ်အံၤ,မုၣ်ကီၤလံၢ်အကစၢ်ဒၣ်လဲာ်,ပျိာ်လဲအသးလၢတၢ်ကပီၤအကလူးလီၤ. 15မၤသးဒ်န့ၣ်ဒီး,အခ့အပှၤတဖၣ်မ့ၢ်ပျိာ်လဲအသးလၢတၢ်တီတၢ်လိၤအခ့အပှၤဒီး,တမ့ၢ်ဘၣ်တၢ်ဒိၣ်တၢ်မုၢ်ဘၣ်.အဝဲသ့ၣ်အကတၢၢ်ကမ့ၢ်ဝဲဒ်အတၢ်မၤအသိးန့ၣ်လီၤ. 16ယစံးကဒီး,မ်ပှၤသုတဆိကမိၣ်ယၤလၢပှၤဟးဂီၤဖိနီတဂၤတဂ့ၤ.မ့တမ့ၢ်ဘၣ်ဒ်န့ၣ်ဒီးဒ်သိးယကပာ်ယသးကဖၢလၢတစဲးဒီး,တူၢ်လိာ်ယၤဒ်ပှၤဟးဂီၤဖိအသိးတက့ၢ်. 17တၢ်လၢယကတိၤ,ယတကတိၤဘၣ်ဒ်ကစၢ်အဂ့ၢ်အသိးဘၣ်,မ့ၢ်ဒ်ပှၤဟးဂီၤဖိအသိး,လၢတၢ်ပာ်ယသးကဖၢလၢအါကဲၣ်ဆိးအံၤအဃိလီၤ. 18မ့ၢ်ပှၤပာ်အသးကဖၢလၢလၢတၢ်ဖံးတၢ်ညၣ်အဃိအါဂၤသတးဒီး,ယဲဒၣ်အံၤ,ယကပာ်ယသးကဖၢလၢစ့ၢ်ကီးလီၤ. 19အဂ့ၢ်ဒ်အံၤၤ,သုမ့ၢ်ပှၤကူၣ်ဘၣ်ကူၣ်သ့အဃိဒီး,သုဝံသးစူၤပှၤဟးဂီၤဖိ,ခုၣ်ခုၣ်မုာ်မုာ်လီၤ. 20အဂ့ၢ်ဒ်အံၤ,ပှၤတဂၤဂၤမ့ၢ်မၢသုကဲကုၢ်,ပှၤတဂၤဂၤမ့ၢ်အီၣ်ကွံာ်သုတၢ်,ပှၤတဂၤဂၤမ့ၢ်ဟံးန့ၢ်သုတၢ်,ပှၤတဂၤဂၤမ့ၢ်ပာ်ထီၣ်ထီအသး,ပှၤတဂၤဂၤမ့ၢ်ဒဲသုမဲာ်ဒီး,သုဝံသးစူၤတၢ်လီၤ. 21ယကတိၤတၢ်လၢတၢ်ဒုၣ်ဒွဲၣ်အဂ့ၢ်,ဒ်ပမ့ၢ်ပှၤလၢအဂံၢ်စၢ်အဘါစၢ်အသိးလီၤ.ဘၣ်ဆၣ်ဒီးပှၤဂၤပာ်အသးခူတလ့ၢ်လၢတၢ်တမံၤမံၤအဃိမ့ၢ်ဘူၣ်ဒီး,ယဲဒၣ်အံၤ,ယပာ်ယသးခူတလ့ၢ်စ့ၢ်ကီးလီၤ.(ယကတိၤတၢ်ဒ်ပှၤဟးဂီၤဖိအသိး)အဝဲသ့ၣ်မ့ၢ်ပှၤဧ့ၤဘြံၤဖိဧါ. 22ယဲဒၣ်အံၤ,ယမ့ၢ်စ့ၢ်ကီးလီၤ.မ့ၢ်ပှၤအံၣ်စရ့လးဖိဧါ.ယဲဒၣ်အံၤ,ယမ့ၢ်စ့ၢ်ကီးလီၤ.မ့ၢ်စီၤအၤဘြၤဟၣ်အချံအသၣ်ဧါ.ယဲဒၣ်အံၤယမ့ၢ်စ့ၢ်ကီးလီၤ. 23မ့ၢ်ခရံာ်အခ့အပှၤဧါ.(ယကတိၤတၢ်ဒ်ပှၤဟးဂီၤဖိအသိး,)ယဲဒၣ်အံၤယဒိၣ်န့ၢ်အန့ၣ်တက့ၢ်လီၤ.လၢတၢ်ဖံးတၢ်မၤအပူၤန့ၣ်,အါတက့ၢ်,လၢတၢ်တီၢ်တၢ်ဝ့ၤအပူၤန့ၣ်အါတက့ၢ်ဒိၣ်မး,လၢဃိာ်ပူၤန့ၣ်အဘျီအါတက့ၢ်,လၢတၢ်သံအပူၤန့ၣ်,တလီၢ်လီၢ်တလီၢ်လီၢ်လီၤ. 24ပှၤယူဒၤဖိတီၢ်ယၤအဘီလွံၢ်ဆံစှၤလီၤတဘီ,ယဲၢ်စုလီၤ.ယဘၣ်တၢ်တီၢ်ယၤလၢနီၣ်က့သၢစု,ယဘၣ်တၢ်ကွံာ်ယၤလၢလၢၢ်တစု, 25ယဘၣ်ကဘီဟးဂီၤသၢစု,ယအိၣ်လၢပီၣ်လဲၣ်ပူၤတနံၤဒီးတနၤလီၤ. 26ယလဲၤတၢ်က့ၤတၢ်တလီၢ်လီၢ်တလီၢ်လီၢ်,ယဘူးတ့ၢ်ဒီးတၢ်နးတၢ်ဖှီၣ်လၢထံမိၢ်ပှၢ်တဖၣ်,ယဘူးတ့ၢ်ဒီးတၢ်နးတၢ်ဖှီၣ်လၢတမျိးတမျာ်,ယဘူးတ့ၢ်ဒီးတၢ်နးတၢ်ဖှီၣ်လၢပှၤတကလုာ်ဒၣ်ယဲ,ယဘူးတ့ၢ်ဒီးတၢ်နးတၢ်ဖှီၣ်လၢပှၤကလုာ်တဖၣ်ယဘူးတ့ၢ်ဒီးတၢ်နးတၢ်ဖှီၣ်လၢဝ့ၢ်ပူၤ,ယဘူးတ့ၢ်ဒီးတၢ်နးတၢ်ဖှီၣ်လၢပှၢ်မုၢ်ကနၢ,ယဘူးတ့ၢ်ဒီးတၢ်နးတၢ်ဖှီၣ်လၢပီၣ်လဲၣ်ပူၤ,ယဘူးတ့ၢ်ဒီးတၢ်နးတၢ်ဖှီၣ်လၢဒီပုၢ်ဝဲၢ်အဘျၣ်အကျါ, 27လၢတၢ်သူၣ်အုးတၢ်သးအုး,ဒီးတၢ်လီၤဘှံးလီၤတီၤအပူၤ,လၢတၢ်ဆိးသီတလီၢ်လီၢ်တလီၢ်လီၢ်အပူၤ,လၢတၢ်သၣ်ဝံၤယသးဒီးတၢ်သူယသးလၢထံအပူၤ,လၢတၢ်ဒုၣ်တၢ်အီၣ်တၢ်အီတလီၢ်လီၢ်တလီၢ်လီၢ်အပူၤ,လၢတၢ်ဂိၢ်,ဒီးတၢ်အိၣ်ဘ့ၣ်ဆ့အပူၤလီၤ. 28လၢတၢ်အိၣ်လၢခိအမဲာ်ညါတဖၣ်န့ၣ်,တၢ်ဘၣ်ယိၣ်ဘၣ်ဃးဒီးတၢ်အိၣ်ဖှိၣ်ခဲလၢာ်ဆီၣ်သနံးယၤကိးမုၢ်နံၤမုၢ်နၤဒဲးလီၤ. 29မ့ၢ်မတၤအဂံၢ်စၢ်အဘါစၢ်ဒီး,ယဂံၢ်တစၢ်ယဘါတစၢ်ဘၣ်တဂၤလဲၣ်.မ့ၢ်မတၤလီၤကမၣ်တၢ်,ဒီးယသးတကိၢ်ဘၣ်တဂၤလဲၣ်. 30ယတပာ်ယသးကဖၢလၢဒီးယအိၣ်မ့ၢ်တသ့ဘၣ်ဒီး,ယကပာ်ယသးကဖၢလၢ,လၢတၢ်ဘၣ်ဃးဒီးယဂံၢ်စၢ်ဘါစၢ်လီၤ. 31ပကစၢ်ယ့ၣ်ရှူးခရံာ်အပၢ်,ယွၤလၢအဘၣ်တၢ်ဆိၣ်ဂ့ၤအစိၤစိၤအဃၣ်ဃၣ်,သ့ၣ်ညါဝဲလၢယတကတိၤဘၣ်တၢ်ကဘျံးကဘျၣ်ဘၣ်လီၤ. 32လၢဒၤမ့ၤစ့းအပူၤန့ၣ်ပဒိၣ်လၢစီၤပၤအရံတၢ်အဖီလာ်တဂၤ,တၢ်မိၣ်ဟံးဃာ်အသးလၢယၤဒီး,ခိးဝ့ၢ်ဒၤမ့ၤစ့းဒီးသုးဖိတဖုသတးဒီး, 33တၢ်စဲၤလီၤယၤလၢတၢ်ထူၣ်ဖျိ,လၢစဲာ်ပူၤလၢဝ့ၢ်ခိၣ်ဒူန့ၣ်,ဒီးယဃ့ၢ်ပူၤဖျဲးအစုပူၤန့ၣ်လီၤ.
Copyright information for
KswSKMB