2 Corinthians 13
1ယဟဲဆူသုအိၣ်အအံၤမ့ၢ်သၢစုတစုလီၤ.မ့ၢ်ပှၤခံဂၤသၢဂၤအုၣ်အသးသတးဒီး,တၢ်ကတိၤကဂၢၢ်ကကျၢၤဝဲကိးအထံၣ်ဒဲးလီၤ. 2ယစံးဘၣ်တ့ၢ်တဘျီ,ဒီးခဲကနံၣ်အံၤ,ယအိၣ်လီၤဖးဒီးသုဒီး,ယစံးပာ်ကဒီးဒ်ယအိၣ်တ့ၢ်ဒီးသုခံစုတစုအသိး,ပှၤလၢအမၤကမၣ်တ့ၢ်တၢ်,ဒီးပှၤအဂၤခဲလၢာ်,ယမ့ၢ်ဟဲကဒီးတစုဒီး,ယတပျဲဘၣ်အီၤဘၣ်. 3အဂ့ၢ်ဒ်အံၤ,သုဃုတၢ်အုၣ်အသးလၢအဒုးနဲၣ်လၢခရံာ်ကတိၤတၢ်လၢယပူၤလီၤ.အဝဲဒၣ်အဂံၢ်စၢ်အဘါစၢ်လၢသုဂီၢ်တမ့ၢ်ဘၣ်.မ့ၢ်အအိၣ်ဒီးအစိအကမီၤလၢသုကျါလီၤ. 4အဂ့ၢ်ဒ်အံၤ,ဒိးသံအသးလၢထူၣ်စုညါအလိၤလၢတၢ်ဂံၢ်စၢ်ဘါစၢ်အဃိနာ်သက့ဒီး,မ့ၢ်အမူဝဲလၢယွၤအစိအကမီၤလီၤ.အဂ့ၢ်ဒ်အံၤ,ပဝဲဒၣ်အံၤ,ပဂံၢ်စၢ်ပဘါစၢ်လၢအပူၤစ့ၢ်ကီးဘၣ်ဆၣ်ဒီး,မ့ၢ်ယွၤအစိအကမီၤသတးဒီး,ပကမူဃုာ်ဒီးအီၤလၢသုဂီၢ်လီၤ. 5သုဝဲဒၣ်အံၤသုအိၣ်လၢတၢ်နာ်အပူၤ,သုတအိၣ်ဘၣ်လဲၣ်န့ၣ်,သံကွၢ်သံဒိးလီၤသုသးတက့ၢ်.ပစီကွၢ်လီၤသုသးတက့ၢ်.မ့ၢ်သုတသ့ၣ်ညါလီၤဘၣ်သုသး,လၢသုမ့တမ့ၢ်ဘၣ်ပှၤလၢအဘၣ်တၢ်ညိကွံာ်အီၤဘၣ်ဒီး,ယ့ၣ်ရှူးခရံာ်အိၣ်လၢသုပူၤန့ၣ်ဘၣ်ဧါ. 6ဒီးယမုၢ်လၢ်လၢသုကသ့ၣ်ညါလၢပတမ့ၢ်ပှၤဘၣ်တၢ်ညိကွံာ်အီၤဘၣ်. 7ဒီးပဘါထုကဖၣ်လၢယွၤဒ်သိးသုသုတမၤတၢ်အၢတၢ်သီနီတမံၤတဂ့ၤလီၤ.ဒ်သိးပကအိၣ်ဖျါပဝဲ,လၢပှၤဘၣ်တၢ်တူၢ်လိာ်အီၤန့ၣ်တမ့ၢ်ဘၣ်.မ့ၢ်ဒ်သိးပမ့ၢ်ပဝဲပှၤလီၤဂာ်လၢတၢ်ညိကွံာ်အီၤနာ်သက့ဒီး,သုကမၤတၢ်ဂ့ၤတၢ်ဘၣ်သုဝဲလီၤ. 8အဂ့ၢ်ဒ်အံၤ,ပမၤတၢ်ထီဒါတၢ်မ့ၢ်တၢ်တီတသ့ဘၣ်နီတမံၤဘၣ်.မ့ၢ်လၢတၢ်မ့ၢ်တၢ်တီအဂီၢ်လီၤ. 9အဂ့ၢ်ဒ်အံၤ,တုၤပဂံၢ်စၢ်ပဘါစၢ်,ဒီးသုဂံၢ်ဆူၣ်ဘါဆူၣ်ဒီး,ပသးခုလီၤ.ဒီးပဘါထုကဖၣ်စ့ၢ်ကီး,လၢသုကလၢထီၣ်ပှဲၤထီၣ်လီၤ. 10လၢတၢ်န့ၣ်အဃိ,ယလီၤဖးဒီးသုအဖၢမုၢ်ဒီး,ယကွဲးတၢ်တဖၣ်အံၤဒ်သိးယမ့ၢ်အိၣ်က့ၤဒီးသုဒီး,ယသုတမၤဆူၣ်မၤစိးဒီးတၢ်အစိအကမီၤလၢကစၢ်ဟ့ၣ်ယၤလၢတၢ်မၤထီၣ်မၤထီအဂီၢ်,ဒီးတမ့ၢ်ဘၣ်လၢတၢ်မၤဟးဂီၤအဂီၢ်ဘၣ်လီၤ. 11တၢ်ကတိၤလၢခံကတၢၢ်န့ၣ်,ပုၢ်သ့ၣ်ဝဲၢ်သ့ၣ်ဧၢ,မ်သုသူၣ်ခုသးခုတက့ၢ်.မ်သုလၢထီၣ်ပှဲၤထီၣ်တက့ၢ်.မ်တၢ်မၤခုၣ်မၤမုာ်သုသးတက့ၢ်.မ်သုအိၣ်သုသးတဖျၢၣ်ဃီတက့ၢ်.မ်သုအိၣ်ဃူအိၣ်ဖိးတက့ၢ်.ဒီးတၢ်အဲၣ်တၢ်ကွံ,ဒီးတၢ်ဃူတၢ်ဖိးအကစၢ်န့ၣ်,ကအိၣ်ဒီးသုလီၤ. 12ကတိၤဒိၣ်လိာ်သုသးဒီးတၢ်နၢမူစီဆှံတက့ၢ်. 13ပှၤစီဆှံခဲလၢာ်န့ၣ်ကတိၤဒိၣ်သုလီၤ. 14ကစၢ်ယ့ၣ်ရှူးခရံာ်အဘျုးအဖှိၣ်,ဒီးယွၤအတၢ်အဲၣ်တၢ်ကွံ,ဒီးသးစီဆှံအတၢ်ရ့လိာ်န့ၣ်,မ်အအိၣ်ဒီးသုခဲလၢာ်တက့ၢ်.[အၤမ့ၣ်].
Copyright information for
KswSKMB