2 Corinthians 3
1မ့ၢ်ပမၤထီၣ်သီကဒီးတၢ်စံးထီၣ်ပတြၢၤလီၤက့ၤပသးန့ၣ်ဧါ.မ့ၢ်ပန့ၢ်လံာ်တူၢ်လိာ်တၢ်,ဒ်ပှၤတနီၤနီၤအသိးဆူသုအိၣ်မ့ၢ်ဂ့ၤ,လံာ်တူၢ်လိာ်တၢ်လၢသုအိၣ်မ့ၢ်ဂ့ၤ,အလီၢ်အိၣ်ဧါ. 2သုဝဲသ့ၣ်,သုမ့ၢ်ပလံာ်ကွဲးအသးလၢပသးအလိၤ,ဒီးပှၤကညီသ့ၣ်ညါဝဲဒီးဖးဝဲခဲလၢာ်လီၤ. 3သုအိၣ်ဖျါလၢသုမ့ၢ်ခရံာ်အလံာ်လၢပမၤအီၤ,အိၣ်ကွဲးအသးလၢကသံၣ်ထံတမ့ၢ်ဘၣ်,မ့ၢ်လၢယွၤလၢအမူဝဲတဂၤန့ၣ်အသး,လၢလၢၢ်ဘ့ၣ်ဘၣ်အလိၤတမ့ၢ်ဘၣ်,မ့ၢ်လၢသးအဖံးအညၣ်ဘ့ၣ်ဘၣ်အလိၤလီၤ. 4ဒီးပအိၣ်ဒီးတၢ်နာ်ယွၤဒ်န့ၣ်လၢခရံာ်အဃိလီၤ. 5တမ့ၢ်ဘၣ်ပသ့တၢ်လၢပကစၢ်ဒၣ်ပဝဲလၢပကကူၣ်တၢ်တမံၤမံၤဒ်လၢပကစၢ်ဒၣ်ပဝဲအသိးဘၣ်.မ့မ့ၢ်ပသ့တၢ်န့ၣ်မ့ၢ်လၢယွၤလီၤ. 6ဒီးအဝဲဒၣ်မၤသ့ထီၣ်ပှၤ,ဒ်သိးပကကဲထီၣ်တၢ်အၢၣ်လီၤအီလီၤအသီအခ့အပှၤဘၣ်ဃးဒီးလံာ်ဖျၢၣ်တမ့ၢ်ဘၣ်,မ့ၢ်အဘၣ်ဃးဒီးသးလီၤ.အဂ့ၢ်ဒ်အံၤ,လံာ်ဖျၢၣ်မၤသံတၢ်,မ့မ့ၢ်သးန့ၣ်မၤမူတၢ်လီၤ. 7ဘၣ်ဆၣ်ဒီးတၢ်မၤလိာ်ဘၣ်ဃးဒီးတၢ်သံ,ကွဲးအသးလၢလၢၢ်အလိၤ,မ့ၢ်အိၣ်ဒီးအလၤအကပီၤတုၤဒၣ်လဲာ်ပှၤအံၣ်စရ့လးဖိကွၢ်ထံကွၢ်ဆးစီၤမိၤရှ့အမဲာ်တကဲဘၣ်လၢအမၤအလၤကပီၤလၢအကဟါမၢ်တ့ၢ်ဝဲအဃိဒီး, 8တၢ်မၤလိာ်ဘၣ်ဃးဒီးသးကအိၣ်အလၤအကပီၤဒိၣ်န့ၢ်အန့ၣ်တက့ၢ်,တမ့ၢ်ဘၣ်ဧါ. 9အဂ့ၢ်ဒ်အံၤ,တၢ်မၤလိာ်ဘၣ်ဃးဒီးတၢ်စံၣ်ညီၣ်ဃၣ်မ့ၢ်အိၣ်ဒီးအလၤအကပီၤဒီး,တၢ်မၤလိာ်ဘၣ်ဃးဒီးတၢ်တီတၢ်လိၤ,အလၤအကပီၤအိၣ်ဒိၣ်န့ၢ်အါန့ၢ်အန့ၣ်တက့ၢ်လီၤ. 10အဂ့ၢ်ဒ်အံၤ,တၢ်လၢအအိၣ်တ့ၢ်ဒီးအလၤကပီၤန့ၣ်,အလၤကပီၤတအိၣ်လၢၤဘၣ်,လၢတၢ်အိၣ်ဒီးအလၤကပီၤဒိၣ်ဝဲန့ၣ်အဃိလီၤ. 11အဂ့ၢ်ဒ်အံၤ,တၢ်လၢအဟါမၢ်မ့ၢ်အိၣ်ဒီးအလၤကပီၤဒီး,တၢ်လၢအအိၣ်ဝဲဆိးဝဲန့ၣ်,အိၣ်ဒီးအလၤကပီၤဒိၣ်န့ၢ်အါန့ၢ်အန့ၣ်တက့ၢ်လီၤ. 12မၤသးဒ်န့ၣ်ဒီးပအိၣ်ဒီးတၢ်မုၢ်လၢ်ထဲထဲအံၤဒီး,ပကတိၤတၢ်လၢတၢ်အိၣ်ဖျါဖးဒိၣ်လီၤ. 13ဒီးတမ့ၢ်ဘၣ်ဒ်စီၤမိၤရှ့လၢအကျၢၢ်ဘၢထီၣ်အမဲာ်,ဒ်သိးပှၤအံၣ်စရ့လးဖိသုတကွၢ်ထံတၢ်လၢအဟါမၢ်န့ၣ်အကတၢၢ်တဂ့ၤ,အသိးဘၣ်, 14ဘၣ်ဆၣ်ဒီးအဝဲသ့ၣ်အသးသ့ၣ်ညါနၢ်ပၢၢ်တၢ်န့ၣ်,ကိၤထီၣ်လီၤ. 15အဂ့ၢ်ဒ်အံၤ,တုၤမုၢ်မဆါတနံၤအံၤ,လၢပှၤဖးလံာ်တၢ်အၢၣ်လီၤအီလီၤလီၢ်လံၤန့ၣ်ဒီး,နီၣ်ကျၢၢ်ဘၢမဲာ်အံၤ,အိၣ်ဒၣ်တၢ်,ဒီးတအိၣ်ဖျါထီၣ်ဘၣ်လၢတၢ်အံၤလၢထီၣ်ပှဲၤထီၣ်လၢခရံာ်အပူၤဘၣ်. 16ဘၣ်ဆၣ်ဒီးတုၤမုၢ်မဆါတနံၤအံၤ,တုၤပှၤဖးစီၤမိၤရှ့ဒီး,နီၣ်ကျၢၢ်ဘၢမဲာ်န့ၣ်အိၣ်လၢအသးအလိၤလီၤ.ဘၣ်ဆၣ်ဒီးတုၤမ့ၢ်အဃၣ်က့ၤအသးဆူကစၢ်အအိၣ်ဒီး,တၢ်ဟံးထီၣ်ကွံာ်နီၣ်ကျၢၢ်ဘၢမဲာ်န့ၣ်လီၤ. 17ဒီးကစၢ်မ့ၢ်သးန့ၣ်,ဒီးဖဲဒၣ်ကစၢ်အသးအိၣ်ဝဲန့ၣ်,တၢ်ထူၣ်ဖျဲးအိၣ်ဝဲလီၤ. 18မ့မ့ၢ်ပဝဲဒၣ်ခဲလၢာ်အံၤ,ပမဲာ်တကျၢၢ်ဘၢဘၣ်ဒီး,ပကွၢ်ကစၢ်အလၤကပီၤဒ်လၢမဲာ်ထံကလၤအပူၤအသိးသတးဒီး,ပဘၣ်တၢ်လဲလိာ်ပသးဆူတၢ်အက့ၢ်အဂီၤတမံၤဃီအံၤ,လၢတၢ်လၤကပီၤဆူတၢ်လၤကပီၤ,ဒ်လၢကစၢ်အသးအသိးန့ၣ်လီၤ.
Copyright information for
KswSKMB