2 Corinthians 4
1မၤသးဒ်န့ၣ်ဒီးပအိၣ်ဒီးတၢ်မၤအံၤဒီး,ဒ်ပဘၣ်တၢ်သးကညီၤအသိး,ပတလီၤဘှံးဘၣ်. 2မ့ၢ်ပညိကွံာ်တၢ်ခူသူၣ်ဘၣ်ဃးဒီးတၢ်မဲာ်ဆှး,ဒီးပတလဲၤဘၣ်လၢတၢ်လီတၢ်ဝ့ၤဘၣ်,ဒီးပတကျီၣ်ကျဲဘၣ်ယွၤအကလုၢ်အကထါဘၣ်.မ့မ့ၢ်ပာ်ဖျါထီၣ်တၢ်မ့ၢ်တၢ်တီသတးဒီး,ပဒုးဘၣ်ကယဲၢ်ပှၤကညီအသးလၢအသ့ၣ်ညါဒၣ်တၢ်လၢပှၤ,လၢယွၤအမဲာ်ညါလီၤ. 3ဘၣ်ဆၣ်ဒီးပတၢ်သးခုအကစီၣ်မ့ၢ်အိၣ်ကျၢၢ်ဘၢဒီး,မ့ၢ်အအိၣ်ကျၢၢ်ဘၢလၢပှၤတုၤတၢ်ဟးဂီၤတဖၣ်အမဲာ်ညါလီၤ. 4လၢအဝဲသ့ၣ်အပူၤဟီၣ်ခိၣ်အကစၢ်မၤခံးပှၤလၢအတစူၢ်တနာ်ဘၣ်အသး,ဒ်သိးခရံာ်လၢအမ့ၢ်ယွၤအက့ၢ်အဂီၤတဂၤန့ၣ်အလၤကပီၤ,အတၢ်သးခုအကစီၣ်အတၢ်ကပီၤ,သုတကပီၤထီၣ်ဘၣ်အီၤတဂ့ၤလီၤ. 5အဂ့ၢ်ဒ်အံၤ,ပတစံၣ်တဲၤတဲလီၤပကစၢ်ဒၣ်ပဝဲဘၣ်,မ့ၢ်ကစၢ်ယ့ၣ်ရှူးခရံာ်,ဒီးပကစၢ်ဒၣ်ပဝဲလၢသုခ့သုပှၤလၢယ့ၣ်ရှူးအဃိလီၤ. 6အဂ့ၢ်ဒ်အံၤ,ယွၤလၢအစံးကဲထီၣ်တၢ်ကပီၤလၢတၢ်ခံးအပူၤတဂၤန့ၣ်ကပီၤထီၣ်လၢပသးကံၢ်ပူၤ,လၢတၢ်ကပီၤဘၣ်ဃးဒီးတၢ်သ့ၣ်ညါယွၤအလၤကပီၤ,လၢအကဲၤကပီၤလၢယ့ၣ်ရှူးအမဲာ်အလိၤအဃိလီၤ. 7ဘၣ်ဆၣ်ဒီးပအိၣ်ဒီးတၢ်လုၢ်ဒိၣ်ပှ့ၤဒိၣ်အံၤ,လၢသပၢၤဟီၣ်ခိၣ်အပူၤ,ဒ်သိးအစိအကမီၤဒိၣ်ကဲၣ်ဆိးအံၤ,ကဘၣ်ဃးဒီးယွၤ,ဒီးတမ့ၢ်ဘၣ်ပှၤဘၣ်လီၤ. 8တၢ်မၤတံာ်တာ်ပှၤလၢတၢ်ကိးမံၤဒဲးဘၣ်ဆၣ်ဒီး,တၢ်ဆီၣ်အံၣ်လီၤပတၢ်တမ့ၢ်ဘၣ်.ပကမၤဒ်လဲၣ်ပကူၣ်တဘၣ်ဘၣ်,မ့မ့ၢ်ပတၢ်မုၢ်လၢ်တဟါမၢ်ဘၣ်. 9တၢ်မၤအၢမၤနးပှၤဘၣ်ဆၣ်ဒီး,တၢ်တလဲၤသဒၣ်ဘၣ်ပှၤဘၣ်.တၢ်မၤလီၤဃံၤပှၤဘၣ်ဆၣ်ဒီး,ပတဟးဂီၤဘၣ်. 10ပစိာ်ယ့ၣ်ရှူးအတၢ်ဒိးသံအသးလၢပနီၢ်ခိတဘိယူၢ်ဃီ,ဒ်သိးယ့ၣ်ရှူးအတၢ်မူကအိၣ်ဖျါထီၣ်စ့ၢ်ကီးလၢပနီၢ်ခိလီၤ. 11အဂ့ၢ်ဒ်အံၤ,ပှၤလၢအမူပဝဲဒၣ်အံၤ,ပဘၣ်တၢ်ဟ့ၣ်လီၤပှၤဆူတၢ်သံ,လၢယ့ၣ်ရှူးအဃိတဘိယူၢ်ဃီ,ဒ်သိးယ့ၣ်ရှူးအတၢ်မူကအိၣ်ဖျါထီၣ်လၢပဖံးပညၣ်လၢအသံသ့အံၤအပူၤလီၤ. 12မၤသးဒ်န့ၣ်ဒီးတၢ်သံန့ၣ်မၤတၢ်လၢပပူၤ,မ့မ့ၢ်တၢ်မူန့ၣ်လၢသုပူၤလီၤ. 13ပအိၣ်ဒီးတၢ်နာ်အသးတမံၤဃီဒ်တၢ်ကွဲးအသးအသိး,ယနာ်တၢ်သတးဒီး,ယကတိၤတၢ်လီၤ. ▼▼4:13 စံး.၁၁၆း၁၀
ဒီးပဝဲဒၣ်အံၤ,ပနာ်တၢ်သတးဒီး,ပကတိၤတၢ်စ့ၢ်ကီးလီၤ. 14အဂ့ၢ်ဒ်အံၤ,ပသ့ၣ်ညါလၢပှၤလၢအဒုးဂဲၤဆၢထၢၣ်က့ၤကစၢ်ယ့ၣ်ရှူး,ကဒုးဂဲၤဆၢထၢၣ်က့ၤပှၤစ့ၢ်ကီးဒီးယ့ၣ်ရှူး,ဒီးကပာ်ပှၤဒီးသုလၢအမဲာ်ညါလီၤ. 15အဂ့ၢ်ဒ်အံၤ,တၢ်ခဲလၢာ်မ့ၢ်လၢသုဂီၢ်,ဒ်သိးတၢ်အဘျုးအဖှိၣ်လၢအအါထီၣ်လၢပှၤအါဂၤအဃိ,ကဒုးအါထီၣ်တၢ်စံးထီၣ်ပတြၢၤတၢ်အဘျုးအဖှိၣ်လၢယွၤအလၤကပီၤအဂီၢ်လီၤ. 16မၤသးဒ်န့ၣ်ဒီးပတလီၤဘှံးဘၣ်.ပနီၢ်လၢခိအံၤမ့ၢ်ဟးဂီၤဘၣ်ဆၣ်ဒီး,ပနီၢ်လၢညါန့ၣ်ဘၣ်တၢ်မၤထီၣ်က့ၤအီၤတနံၤဘၣ်တနံၤလီၤ. 17အဂ့ၢ်ဒ်အံၤ,တၢ်နးတၢ်ဖှီၣ်ဘၣ်ပှၤဘီၣ်သလီၣ်,လၢအအိၣ်တစိၢ်ဖိအံၤ,မၤန့ၢ်ပှၤလၢတၢ်လၤတၢ်ကပီၤအထူအယိာ်လၢအအါန့ၢ်ဃၢန့ၢ်ဒိၣ်ဒိၣ်ကလဲာ်တက့ၢ်လီၤ. 18အဂ့ၢ်ဒ်အံၤ,ပတကွၢ်ဘၣ်တၢ်လၢအအိၣ်ဖျါဘၣ်,မ့ၢ်တၢ်လၢအတအိၣ်ဖျါဘၣ်လီၤ.အဂ့ၢ်ဒ်အံၤ,တၢ်လၢအအိၣ်ဖျါန့ၣ်အိၣ်တစိၢ်ဖိဧိၤလီၤ.မ့မ့ၢ်တၢ်လၢအတအိၣ်ဖျါဘၣ်န့ၣ်,အိၣ်ဝဲလီၤထူလီၤယိာ်လီၤ.
Copyright information for
KswSKMB