2Cor 6 | KswSKMB | STEP | ဒီးပမ့ၢ်ပှၤမၤဃုာ်တၢ်စ့ၢ်ကီး,ဒီးပဃ့ကညးသု,ဒ်သိးသုသုတဒိးန့ၢ်ယွၤအဘျုးအဖှိၣ်ကလီကလီတဂ့ၤလီၤ.

‏ 2 Corinthians 6

1 ဒီးပမ့ၢ်ပှၤမၤဃုာ်တၢ်စ့ၢ်ကီး,ဒီးပဃ့ကညးသု,ဒ်သိးသုသုတဒိးန့ၢ်ယွၤအဘျုးအဖှိၣ်ကလီကလီတဂ့ၤလီၤ. 2 အဂ့ၢ်ဒ်အံၤ,စံးဝဲဒၣ်,

လၢအကတီၢ်အဂ့ၤအဘၣ်န့ၣ်,ယဒိကနၣ်နကလုၢ်,
ဒီးလၢတၢ်အုၣ်က့ၤခီၣ်က့ၤအမုၢ်နံၤ,ယမၤစၢၤနၤလီၤ. ^{▼▼6:2 ၡါ.၄၉း၈}

ကွၢ်ကွၢ်,ခဲကနံၣ်အံၤမ့ၢ်တၢ်အကတီၢ်အဂ့ၤအဘၣ်,ကွၢ်ကွၢ်,ခဲကနံၣ်အံၤမ့ၢ်တၢ်အုၣ်က့ၤခီၣ်က့ၤအမုၢ်နံၤန့ၣ်လီၤ. 3 ဒ်သိးတၢ်အခ့အပှၤအတၢ်မၤသုတဘၣ်တၢ်ပာ်တၢ်ကမၣ်လၢအလိၤတဂ့ၤဒီး,ပတဟ့ၣ်ဘၣ်တၢ်လီၤကမၣ်အလီၢ်လၢတၢ်နီတမံၤဘၣ်. 4 မ့မ့ၢ်ပပာ်ဖျါထီၣ်ပသးလၢပမ့ၢ်ယွၤအခ့အပှၤလၢတၢ်ခဲလၢာ်အပူၤ,လၢတၢ်ဝံသးစူၤလၢအအါ,လၢတၢ်နးတၢ်ဖှီၣ်အပူၤ,လၢတၢ်ဖီၣ်တၢ်ယာ်အပူၤ,လၢတၢ်ကီတၢ်ခဲအပူၤ, 5 လၢတၢ်တီၢ်တၢ်ဝ့ၤအပူၤ,လၢပဘၣ်ဃိာ်အပူၤ,လၢတၢ်တၢထီၣ်တၢလီၤအပူၤ,လၢတၢ်ဖံးတၢ်မၤအပူၤ,လၢတၢ်ဆိးသီအပူၤ,လၢတၢ်ဒုၣ်တၢ်အီၣ်တၢ်အီအပူၤ, 6 လၢတၢ်စီဆှံအပူၤ,လၢတၢ်သ့ၣ်ညါအပူၤ,လၢတၢ်ဝံသးစူၤဃဲးဃဲးအပူၤ,လၢတၢ်မၤဂ့ၤတၢ်အပူၤ,လၢသးစီဆှံအပူၤ,လၢတၢ်အဲၣ်တၢ်ကွံနီၢ်နီၢ်အပူၤ, 7 လၢတၢ်မ့ၢ်တၢ်တီအကလုၢ်အကထါအပူၤ,လၢယွၤအစိအကမီၤအပူၤ,လၢတၢ်တီတၢ်လိၤအစုကဝဲၤ,အိၣ်ဝဲလၢစုစ့ၣ်ဒီးစုထွဲ, 8 လၢပဘၣ်တၢ်လၤကပီၤ,ဒီးလၢပဘၣ်တၢ်တရီတပါ,လၢပဘၣ်တၢ်ဟူထီသါလီၤလၢအအၢ,ဒီးလၢပဘၣ်တၢ်ဟူထီသါလီၤလၢအဂ့ၤဒ်ပှၤလီတၢ်အသိး,ဘၣ်ဆၣ်ဒီးမ့ၢ်ပှၤအတီ, 9 ဒ်ပှၤလၢပှၤဂၤတသ့ၣ်ညါဘၣ်အီၤအသိး,ဘၣ်ဆၣ်ဒီး,မ့ၢ်ပှၤလၢတၢ်သ့ၣ်ညါထံအီၤ,ဒ်ပှၤဘၣ်သံအသိး,ဒီးကွၢ်ကွၢ်ပမူလီၤ,ဒ်ပှၤလၢအဘၣ်တၢ်သိၣ်ဃီၣ်အီၤအသိး,ဘၣ်ဆၣ်ဒီးတၢ်တမၤသံဘၣ်အီၤဘၣ်, 10 ဒ်ပှၤလၢအသးအုးအသိး,ဘၣ်ဆၣ်ဒီးသးခုဝဲတထံၣ်ဃီ,ဒ်ပှၤဖှီၣ်ဖိယာ်ဖိအသိး,ဘၣ်ဆၣ်ဒီးဒုးထူးဒုးတီၤပှၤအါဂၤ,ဒ်ပှၤလၢအတၢ်တအိၣ်ဘၣ်နီတမံၤဘၣ်အသိး,ဘၣ်ဆၣ်ဒီးအိၣ်ဒီးတၢ်ခဲလၢာ်လီၤ.

11 ပှၤကရံၣ်သူးဖိသ့ၣ်ဧၢ,ပထးခိၣ်အိၣ်အိးထီၣ်အသးလၢသုဂီၢ်,ပသးအိးလဲၢ်ထီၣ်အသးလီၤ. 12 တမ့ၢ်ဘၣ်သုဘၣ်တၢ်မၤအံၣ်မၤဆံးသုလၢပပူၤဘၣ်,မ့ၢ်သုဘၣ်တၢ်မၤအံၣ်မၤဆံးသုလၢသုဟၢဖၢဒၣ်သုဝဲအပူၤလီၤ. 13 ယကတိၤတၢ်ဒ်လၢယဖိအသိးလၢတၢ်ဟ့ၣ်ဆၢတၢ်တမံၤဃီအံၤအဂီၢ်,မၤလဲၢ်ထီၣ်သုသးစ့ၢ်ကီးတက့ၢ်.

14 သုတယိးနီၣ်ယိးဘိဖုၣ်ထံၣ်ဖုၣ်ထီဒီးပှၤလၢအတစူၢ်တနာ်ဘၣ်တဖၣ်န့ၣ်တဂ့ၤ.အဂ့ၢ်ဒ်အံၤ,တၢ်တီတၢ်လိၤန့ၣ်,ဘၣ်ဃးဒီးတၢ်တတီတလိၤဘၣ်ဒ်လဲၣ်,ဒီးတၢ်ကပီၤရ့လိာ်အသးဒီးတၢ်ခံးဒ်လဲၣ်. 15 ဒီးခရံာ်ဘၣ်လိာ်ဒီးဘလးယဧၤလးဒ်လဲၣ်,ဒီးပှၤလၢအစူၢ်က့ၤနာ်က့ၤတၢ်,န့ၢ်ဘၣ်ဃုာ်အဂီၢ်ဒီးပှၤလၢအတစူၢ်တနာ်ဘၣ်ဒ်လဲၣ်,ဒီးယွၤအတၢ်လုၢ်အဟံၣ်ဘၣ်လိာ်အသးဒီးတၢ်ဂီၤလၢမနုၤတမံၤလဲၣ်. 16 အဂ့ၢ်ဒ်အံၤ,သုမ့ၢ်ယွၤလၢအမူဝဲတဂၤအတၢ်လုၢ်အဟံၣ်လီၤ.ဒ်ယွၤစံးဝဲအသိး,ယကအိၣ်လၢအပူၤဒီးယကလဲၤတၢ်ဒီးအီၤ,ဒီးယကကဲထီၣ်အကစၢ်,ဒီးအဝဲသ့ၣ်ကကဲလၢယပှၤဂီၢ်မုၢ်လီၤ. ^{▼▼6:16 ၃မိၤ.၂၆း၁၁}

17 မၤသးဒ်န့ၣ်ဒီးယွၤစံးဝဲဒၣ်,ဟးထီၣ်လၢအကျါ,ဒီးအိၣ်လီၤဆီတက့ၢ်.ဒီးထိးဘၣ်တၢ်တကဆှီဘၣ်န့ၣ်တဂ့ၤ.ဒီးယကတူၢ်လိာ်သု, 18 ဒီးယကကဲလၢသုပၢ်,ဒီးသုကကဲလၢယဖိမုၣ်,ဒီးယဖိခွါတဖၣ်လီၤ,ယွၤလၢအသ့တၢ်လၢာ်စံးဝဲဒၣ်. ^{▼▼6:18 ၡါ.၅၂း၁၁,၁၂.၂မူၤ.၇း၁၄}