2 Corinthians 7
1မၤသးဒ်န့ၣ်ဒီးပှၤသးဘိသ့ၣ်သုဧၢ,ပအိၣ်ဒီးတၢ်စံးပာ်တဖၣ်အံၤဒီး,မ်ပမၤကဆှီပသးလၢကယဲၢ်တၢ်ဃံၣ်တၢ်မူး,ဘၣ်ဃးဒီးပဖံးပညၣ်,ဒီးပသူၣ်ပသးခဲလၢာ်တက့ၢ်.ဒီးလၢတၢ်ပျံၤယွၤအပူၤန့ၣ်,မ်ပမၤလၢထီၣ်ပှဲၤထီၣ်တၢ်စီဆှံတက့ၢ်. 2တူၢ်လိာ်ပှၤတက့ၢ်.ပတမၤဘၣ်ပှၤလၢတၢ်တတီတလိၤနီတဂၤဘၣ်,ပတလီန့ၢ်ပှၤအတၢ်နီတဂၤဘၣ်. 3ယစံးတၢ်အံၤဒ်သိးယကစံၣ်ညီၣ်ဃၣ်သုတမ့ၢ်ဘၣ်.အဂ့ၢ်ဒ်အံၤၤ,ယစံးတ့ၢ်လံသုအိၣ်လၢပသးလၢပကသံဃုာ်,ဒီးမူဃုာ်ဒီးသုလီၤ. 4ယသးခူတလ့ၢ်ဒိၣ်မးလၢသုဂ့ၢ်,ယပာ်ယသးကဖၢလၢဒိၣ်မးလၢသုဃိ,တၢ်မၤမုာ်ထီၣ်က့ၤယၤအိၣ်ပှဲၤယပူၤ,ယသးခုဒိၣ်မးလၢပတၢ်နးတၢ်ဖှီၣ်ခဲလၢာ်အပူၤလီၤ. 5အဂ့ၢ်ဒ်အံၤ,လၢပဟဲတုၤလၢမၤက့းဒနံ,ပဖံးပညၣ်တအိၣ်ဘှံးဘၣ်လ့ၤတက့ၤဘၣ်,မ့ၢ်ပဘၣ်တၢ်နးတၢ်ဖှီၣ်လၢတၢ်ခဲလၢာ်လီၤ.လၢခိမ့ၢ်တၢ်ဒုးတၢ်ယၤ,လၢညါမ့ၢ်တၢ်ပျံၤတၢ်ဖုးလီၤ. 6ဘၣ်ဆၣ်ဒီးယွၤလၢအမၤမုာ်ထီၣ်က့ၤပှၤလၢအဘၣ်တၢ်ဆီၣ်လီၤအီၤတဖၣ်န့ၣ်,မၤမုာ်ထီၣ်က့ၤပှၤလၢစီၤတံတူးဟဲတုၤအဃိလီၤ. 7ဒီးထဲအဟဲတုၤဧိၤတမ့ၢ်ဘၣ်.မ့ၢ်လၢတၢ်မၤမုာ်,လၢအဝဲဒၣ်ဘၣ်တၢ်မၤမုာ်အီၤလၢသုဂ့ၢ်န့ၣ်စ့ၢ်ကီးလီၤ.ဒီးတုၤအစံးဘၣ်တဲဘၣ်ပှၤလၢသုဆၢတၢ်သပှၢ်ပှၢ်,သုသးအုး,သုးသးဂဲၤလိာ်လၢယၤဒီး,ယသးခုဒိၣ်န့ၢ်အန့ၣ်တက့ၢ်လီၤ. 8အဂ့ၢ်ဒ်အံၤ,မ့ၢ်ယမၤသးအုးသုလၢယလံာ်တဘ့ၣ်ဒီး,ယပီၢ်ယၢ်လီၤက့ၤတ့ၢ်ယသးနာ်သက့ဒီး,ယတပီၢ်ယၢ်လီၤက့ၤလၢၤဘၣ်ယသးဘၣ်.အဂ့ၢ်ဒ်အံၤ,ယထံၣ်လၢလံာ်တဘ့ၣ်န့ၣ်မၤသးအုးသုဘၣ်ဆၣ်ဒီး,မ့ၢ်တစိၢ်ဖိဧိၤလီၤ. 9ခဲကနံၣ်အံၤယသးခုလၢသုဘၣ်တၢ်သးအုးတမ့ၢ်ဘၣ်,မ့ၢ်လၢသုသးအုးတုၤလၢတၢ်ပီၢ်ယၢ်လီၤက့ၤသုသးအဃိန့ၣ်လီၤ.အဂ့ၢ်ဒ်အံၤ,သုသးအုးန့ၣ်ဘၣ်ဃးဒီးယွၤ,ဒ်သိးသုသုတဘၣ်တၢ်ဆံးလီၤစှၤလီၤလၢပဃိ,နီတမံၤတဂ့ၤန့ၣ်လီၤ. 10အဂ့ၢ်ဒ်အံၤ,တၢ်သးအုးဘၣ်ဃးဒီးယွၤန့ၣ်,ဒုးအိၣ်ထီၣ်တၢ်ပီၢ်ယၢ်လီၤက့ၤပသးတုၤလၢတၢ်အုၣ်က့ၤခီၣ်က့ၤလၢပသးအုးလၢအဃိအလီၢ်တအိၣ်ဘၣ်.မ့မ့ၢ်တၢ်သးအုးဘၣ်ဃးဒီးဟီၣ်ခိၣ်န့ၣ်,ဒုးအိၣ်ထီၣ်တၢ်သံလီၤ. 11အဂ့ၢ်ဒ်အံၤ,ကွၢ်ကွၢ်,တၢ်အံၤတမံၤဒၣ်ဝဲ,လၢသုသးအုးဘၣ်ဃးဒီးယွၤအဃိဒီး,မ့ၢ်အဒုးအိၣ်ထီၣ်သုကျဲးစၢးတၢ်သပှၢ်ပှၢ်ဆံးအါလဲၣ်.မ့ၢ်လံ,သုကတိၤပူၤဖျဲးတၢ်,မ့ၢ်လံ,သုသးဟ့တၢ်,မ့ၢ်လံ,သုပျံၤတၢ်,မ့ၢ်လံ,သုဆၢတၢ်သပှၢ်ပှၢ်,မ့ၢ်လံ,သုသးဂဲၤလိာ်,မ့ၢ်လံ,သုဟ့ၣ်ဆၢတၢ်န့ၣ်ဆံးဒိၣ်လဲၣ်.လၢတၢ်ခဲလၢာ်အပူၤ,သုပာ်ဖျါသုသးလၢသုစီဆှံလၢတၢ်အံၤအဂ့ၢ်လီၤ. 12မ်ဒ်န့ၣ်ဒီးယကွဲးတ့ၢ်သုလံာ်တဘ့ၣ်,တမ့ၢ်ဘၣ်လၢပှၤမၤတၢ်တတီတလိၤဘၣ်တဂၤန့ၣ်အဃိဘၣ်,ဒီးတမ့ၢ်ဘၣ်လၢပှၤဘၣ်တၢ်မၤအီၤတတီတလိၤအဃိဘၣ်,မ့ၢ်ဒ်သိးသုကျဲးစၢးတၢ်လၢပဂီၢ်,ကအိၣ်ဖျါလၢယွၤအမဲာ်ညါ,လၢသုဂီၢ်လီၤ. 13မၤသးဒ်န့ၣ်ဒီး,ပဘၣ်တၢ်မၤမုာ်ထီၣ်က့ၤလံပှၤလံ.ဒီးလၢပဘၣ်တၢ်မၤမုာ်ထီၣ်က့ၤပှၤန့ၣ်ပသးခုထီၣ်လၢစီၤတံတူးသးခုအဃိအါဒိၣ်န့ၢ်အန့ၣ်တက့ၢ်လီၤ.အဂ့ၢ်ဒ်အံၤၤ,အဝဲဒၣ်အသးဒိးတၢ်ဒုးအိၣ်ဘှံးဝဲ,လၢသုဃိခဲလၢာ်လီၤ. 14အဂ့ၢ်ဒ်အံၤ,ယမ့ၢ်ပာ်ယသးကဖၢလၢလၢသုဂ့ၢ်သုကျိၤတမံၤမံၤလၢအဝဲဒၣ်အမဲာ်ညါဒီး,ယမဲာ်တဆှးဘၣ်.အဂ့ၢ်ဒ်အံၤ,ဒ်ပကတိၤတၢ်မ့ၢ်တၢ်တီခဲလၢာ်လၢသုဂ့ၢ်အသိး,ပပာ်ပသးကဖၢလၢလၢစီၤတံတူးအမဲာ်ညါအံၤ,ကဲစ့ၢ်ကီးလၢတၢ်မ့ၢ်တၢ်တီလီၤ. 15ဒီးအဝဲဒၣ်န့ၣ်သ့ၣ်နီၣ်ထီၣ်သုစူၢ်တၢ်ခဲလၢာ်,ဒီးသုတူၢ်လိာ်အီၤအိၣ်ဒီးတၢ်ပျံၤဒီးတၢ်ကနိးကစုာ်သတးဒီး,အဲၣ်သုကွံသုလၢအသူၣ်ကံၢ်အသးလဲဒိၣ်မးလီၤ. 16ယသးခုလၢယနာ်သုလၢတၢ်ခဲလၢာ်အဃိလီၤ.
Copyright information for
KswSKMB