2 Corinthians 9
1အဂ့ၢ်ဒ်အံၤ,တၢ်မၤစၢၤပှၤစီဆှံတဖၣ်အဂ့ၢ်န့ၣ်,ယကွဲးန့ၢ်သုအလီၢ်တအိၣ်ဘၣ်. 2အဂ့ၢ်ဒ်အံၤ,ယသ့ၣ်ညါသုသးအိၣ်ပာ်,ဒီးယပာ်ယသးကဖၢလၢလၢပှၤမၤက့းဒနံဖိတဖၣ်အကျါလၢသုဂ့ၢ်,လၢအဃါယၤအိၣ်ကတဲာ်ကတီၤပာ်လံအသးတနံၣ်လံ,ဒီးသုသးဂဲၤလိာ်တၢ်အံၤ,ကဲလၢတၢ်ထိၣ်ဂဲၤထီၣ်ပှၤအါဂၤအသးလံ. 3ဘၣ်ဆၣ်ဒီးယမၢလီၤပဒီပုၢ်ဝဲၢ်,ဒ်သိးပတၢ်ပာ်ပသးကဖၢလၢလၢသုဂ့ၢ်လၢတၢ်အံၤအဃိ,သုတကဲလၢတၢ်ကလီကလီတဂ့ၤ,ဒ်သိး,ဒ်ပစံးတ့ၢ်အသိး,သုကအိၣ်ကတီၤသုသးလီၤ. 4မ့တမ့ၢ်ဘၣ်ဒီး,ပှၤမၤက့းဒနံဖိမ့ၢ်ဟဲဒီးယၤဒီး,ကထံၣ်န့ၢ်သုတအိၣ်ကတဲာ်ကတီၤဘၣ်သုသး,ဒီးပဝဲဒၣ်(ဒ်သိးပသုတစံးလၢသု),ကမဲာ်ဆှးလၢတၢ်ပာ်ပသးကဖၢလၢအံၤအဃိဘၣ်ဖုးလီၤ. 5မၤသးဒ်န့ၣ်ဒီး,ယဆိကမိၣ်အလီၢ်အိၣ်လၢယကသဆၣ်ထီၣ်ဒီပုၢ်ဝဲၢ်တဖၣ်အခံ,ဒ်သိးကလဲၤပာ်ဆူသုအိၣ်,ဒီးကတဲာ်ကတီၤပာ်သုတၢ်ဆိၣ်ဂ့ၤလၢတၢ်စံးပာ်တ့ၢ်လၢအဂ့ၢ်,ဒ်သိးအကအိၣ်ကတဲာ်ကတီၤအသးဒ်တၢ်ဆိၣ်ဂ့ၤတၢ်အသိး,တမ့ၢ်ဘၣ်ဒ်တၢ်ပံာ်တၢ်ကီဘၣ်အသိးန့ၣ်ဘၣ်. 6ယစံးတၢ်တဘီအံၤ,ပှၤလၢအဖှံတၢ်စှၤန့ၣ်,ကကူးစ့ၢ်ကီးတၢ်စှၤဒီးပှၤလၢအဖှံတၢ်အါန့ၣ်,ကကူးစ့ၢ်ကီးတၢ်အါလီၤ. ▼▼9:6 ကတိၤ.၂၂း၉
7ပှၤတဂၤဒီးတဂၤ,ဒ်အတိာ်ဝဲလၢအသးကံၢ်ပူၤအသိးန့ၣ်,တမ့ၢ်ဘၣ်လၢတၢ်သးအုးဒီးတၢ်မၢဆူၣ်ဘၣ်ဒီး,မ်အဟ့ၣ်တၢ်ကိးဂၤဒဲးတက့ၢ်. 8အဂ့ၢ်ဒ်အံၤ,ယွၤဘၣ်အသးလၢပှၤလၢအဟ့ၣ်ညီတၢ်လီၤ.ဒီးယွၤမၤလၢထီၣ်ပှဲၤထီၣ်ကယဲၢ်တၢ်ဘျုးတၢ်ဖှိၣ်လၢသုပူၤသ့,ဒ်သိးသုတၢ်တမံၤလၢ်လၢ်လၢတၢ်ခဲလၢာ်အပူၤလၢထီၣ်ပှဲၤထီၣ်တထံၣ်ဃီဒီး,သုကအါထီၣ်လၢတၢ်မၤဂ့ၤကိးမံၤဒဲးလီၤ. 9ဒ်တၢ်ကွဲးအသးအသိး, ဖှံလံတၢ်လံ,ဟ့ၣ်လံတၢ်လၢပှၤဖှီၣ်ဖိယာ်ဖိလံ.အတၢ်တီတၢ်လိၤကအိၣ်ဝဲဆိးဝဲလီၤထူလီၤယိာ်လီၤ. ▼▼9:9 စံး.၁၁၂း၉
10ဒီးပှၤလၢအဟ့ၣ်လီၤတၢ်ချံလၢပှၤဖှံတၢ်အဂီၢ်,ဒီးကိၣ်လၢပှၤအီၣ်တၢ်အဂီၢ်,ကမၤပှဲၤထီၣ်သုတၢ်ချံ,ဒီးမၤအါထီၣ်သုတၢ်တီတၢ်လိၤအတၤသၣ်န့ၣ်စ့ၢ်ကီးလီၤ. 11ဒီးသုဘၣ်တၢ်မၤထူးထီၣ်တီၤထီၣ်သုလၢတၢ်ခဲလၢာ်လၢကယဲၢ်တၢ်ဟ့ၣ်ညီန့ၣ်,မၤထီၣ်တၢ်စံးထီၣ်ပတြၢၤယွၤလၢပဝဲဒၣ်အဃိလီၤ. 12အဂ့ၢ်ဒ်အံၤ,တၢ်မၤလၢတၢ်ဟ့ၣ်အံၤ,တမ့ၢ်ဘၣ်ထဲတၢ်မၤစၢၤပှၤစီဆှံလၢအဘၣ်ဖှီၣ်ဘၣ်ယာ်ဧိၤဘၣ်,မ့ၢ်အကဲလၢတၢ်စံးထီၣ်ပတြၢၤယွၤအဘျုးအဖှိၣ်,လၢပှၤအါဂၤအဃိစ့ၢ်ကီးလီၤ. 13အဂ့ၢ်ဒ်အံၤ,လၢတၢ်မၤစၢၤအံၤဒုးနဲၣ်သုစူၢ်သုတၢ်အၢၣ်လီၤအီလီၤဘၣ်ဃးဒီးခရံာ်အတၢ်သးခုကစီၣ်သတးဒီး,အဝဲသ့ၣ်စံးထီၣ်ပတြၢၤယွၤ,လၢသုဟ့ၣ်ညီတၢ်လၢအီၤ,ဒီးလၢပှၤခဲလၢာ်အဃိလီၤ. 14ဒီးမ့ၢ်ယွၤအဘျုးအဖှိၣ်ဖးဒိၣ်အိၣ်လၢသုလိၤဒီး,အဝဲသ့ၣ်ဘါထုကဖၣ်န့ၢ်သုဂီၢ်,ဒီးသးသယုၢ်သုဒိၣ်နီၢ်မးလီၤ. 15မ်ပှၤစံးထီၣ်ပတြၢၤယွၤလၢအတၢ်ဟ့ၣ်လၢပစံးတသ့ဘၣ်တမံၤ,အဃိန့ၣ်တက့ၢ်.
Copyright information for
KswSKMB