‏

လံာ်စီၤယိၤဟၣ်ကွဲးဝဲခံဘ့ၣ်တဘ့ၣ်.

II JOHN.

‏ 2 John

1 ယၤပှၤသးပှၢ်အံၤ,ယစံးဘၣ်နီၢ်ကူၤရံလၢတၢ်ဃုထၢအီၤ,ဒီးအဖိတဖၣ်လၢယအဲၣ်အီၤလၢတၢ်မ့ၢ်တၢ်တီအပူၤ,ဒီးတမ့ၢ်ဘၣ်ထဲယၤဘၣ်,မ့ၢ်စ့ၢ်ကီးကယဲၢ်ပှၤလၢအသ့ၣ်ညါတၢ်မ့ၢ်တၢ်တီ, 2 လၢတၢ်မ့ၢ်တၢ်တီလၢအအိၣ်လၢပပူၤ,ဒီးလၢအကအိၣ်ဒီးပှၤလီၤထူလီၤယိာ်အဃိ, 3 တၢ်ဘျုးတၢ်ဖှိၣ်,တၢ်သူၣ်ကညီၤတၢ်သးကညီၤ,တၢ်ဃူတၢ်ဖိးလၢပၢ်ယွၤ,ဒီးပၢ်အဖိခွါယ့ၣ်ရှူးခရံာ်လၢတၢ်မ့ၢ်တၢ်တီဒီးတၢ်အဲၣ်တၢ်ကွံအပူၤန့ၣ်ကအိၣ်ဒီးပှၤလီၤ.

4 ယထံၣ်န့ၢ်လံနဖိတနီၤလဲၤတၢ်လၢတၢ်မ့ၢ်တၢ်တီအပူၤ,ဒ်ပဒိးန့ၢ်တၢ်မၤလိာ်လၢပၢ်အသိးန့ၣ်ဒီး,ယသးခုဒိၣ်မးလီၤ. 5 ဒီးခဲကနံၣ်အံၤ,နီၢ်ကူၤရံဧၢ,ယဃ့ကညးနၤ,တမ့ၢ်ဘၣ်ဒ်ယကွဲးတၢ်မၤလိာ်အသီအသိးဘၣ်,မ့ၢ်တၢ်လၢပန့ၢ်ဘၣ်လၢအခီၣ်ထံးန့ၣ်,လၢပကအဲၣ်လိာ်ကွံလိာ်ပသးလီၤ. 6 ဒီးတၢ်အံၤမ့ၢ်တၢ်အဲၣ်တၢ်ကွံလၢပကလဲၤတၢ်ဒ်အတၢ်မၤလိာ်တဖၣ်အသိးန့ၣ်လီၤ.တၢ်မၤလိာ်န့ၣ်မ့ၢ်တၢ်အံၤ,လၢပကလဲၤလၢအပူၤ,ဒ်ပနၢ်ဟူလၢအခီၣ်ထံးအသိးန့ၣ်လီၤ. 7 အဂ့ၢ်ဒ်အံၤ,ပှၤလီတၢ်အါဂၤလဲၤထီၣ်ဆူဟီၣ်ခိၣ်ချၢ,လၢအတအၢၣ်လီၤအီလီၤဘၣ်လၢယ့ၣ်ရှူးခရံာ်ဟဲလၢပဖံးပညၣ်အပူၤဘၣ်.အဝဲန့ၣ်မ့ၢ်ပှၤလီတၢ်တဂၤန့ၣ်ဒီးပှၤဂ့ၢ်လိာ်ဘှီလိာ်ခရံာ်န့ၣ်လီၤ.

8 ဒ်သိးသုသုတဒုးဟါမၢ်သုတၢ်မၤတဖၣ်တဂ့ၤ,ဒီးဒ်သိးသုကန့ၢ်ဘၣ်တၢ်ဘျုးတၢ်ဖှိၣ်အလၢအပှဲၤဒီး,ပလီၢ်သုသးတက့ၢ်. 9 ကယဲၢ်ပှၤလၢအမၤကမၣ်တၢ်,ဒီးတအိၣ်တဆိးဘၣ်လၢခရံာ်အတၢ်သိၣ်တၢ်သီအပူၤဘၣ်န့ၣ်,တအိၣ်ဘၣ်ဒီးယွၤဘၣ်.ပှၤလၢအအိၣ်ဝဲဆိးဝဲလၢခရံာ်အတၢ်သိၣ်တၢ်သီအပူၤန့ၣ်,မ့ၢ်အအိၣ်ဒီးပၢ်ဒီးဖိခွါန့ၣ်လီၤ. 10 ပှၤတဂၤဂၤမ့ၢ်ဟဲဆူသုအိၣ်,ဒီးတဟဲစိာ်ဘၣ်တၢ်သိၣ်တၢ်သီအံၤဘၣ်ဒီး,တူၢ်လိာ်အီၤလၢသုဟံၣ်ပူၤတဂ့ၤ.ဒီးစံးတၢ်အမုာ်မ်အအိၣ်ဒီးနၤတက့ၢ်န့ၣ်,တဂ့ၤ. 11 အဂ့ၢ်ဒ်အံၤ,ပှၤလၢအစံး,တၢ်အမုာ်မ်အအိၣ်ဒီးအီၤတက့ၢ်န့ၣ်,မ့ၢ်အဘၣ်ဃးဒီးအဝဲဒၣ်အမၤတၢ်လၢအအၢန့ၣ်လီၤ.

12 မ့ၢ်တၢ်ကွဲးန့ၢ်သုအဂ့ၢ်အကျိၤအိၣ်အါမံၤဒီး,တၢ်တမိၣ်ကွဲးဘၣ်ယသးလၢစးခိဒီးကသံၣ်ထံဘၣ်.မ့မ့ၢ်ယမုၢ်လၢ်လၢယကဟဲဆူသုအိၣ်,ဒီးကတိၤလိာ်ပသးလၢထးခိၣ်သကိးထးခိၣ်,ဒ်သိးပတၢ်သူၣ်ခုသးခုကလၢထီၣ်ပှဲၤထီၣ်လီၤ. 13 နဒီပုၢ်ဝဲၢ်မုၣ်လၢတၢ်ဃုထၢအီၤအဖိတဖၣ်န့ၣ်ကတိၤဒိၣ်နၤလီၤ.