2 Kings 14
1အံၣ်စရ့လးအစီၤပၤယဟိအါဃးအဖိခွါစီၤယိၤအၣ်အနံၣ်ပှဲၤထီၣ်ခံနံၣ်တနံၣ်န့ၣ်ယူဒၤအစီၤပၤယိၤအၣ်အဖိခွါစီၤအမၤစယါကဲထီၣ်စီၤပၤလီၤ. 2တုၤအကဲသီစီၤပၤန့ၣ်အသးပှၢ်ခံဆံယဲၢ်နံၣ်,ဒီးကဲစီၤပၤလၢယရူၤၡလ့ၣ်အပူၤခံဆံခွံနံၣ်,ဒီးအမိၢ်အမံၤမ့ၢ်နီၢ်ယဟိဧဒံၣ်လၢယရူၤၡလ့ၣ်လီၤ. 3ဒီးမၤတၢ်အလိၤလၢယွၤအမဲာ်ဘၣ်ဆၣ်ဒီး,တမၤဘၣ်ဒ်အပၢ်စီၤဒၤဝံးအသိးဘၣ်,မ့ၢ်အမၤဒ်ကယဲၢ်တၢ်လၢအပၢ်စီၤယိၤအၣ်မၤဝဲအသိးန့ၣ်လီၤ. 4ဘၣ်ဆၣ်ဒီးတၢ်တသုးကွံာ်ဘၣ်အလီၢ်ထီၣ်ထီတဖၣ်ဘၣ်.ပှၤဂီၢ်မုၢ်လုၢ်ဒံးတၢ်,ဒီးဆိၣ်ကဲၤဒံးတၢ်နၢမူလၢတၢ်အလီၢ်ထီၣ်ထီတဖၣ်အဖီခိၣ်န့ၣ်လီၤ. 5ဒီးတုၤအဘီမုၢ်အိၣ်ဂၢၢ်ဆိးကျၢၤလၢအစုပူၤဒီး,တၢ်မၤအသးလၢအမၤသံအခ့အပှၤတဖၣ်လၢအမၤသံအပၢ်န့ၣ်လီၤ. 6မ့မ့ၢ်ပှၤမၤသံတၢ်အဖိတဖၣ်န့ၣ်တမၤသံဘၣ်ဝဲဘၣ်,ဒ်တၢ်ကွဲးအသးလၢစီၤမိၤရှ့အတၢ်သိၣ်တၢ်သီအလံာ်ပူၤအသိး,ဖဲယွၤမၤလိာ်တၢ်ဒီးစံးဝဲဒၣ်,ပၢ်တဖၣ်တဘၣ်သံဘၣ်လၢဖိတဖၣ်အဃိဘၣ်,ဒီးဖိတဖၣ်တဘၣ်သံဘၣ်လၢပၢ်တဖၣ်အဃိဘၣ်.မ့မ့ၢ်ပှၤကဘၣ်သံစုာ်စုာ်လၢအတၢ်ဒဲးဘးဒၣ်ဝဲအဃိန့ၣ်လီၤ. 7ဒီးမၤသံပှၤအဒိၣ်ဖိတကလးလၢကစၢၢ်ကဆူးအံသၣ်အပူၤ,ဒီးလၢဒုးသုးသတးဒီး,မၤန့ၢ်စ့လၤ,ဒီးယုၢ်အမံၤလၢယိးကသ့ၣ်လးတုၤမုၢ်မဆါတနံၤအံၤလီၤ. 8တုၤနုၤတစုစီၤအမၤစယါမၢလီၤကလူးတဖၣ်ဆူအံၣ်စရ့လးအစီၤပၤယ့ၤဟူအဖိခွါစီၤယဟိအါဃးအဖိခွါစီၤယိၤအၣ်,ဒီးစံးဝဲဒၣ်,ဟဲ,ကွၢ်လိာ်မဲာ်သကိးတက့ၢ်. 9ဒီးအံၣ်စရ့လးအစီၤပၤယိၤအၣ်မၢလီၤတၢ်ဆူယူဒၤအစီၤပၤအမၤစယါဒီးစံးဝဲဒၣ်,တၤဆှုၣ်လၢလဘၤနိၣ်အလိၤ,မၢလီၤတၢ်ဆူသ့ၣ်ဆှိအ့ရ့းလၢလဘၤနိၣ်အလိၤ,ဒီးစံးဝဲဒၣ်,ဟ့ၣ်လီၤနဖိမုၣ်လၢယဖိခွါအမါတက့ၢ်.ဒီးဆၣ်ဖိကီၢ်ဖိအမံၤလၢလဘၤနိၣ်အလိၤတဒုလဲၤပူၤတၢ်,ဒီးယီၢ်တံၢ်လီၤတၤဆှုၣ်န့ၣ်လီၤ. 10နကျီကွံာ်လံအဒိၣ်သပှၢ်တၢၢ်လံ,ဒီးနသးပာ်ထီၣ်ထီနၤလီၤ.ပာ်ကဖၢလၢနသးဒီးအိၣ်လၢနဟံၣ်တက့ၢ်.နကမၤတၢ်လၢနတၢ်အၢအဂီၢ်,ဒီးလီၤဃံၤနဝဲဒၣ်,ဒီးယူဒၤအိၣ်ဒီးနၤန့ၣ်မ့ၢ်အဘၣ်မနုၤလဲၣ်. 11ဒီးစီၤအမၤစယါတကနၣ်ဘၣ်တၢ်ဘၣ်,ဒီးအံၣ်စရ့လးအစီၤပၤယိၤအၣ်လဲၤထီၣ်,ဒီးအဝဲဒၣ်,ဒီးယူဒၤအစီၤပၤအမၤစယါကွၢ်လိာ်အမဲာ်လၢဘ့ၤသရှ့မ့ၣ်ဘၣ်ဃးဒီးယူဒၤလီၤ. 12ဒီးယူဒၤဃၣ်ဝဲလၢအံၣ်စရ့လးအမဲာ်ညါ,ဒီးပှၤဃ့ၢ်ကွံာ်ဝဲတဂၤဆူအဒဲဒၣ်ဝဲ,တဂၤဆူအဒဲဒၣ်ဝဲန့ၣ်လီၤ. 13ဒီးအံၣ်စရ့လးအစီၤပၤယိၤအၣ်မၤန့ၢ်ယူဒၤအစီၤပၤစီၤအဃၤစယၤအဖိခွါစီၤယိၤအၣ်အဖိခွါ,စီၤအမၤစယါလၢဘ့ၤသရှ့မ့ၣ်အပူၤ,ဒီးဟဲဝဲဆူယရူၤၡလ့ၣ်,ဒီးမၤလီၤပှီၢ်ယရူၤၡလ့ၣ်အခိၣ်ဒူအပျၢ်လွံၢ်ကယၤ,လၢပဲတရီအ့ဖရဲၣ်ပၢၢ်လၢတၢ်သနၢၣ်အပဲတရီလီၤ. 14ဒီးမၤန့ၢ်ထူဧိၤလွဲဧိၤ,ဒီးကျိၣ်ဧိၤစ့ဧိၤခဲလၢာ်,ဒီးတၢ်အဃၢၤအဃိၢ်လၢအထံၣ်န့ၢ်ဝဲလၢယွၤအဟံၣ်ပူၤခဲလၢာ်,ဒီးတၢ်လုၢ်ဒိၣ်ပှ့ၤဒိၣ်လၢစီၤပၤအဟံၣ်ပူၤ,ဒီးပှၤအုၣ်ကီၤအသးတဖၣ်,ဒီးက့ၤကဒါက့ၤဝဲဆူၡၤမရံန့ၣ်လီၤ. 15ဒီးတၢ်အိၣ်လီၤတဲာ်ဘၣ်ဃးဒီးစီၤယိၤအၣ်,ဒီးကယဲၢ်တၢ်လၢအမၤဝဲဒီးအစိအကမီၤ,ဒီးဒုးသုးဒီးယူဒၤအစီၤပၤအမၤစယါအဂ့ၢ်အကျိၤန့ၣ်ကွဲးအသးလၢအံၣ်စရ့လးအစီၤပၤအလံာ်ကွဲးနီၣ်တၢ်အပူၤ,တမ့ၢ်ဘၣ်ဧါ. 16ဒီးစီၤယိၤအၣ်မံဝဲဒီးအပၢ်တဖၣ်,ဒီးပှၤခူၣ်လီၤကွံာ်အီၤလၢၡၤမရံအပူၤအိၣ်ဒီးအံၣ်စရ့လးအစီၤပၤတဖၣ်,ဒီးအဖိခွါစီၤယၤရၤဘၣ်ကဲထီၣ်စီၤပၤလၢအလီၢ်န့ၣ်လီၤ. 17ဒီးယူဒၤအစီၤပၤစီၤယိၤအၣ်အဖိခွါစီၤအမၤစယါမူဒံးဝဲလၢအံၣ်စရ့လးအစီၤပၤယဟိအါဃးအဖိခွါစီၤယိၤအၣ်သံဝဲအလီၢ်ခံန့ၣ်တဆံယဲၢ်နံၣ်လီၤ. 18ဒီးတၢ်အိၣ်လီၤတဲာ်ဘၣ်ဃးဒီးစီၤအမၤစယါကွဲးအသးလၢယူဒၤအစီၤပၤအလံာ်ကွဲးနီၣ်တၢ်အပူၤ,တမ့ၢ်ဘၣ်ဧါ. 19ဒီးပှၤကူၣ်တၢ်ထီဒါအီၤလၢယရူၤၡလ့ၣ်အပူၤ,ဒီးဃ့ၢ်ဝဲဆူလၤကံၣ်,ဒီးပှၤမၢလီၤတၢ်လူၤအီၤ,ဒီးမၤသံအီၤဖဲန့ၣ်လီၤ. 20ဒီးပှၤဟဲစိာ်အီၤလၢကသ့ၣ်အလိၤ,ဒီးခူၣ်လီၤကွံာ်အီၤလၢယရူၤၡလ့ၣ်အပူၤအိၣ်ဒီးအပၢ်တဖၣ်လၢစီၤဒၤဝံးအဝ့ၢ်ပူၤလီၤ. 21ဒီးယူဒၤအပှၤဂီၢ်မုၢ်ခဲလၢာ်ဟံးန့ၢ်စီၤဧစၤရယၤလၢအသးပှၢ်တဆံဃုနံၣ်တဂၤ,ဒီးပာ်အီၤလၢစီၤပၤလၢအပၢ်စီၤအမၤစယါအလီၢ်န့ၣ်လီၤ. 22အဝဲဒၣ်တ့ထီၣ်က့ၤအ့လး,ဒီးမၤန့ၢ်က့ၤလၢယူဒၤအဂီၢ်,ဒီးလၢအလီၢ်ခံန့ၣ်စီၤပၤမံဒီးအပၢ်တဖၣ်လီၤ. 23ယူဒၤအစီၤပၤယိၤအၣ်အဖိခွါစီၤအမၤစယါအနံၣ်ပှဲၤထီၣ်တဆံယဲၢ်နံၣ်တနံၣ်န့ၣ်အံၣ်စရ့လးအစီၤပၤစီၤယိၤအၣ်အဖိခွါစီၤယၤရၤဘၣ်ကဲသီစီၤပၤဒီးပၢတၢ်လၢၡၤမရံလွံၢ်ဆံတနံၣ်လီၤ. 24ဒီးမၤတၢ်အၢလၢယွၤအမဲာ်,ဒီးတဟးသဒၣ်ဘၣ်စီၤနဘိးအဖိခွါစီၤယၤရၤဘၣ်လၢအဒုးမၤအံၣ်စရ့လးလၢတၢ်ဒဲးဘးတဂၤအတၢ်ဒဲးဘးဘၣ်. 25ဒီးမၤန့ၢ်က့ၤအံၣ်စရ့လးအကီၢ်ဃၢၤလၢတၢ်လဲၤနုာ်လၢဃမါသးပၢၢ်လၢတၢ်ပျီပူၤအပီၣ်လဲၣ်,ဒ်ယွၤအံၣ်စရ့လးအကစၢ်အကလုၢ်လၢအကတိၤဝဲလၢအခ့အပှၤ,ပှၤကၤသးဃ့ဖ့ၢ်ဖိစီၤအမံးတဲၤအဖိခွါဝံယိၤနါအစုအသိးန့ၣ်လီၤ. 26အဂ့ၢ်ဒ်အံၤ,ယွၤထံၣ်အံၣ်စရ့လးအတၢ်နးတၢ်ဖှီၣ်လၢအနးမးလီၤ.အဂ့ၢ်ဒ်အံၤ,တၢ်တဘၣ်ကးတံာ်ဃာ်ဘၣ်အသးဘၣ်.ဒီးတၢ်တအိၣ်လီၤတဲာ်သဘျ့ဘၣ်.ဒီးတၢ်မၤစၢၤအံၣ်စရ့လးတအိၣ်ဘၣ်. 27ဒီးယွၤစံးလၢအကတြူာ်ကွံာ်အံၣ်စရ့လးအမံၤလၢမူခိၣ်အဖီလာ်တမ့ၢ်ဘၣ်.မ့ၢ်အအုၣ်က့ၤခီၣ်က့ၤအီၤလၢစီၤယိၤအၣ်အဖိခွါစီၤယၤရၤဘၣ်အစုန့ၣ်လီၤ. 28ဒီးတၢ်အိၣ်လီၤတဲာ်ဘၣ်ဃးဒီးစီၤယၤရၤဘၣ်,ဒီးကယဲၢ်တၢ်လၢအမၤဝဲ,ဒီးအစိအကမီၤ,ဒီးအဒုးတၢ်,ဒီးမၤန့ၢ်က့ၤဒၤမ့ၤစ့း,ဒီးဃမါသးဘၣ်ဃးဒီးယူဒၤလၢအံၣ်စရ့လးအဂီၢ်အဂ့ၢ်အကျိၤန့ၣ်ကွဲးအသးလၢအံၣ်စရ့လးအစီၤပၤအလံာ်ကွဲးနီၣ်တၢ်အပူၤ,တမ့ၢ်ဘၣ်ဧါ. 29ဒီးစီၤယၤရၤဘၣ်မံဝဲဒီးအပၢ်တဖၣ်,အံၣ်စရ့လးအစီၤပၤတဖၣ်,ဒီးအဖိခွါစီၤစကၤရယၤကဲထီၣ်စီၤပၤလၢအလီၢ်န့ၣ်လီၤ.
Copyright information for
KswSKMB