2Ki 22 | KswSKMB | STEP | လၢစီၤယိၤၡံယၤကဲသီစီၤပၤန့ၣ်အသးပှၢ်ဃိးနံၣ်ဒီးကဲစီၤပၤလၢယရူၤၡလ့ၣ်အပူၤသၢဆံတနံၣ်လီၤ.ဒီးအမိၢ်အမံၤမ့ၢ်နီၢ်ယဒံဒၤ,စီၤဧဒါယၤအဖိမုၣ်လၢဘိးစကးလီၤ.

‏ 2 Kings 22

1 လၢစီၤယိၤၡံယၤကဲသီစီၤပၤန့ၣ်အသးပှၢ်ဃိးနံၣ်ဒီးကဲစီၤပၤလၢယရူၤၡလ့ၣ်အပူၤသၢဆံတနံၣ်လီၤ.ဒီးအမိၢ်အမံၤမ့ၢ်နီၢ်ယဒံဒၤ,စီၤဧဒါယၤအဖိမုၣ်လၢဘိးစကးလီၤ.

2 ဒီးမၤတၢ်အလိၤလၢယွၤအမဲာ်,ဒီးပိာ်အပၢ်စီၤဒၤဝံးအကျဲဒီဘိညါ,ဒီးဆူစုထွဲမ့ၢ်ဂ့ၤ,ဆူစုစ့ၣ်မ့ၢ်ဂ့ၤ,တဃၣ်ကွံာ်အသးဘၣ်.

3 ဒီးလၢစီၤယိၤၡံယၤအနံၣ်ပှဲၤထီၣ်တဆံဃိးနံၣ်တနံၣ်န့ၣ်တၢ်မၤအသးလၢစီၤပၤမၢလီၤပှၤကွဲးလံာ်စီၤမရှူလၣ်အဖိခွါ,စီၤအစါလံယၤအဖိခွါ,စီၤၡၤဖၣ်ဆူယွၤအဟံၣ်ဒီးစံးဝဲဒၣ်, 4 လဲၤထီၣ်ဆူပှၤလုၢ်တၢ်အခိၣ်စီၤဃံးလကံယၤအအိၣ်ဒ်သိးအကဂံၢ်စ့လၢပှၤဟဲစိာ်ဝဲဆူယွၤအဟံၣ်ပူၤ,လၢပှၤပၢၤတြဲၤတဖၣ်ထၢဖှိၣ်လၢပှၤဂီၢ်မုၢ်န့ၣ်တက့ၢ်. 5 ဒီးမ်အဟ့ၣ်လီၤအီၤလၢပှၤမၤတၢ်မၤလၢအကွၢ်ယွၤအဟံၣ်တဖၣ်အစုပူၤ,ဒီးမ်အဟ့ၣ်က့ၤပှၤလၢအမၤတၢ်မၤလၢယွၤအဟံၣ်ပူၤဒ်သိးအကမၤက့ၤတၢ်ဘၢၣ်ဖျိလၢဟံၣ်ပူၤန့ၣ်, 6 လၢပှၤမၤတၢ်လၢသ့ၣ်,ဒီးလၢပှၤသူၣ်တၢ်ဖိ,ဒီးလၢပှၤမၤတၢ်လၢလၢၢ်,ဒီးဒ်သိးအကပှ့ၤသ့ၣ်,ဒီးလၢၢ်စိးပျၤအသးလၢတၢ်မၤက့ၤဟံၣ်အဂီၢ်န့ၣ်တက့ၢ်.

7 ဘၣ်ဆၣ်ဒီး,ပှၤတဂံၢ်ဘၣ်ဒီးအီၤလၢစ့လၢပှၤဟ့ၣ်လီၤလၢအစုပူၤဘၣ်.အဂ့ၢ်ဒ်အံၤ,မၤဝဲလၢအကလုၢ်တီလီၤ.

8 ဒီးပှၤလုၢ်တၢ်အခိၣ်စီၤဃံးလကံယၤစံးဘၣ်ပှၤကွဲးလံာ်စီၤၡၤဖၣ်,ယထံၣ်န့ၢ်လံာ်တၢ်သိၣ်တၢ်သီလၢယွၤအဟံၣ်ပူၤလီၤ.ဒီးစီၤဃံးလကံယၤဟ့ၣ်လံာ်န့ၣ်လၢစီၤၡၤဖၣ်,ဒီးဖးဝဲလီၤ.

9 ဒီးပှၤကွဲးလံာ်စီၤၡၤဖၣ်ဟဲက့ၤဆူစီၤပၤအအိၣ်,ဒီးဟဲစိာ်တၢ်ကတိၤဆူစီၤပၤ,ဒီးစံးဝဲဒၣ်,နခ့နပှၤတဖၣ်န့ၣ်ထၢဖှိၣ်လံစ့လၢအထံၣ်န့ၢ်ဘၣ်လၢဟံၣ်ပူၤ,ဒီးဟ့ၣ်လီၤလံလၢပှၤလၢအမၤတၢ်မၤ,လၢအကွၢ်က့ၤယွၤအဟံၣ်အစုပူၤလံ.

10 ဒီးပှၤကွဲးလံာ်စီၤၡၤဖၣ်ဒုးနဲၣ်တၢ်လၢစီၤပၤ,ဒီးစံးဝဲဒၣ်,ပှၤလုၢ်တၢ်အခိၣ်စီၤဃံးလကံယၤန့ၣ်ဟ့ၣ်လီၤယၤလၢလံာ်တကတြူၢ်လီၤ.ဒီးစီၤၡၤဖၣ်ဖးဝဲလၢစီၤပၤအမဲာ်ညါလီၤ.

11 ဒီးတုၤစီၤပၤနၢ်ဟူလံာ်တၢ်သိၣ်တၢ်သီအကလုၢ်ကထါဒီး,တၢ်မၤအသးလၢအဖှီအဆ့လီၤ.

12 ဒီးစီၤပၤမၤလိာ်ပှၤလုၢ်တၢ်အဒိၣ်စီၤဃံးလကံယၤ,ဒီးစီၤၡၤဖၣ်အဖိခွါစီၤအဃံကၣ်,ဒီးစီၤမံၤကါယၤအဖိခွါစီၤဧးကဘိၢ်,ဒီးပှၤကွဲးလံာ်စီၤၡၤဖၣ်,ဒီးစီၤပၤအခ့အပှၤစီၤဧစါယၤ,ဒီးစံးဝဲဒၣ်, 13 လဲၤသံကွၢ်ယွၤလၢယဂီၢ်,ဒီးလၢပှၤဂီၢ်မုၢ်အဂီၢ်,ဒီးလၢယူဒၤခဲလၢာ်အဂီၢ်လၢလံာ်တကတြူၢ်လၢပထံၣ်န့ၢ်အီၤအကလုၢ်ကထါအဂ့ၢ်အကျိၤတက့ၢ်.အဂ့ၢ်ဒ်အံၤ,ယွၤအတၢ်သးထီၣ်လၢအကဲၤထီၣ်ဘၣ်ပှၤမ့ၢ်အဒိၣ်မးလီၤ.အဂ့ၢ်ဒ်အံၤ,ပပၢ်တဖၣ်တဒိကနၣ်ဘၣ်လံာ်အံၤအကလုၢ်ကထါ,ဒ်သိးအကမၤဝဲဒ်ကယဲၢ်တၢ်ကွဲးအသးဘၣ်ဃးဒီးပှၤအသိးန့ၣ်ဘၣ်.

14 ဒီးပှၤလုၢ်တၢ်အခိၣ်စီၤဃံးလကံယၤ,ဒီးစီၤအဃံကၣ်,ဒီးစီၤဧးကဘိၢ်,ဒီးစီၤၡၤဖၣ်,ဒီးစီၤဧစါယၤသ့ၣ်တဖၣ်န့ၣ်လဲၤဝဲဆူပှၤပၢၤတၢ်ကူတၢ်သိးစီၤဃၢ်ဃၣ်အဖိခွါစီၤတံးကဝၤအဖိခွါစီၤၡၤလူၣ်အမါဝံပိာ်မုၣ်နီၢ်ဃူးလဒါတဂၤအအိၣ်,ဒီးကတိၤတၢ်ဒီးအီၤလီၤ.အဝဲဒၣ်အိၣ်ဝဲလၢယရူၤၡလ့ၣ်ခံတီၤတတီၤန့ၣ်လီၤ.

15 ဒီးပိာ်မုၣ်န့ၣ်စံးဘၣ်အီၤ,ယွၤအံၣ်စရ့လးအကစၢ်စံးဒ်အံၤ,စံးဘၣ်တဲဘၣ်ပှၤလၢအမၢလီၤသုဆူယအိၣ်, 16 ယွၤစံးဒ်အံၤ,ကွၢ်ကွၢ်,ယကဒုးဟဲတၢ်အၢဘၣ်တၢ်အလီၢ်အံၤဒီးလၢပှၤလၢအအိၣ်ဝဲဆိးဝဲလၢအပူၤအလိၤ,ကယဲၢ်လံာ်အကလုၢ်ကထါလၢယူဒၤအစီၤပၤခဲလၢာ်လီၤ. 17 အဂ့ၢ်ဒ်အံၤ,လဲၤသဒၣ်ယၤ,ဒီးဆိၣ်ကဲၤတၢ်နၢမူလၢကစၢ်အဂၤတဖၣ်အဂီၢ်,ဒ်သိးအကဒုးသးထီၣ်ယၤလၢအစုအတၢ်မၤခဲလၢာ်အဃိလီၤ.ဒီးယသးကကဲၤထီၣ်ဘၣ်တၢ်အလီၢ်အံၤ,ဒီးတစၢ်လီၤဘၣ်. 18 မ့မ့ၢ်ယူဒၤအစီၤပၤလၢအမၢသုဟဲသံကွၢ်ယွၤန့ၣ်,သုဘၣ်စံးဘၣ်အီၤ,ယွၤအံၣ်စရ့လးအစီၤပၤစံးဒ်အံၤ,တၢ်ကတိၤလၢနနၢ်ဟူန့ၣ်, 19 မ့ၢ်နသးစူၤ,ဒီးတုၤနနၢ်ဟူတၢ်ကတိၤထီဒါတၢ်အလီၢ်အံၤ,ဒီးထီဒါပှၤလၢအအိၣ်အဆိးလၢအပူၤလၢအကကဲထီၣ်တၢ်အိၣ်သယုၢ်,ဒီးတၢ်ဆိၣ်အၢအလီၢ်န့ၣ်ဒီး,နဆီၣ်လီၤနသးဒီးဖှီနဆ့,ဒီးဟီၣ်လၢယမဲာ်ညါဒီး,ယနၢ်ဟူစ့ၢ်ကီးလီၤ,ယွၤစံးဝဲဒၣ်, 20 မၤသးဒ်န့ၣ်ဒီးကွၢ်ကွၢ်,ယကပာ်ဖှိၣ်နၤဒီးနပၢ်တဖၣ်,ဒီးတၢ်ကပာ်ဖှိၣ်နၤလၢနတၢ်သွၣ်ခိၣ်ပူၤမုာ်မုာ်,ဒီးနမဲာ်တထံၣ်ဘၣ်တၢ်အၢခဲလၢာ်လၢယကဒုးဟဲဘၣ်တၢ်အလီၢ်အံၤဘၣ်.ဒီးအဝဲသ့ၣ်တဖၣ်န့ၣ်ဟဲစိာ်န့ၢ်စီၤပၤလၢတၢ်ကတိၤန့ၣ်လီၤ.