2 Kings 24
1လၢအဝဲဒၣ်အမုၢ်နံၤတဖၣ်န့ၣ်ဘၤဘူၤလိၣ်အစီၤပၤနဘူၤကးန့စၢ်ဟဲထီၣ်,ဒီးစီၤယဟိၤယါကံၣ်ကဲထီၣ်အခ့အပှၤသၢနံၣ်,ဒီးဃၣ်အသးဒီးပူထီၣ်ဝဲလီၤ. 2ဒီးယွၤမၢအလဲၤထီဒါအီၤလၢပှၤက့စ့းဖိအဖုတဖၣ်,ဒီးပှၤစူၤရံဖိအဖုတဖၣ်,ဒီးပှၤမိၤအးဖိအဖုတဖၣ်,ဒီးပှၤဧၣ်မိၣ်ဖိအဖုတဖၣ်,ဒီးမၢလီၤအီၤထီဒါယူဒၤဒ်သိးအကမၤဟးဂီၤအီၤ,ဒ်ယွၤအကလုၢ်ကထါအသိးလၢအကတိၤဝဲလၢအခ့အပှၤဝံတဖၣ်အစုပူၤန့ၣ်လီၤ. 3မ့ၢ်မးတၢ်န့ၣ်ဟဲဘၣ်ယူဒၤလၢယွၤအတၢ်မၤလိာ်,ဒ်သိးအကသုးကွံာ်အီၤလၢအမဲာ်ညါလၢစီၤမနၤရှ့ၤအတၢ်ဒဲးဘးအဃိဒ်ကယဲၢ်တၢ်လၢအမၤဝဲအသိးန့ၣ်, 4ဒီးလၢတၢ်သွံၣ်လၢအတၢ်ဒဲးဘးတအိၣ်ဘၣ်လၢအလူလီၤဝဲအဃိန့ၣ်လီၤ.အဂ့ၢ်ဒ်အံၤ,မၤပှဲၤယရူၤၡလ့ၣ်ဒီးတၢ်သွံၣ်လၢတၢ်ဒဲးဘးတအိၣ်ဘၣ်န့ၣ်ဒီးယွၤတပျၢ်ဘၣ်လီၤ. 5ဒီးတၢ်အိၣ်လီၤတဲာ်ဘၣ်ဃးဒီးစီၤယဟိၤယါကံၣ်,ဒီးကယဲၢ်တၢ်လၢအမၤဝဲခဲလၢာ်န့ၣ်ကွဲးအသးလၢယူဒၤအစီၤပၤအလံာ်ကွဲးနီၣ်တၢ်အပူၤ,တမ့ၢ်ဘၣ်ဧါ. 6ဒီးစီၤယဟိၤယါကံၣ်မံဝဲဒီးအပၢ်တဖၣ်,ဒီးအဖိခွါစီၤယဟိၤယါခံၣ်ကဲထီၣ်စီၤပၤလၢအလီၢ်န့ၣ်လီၤ. 7ဒီးအဲၤကူပတူးအစီၤပၤတဟဲထီၣ်လၢၤဘၣ်လၢအကီၢ်ပူၤဘၣ်.အဂ့ၢ်ဒ်အံၤ,ဘၤဘူၤလိၣ်အစီၤပၤမၤန့ၢ်တၢ်ဘၣ်ဃးဒီးအဲၤကူပတူးခဲလၢာ်လၢအဲၤကူပတူးအထံမိၢ်ပှၢ်ပၢၢ်လၢထံမိၢ်ပှၢ်ဖရၤသးလီၤ. 8လၢစီၤယဟိၤယါခံၣ်ကဲသီစီၤပၤန့ၣ်အသးပှၢ်တဆံဃိးနံၣ်,ဒီးကဲစီၤပၤသၢလါလၢယရူၤၡလ့ၣ်အပူၤ,ဒီးအမိၢ်အမံၤမ့ၢ်နီၢ်နဃူၡတၤ,စီၤအ့လနၤသၣ်လၢယရူၤၡလ့ၣ်အဖိမုၣ်လီၤ. 9ဒီးမၤတၢ်အၢလၢယွၤအမဲာ်ဒ်ကယဲၢ်တၢ်လၢအပၢ်မၤဝဲအသိးန့ၣ်လီၤ. 10အကတီၢ်ဖဲန့ၣ်ဘၤဘူၤလိၣ်အစီၤပၤနဘူၤကးန့စၢ်အခ့အပှၤဟဲထီဒါယရူၤၡလ့ၣ်,ဒီးဝ့ၢ်ဘၣ်တၢ်ဝီၤဃာ်အီၤလီၤ. 11ဒီးဘၤဘူၤလိၣ်အစီၤပၤနဘူၤကးန့စၢ်ဟဲထီဒါဝ့ၢ်,ဒီးအခ့အပှၤကဝီၤဃာ်အီၤလီၤ. 12ဒီးယူဒၤအစီၤပၤယဟိၤယါခံၣ်ဟဲထီၣ်ဆူဘၤဘူၤလိၣ်အစီၤပၤအအိၣ်,အဝဲဒၣ်,ဒီးအမိၢ်,ဒီးအခ့အပှၤတဖၣ်,ဒီးအပဒိၣ်ဖးဒိၣ်တဖၣ်,ဒီးအပှၤဒ့ဒံၣ်တဖၣ်ဒီးလၢအကဲစီၤပၤပှဲၤထီၣ်ဃိးနံၣ်တနံၣ်န့ၣ်ဘၤဘူၤလိၣ်အစီၤပၤမၤန့ၢ်အီၤလီၤ. 13ဒီးစိာ်ထီၣ်ကွံာ်ဖဲန့ၣ်လၢကယဲၢ်တၢ်လုၢ်ဒိၣ်ပှ့ၤဒိၣ်,လၢယွၤအဟံၣ်ပူၤ,ဒီးတၢ်လုၢ်ဒိၣ်ပှ့ၤဒိၣ်လၢစီၤပၤအဟံၣ်ပူၤ,ဒီးဒီၣ်တဲာ်ကွံာ်ကယဲၢ်တၢ်အဃၢၤအဃိၢ်ထူလၢအံၣ်စရ့လးအစီၤပၤၡလိၤမိၤတ့ဝဲလၢယွၤအနူၢ်ပူၤ,ဒ်ယွၤစံးဝဲအသိးန့ၣ်လီၤ. 14ဒီးစိာ်ထီၣ်ကွံာ်မၢကဲကုၢ်ယရူၤၡလ့ၣ်ဖိခဲလၢာ်ဒီးပဒိၣ်ဖးဒိၣ်ခဲလၢာ်,ဒီးပှၤအဆူၣ်ပှၤသုးဖိခဲလၢာ်,ပှၤကဲကုၢ်တကလး,ဒီးကယဲၢ်ပှၤမၤတၢ်သ့,ဒီးပှၤပိာ်တၢ်ခဲလၢာ်,ဒီးလၢကီၢ်အပှၤဂီၢ်မုၢ်အကျါန့ၣ်အိၣ်လီၤတဲာ်ထဲပှၤဖှီၣ်ဖိယာ်ဖိဧိၤလီၤ. 15ဒီးစိာ်ထီၣ်ကွံာ်စီၤယဟိၤယါခံၣ်ဆူဘၤဘူၤလိၣ်,ဒီးစီၤပၤအမိၢ်,ဒီးစီၤပၤအမါတဖၣ်,ဒီးပှၤဒ့ဒံၣ်တဖၣ်,ဒီးထံဧိၤကီၢ်ဧိၤအပှၤဆူၣ်ဖိတဖၣ်လီၤ.စိာ်ထီၣ်မၢကဲကုၢ်လၢယရူၤၡလ့ၣ်ပၢၢ်လၢဘၤဘူၤလိၣ်လီၤ. 16ဒီးကယဲၢ်ပှၤအဆူၣ်ဖိနွံကထိ,ဒီးပှၤမၤတၢ်သ့,ဒီးပှၤပိာ်တၢ်ဖိတကထိ,ကယဲၢ်ပှၤလၢအဆူၣ်,ဒီးပှၤသုးဖိခဲလၢာ်န့ၣ်ဘၤဘူၤလိၣ်အစီၤပၤဟဲစိာ်မၢကဲကုၢ်ဆူဘၤဘူၤလိၣ်န့ၣ်လီၤ. 17ဒီးဘၤဘူၤလိၣ်အစီၤပၤပာ်အပၢ်အဒီပုၢ်ဝဲၢ်စီၤမးတးနယၤလၢစီၤပၤအလီၢ်,ဒီးယုၢ်ဝဲအမံၤသီလၢစီၤစံးဒကံယၤလီၤ. 18လၢစီၤစံးဒကံယၤကဲထီၣ်စီၤပၤန့ၣ်အသးပှၢ်ခံဆံတနံၣ်,ဒီးကဲစီၤပၤလၢယရူၤၡလ့ၣ်အပူၤတဆံတနံၣ်,ဒီးအမိၢ်အမံၤမ့ၢ်နီၢ်ဃမူတလး,စီၤယံးရမံယၤလၢလံးဘနၤအဖိမုၣ်လီၤ. 19ဒီးမၤတၢ်အၢလၢယွၤအမဲာ်,ဒ်ကယဲၢ်တၢ်လၢစီၤပၤယဟိယါကံၣ်မၤဝဲအသိးန့ၣ်လီၤ. 20အဂ့ၢ်ဒ်အံၤ,လၢယွၤအသးထီၣ်အဃိန့ၣ်တၢ်မၤအသးလၢယရူၤၡလ့ၣ်,ဒီးလၢယူဒၤအပူၤ,တုၤအဟီထီၣ်ကွံာ်အီၤလၢအမဲာ်ညါလီၤ.ဒီးစီၤစံးဒကံယၤပူထီၣ်ဘၤဘူၤလိၣ်အစီၤပၤန့ၣ်လီၤ.
Copyright information for
KswSKMB