‏ 2 Kings 4

1ဒီးပိာ်မုၣ်တဂၤလၢဝံဖိခွါတဖၣ်အမါအကျါန့ၣ်ကိးထီၣ်ဆူစီၤအလံၤၡါ,ဒီးစံးဝဲဒၣ်,နခ့နပှၤယဝၤတဂၤသံလံ.ဒီးနသ့ၣ်ညါလၢနခ့နပှၤပျံၤယွၤလီၤ.ဒီးအကမၢ်အကစၢ်ဟဲဝဲဒ်သိးအကဟံးန့ၢ်မၢကဲကုၢ်ယဖိခွါခံဂၤလီၤ.

2ဒီးစီၤအလံၤၡါစံးဘၣ်အီၤ,ယဘၣ်မၤတၢ်လၢနဂီၢ်လၢမနုၤတမံၤလဲၣ်,စံးဘၣ်ယၤတက့ၢ်.တၢ်အိၣ်လၢနဟံၣ်ပူၤမနုၤတမံၤလဲၣ်,စံးဘၣ်ယၤတက့ၢ်.ဒီးစံးဝဲဒၣ်,တၢ်တအိၣ်ဘၣ်ဒီးနကုၢ်ပိာ်မုၣ်လၢဟံၣ်ပူၤနီတမံၤဘၣ်.အိၣ်ထဲသိကိတဖျၢၣ်ဧိၤလီၤ.

3ဒီးစံးဘၣ်အီၤ,လဲၤဃ့တၢ်ပူၤတၢ်လီၢ်တဖၣ်လၢပှၤလၢနဃၢၤအိၣ်လၢခိခဲလၢာ်,တၢ်ပူၤတၢ်လီၢ်အိၣ်ကလီတဖၣ်တက့ၢ်.မၤန့ၢ်စှၤဖျၢၣ်တဂ့ၤ. 4ဒီးဟဲနုာ်,ဒီးကးတံာ်ဃာ်တြဲၤလၢနခံ,ဒီးလၢနဖိခွါတဖၣ်အခံ,ဒီးနဘၣ်လူလၢကယဲၢ်တၢ်ပူၤတၢ်လီၢ်တဖၣ်န့ၣ်အပူၤခဲလၢာ်,ဒီးတၢ်လၢအပှဲၤဝဲန့ၣ်နဘၣ်ပာ်တပူၤဒၣ်လီၤ.

5ဒီးဟးထီၣ်လၢအအိၣ်,ဒီးကးတံာ်ဃာ်တြဲၤလၢအခံ,ဒီးလၢအဖိခွါအခံလီၤ.အဝဲသ့ၣ်တဖၣ်န့ၣ်ဟဲစိာ်တၢ်ဆူအအိၣ်,ဒီးအဝဲဒၣ်လူလီၤတၢ်လီၤ.

6ဒီးတုၤတၢ်ပူၤတၢ်လီၢ်ပှဲၤဝဲဒီး,တၢ်မၤအသးလၢအစံးဘၣ်အဖိခွါ,ဟဲစိာ်ဒံးတၢ်ပူၤတၢ်လီၢ်တဖျၢၣ်တက့ၢ်.ဒီးစံးဘၣ်အီၤ,တၢ်ပူၤတၢ်လီၢ်တအိၣ်လၢၤဘၣ်,ဒီးသိအိၣ်ကတီၢ်လီၤ.

7ဒီးဟဲဝဲ,ဒီးစံးဘၣ်ယွၤအပှၤကညီ,ဒီးအဝဲဒၣ်စံးဘၣ်အီၤ,လဲၤဆါကွံာ်သိဒီးလိးတူာ်ကွံာ်နကမၢ်,ဒီးမူနဲဒီးနဖိခွါတဖၣ်န့ၣ်လၢတၢ်အိၣ်လီၤတဲာ်တဖၣ်န့ၣ်တက့ၢ်.

8ဒီးတၢ်မၤအသးလၢအန့ၣ်တနံၤလၢစီၤအလံၤၡါလဲၤပူၤတၢ်ဆူရှူန့ၣ်,ဒီးပိာ်မုၣ်ကဲဒိၣ်အိၣ်ဝဲဖဲန့ၣ်တဂၤ,ဒီးကညးအီၤလၢအကအီၣ်ကိၣ်လီၤ.ဒီးဖဲဒၣ်အလဲၤတၢ်ဘၣ်ကျဲတဘျီဘျီန့ၣ်တၢ်မၤအသးလၢအလဲၤနုာ်အီၣ်ကိၣ်ဖဲန့ၣ်လီၤ.

9ဒီးစံးဘၣ်အဝၤ,ကွၢ်ကွၢ်,ယထံၣ်လၢပှၤတဂၤအံၤမ့ၢ်ယွၤအပှၤစီဆှံလီၤ.အဝဲဒၣ်လဲၤတၢ်ဘၣ်ကျဲဖဲပအိၣ်တထံၣ်ဃီလီၤ. 10မ်ပမၤဒၢးဖိလၢတၢ်ဒူၣ်အဖီခိၣ်လၢအဂီၢ်တက့ၢ်.ဒီးပကပာ်အလီၢ်မံ,ဒီးစီၢ်နီၤခိၣ်,ဒီးလီၢ်ဆ့ၣ်နီၤ,ဒီးမ့ၣ်အူဒၢအလီၢ်ဖဲန့ၣ်လၢအဂီၢ်တက့ၢ်.ဒီးတုၤအဟဲဆူပအိၣ်ဒီး,တၢ်ကမၤအသးလၢအကဃၣ်အသးဆူန့ၣ်လီၤ.

11ဒီးတၢ်မၤအသးလၢအန့ၣ်တနံၤလၢအဟဲဝဲဖဲန့ၣ်,ဒီးဃၣ်အသးဆူဒၢးဖိအပူၤန့ၣ်,ဒီးမံဝဲဖဲန့ၣ်လီၤ. 12ဒီးစံးဘၣ်အခ့အပှၤစီၤက့ၤဃစံ,ကိးန့ၢ်ပှၤရှူန့ၣ်ဖိတဂၤန့ၣ်တက့ၢ်.ဒီးကိးဝဲ,ဒီးအဝဲဒၣ်ဆၢထၢၣ်လၢအမဲာ်ညါလီၤ.

13ဒီးစံးလၢအခ့အပှၤ,စံးဘၣ်အီၤ,ကွၢ်ကွၢ်,နအံးက့ၤကွၢ်က့ၤမၤစၢၤပှၤလၢကယဲၢ်တၢ်ခဲလၢာ်အံၤလီၤ.ပှၤကမၤလၢနဂီၢ်မနုၤတမံၤလဲၣ်.ပှၤကတိၤတၢ်လၢနဂီၢ်ဒီးစီၤပၤမ့ၢ်ဂ့ၤ,ဒီးပှၤသုးမုၢ်အခိၣ်မ့ၢ်ဂ့ၤ,အလီၢ်အိၣ်ဧါ.ဒီးစံးဝဲဒၣ်,ယအိၣ်ယဆိးလၢယပှၤတကလုာ်ဒၣ်ယဲအကျါလီၤ.

14ဒီးစံးဝဲဒၣ်,ဒီးပှၤဘၣ်မၤလၢအဂီၢ်လၢမနုၤတမံၤလဲၣ်ဒီးစီၤက့ၤဃစံစံးဝဲဒၣ်,မ့ၢ်မးအဖိတအိၣ်ဘၣ်,ဒီးအဝၤအသးပှၢ်တ့ၢ်လီၤ.

15ဒီးစံးဝဲဒၣ်,ကိးန့ၢ်အီၤတက့ၢ်.ဒီးကိးဝဲ,ဒီးအဝဲဒၣ်ဆၢထၢၣ်လၢကျဲစၢၤအခီၣ်ထံးလီၤ. 16ဒီးစံးဝဲဒၣ်,တုၤအကတီၢ်အံၤဆၢအလီၢ်ဒီး,ဖဲတၢ်မူအကတီၢ်န့ၣ်နကဖိးဖိခွါတဂၤလီၤ.ဒီးစံးဝဲဒၣ်,တမ့ၢ်ဘၣ်,ယကစၢ်,ယွၤအပှၤကညီဧၢ,ကတိၤကဘျံးကဘျၣ်ဒီးနကုၢ်ပိာ်မုၣ်တဂ့ၤ.

17ဒီးပိာ်မုၣ်န့ၣ်ဒၢထီၣ်,ဒီးဆံးစၢ်န့ၢ်အဖိခွါဖဲအကတီၢ်လၢစီၤအလံၤၡါစံးဘၣ်အီၤ,ဖဲတၢ်မူအကတီၢ်န့ၣ်လီၤ.

18ဒီးတုၤဖိသၣ်ဒိၣ်ထီၣ်ဒီး,ဘၣ်လၢမုၢ်တနံၤတၢ်မၤအသးလၢအလဲၤထီၣ်ဆူအပၢ်အအိၣ်,ဆူပှၤကူးဘုဖိတဖၣ်အအိၣ်လီၤ. 19ဒီးစံးဘၣ်အပၢ်,ယခိၣ်,ယခိၣ်,ဒီးစံးဘၣ်ဖိၣ်သၣ်ခွါတဂၤ,လဲၤစိာ်အီၤဆူအမိၢ်အအိၣ်တက့ၢ်.

20ဒီးဟံးန့ၢ်အီၤ,ဒီးစိာ်ဝဲဆူအမိၢ်အအိၣ်,ဒီးဖိသၣ်ဆ့ၣ်နီၤလၢအဟုးလာ်တုၤမုၢ်ထူၣ်,ဒီးသံဝဲလီၤ.

21ဒီးလဲၤထီၣ်,ဒီးပာ်လီၤအီၤလၢယွၤအပှၤကညီအလီၢ်မံအဖီခိၣ်,ဒီးကးတံာ်ဃာ်တြဲၤ,ဒီးဟးထီၣ်ဝဲလီၤ.

22ဒီးကိးထီၣ်ဆူအဝၤ,ဟ့ၣ်ယုၢ်န့ၢ်လၢ်ယၤလၢဖိၣ်သၣ်ခွါတဂၤ,ဒီးကသ့ၣ်ယီၤတဒု,ဒ်သိးအကဃ့ၢ်ဆူယွၤအပှၤကညီအအိၣ်,ဒီးဟဲက့ၤန့ၣ်တက့ၢ်.

23ဒီးစံးဝဲဒၣ်,နကလဲၤဆူအအိၣ်လၢမုၢ်မဆါတနံၤအံၤမ့ၢ်အဘၣ်မနုၤလဲၣ်.လါထီၣ်သီနံၤတမ့ၢ်ဘၣ်,မုၢ်အိၣ်ဘှံးနံၤတမ့ၢ်ဘၣ်.ဒီးစံးဝဲဒၣ်,တၢ်မုာ်တၢ်ဖိးလီၤ.

24ဒီးဂီၤကၢ်ကသ့ၣ်ယီၤ,ဒီးစံးဘၣ်အခ့အပှၤ,နီၣ်ဒီးလဲၤတၢ်တက့ၢ်.ယမ့ၢ်တမၤလိာ်ဘၣ်နၤဒီး,မၤစၢ်လီၤနနီၣ်တၢ်တဂ့ၤ.

25ဒီးလဲၤတၢ်,ဒီးဟဲက့ၤဆူယွၤအပှၤကညီအအိၣ်လၢကစၢၢ်ကၢ်မ့ၤလးလီၤ.ဒီးတုၤယွၤအပှၤကညီထံၣ်ဘၣ်အီၤလၢအယံၤဒီး,တၢ်မၤအသးလၢအစံးဘၣ်အခ့အပှၤ,စီၤက့ၤဃစံ,ကွၢ်ကွၢ်,ပှၤရှူန့ၣ်ဖိတဂၤန့ၣ်လီၤ.

26ခဲကနံၣ်အံၤဃ့ၢ်သဂၢၢ်အီၤ,ဒီးစံးလၢအီၤ,နအိၣ်မုာ်စ့ၢ်ကီးဧါ,နဝၤအိၣ်မုာ်စ့ၢ်ကီးဧါ,ဖိသၣ်န့ၣ်အိၣ်မုာ်စ့ၢ်ကီးဧါန့ၣ်တက့ၢ်.ဒီးစံးဝဲဒၣ်,အိၣ်မုာ်ဝဲလီၤ.

27ဒီးတုၤအတုၤလၢယွၤအပှၤကညီအအိၣ်လၢကစၢၢ်လိၤဒီး,ဟံးဃာ်အခီၣ်,ဒီးစီၤက့ၤဃစံသုးဘူးအသးဒ်သိးအကထွၣ်ကွံာ်အီၤလီၤ.ဒီးယွၤအပှၤကညီစံးဘၣ်အီၤ,ကအိၣ်ဒၣ်ဝဲတက့ၢ်.အဂ့ၢ်ဒ်အံၤ,အသူၣ်ကိၢ်အသးဂီၤလၢအပူၤ,ဒီးယွၤပာ်ခူသူၣ်ဝဲဒီးယၤ,ဒီးတစံးဘၣ်ယၤဘၣ်.

28ဒီးစံးဝဲဒၣ်,ယဃ့န့ၢ်ဖိသၣ်တဂၤလၢယကစၢ်စ့ၢ်ကီးဧါ.ယစံး,လီန့ၢ်ယၤတဂ့ၤန့ၣ်တမ့ၢ်ဘၣ်ဧါ.

29ဒီးအဝဲဒၣ်စံးဘၣ်စီၤက့ၤဃစံ,ကံၢ်တူာ်နယီၢ်ဒ့,ဒီးဟံးန့ၢ်ယနီၣ်ထိးဘိလၢနစုပူၤ,ဒီးလဲၤတၢ်တက့ၢ်.နမ့ၢ်ဘၣ်သဃိာ်ပှၤတဂၤဂၤဒီး,ဆိၣ်ဂ့ၤအီၤတဂ့ၤ.ဒီးပှၤတဂၤဂၤမ့ၢ်ဆိၣ်ဂ့ၤနၤဒီး,စံးဆၢအီၤတဂ့ၤ.ဒီးပာ်လီၤယနီၣ်ထိးဘိလၢဖိသၣ်အမဲာ်အဖီခိၣ်တက့ၢ်.

30ဒီးဖိသၣ်အမိၢ်စံးဝဲဒၣ်,ယွၤမူဝဲ,ဒီးနသးမူဝဲန့ၣ်,ယတဟးဖးဒီးနၤဘၣ်.ဒီးဂဲၤဆၢထၢၣ်,ဒီးပိာ်အခံလီၤ.

31ဒီးစီၤက့ၤဃစံလဲၤဝဲလၢအမဲာ်ညါ,ဒီးပာ်လီၤနီၣ်ထိးဘိလၢဖိသၣ်အမဲာ်အဖီခိၣ်,ဒီးတၢ်အသီၣ်တအိၣ်,တၢ်ကနၣ်တၢ်တအိၣ်ဘၣ်.ဒီးဟဲက့ၤသဂၢၢ်အီၤ,ဒီးတဲဘၣ်ဝဲ,ဒီးစံးဝဲဒၣ်,ဖိသၣ်တဖုသံနီၣ်ဘၣ်.

32ဒီးစီၤအလံၤၡါဟဲနုာ်လၢဟံၣ်ပူၤ,ဒီးကွၢ်ကွၢ်,ဖိသၣ်သံလံ.ဒီးမံလီၤဝဲလၢအလီၢ်မံအဖီခိၣ်လီၤ.

33ဒီးလဲၤနုာ်ဝဲ,ဒီးကးတံာ်ဃာ်တြဲၤလၢအဝဲသ့ၣ်ခံဂၤအခံ,ဒီးဘါထုကဖၣ်ယွၤလီၤ. 34ဒီးလဲၤထီၣ်မံလီၤလၢဖိသၣ်န့ၣ်အဖီခိၣ်,ဒီးပာ်အထးခိၣ်လၢအထးခိၣ်အဖီခိၣ်,ဒီးအမဲာ်လၢအမဲာ်အဖီခိၣ်,အစုလၢအစုအဖီခိၣ်,ဒီးစူၣ်ထီၣ်အသးလၢဖိသၣ်အဖီခိၣ်,ဒီးဖိသၣ်အညၣ်လၢၤထီၣ်ဝဲလီၤ.

35ဒီးဟဲက့ၤ,ဒီးဟးယဲၤယီၤတၢ်လၢဟံၣ်ပူၤ,ဒီးလဲၤထီၣ်စူၣ်ထီၣ်အသးလၢအဖီခိၣ်,ဒီးဖိသၣ်ဆံၣ်ဆဲထီၣ်နွံဘျီ,ဒီးဖိသၣ်အိးထီၣ်အမဲာ်လီၤ.

36ဒီးကိးန့ၢ်စီၤက့ၤဃစံ,ဒီးစံးဝဲဒၣ်,ကိးန့ၢ်ပှၤရှူန့ၣ်ဖိတဂၤန့ၣ်တက့ၢ်.ဒီးအဝဲဒၣ်ကိးန့ၢ်အီၤလီၤ.ဒီးဟဲနုာ်ဝဲဆူအအိၣ်,ဒီးစံးဘၣ်အီၤ,ဟံးထီၣ်န့ၢ်နဖိခွါတက့ၢ်.

37ဒီးလဲၤနုာ်ဝဲ,ဒီးထိၣ်လီၤပှီၤအသးလၢအခီၣ်ထံး,ဒီးတီၤလီၤကဒွံကျိာ်,ဒီးဟံးန့ၢ်ထီၣ်အဖိခွါ,ဒီးဟးထီၣ်ဝဲလီၤ.

38ဒီးစီၤအလံၤၡါဟဲက့ၤကဒီးဆူကံးလကၤလး,ဒီးတၢ်သၣ်ဝံၤလီၤဒိအိၣ်ဝဲလၢကီၢ်ပူၤန့ၣ်လီၤ.ဒီးဝံတဖၣ်အိၣ်ဝဲဆိးဝဲလၢအမဲာ်ညါ,ဒီးစံးဘၣ်အခ့အပှၤ,ပာ်လီၤသပၢၤဖးဒိၣ်,ဒီးချီတၢ်ချီလၢဝံအဖိခွါတဖၣ်အဂီၢ်တက့ၢ်.

39ဒီးပှၤတဂၤလဲၤဝဲလၢပှၢ်လၢ်ကျါဒ်သိးအကထၢဖှိၣ်တၢ်ဒိးတၢ်လၣ်လီၤ.ဒီးထံၣ်န့ၢ်ဝဲလၢခီခးဖးကိးအမုၢ်တမုၢ်,ဒီးဒဲးဝဲအသၣ်မံတုၤအမၤပှဲၤအသးနါပှၢ်,ဒီးဟဲက့ၤသွဲၣ်နုာ်အီၤလၢတၢ်ချီအသပၢၤပူၤလီၤ.အဂ့ၢ်ဒ်အံၤ,တသ့ၣ်ညါဘၣ်ဝဲဘၣ်.

40ဒီးဂၢ်လီၤဝဲဒ်သိးပှၤကညီကအီၣ်တၢ်လီၤ.ဒီးအီၣ်တၢ်ချီအဖၢမုၢ်ဒီး,ကိးပသူထီၣ်ဒီးစံးဝဲဒၣ်,ယွၤအပှၤကညီဧၢ,တၢ်သံအိၣ်ဝဲလၢသပၢၤပူၤလီၤ.ဒီးအီၣ်ဝဲတသ့ဘၣ်.

41ဒီးစံးဝဲဒၣ်,ဟဲစိာ်ကိၣ်ကမူၣ်တက့ၢ်.ဒီးဖၢလီၤဝဲလၢသပၢၤပူၤ,ဒီးစံးဝဲဒၣ်,ဂၢ်လီၤလၢပှၤဂီၢ်မုၢ်အဂီၢ်ဒ်သိးအကအီၣ်တၢ်န့ၣ်တက့ၢ်.ဒီးတၢ်အၢတအိၣ်ဘၣ်လၢသပၢၤပူၤဘၣ်.

42ဒီးပှၤတဂၤဟဲဝဲလၢဘဧၤလးၡလံၡၤ,ဒီးဟဲစိာ်န့ၢ်ယွၤအပှၤကညီလၢကိၣ်အလိၣ်ခံဆံတ့ဝဲလၢဘုမုယီၤအသၣ်ဆိ,ဒီးဘုအစဲၤတဖၣ်လၢထၢၣ်ပူၤလီၤ.ဒီးစံးဝဲဒၣ်,ဟ့ၣ်လီၤပှၤဂီၢ်မုၢ်ဒ်သိးအကအီၣ်တၢ်တက့ၢ်.

43ဒီးအခ့အပှၤစံးဘၣ်အီၤ,ယကပာ်လီၤတၢ်အံၤလၢပှၤတကယၤအမဲာ်ညါန့ၣ်မ့ၢ်အဘၣ်မနုၤလဲၣ်.ဒီးစံးကဒီးဝဲဒၣ်,ဟ့ၣ်လီၤပှၤဂီၢ်မုၢ်ဒ်သိးအကအီၣ်တၢ်တက့ၢ်.အဂ့ၢ်ဒ်အံၤ,ယွၤစံးဝဲဒ်အံၤ,ကအီၣ်တၢ်,ဒီးကပာ်လီၤတဲာ်တၢ်လီၤ.

44ဒီးပာ်လီၤဝဲလၢအမဲာ်ညါ,ဒီးအဝဲသ့ၣ်တဖၣ်န့ၣ်အီၣ်ဝဲ,ဒီးပာ်လီၤတဲာ်တၢ်ဒ်ယွၤအကလုၢ်ကထါအသိးန့ၣ်လီၤ.