2 Kings 2
1ဒီးတုၤယွၤကဟံးထီၣ်စီၤအ့ၤလံယၤဆူမူခိၣ်လၢကလံၤသဝံးဒီး,တၢ်မၤအသးလၢစီၤအ့ၤလံယၤလဲၤဝဲဒီးစီၤအလံၤၡါလၢကံးလကၤလးလီၤ. 2ဒီးစီၤအ့ၤလံယၤစံးဘၣ်စီၤအလံၤၡါ,အိၣ်ဒၣ်ကလိာ်ဖဲအံၤတက့ၢ်.အဂ့ၢ်ဒ်အံၤ,ယွၤမၢယလဲၤဆူဘ့ၤသ့လးလီၤ.ဒီးစီၤအလံၤၡါစံးဝဲဒၣ်,ယွၤမူဝဲ,ဒီးနသးမူဝဲ,ယတလီၤဖးဘၣ်ဒီးနၤဘၣ်.ဒီးလဲၤလီၤဝဲဆူဘ့ၤသ့လးလီၤ. 3ဒီးဝံအဖိခွါတဖၣ်လၢအအိၣ်ဝဲလၢဘ့ၤသ့လးအပူၤဟဲထီၣ်ဆူစီၤအလံၤၡါအအိၣ်,ဒီးစံးဘၣ်အီၤ,ယွၤကဟံးန့ၢ်နကစၢ်လၢနခိၣ်အဖီခိၣ်လၢမုၢ်မဆါတနံၤအံၤ,နသ့ၣ်ညါစ့ၢ်ကီးဧါ.ဒီးစံးဝဲဒၣ်,ယသ့ၣ်ညါလီၤ.အိၣ်ဘှီၣ်ကလာ်တက့ၢ်. 4ဒီးစီၤအ့ၤလံယၤစံးဘၣ်အီၤ,စီၤအလံၤၡါဧၢ,အိၣ်ဒၣ်ကလိာ်ဖဲအံၤတက့ၢ်.အဂ့ၢ်ဒ်အံၤ,ယွၤမၢယလဲၤဆူယရံၤဃိလီၤ.ဒီးစံးဝဲဒၣ်,ယွၤမူဝဲ,ဒီးနသးမူဝဲန့ၣ်,ယတလီၤဖးဘၣ်ဒီးနၤဘၣ်.ဒီးဟဲဝဲဆူယရံၤဃိလီၤ. 5ဒီးဝံအဖိခွါလၢအအိၣ်ဝဲလၢယရံၤဃိတဖၣ်ဟဲဆူစီၤအလံၤၡါအအိၣ်ဒီးစံးဘၣ်အီၤ,ယွၤကဟံးန့ၢ်နကစၢ်လၢနခိၣ်အဖီခိၣ်လၢမုၢ်မဆါတနံၤအံၤ,နသ့ၣ်ညါစ့ၢ်ကီးဧါ.ဒီးစံးဝဲဒၣ်,ယသ့ၣ်ညါစ့ၢ်ကီးလီၤ.အိၣ်ဘှီၣ်ကလာ်တက့ၢ်. 6ဒီးစီၤအ့ၤလံယၤစံးဘၣ်အီၤ,အိၣ်ဒၣ်ကလိာ်ဖဲအံၤတက့ၢ်.အဂ့ၢ်ဒ်အံၤ,ယွၤမၢယလဲၤဆူယၢ်ဒ့ၣ်လီၤ.ဒီးစံးဝဲဒၣ်,ယွၤမူဝဲ,ဒီးနသးမူဝဲန့ၣ်,ယတလီၤဖးဘၣ်ဒီးနၤဘၣ်.ဒီးအဝဲသ့ၣ်ခံဂၤန့ၣ်လဲၤတၢ်လီၤ. 7ဒီးပှၤကညီယဲၢ်ဆံလၢဝံဖိခွါအကျါလဲၤဝဲ,ဒီးဆၢထၢၣ်ကွၢ်စၢၢ်တလၢၢ်လီၤ.ဒီးပှၤခံဂၤန့ၣ်ဆၢထၢၣ်လၢယၢ်ဒ့ၣ်အနံၤလီၤ. 8ဒီးစီၤအ့ၤလံယၤဟံးန့ၢ်အယၣ်,ဒီးထူထီၣ်ဝဲ,ဒီးတီၢ်ထံ,ဒီးထံသ့ၣ်ဖးလီၤအသးဆူအံၤဆူန့ၣ်,ဒီးအဝဲသ့ၣ်ခံဂၤန့ၣ်လဲၤခီဂာ်လၢခိလီၤ. 9ဒီးတုၤအလဲၤခီဂာ်ကွံာ်ဒီး,တၢ်မၤအသးလၢစီၤအ့ၤလံယၤစံးဘၣ်စီၤအလံၤၡါ,တၢ်တချုးဟံးထီၣ်ကွံာ်ဒံးဘၣ်ယၤလၢနၤဒီး,ဃ့တၢ်လၢယကမၤလၢနဂီၢ်တက့ၢ်.ဒီးစီၤအလံၤၡါစံးဝဲဒၣ်,မ်နသးခံစးအိၣ်လၢယလိၤတက့ၢ်. 10ဒီးစံးဝဲဒၣ်,နဃ့တၢ်ကီတမံၤလီၤ.တုၤတၢ်ဟံးထီၣ်ကွံာ်ယၤလၢနၤဒီး,နမ့ၢ်ထံၣ်ဘၣ်ယၤဒီး,တၢ်ကမၤအသးလၢနဂီၢ်ဒ်န့ၣ်လီၤ.မ့တမ့ၢ်ဘၣ်ဒ်န့ၣ်ဒီးတၢ်ကကဲထီၣ်ဘၣ်လၢနဂီၢ်ဘၣ်. 11ဒီးတၢ်မၤအသးလၢအဝဲသ့ၣ်လဲၤတၢ်,ဒီးကတိၤတၢ်ဒီး,ကွၢ်ကွၢ်,လ့ၣ်ကဟၣ်မ့ၣ်အူ,ဒီးကသ့ၣ်မ့ၣ်အူတဖၣ်,မၤလီၤဖှၣ်အဝဲခံဂၤ,ဒီးစီၤအ့ၤလံယၤလဲၤထီၣ်ဆူမူခိၣ်လၢကလံၤသဝံးအပူၤလီၤ. 12ဒီးစီၤအလံၤၡါထံၣ်ဘၣ်ဝဲ,ဒီးကိးထီၣ်,ယပၢ်ဧၢ,ယပၢ်ဧၢ,အံၣ်စရ့လးအလ့ၣ်ကဟၣ်,ဒီးအကသ့ၣ်တဖၣ်န့ၣ်လီၤ.ဒီးတထံၣ်လၢၤဘၣ်အီၤဘၣ်.ဒီးဟံးအယၣ်ဒၣ်ဝဲ,ဒီးဖှီကွံာ်လၢခံခီလီၤ. 13ဒီးထၢထီၣ်စီၤအ့ၤလံယၤအယၣ်လၢအလီၤတဲာ်လၢအလိၤ,ဒီးက့ၤကဒါက့ၤ,ဒီးဆၢထၢၣ်လၢယၢ်ဒ့ၣ်အနံၤလီၤ. 14ဒီးဟံးန့ၢ်စီၤအ့ၤလံယၤအယၣ်လၢအလီၤတဲာ်လၢအလိၤ,ဒီးတီၢ်ထံ,ဒီးစံးဝဲဒၣ်,ယွၤစီၤအ့ၤလံယၤအကစၢ်န့ၣ်မ့ၢ်အအိၣ်ဖဲလဲၣ်.ဒီးတီၢ်ထံဝံၤဒီး,ထံသ့ၣ်ဖးအသးဆူအံၤဆူန့ၣ်,ဒီးစီၤအလံၤၡါခီဂာ်ဝဲလီၤ. 15ဒီးတုၤဝံအဖိခွါတဖၣ်အိၣ်ဝဲလၢယရံၤဃိထံၣ်ဘၣ်အီၤဒီး,စံးဝဲဒၣ်,စီၤအ့ၤလံယၤအသးအိၣ်ဝဲလၢစီၤအလံၤၡါအလိၤလီၤ.ဒီးဟဲသဂၢၢ်အီၤ,ဒီးတီၤလီၤကဒွံကျိာ်ဝဲလၢအမဲာ်ညါလီၤ. 16ဒီးအဝဲသ့ၣ်တဖၣ်န့ၣ်စံးဝဲဒၣ်,ကွၢ်ကွၢ်,ပှၤအဆူၣ်ယဲၢ်ဆံအိၣ်ဒီးနခ့နပှၤလီၤ.ဒုးလဲၤလၢ်အီၤ,ဒီးဃုနကစၢ်တက့ၢ်.ဘၣ်တဘၣ်ယွၤအသးဟံးထီၣ်အီၤ,ဒီးလၢကစၢၢ်တဖျၢၣ်ဖျၢၣ်မ့ၢ်ဂ့ၤ,ကစၢၢ်ကဆူးတပူၤပူၤမ့ၢ်ဂ့ၤ,ပာ်လီၤဝဲလီၤ.ဒီးစံးဝဲဒၣ်,သုတမၢလီၤတဂ့ၤ. 17ဒီးသဆၣ်ထီၣ်အခံတုၤအဝဲဒၣ်မဲာ်ဆှး,ဒီးစံး,မၢလီၤတၢ်တက့ၢ်.ဒီးမၢလီၤပှၤယဲၢ်ဆံ,ဒီးအဝဲသ့ၣ်ဃုဝဲသၢနံၤ,ဒီးတထံၣ်န့ၢ်ဘၣ်ဝဲဘၣ်. 18ဒီးဟဲက့ၤဝဲဆူအအိၣ်လီၤ.ဒီးအဝဲဒၣ်အိၣ်ဝဲလၢယရံၤဃိအပူၤလီၤ.ဒီးစံးဘၣ်အီၤ,ယစံးလၢသုလဲၤတဂ့ၤန့ၣ်တမ့ၢ်ဘၣ်ဧါ. 19ဒီးဝ့ၢ်အပှၤကညီစံးလၢစီၤအလံၤၡါ,ကွၢ်ကွၢ်,ဝ့ၢ်အလီၢ်အံၤဂ့ၤ,ဒ်ယကစၢ်ထံၣ်ဝဲအသိးန့ၣ်,မ့မ့ၢ်ထံန့ၣ်မ့ၢ်အအၢ,ဒီးဟီၣ်ခိၣ်တဒုးကဲထီၣ်ဘၣ်တၢ်ဘၣ်. 20ဒီးစံးဝဲဒၣ်,ဟဲစိာ်န့ၢ်ယၤလၢပလီအသီတဖျၢၣ်,ဒီးဒၢနုာ်အံသၣ်လၢအပူၤတက့ၢ်.ဒီးဟဲစိာ်ဝဲဆူအအိၣ်လီၤ. 21ဒီးလဲၤထီၣ်ဝဲဆူထံထီၣ်ပၢၢ်အအိၣ်,ဒီးကွံာ်လီၤအံသၣ်လၢအပူၤ,ဒီးစံးဝဲဒၣ်,ယွၤစံးဝဲဒ်အံၤ,ယမၤဘျါက့ၤလံထံအံၤလံ,တုၤအံၤဆူညါတၢ်သံ,ဒီးတၢ်တဒုးကဲထီၣ်ဘၣ်တၢ်ဘၣ်န့ၣ်တအိၣ်လၢၤဘၣ်. 22ဒီးထံတဖၣ်န့ၣ်ဘျါက့ၤဝဲတုၤမုၢ်မဆါတနံၤအံၤဒ်စီၤအလံၤၡါအတၢ်ကတိၤလၢအကတိၤဝဲအသိးန့ၣ်လီၤ. 23ဒီးဟးထီၣ်ဖဲန့ၣ်ဆူဘ့ၤသ့လး,ဒီးလဲၤထီၣ်လၢကျဲပူၤ,ဒီးဖိသၣ်ပိာ်ခွါဆံးတဖၣ်ဟဲထီၣ်လၢဝ့ၢ်ပူၤ,ဒီးဒုၣ်ဒွဲၣ်အီၤ,ဒီးစံးဘၣ်အီၤ,လဲၤထီၣ်ပှၤကျၤခိၣ်ဧၢ,လဲၤထီၣ်ပှၤကျၤခိၣ်ဧၢ. 24ဒီးဃၣ်အသးဒီးကွၢ်အီၤ,ဒီးဆိၣ်အၢအီၤလၢယွၤအမံၤလီၤ.ဒီးတၤသူမိၢ်ခံဒုဟဲထီၣ်လၢသ့ၣ်အကျါ,ဒီးဖှီကွံာ်ဖိသၣ်လွံၢ်ဆံခံဂၤလၢအကျါန့ၣ်လီၤ. 25ဒီးဟးထီၣ်ဖဲန့ၣ်ဆူကစၢၢ်ကၢ်မ့ၤလး,ဒီးဖဲန့ၣ်က့ၤက့ၤဆူၡၤမရံလီၤ.
Copyright information for
KswSKMB