2 Kings 20
1တၢ်လၢမုၢ်နံၤတဖၣ်န့ၣ်စီၤဃံးစကံယၤဆါဝဲတုၤအကသံတ့ၢ်လီၤ.ဒီးစီၤအၤမိးအဖိခွါဝံယၡါယၤန့ၣ်လဲၤဆူအအိၣ်ဒီးစံးဘၣ်အီၤ,မၤလိာ်နပှၤဟံၣ်ဖိအတၢ်တက့ၢ်.အဂ့ၢ်ဒ်အံၤ,နကသံ,ဒီးနတမူဘၣ်လီၤ. 2ဒီးအဝဲဒၣ်ဃၣ်ဃီၤအမဲာ်ဆူတၢ်ဒူၣ်,ဒီးဘါထုကဖၣ်ယွၤ, 3ဒီးစံးဝဲဒၣ်,ယွၤဧၢ,ယလဲၤတၢ်လၢနမဲာ်ညါလၢတၢ်မ့ၢ်တၢ်တီအပူၤဒီးလၢယသးဒီဖျၢၣ်,ဒီးယမၤတ့ၢ်တၢ်လၢအဂ့ၤလၢနမဲာ်န့ၣ်သ့ၣ်နီၣ်ထီၣ်က့ၤလၢ်တက့ၢ်.ဒီးစီၤဃံးစကံယၤဟီၣ်ဝဲနးမးလီၤ. 4ဒီးစီၤယၡါယၤတချုးတုၤဒံးဘၣ်လၢတၢ်အဂၢၤအသးကံၢ်ပူၤန့ၣ်တၢ်မၤအသးလၢယွၤအကလုၢ်ဘၣ်အီၤဒီးစံးဝဲဒၣ်, 5က့ၤကဒါက့ၤဒီးစံးဘၣ်စီၤဃံးစကံယၤ,ယပှၤဂီၢ်မုၢ်အခိၣ်,ယွၤနပၢ်စီၤဒၤဝံးအကစၢ်စံးဒ်အံၤ,ယနၢ်ဟူနဘါထုကဖၣ်တၢ်လံ,ယထံၣ်နမဲာ်ထံလံ,ကွၢ်ကွၢ်,ယကမၤဘျါက့ၤနၤလီၤ.ပှဲၤထီၣ်သၢနံၤတနံၤန့ၣ်နကလဲၤထီၣ်ဆူယွၤအဟံၣ်ပူၤလီၤ. 6ယကပာ်ဖှိၣ်ဒီးနနံၤတဖၣ်လၢတဆံယဲၢ်နံၣ်လီၤ.ဒီးယကမၤပူၤဖျဲးနၤဒီးဝ့ၢ်တဖျၢၣ်အံၤလၢအၤရှူၢ်အစီၤပၤအစုပူၤ,ဒီးယကအိၣ်ပှိၤဝ့ၢ်တဖျၢၣ်အံၤလၢယဃိဒၣ်ဝဲ,ဒီးလၢယခ့ယပှၤစီၤဒၤဝံးအဃိလီၤ. 7ဒီးစီၤယၡါယၤစံးဝဲဒၣ်,ဟံးန့ၢ်ချၢၣ်ဒၢသၣ်ဃ့တလိၣ်တက့ၢ်.ဒီးဟံးန့ၢ်ဝဲ,ဒီးပာ်လီၤလၢတၢ်ဝ့အဖီခိၣ်,ဒီးဘျါက့ၤဝဲလီၤ. 8ဒီးစီၤဃံးစကံယၤစံးဘၣ်စီၤယၡါယၤ,တၢ်အပနီၣ်လၢယွၤကမၤဘျါက့ၤယၤ,ဒီးလၢယကလဲၤထီၣ်ဆူယွၤအဟံၣ်ပူၤသၢနံၤတနံၤန့ၣ်မ့ၢ်မနုၤတမံၤလဲၣ်. 9ဒီးစီၤယၡါယၤစံးဝဲဒၣ်,အအံၤမ့ၢ်တၢ်ပနီၣ်လၢနဂီၢ်လၢနကန့ၢ်ဘၣ်တၢ်လၢယွၤ,လၢယွၤကမၤတၢ်လၢအကတိၤတ့ၢ်ဝဲ,တၢ်ကဒုန့ၣ်မ့ၢ်အကလဲၤလၢညါအတီၤတဆံ,ကက့ၤကဒါက့ၤအတီၤတဆံလဲၣ်. 10ဒီးစီၤဃံးစကံယၤစံးဝဲဒၣ်,တၢ်ကဒုလဲၤလၢညါအတီၤတဆံမ့ၢ်တၢ်ညီ,မ်အက့ၤကဒါက့ၤအတီၤတဆံတက့ၢ်. 11ဒီးဝံယၡါယၤဃ့ကညးယွၤ,ဒီးဒုးက့ၤကဒါက့ၤတၢ်ကဒုအတီၤတဆံလၢအလဲၤလီၤပူၤကွံာ်တ့ၢ်လၢစီၤအၤဃးအမုၢ်အနၣ်ရံၣ်အလိၤန့ၣ်လီၤ. 12တၢ်လၢအကတီၢ်န့ၣ်ဘၤဘူၤလိၣ်အစီၤပၤစီၤဘၤလဒၣ်အဖိခွါစီၤဘရိဒးဘၤလဒၣ်တဂၤဟ့ၣ်ယုၢ်လံာ်,ဒီးခိၣ်ဖးလၢစီၤဃံးစကံယၤလီၤ.အဂ့ၢ်ဒ်အံၤ,နၢ်ဟူဝဲလၢအဆါတ့ၢ်ဝဲလီၤ. 13ဒီးစီၤဃံးစကံယၤဒိကနၣ်ဝဲ,ဒီးဒုးနဲၣ်အီၤလၢအတၢ်လုၢ်ဒိၣ်ပှ့ၤဒိၣ်အဟံၣ်ဒီဟံၣ်ညါ,ကျိၣ်ဧိၤစ့ဧိၤ,ဒီးထူဧိၤလွဲဧိၤ,ဒီးတၢ်နၢမူ,ဒီးသိအဂ့ၤ,ဒီးအစုကဝဲၤအဟံၣ်ဒီဖျၢၣ်ညါ,ဒီးကယဲၢ်အတၢ်လၢအအိၣ်လၢအတၢ်လုၢ်ဒိၣ်ပှ့ၤဒိၣ်အကျါန့ၣ်လီၤ.တၢ်လၢစီၤဃံးစကံယၤတဒုးနဲၣ်ဘၣ်အီၤန့ၣ်တအိၣ်လၢၤဘၣ်လၢအဟံၣ်ပူၤ,ဒီးတအိၣ်လၢၤဘၣ်လၢအဘီမုၢ်ဒီဘ့ၣ်ညါအပူၤနီတမံၤဘၣ်. 14ဒီးဝံယၡါယၤန့ၣ်ဟဲဆူစီၤပၤဃံးစကံယၤအအိၣ်,ဒီးစံးဘၣ်အီၤ,ပှၤတဖၣ်န့ၣ်စံးဒ်လဲၣ်,ဒီးဟဲဆူနအိၣ်လၢလဲၣ်.ဒီးစီၤဃံးစကံယၤစံးဝဲဒၣ်,ဟဲဆူယအိၣ်လၢထံယံၤကီၢ်ယံၤတဘ့ၣ်,လၢဘၤဘူၤလိၣ်န့ၣ်လီၤ. 15ဒီးစံးဝဲဒၣ်,မ့ၢ်အထံၣ်ဘၣ်လၢနဟံၣ်ပူၤမနုၤလဲၣ်.ဒီးစီၤဃံးစကံယၤစံးဝဲဒၣ်,ထံၣ်ဘၣ်လံကယဲၢ်တၢ်လၢအအိၣ်လၢယဟံၣ်ပူၤခဲလၢာ်လံ.တၢ်လၢယတဒုးနဲၣ်ဘၣ်အီၤန့ၣ်တအိၣ်ဘၣ်လၢယတၢ်လုၢ်ဒိၣ်ပှ့ၤဒိၣ်အပူၤနီတမံၤဘၣ်. 16ဒီးစီၤယၡါယၤစံးဘၣ်စီၤဃံးစကံယၤ,ဒိကနၣ်ယွၤအကလုၢ်တက့ၢ်. 17ကွၢ်ကွၢ်,မုၢ်နံၤတဖၣ်ကဟဲလၢကယဲၢ်တၢ်အိၣ်လၢနဟံၣ်ပူၤ,ဒီးတၢ်လၢနပၢ်တဖၣ်ပာ်ဖှိၣ်ဝဲတုၤမုၢ်မဆါတနံၤအံၤ,တၢ်ကစိာ်ထီၣ်ကွံာ်အီၤဆူဘၤဘူၤလိၣ်လီၤ.တၢ်တအိၣ်လီၤတဲာ်ဘၣ်နီတမံၤဘၣ်,ယွၤစံးဝဲဒၣ်, 18ဒီးကစိာ်ထီၣ်ကွံာ်နဖိခွါလၢအလီၤစၢၤလၢနၤ,လၢနထီၣ်ဖိ,ဒီးကကဲပှၤဒ့ဒံၣ်ဖိလၢဘၤဘူၤလိၣ်အစီၤပၤအနူၢ်ပူၤလီၤ. 19ဒီးစီၤဃံးစကံယၤစံးဘၣ်စီၤယၡါယၤ,ယွၤအတၢ်ကတိၤလၢအကတိၤတ့ၢ်ဝဲန့ၣ်ဂ့ၤဝဲလီၤ.ဒီးစံးဝဲဒၣ်,တၢ်ဃူတၢ်ဖိး,ဒီးတၢ်မ့ၢ်တၢ်တီကအိၣ်ဝဲလၢယမုၢ်နံၤတဖၣ်အပူၤန့ၣ်တမ့ၢ်ဘၣ်ဧါ. 20ဒီးတၢ်အိၣ်လီၤတဲာ်ဘၣ်ဃးဒီးစီၤဃံးစကံယၤ,ဒီးအစိအကမီၤခဲလၢာ်,ဒီးလၢအမၤထံနိၣ်တပူၤ,ဒီးထံအကျိၤတဘိ,ဒီးလၢအဒုးဟဲထံဆူဝ့ၢ်ပူၤအဂ့ၢ်အကျိၤန့ၣ်ကွဲးအသးလၢယူဒၤအစီၤပၤအလံာ်ကွဲးနီၣ်တၢ်အပူၤ,တမ့ၢ်ဘၣ်ဧါ. 21ဒီးစီၤဃံးစကံယၤမံဝဲဒီးအပၢ်တဖၣ်,ဒီးအဖိခွါစီၤမနၤရှ့ၤကဲထီၣ်စီၤပၤလၢအလီၢ်န့ၣ်လီၤ.
Copyright information for
KswSKMB