2 Kings 3
1ဒီးလၢယူဒၤအစီၤပၤစီၤယဟိၡၤဖးအနံၣ်ပှဲၤထီၣ်တဆံဃိးနံၣ်တနံၣ်န့ၣ်စီၤအၤဃာ်အဖိခွါစီၤယဟိရၣ်ကဲသီစီၤပၤလၢအံၣ်စရ့လးအဖီခိၣ်လၢၡၤမရံအပူၤ,ဒီးကဲစီၤပၤတဆံခံနံၣ်လီၤ. 2ဒီးမၤတၢ်အၢလၢယွၤအမဲာ်ဘၣ်ဆၣ်ဒီး,တဒ်သိးဘၣ်အပၢ်,ဒီးတဒ်သိးဘၣ်အမိၢ်ဘၣ်.ဒီးသုးကွံာ်ဘဧၤလးအတၢ်ဂီၤလၢအပၢ်တ့ဝဲလီၤ. 3မ့ၢ်နာ်သက့ဒ်န့ၣ်ဒီးစဲဘူးအသးဒီးစီၤနဘးအဖိခွါစီၤယၤရၤဘၣ်အတၢ်ဒဲးဘးလၢအဒုးမၤအံၣ်စရ့လးလၢတၢ်ဒဲးဘးလီၤ.တလဲၤသဒၣ်ဘၣ်အီၤဘၣ်. 4ဒီးမိၤအးအစီၤပၤစီၤမ့ၡၤမ့ၢ်သိအကစၢ်,ဒီးဟ့ၣ်သိဖိတကလီၤ,ဒီးသိဖါတကလီၤအိၣ်ဒီးအဆူၣ်လၢအံၣ်စရ့လးအစီၤပၤလီၤ. 5ဒီးတုၤစီၤအၤဃာ်သံဝဲဒီး,တၢ်မၤအသးလၢမိၤအးအစီၤပၤပူထီၣ်အံၣ်စရ့လးအစီၤပၤလီၤ. 6ဒီးတၢ်လၢမုၢ်တနံၤန့ၣ်စီၤပၤယဟိရၣ်လဲၤထီၣ်လၢၡၤမရံ,ဒီးဂံၢ်အံၣ်စရ့လးခဲလၢာ်လီၤ. 7ဒီးလဲၤတၢ်ဒီးမၢလီၤတၢ်ဆူယူဒၤအစီၤပၤယဟိၡၤဖးဒီးစံးဝဲဒၣ်,မိၤအးအစီၤပၤပူထီၣ်လံယၤလံ.နကလဲၤတၢ်ဒီးယၤထီဒါမိၤအးလၢပကဒုးသုးတၢ်စ့ၢ်ကီးဧါ.ဒီးစံးဝဲဒၣ်,ယကလဲၤတၢ်လီၤ.ယမ့ၢ်ဒ်နၤအသိး,ယပှၤဂီၢ်မုၢ်ဒ်နပှၤဂီၢ်မုၢ်အသိး,ယကသ့ၣ်ဒ်နကသ့ၣ်အသိးန့ၣ်လီၤ. 8ဒီးစံးဝဲဒၣ်,ပကလဲၤကျဲဖဲလဲၣ်ဘိလဲၣ်.ဒီးစံးဝဲဒၣ်,ကျဲခီဂာ်အဒိၣ်အပှၢ်မုၢ်ကနၢလီၤ. 9ဒီးအံၣ်စရ့လးအစီၤပၤလဲၤတၢ်,ဒီးယူဒၤအစီၤပၤ,ဒီးအဒိၣ်အစီၤပၤ,ဒီးလဲၤတၢ်နွံနံၤကျဲ,ဒီးလၢပှၤသုးမုၢ်အဂီၢ်,ဒီးလၢဆၣ်ဖိကီၢ်ဖိအဒၢလၢအပိာ်အခံအဂီၢ်န့ၣ်ထံတအိၣ်ဘၣ်. 10ဒီးအံၣ်စရ့လးအစီၤပၤစံးဝဲဒၣ်,အၣ်လါ,ယွၤကိးဖှိၣ်စီၤပၤသၢဂၤအံၤဒ်သိးအကဟ့ၣ်လီၤကွံာ်အီၤဆူမိၤအးအစုပူၤလီၤ. 11ဒီးစီၤယဟိၡၤဖးစံးဝဲဒၣ်,ဒ်သိးပကသံကွၢ်ယွၤဒီး,ယွၤအဝံတဂၤဂၤတအိၣ်ဘၣ်ဖဲအံၤဘၣ်ဧါ.ဒီးအံၣ်စရ့လးအစီၤပၤအခ့အပှၤတဂၤစံးဆၢတၢ်ဒီးစံးဝဲဒၣ်,စီၤၡၤဖးအဖိခွါစီၤအလံၤၡါလၢအဂၢ်လီၤထံလၢစီၤအ့ၤလံယၤအစုလိၤတဂၤအိၣ်ဖဲအံၤလီၤ. 12ဒီးစီၤယဟိၡၤဖးစံးဝဲဒၣ်,ယွၤအကလုၢ်အိၣ်ဒီးအီၤလီၤ.ဒီးအံၣ်စရ့လးအစီၤပၤ,စီၤယဟိၡၤဖး,ဒီးအဒိၣ်အစီၤပၤလဲၤလီၤဆူအအိၣ်လီၤ. 13ဒီးစီၤအလံၤၡါစံးဘၣ်အံၣ်စရ့လးအစီၤပၤ,တၢ်ဘၣ်ဃးဒီးယၤဒီးနၤမ့ၢ်မနုၤတမံၤလဲၣ်.လဲၤဆူနပၢ်အဝံတဖၣ်အအိၣ်,ဒီးဆူနမိၢ်အဝံတဖၣ်အအိၣ်တက့ၢ်.ဒီးအံၣ်စရ့လးအစီၤပၤစံးဘၣ်အီၤ,တမ့ၢ်ဘၣ်.အဂ့ၢ်ဒ်အံၤ,ယွၤကိးဖှိၣ်စီၤပၤသၢဂၤအံၤဒ်သိးအကဟ့ၣ်လီၤကွံာ်အီၤလၢမိၤအးအစုပူၤလီၤ. 14ဒီးစီၤအလံၤၡါစံးဝဲဒၣ်,ယွၤမူဝဲလၢယဆၢထၢၣ်လၢအမဲာ်ညါန့ၣ်,မ့တမ့ၢ်ဘၣ်ယကွၢ်မဲာ်ဆူယူဒၤအစီၤပၤယဟိၡၤဖးဒီး,ယတကွၢ်ဘၣ်တၢ်ဆူနအိၣ်ဘၣ်,ဒီးယတထံၣ်ဘၣ်နၤဘၣ်. 15ဒီးခဲကနံၣ်အံၤ,ဟဲစိာ်န့ၢ်ယၤလၢပှၤဒ့တၢ်ဖိတဂၤတက့ၢ်.ဒီးတုၤပှၤဒ့တၢ်ဖိဒ့တၢ်ဒီး,တၢ်မၤအသးလၢယွၤအစုအိၣ်ဘၣ်လၢအလိၤလီၤ. 16ဒီးစံးဝဲဒၣ်,မၤတၢ်တြိပူၤအံၤပှဲၤလၢတၢ်ကျိၤတဖၣ်တက့ၢ်. 17အဂ့ၢ်ဒ်အံၤ,ယွၤစံးဒ်အံၤ,သုတထံၣ်ဘၣ်ကလံၤ,ဒီးသုတထံၣ်ဘၣ်တၢ်ဟဲစူၤဘၣ်.ဘၣ်ဆၣ်ဒီးတၢ်တြိပူၤအံၤကပှဲၤဝဲဒီးထံဒ်သိးသုကအီတၢ်,သုဝဲဒၣ်,ဒီးသုတၢ်ဖိတၢ်လံၤ,ဒီးသုဆၣ်ဖိကီၢ်ဖိအဒၢတဖၣ်လီၤ. 18ဒီးတၢ်အံၤမ့ၢ်တၢ်ဖှံတမံၤလၢယွၤအမဲာ်ညါလီၤ.ကဟ့ၣ်လီၤကွံာ်စ့ၢ်ကီးပှၤမိၤအးဖိလၢသုစုပူၤလီၤ. 19ဒီးသုကကျီကွံာ်ကယဲၢ်ဝ့ၢ်အိၣ်ဒီးအခိၣ်ဒူ,ဒီးကယဲၢ်ဝ့ၢ်လၢတၢ်ဃုထၢအီၤ,ဒီးကကူာ်လီၤကွံာ်ကယဲၢ်သ့ၣ်လၢအဂ့ၤ,ဒီးသုကဆွံတံာ်ကယဲၢ်ထံထီၣ်ပၢၢ်,ဒီးမၤဟးဂီၤကယဲၢ်ဟီၣ်ခိၣ်အကဝီၤဂ့ၤလၢလၢၢ်တဖၣ်န့ၣ်လီၤ. 20ဒီးလၢမုၢ်ဆ့ၣ်ထီၣ်န့ၣ်တုၤပှၤပာ်ထီၣ်တၢ်မၤဘူၣ်ကိၣ်ဒီး,ကွၢ်ကွၢ်,တၢ်မၤအသးလၢထံဟဲလၢအဒိၣ်အကျဲ,ဒီးကီၢ်ပှဲၤဝဲဒီးထံဧိၤနိဧိၤလီၤ. 21ဒီးတုၤပှၤမိၤအးဖိနၢ်ဟူဝဲခဲလၢာ်လၢစီၤပၤတဖၣ်ဟဲဒုးတၢ်ဒီးအီၤဒီး,ဒုးအိၣ်ဖှိၣ်ကယဲၢ်ပှၤလၢအသိးသဃိးသ့,ဒီးပှၤလၢအသးပှၢ်န့ၢ်အီၤတက့ၢ်,ဒီးဆၢထၢၣ်လၢကီၢ်အဃၢၤန့ၣ်လီၤ. 22ဒီးမုၢ်ဆ့ၣ်ထီၣ်န့ၣ်ဂဲၤဆၢထၢၣ်ဂီၤဂီၤ,ဒီးမုၢ်အဧူၢ်ဆဲးဘၣ်လၢထံဖံးခိၣ်,ဒီးပှၤမိၤအးဖိထံၣ်ဘၣ်ထံလၢဝၢ်ဘးခီဂီၤဒ်တၢ်သွံၣ်အသိးန့ၣ်လီၤ. 23ဒီးစံးဝဲဒၣ်,အဝဲအံၤမ့ၢ်တၢ်သွံၣ်လီၤ.စီၤပၤတဖၣ်ဘၣ်တၢ်မၤသံလံအီၤသပှၢ်တၢၢ်,ဒီးကျီလိာ်လံအသးလံ,ဒီးခဲကနံၣ်အံၤ,မိၤအးဧၢ,ဟဲဆူတၢ်ဂုာ်န့ၢ်အအိၣ်တက့ၢ်. 24ဒီးဟဲဝဲဆူအံၣ်စရ့လးအသူၣ်ဒဲအလီၢ်,ဒီးပှၤအံၣ်စရ့လးဖိဂဲၤထၢၣ်,ဒီးကျီကွံာ်ပှၤမိၤအးဖိ,ဒီးအဝဲသ့ၣ်ဃ့ၢ်ဝဲလၢအမဲာ်ညါ,ဒီးကျီကွံာ်တၢ်,ဒီးလဲၤတၢ်,ဒီးကျီကွံာ်ပှၤမိၤအးဖိဆူၣ်ဆူၣ်ကလဲာ်လီၤ. 25ဒီးမၤလီၤပှီၢ်အဝ့ၢ်တဖၣ်,ဒီးလၢကယဲၢ်ဟီၣ်ခိၣ်အကဝီၤအဂ့ၤအဖီခိၣ်န့ၣ်တဂၤကွံာ်လၢၢ်တဖျၢၣ်,တဂၤကွံာ်လၢၢ်တဖျၢၣ်,ဒီးမၤပှဲၤအီၤလီၤ.ဒီးဆွံတံာ်ထံထီၣ်ပၢၢ်ခဲလၢာ်,ဒီးကူာ်လီၤကွံာ်သ့ၣ်အဂ့ၤခဲလၢာ်တုၤအပာ်လီၤတဲာ်ထဲကံၢ်ဃရၤရှ့းအခိၣ်ဒူ,ဒီးပှၤခးနီၣ်ဘျုးလဲၤတရံးဒီးခးဘၣ်အီၤလီၤ. 26ဒီးမိၤအးအစီၤပၤထံၣ်ဘၣ်ဝဲလၢတၢ်ဒုးသုးဆူၣ်န့ၢ်အီၤတက့ၢ်,ဒီးဟံးန့ၢ်ပှၤနွံကထိလၢအဘီၣ်ထီၣ်နးဒ်သိးအကဘၢၣ်ဖျိတၢ်ဆူအဒိၣ်အစီၤပၤအအိၣ်လီၤ.ဒီးမၤဝဲတသ့ဘၣ်. 27ဒီးဟံးန့ၢ်အဖိခွါဝဲၢ်ကိလၢအကြၢးကဲစီၤပၤလၢအလီၢ်,ဒီးလုၢ်အီၤလၢတၢ်လုၢ်မ့ၣ်အူလၢဝ့ၢ်ခိၣ်ဒူအဖီခိၣ်လီၤ.ဒီးတၢ်သးထီၣ်ဖးဒိၣ်အိၣ်ဝဲလၢအံၣ်စရ့လးန့ၣ်,ဒီးအဝဲသ့ၣ်တဖၣ်န့ၣ်ဟးထီၣ်ဝဲလၢအအိၣ်,ဒီးက့ၤက့ၤဝဲဆူအကီၢ်ဒၣ်ဝဲန့ၣ်လီၤ.
Copyright information for
KswSKMB