2Pe 1 | KswSKMB | STEP | ယ့ၣ်ရှူးခရံာ်အခ့အပှၤဒီးအပှၤတၢ်မၢဖိ,ယၤစီၤၡံမိၣ်ပ့းတရူး,ယစံးဘၣ်ပှၤလၢအန့ၢ်ဘၣ်တၢ်စူၢ်တၢ်နာ်လုၢ်ဒိၣ်ပှ့ၤဒိၣ်တမံၤဃီဒီးပှၤ,လၢယွၤဒီးပတၢ်အုၣ်က့ၤခီၣ်က့ၤ,ယ့ၣ်ရှူးခရံာ်,အတၢ်တီတၢ်လိၤအပူၤန့ၣ်,

‏ 2 Peter 1

1 ယ့ၣ်ရှူးခရံာ်အခ့အပှၤဒီးအပှၤတၢ်မၢဖိ,ယၤစီၤၡံမိၣ်ပ့းတရူး,ယစံးဘၣ်ပှၤလၢအန့ၢ်ဘၣ်တၢ်စူၢ်တၢ်နာ်လုၢ်ဒိၣ်ပှ့ၤဒိၣ်တမံၤဃီဒီးပှၤ,လၢယွၤဒီးပတၢ်အုၣ်က့ၤခီၣ်က့ၤ,ယ့ၣ်ရှူးခရံာ်,အတၢ်တီတၢ်လိၤအပူၤန့ၣ်, 2 မ်တၢ်ဘျုးတၢ်ဖှိၣ်,ဒီးတၢ်ဃူတၢ်ဖိးအါထီၣ်လၢသုဂီၢ်,လၢတၢ်သ့ၣ်ညါယွၤ,ဒီးပကစၢ်ယ့ၣ်ရှူးခရံာ်အပူၤန့ၣ်တက့ၢ်.

3 အဂ့ၢ်ဒ်အံၤ,မ့ၢ်လၢတၢ်သ့ၣ်ညါဘၣ်ဃးဒီးပှၤလၢအကိးန့ၢ်ပှၤလၢအလၤကပီၤ,ဒီးအတၢ်ဂ့ၤတၢ်ဝါဒၣ်ဝဲသတးဒီး,ယွၤအစိအကမီၤဟ့ၣ်လီၤလံပှၤလၢကယဲၢ်တၢ်ဘၣ်ဃးဒီးတၢ်မူဒီးတၢ်ယူးယီၣ်ယွၤ, 4 ဒီးဟ့ၣ်လီၤလံစ့ၢ်ကီးပှၤလၢတၢ်စံးပာ်အဒိၣ်အမုၢ်ဒီးအလုၢ်ဒိၣ်ပှ့ၤဒိၣ်,ဒ်သိးသုကပူၤဖျဲးဒီးတၢ်ဟးဂီၤလၢအကဲထီၣ်ဝဲလၢဟီၣ်ခိၣ်ချၢလၢပသးကွံတၢ်အဃိ,ဒီးန့ၢ်ဃုာ်တၢ်အလုၢ်အလၢ်ဘၣ်ဃးဒီးယွၤန့ၣ်လီၤ. 5 လၢတၢ်န့ၣ်အဃိစ့ၢ်ကီး,သုမၤတၢ်လၢကယဲၢ်တၢ်ဂုာ်မၤခဲလၢာ်သတးဒီး,လၢသုတၢ်နာ်အဖီခိၣ်,ပာ်ဖှိၣ်တၢ်ဂ့ၤတၢ်ဝါ,ဒီးလၢတၢ်ဂ့ၤတၢ်ဝါအဖီခိၣ်,တၢ်သ့ၣ်ညါ, 6 ဒီးလၢတၢ်သ့ၣ်ညါအဖီခိၣ်,တၢ်ကီၤပသး,ဒီးလၢတၢ်ကီၤပသးအဖီခိၣ်,တၢ်ဝံသးစူၤဒီးလၢတၢ်ဝံသးစူၤအဖီခိၣ်,တၢ်ယူးယီၣ်ယွၤ, 7 ဒီးလၢတၢ်ယူးယီၣ်ယွၤအဖီခိၣ်,တၢ်အဲၣ်ပုၢ်အဲၣ်ဝဲၢ်,ဒီးလၢတၢ်အဲၣ်ပုၢ်အဲၣ်ဝဲၢ်အဖီခိၣ်,တၢ်အဲၣ်တၢ်ကွံတက့ၢ်. 8 အဂ့ၢ်ဒ်အံၤ,တၢ်တဖၣ်န့ၣ်မ့ၢ်အိၣ်လၢသုပူၤ,ဒီးမ့ၢ်အါထီၣ်ဝဲဒီး,ကဒုးကဲထီၣ်သုလၢသုတမ့ၢ်ဘၣ်ပှၤအကၢၣ်အကျူ,ဒီးပှၤတသၣ်ထီၣ်ဘၣ်လၢတၢ်သ့ၣ်ညါပကစၢ်ယ့ၣ်ရှူးခရံာ်အဂ့ၢ်န့ၣ်ဘၣ်လီၤ. 9 အဂ့ၢ်ဒ်အံၤ,ပှၤလၢတၢ်န့ၣ်တဖၣ်တအိၣ်ဘၣ်န့ၣ်,မ့ၢ်ပှၤမဲာ်ဘျီၣ်,ဒီးတထံၣ်ဘၣ်တၢ်အယံၤဘၣ်,ဒီးသးပ့ၤနီၣ်လၢအဒိးကဆှီထီၣ်အသးလၢအတၢ်ဒဲးဘးလီၢ်လံၤန့ၣ်လီၤ.

10 မၤသးဒ်န့ၣ်ဒီး,ဒီပုၢ်ဝဲၢ်သ့ၣ်ဧၢ,ကျဲးစၢးမၤဂၢၢ်မၤကျၢၤတၢ်ကိးန့ၢ်သုဒီးတၢ်ဃုထၢသု,ဒိၣ်ဒၣ်တၢ်န့ၣ်တက့ၢ်.အဂ့ၢ်ဒ်အံၤ,သုမ့ၢ်မၤတၢ်တဖၣ်န့ၣ်ဒီး,သုတလီၤဃံၤလၢၤဘၣ်နီတခီၣ်ဘၣ်. 11 အဂ့ၢ်ဒ်အံၤ,ဒ်န့ၣ်အသိးတၢ်ကကပာ်ဖှိၣ်ဒီးသုထူးထူးတီၤတီၤလၢတၢ်လဲၤနုာ်ဆူတၢ်အုၣ်က့ၤခီၣ်က့ၤ,ပကစၢ်ယ့ၣ်ရှူးခရံာ်အဘီအမုၢ်အထူအယိာ်အပူၤလီၤ.

12 မ်ဒ်န့ၣ်ဒီးသုသ့ၣ်ညါတၢ်န့ၣ်တဖၣ်,ဒီးသုအိၣ်ဂၢၢ်ဆိးကျၢၤလၢတၢ်မ့ၢ်တၢ်တီလၢအအိၣ်ဒီးသုနာ်သက့ဒီးယကဂုာ်ဒုးသ့ၣ်နီၣ်ထီၣ်သုလၢအဂ့ၢ်အကျိၤ,တဘိယူၢ်ဃီလီၤ. 13 ဒီးယဆိကမိၣ်လၢယအိၣ်ဒံးလၢဒဲအံၤအဖၢမုၢ်ဒီး,ယဂ့ၤထိၣ်ဂဲၤသုလၢတၢ်သ့ၣ်နီၣ်ထီၣ်အဂီၢ်လီၤ. 14 ယသ့ၣ်ညါလၢယဘၣ်ပာ်ကွံာ်ယဒဲအံၤချ့သဒံး,ဒ်ပကစၢ်ယ့ၣ်ရှူးခရံာ်ဒုးနဲၣ်ယၤအသိးန့ၣ်လီၤ. 15 ဒီးယကကျဲးစၢးတၢ်ဒ်သိးယက့ၤက့ၤအလီၢ်ခံန့ၣ်,သုကသ့ၣ်နီၣ်ထီၣ်တၢ်တဖၣ်အံၤတထံၣ်ဃီလီၤ.

16 အဂ့ၢ်ဒ်အံၤ,လၢပဒုးသ့ၣ်ညါသုလၢပကစၢ်ယ့ၣ်ရှူးခရံာ်အစိအကမီၤ,ဒီးအဟဲလီၤအဂ့ၢ်အကျိၤန့ၣ်,ပတပိာ်ဘၣ်ပူကဲထီၣ်လၢတၢ်ကူၣ်တၢ်ဆးန့ၣ်ဘၣ်.မ့မ့ၢ်ပမ့ၢ်ပှၤလၢအထံၣ်ဘၣ်အစိအကမီၤလၢပမဲာ်လီၤ. 17 အဂ့ၢ်ဒ်အံၤ,လၢတၢ်အကလုၢ်ဟဲလၢတၢ်လၤကပီၤကပြုၢ်ကပြီၤဆူအအိၣ်ဒ်အံၤ,အအံၤမ့ၢ်ယဖိခွါလၢယအဲၣ်,ဒီးဘၣ်ယသးလၢအီၤန့ၣ်ဒီး, ^{▼▼1:17 မး.၁၇း၅}မ့ၢ်အဒိးန့ၢ်တၢ်ပာ်ဒိၣ်ပာ်ထီ,ဒီးတၢ်လၤတၢ်ကပီၤလၢပၢ်ယွၤန့ၣ်လီၤ. 18 ဒီးဖဲပအိၣ်ဒီးအီၤလၢကစၢၢ်စီဆှံအလိၤအဖၢမုၢ်ဒီး,ပနၢ်ဟူတၢ်အကလုၢ်အံၤလၢအဟဲလီၤလၢမူခိၣ်လီၤ. 19 ဒီးပအိၣ်ဒီးဝံအကလုၢ်ဂၢၢ်န့ၢ်ကျၢၤန့ၢ်အလီၢ်တက့ၢ်,လၢသုဂ့ၤကွၢ်ထံအီၤဒ်မ့ၣ်အူဒၢကပီၤထီၣ်လၢတၢ်ခံးအလီၢ်အသိးတုၤလၢမုၢ်ဆ့ၣ်ထီၣ်,ဒီးဆၣ်တူၢ်ဂီၤထီၣ်ဘးလၢသုသးကံၢ်ပူၤန့ၣ်လီၤ. 20 သ့ၣ်ညါဆိတၢ်အံၤတက့ၢ်.လံာ်အကလုၢ်လၢဝံအကျိာ်န့ၣ်,တၢ်တဒုးအိၣ်ဖျါထီၣ်အခီပညီဖဲဒၣ်ပသးပလိၤနီတထံၣ်ဘၣ်. 21 အဂ့ၢ်ဒ်အံၤ,ဝံအကလုၢ်တဟဲဘၣ်ဝဲလၢပျၢၤဖဲဒၣ်ပှၤကညီအသးဘၣ်.မ့ၢ်ဒ်သးစီဆှံဘိးထီၣ်အသးအသိးန့ၣ်,ယွၤအပှၤစီဆှံကတိၤတၢ်န့ၣ်လီၤ.