Act 1 | KswSKMB | STEP | စီၤသီးဖံၤလူးဧၢ,ကယဲၢ်တၢ်လၢယ့ၣ်ရှူးမၤဒီးသိၣ်က့ၤသီက့ၤလၢအခီၣ်ထံးတုၤလီၤလၢမုၢ်တနံၤလၢအမၤလိာ်ပှၤတၢ်မၢဖိလၢအဃုထၢဝဲတဖၣ်,လၢသးစီဆှံ,ဒီးဘၣ်တၢ်စိာ်ထီၣ်အီၤန့ၣ်,

‏ Acts 1

1 စီၤသီးဖံၤလူးဧၢ,ကယဲၢ်တၢ်လၢယ့ၣ်ရှူးမၤဒီးသိၣ်က့ၤသီက့ၤလၢအခီၣ်ထံးတုၤလီၤလၢမုၢ်တနံၤလၢအမၤလိာ်ပှၤတၢ်မၢဖိလၢအဃုထၢဝဲတဖၣ်,လၢသးစီဆှံ,ဒီးဘၣ်တၢ်စိာ်ထီၣ်အီၤန့ၣ်, 2 ယကွဲးပာ်လံာ်တဘ့ၣ်လံ. 3 ဒီးအဝဲဒၣ်ဒုးနဲၣ်အသးလၢအီၤလၢအမူဒံးလၢအဒိးတၢ်အလီၢ်ခံ,လၢတၢ်အုၣ်အသးအါမံၤလၢပသးဒ့ဒီတသ့ဘၣ်,ဒီးအိၣ်ဖျါထီၣ်လၢအီၤအနံၤလွံၢ်ဆံညါ,ဒီးကတိၤတၢ်ဘၣ်ဃးဒီးယွၤအဘီအမုၢ်လီၤ.

4 ဒီးအဝဲသ့ၣ်အိၣ်ဖှိၣ်ရိဖှိၣ်ဒီးအီၤ,ဒီးအဝဲဒၣ်မၤလိာ်အီၤဒ်သိးအသုတဟးထီၣ်လၢယရူၤၡလ့ၣ်တဂ့ၤ.မ့မ့ၢ်လၢအကဆူလၢ်ဟူပၢ်အတၢ်စံးပာ်,လၢသုနၢ်ဟူတ့ၢ်လၢယၤလီၤ. 5 အဂ့ၢ်ဒ်အံၤ,စီၤယိၤဟၣ်ဘျၢ ^{▼▼1:5 လၢဟ့းလ့ၣ်အကျိာ်"ဘးပတံစၢ်."}တၢ်လၢထံကျါ,မ့မ့ၢ်ဆူညါတအါနံၤအါသီဘၣ်ဒီး,သုကဒိးဘျၢသုသးလၢသးစီဆှံအပူၤလီၤ.

6 မၤသးဒ်န့ၣ်ဒီးအဝဲသ့ၣ်အိၣ်ဖှိၣ်ရိဖှိၣ်ဝံၤဒီး,သံကွၢ်အီၤဒီးစံးဝဲဒၣ်,ကစၢ်ဧၢ,မ့ၢ်နကဟ့ၣ်လီၤက့ၤဘီမုၢ်လၢအံၣ်စရ့လးခဲကနံၣ်အံၤဧါ. 7 ဒီးစံးဘၣ်အီၤ,အမုၢ်အလါ,အဆၢအကတီၢ်,လၢပၢ်ပာ်လီၤလၢအစိအကမီၤဒၣ်ဝဲအပူၤန့ၣ်,တၢ်တဒုးသ့ၣ်ညါဘၣ်သုဘၣ်. 8 ဘၣ်ဆၣ်ဒီးဖဲသးစီဆှံဟဲလီၤလၢသုလိၤဝံၤဒီး,သုကဒိးန့ၢ်တၢ်အစိအကမီၤ,ဒီးသုကကဲထီၣ်ယပှၤအုၣ်အသးတဖၣ်လၢယရူၤၡလ့ၣ်,ဒီးကီၢ်ယူဒၤဒီကီၢ်ညါ,ဒီးၡၤမရံ,ဒီးပၢၢ်လၢဟီၣ်ခိၣ်အကတၢၢ်လီၤ.

9 ဒီးစံးတၢ်န့ၣ်တဖၣ်ဝံၤဒီး,အဝဲသ့ၣ်ကွၢ်အီၤအဖၢမုၢ်ဒီး,တၢ်ဟံးထီၣ်န့ၢ်အီၤ,ဒီးတၢ်အၢၣ်ဒိးန့ၢ်အီၤလၢအဝဲသ့ၣ်အမဲာ်ညါလီၤ. 10 ဒီးအဝဲသ့ၣ်ကွၢ်ထံကွၢ်ဆးဆူမူခိၣ်ဖဲအက့ၤထီၣ်အဖၢမုၢ်ဒီး,ကွၢ်ကွၢ်,ပှၤခံဂၤကူသိးတၢ်ဝါ,အိၣ်ထီၣ်လၢအဝဲသ့ၣ်အဃၢၤ, 11 ဒီးစံးဝဲဒၣ်,ပှၤကၤလံၤလါဖိသ့ၣ်ဧၢ,သုအိၣ်ဆၢထၢၣ်ကွၢ်ထီၣ်ဆူမူခိၣ်မ့ၢ်အဘၣ်မနုၤလဲၣ်.ယ့ၣ်ရှူးအကစၢ်ဒၣ်ဝဲလၢတၢ်စိာ်ထီၣ်ကွံာ်အီၤလၢသုအိၣ်ဆူမူခိၣ်န့ၣ်,ကဟဲလီၤက့ၤဒ်သုထံၣ်အက့ၤထီၣ်ဆူမူခိၣ်အသိးန့ၣ်လီၤ.

12 တုၤနုၤတစုပှၤတဖၣ်န့ၣ်က့ၤက့ၤဆူယရူၤၡလ့ၣ်လၢကစၢၢ်ကိးဝဲအမံၤလၢသ့ၣ်စၤယံးအအိၣ်လၢအယံၤဒီးယရူၤၡလ့ၣ်အိၣ်ဘှံးအနံၤတနံၤလဲၤကျဲလီၤ. 13 ဒီးတုၤအဟဲနုာ်ဒီး,လဲၤထီၣ်ဆူဒၢးအိၣ်လၢအထီၣ်ထီတတီၤလီၤ.ဒီးဖဲန့ၣ်အိၣ်ဝဲဆိးဝဲမ့ၢ်စီၤပ့းတရူးဒီးစီၤယိၤဟၣ်,စီၤယၤကိာ်ဒီးစီၤအၣ်ဒရ့း,စီၤဖံလံးပူးဒီးစီၤသိၤမါ,စီၤဘၢ်သလီးမဲဒီးစီၤမးသဲ,စီၤအၤလဖဲအဖိခွါစီၤယၤကိာ်ဒီးစီၤၡံမိၣ်စ့ၤလိာ်,ဒီးစီၤယၤကိာ်အဒီပုၢ်ဝဲၢ်စီၤယူဒၤလီၤ. 14 အဝဲသ့ၣ်ခဲလၢာ်အိၣ်ဒီးပိာ်မုၣ်သ့ၣ်,ဒီးယ့ၣ်ရှူးအမိၢ်နီၢ်မၤရံ,ဒီးအဒီပုၢ်ဝဲၢ်သ့ၣ်တဖၣ်န့ၣ်,ဘါထုကဖၣ်တၢ်တဘိယူၢ်ဃီလၢအသးတဖျၢၣ်ဃီလီၤ.

15 ဒီးတၢ်လၢမုၢ်နံၤတဖၣ်န့ၣ်,စီၤပ့းတရူးဂဲၤဆၢထၢၣ်လၢဒီပုၢ်ဝဲၢ်တဖၣ်အကျါ,(ပှၤအမံၤအိၣ်တကယၤခံဆံဃၣ်ဃၣ်),ဒီးစံးဝဲဒၣ်, 16 ပှၤပုၢ်သ့ၣ်ဝဲၢ်သ့ၣ်ဧၢ,တၢ်ကွဲးအသး,လၢသးစီဆှံစံးပာ်လၢစီၤဒၤဝံးအထးခိၣ်,လၢစီၤယူဒၤ,လၢအဆှၢပှၤလၢအဟံးဃာ်ယ့ၣ်ရှူးအဂ့ၢ်န့ၣ်,တလၢထီၣ်ပှဲၤထီၣ်ဘၣ်ဒီး,အိၣ်တသ့ဘၣ်. 17 အဂ့ၢ်ဒ်အံၤ,အဝဲဒၣ်န့ၣ်,တၢ်ဂံၢ်အီၤလၢပကျါ,ဒီးန့ၢ်ဘၣ်အလီၢ်လၢတၢ်မၤအံၤအပူၤလီၤ. 18 အဝဲဒၣ်န့ၣ်ပှ့ၤဟီၣ်ခိၣ်အကဝီၤလၢအဘူးအၢအလဲသီ,ဒီးလီၤတဲာ်ဆှိခိၣ်,ဒီးအဖးဖီပိၢ်ဖး,ဒီးအပှံာ်လီၤလဲာ်ခဲလၢာ်လီၤ. 19 ဒီးပှၤအိၣ်ဝဲဆိးဝဲလၢယရူၤၡလ့ၣ်သ့ၣ်ညါဝဲခဲလၢာ်သတးဒီး,ယုၢ်ဟီၣ်ခိၣ်တကဝီၤန့ၣ်အမံၤလၢအကလုၢ်ဒၣ်ဝဲလၢအၤက့းလဒၤမါ,ဒ်ပစံးတၢ်အသိး,တၢ်သွံၣ်အဟီၣ်ခိၣ်ကဝီၤလီၤ. 20 အဂ့ၢ်ဒ်အံၤ,တၢ်အိၣ်ကွဲးအသးလၢလံာ်စံးထီၣ်ပတြၢၤ,မ်အအိၣ်အဆိးအလီၢ်,အိၣ်သယုၢ်တက့ၢ်.မ်ပှၤသုတအိၣ်တဆိးလၢအပူၤတဂ့ၤ. ^{▼▼1:20 စံး.၆၉း၂၅}ဒီး,မ်ပှၤဂၤထီၣ်ဘးအကွၢ်တၢ်အလီၢ်တက့ၢ်. ^{▼▼1:20 စံး.၁၀၉း၈}

21 မၤသးဒ်န့ၣ်ဒီးလၢကစၢ်ယ့ၣ်ရှူးနုာ်ဘၣ်ဟးထီၣ်လၢပကျါ 22 လၢစီၤယိၤဟၣ်ဘျၢ ^{▼▼1:22 လၢဟ့းလ့ၣ်အကျိာ်"ဘးပတံစၢ်."}တၢ်,တုၤလီၤအနံၤအသီလၢအဘၣ်တၢ်စိာ်ထီၣ်ကွံာ်လၢပအိၣ်န့ၣ်,ပှၤလဲၤတၢ်လၢပကျါကိးအကတီၢ်ဒဲးတဖၣ်,ဘၣ်ကဲထီၣ်ပှၤအုၣ်အသးဒီးပဝဲဒၣ်,လၢအဂဲၤဆၢထၢၣ်က့ၤအဂ့ၢ်,တဂၤလီၤ. 23 ဒီးအဝဲသ့ၣ်ပာ်လီၤပှၤခံဂၤ,စီၤယိၤသးကိးဝဲလၢစီၤဘၢ်စဘါ,ဒီးကိးက့ၤဝဲအမံၤသီလၢစီၤယူစတူး,ဒီးစီၤမးသံ, 24 ဒီးဘါထုကဖၣ်တၢ်ဒီးစံးဝဲဒၣ်,ကစၢ်လၢအသ့ၣ်ညါပှၤခဲလၢာ်အသူၣ်အသးဧၢ,ပှၤခံဂၤအံၤ,ဒုးနဲၣ်တဂၤလၢနဃုထၢနဲ, 25 ဒ်သိးအကန့ၢ်ဘၣ်တၢ်မၤအလီၢ်,ဒီးတၢ်မၢဖိအလီၢ်အံၤ,လၢစီၤယူဒၤလီၤတဲာ်ကွံာ်ဝဲဒ်သိးအကက့ၤက့ၤဝဲဆူအလီၢ်ဒၣ်ဝဲတက့ၢ်. 26 ဒီးဖးဝဲ,ဒီးဘၣ်စီၤမးသံ,ဒီးတၢ်ဂံၢ်ဃုာ်အီၤလၢပှၤတၢ်မၢဖိတဆံတဂၤအကျါလီၤ.