‏ Acts 20

1ဒီးတၢ်တၢထီၣ်တၢလီၤအိၣ်ဘှီၣ်ကလာ်အလီၢ်ခံဒီး,စီၤပီလူးကိးက့ၤအပျဲၢ်အဘီၣ်ဒီးကတိၤဒိၣ်အီၤ,ဒီးသဆၣ်ထီၣ်အခံဝံၤဒီး,ဟးထီၣ်ကွံာ်ဒ်သိးအကလဲၤဆူမၤက့းဒနံလီၤ. 2ဒီးလဲၤခီဂာ်ထံဧိၤကီၢ်ဧိၤ,ဒီးသဆၣ်ထီၣ်ပှၤအခံလၢတၢ်ကတိၤအါဝံၤဒီး,ဟဲဝဲဆူကီၢ်ဟ့းလ့ၣ်လီၤ. 3ဒီးအိၣ်ဖဲန့ၣ်သၢလါညါ,ဒီးသါကဒိးထီၣ်ကဘီဒီးလဲၤဆူကီၢ်စူၤရံ,ဒီးမ့ၢ်ပှၤယူဒၤဖိအတၢ်ကူၣ်အၢဒီး,ပာ်အသးလၢအကက့ၤခီဂာ်မၤက့းဒနံလီၤ. 4ဒီးပှၤဘ့းရံၤဖိ,စီၤပူရူးအဖိခွါ,စီၤစိပၤတြူး,ဒီးပှၤသ့းစၤလနံဖိ,စီၤအရံစတၢ်ဃူး,ဒီးစီၤစ့းကူၣ်ဒူး,ဒီးပှၤဒ့ၢ်ဘ့ၤဖိစီၤကါယူး,ဒီးစီၤတံၤမသ့း,ဒီးပှၤအၤစံဖိစီၤတူဃံၤကူး,ဒီးစီၤတြီးဖံၤမူးသ့ၣ်တဖၣ်လဲၤပိာ်အခံပၢၢ်လၢအၤစံလီၤ. 5ဒီးအဝဲသ့ၣ်တဖၣ်လဲၤပာ်ဝဲ,ဒီးဆူလၢ်ဟူပှၤလၢတြိၤအါအပူၤလီၤ. 6ဒီးဘူၣ်ကိၣ်တဘၣ်ဒီးကိၣ်မံၣ်အနံၤအသီပူၤကွံာ်ဒီး,ပဒိးထီၣ်ကဘီဒီးပဟးထီၣ်လၢဖံလံးပံးအပူၤဒီးပလဲၤတုၤလၢအဝဲသ့ၣ်အအိၣ်ဖဲတြိၤအါ,လၢယဲၢ်နံၤအတီၢ်ပူၤ,ဒီးပအိၣ်ဖဲန့ၣ်နွံနံၤလီၤ. 7ဒီးနွံနံၤအကျါမုၢ်ခီၣ်ထံးန့ၣ်,ပအိၣ်ဖှိၣ်ရိဖှိၣ်ဒ်သိးကစိၢ်ဘျဲးကိၣ်,ဒီးစီၤပီလူးသါကဟးထီၣ်လၢမုၢ်ဆ့ၣ်ထီၣ်တနံၤသတးဒီး,စံၣ်တဲၤတဲလီၤတၢ်တုၤလၢဖးဖီမုၢ်လီၤ. 8ဒီးမ့ၣ်အူဒၢအိၣ်အါဖျၢၣ်လၢပအိၣ်ဖှိၣ်ရိဖှိၣ်အဒၢးလၢတၢ်ထီၣ်ထီတတီၤအပူၤလီၤ. 9ဒီးပှၤဖိၣ်သၣ်ခွါစီၤအူတူၤဃူးတဂၤ,ဆ့ၣ်နီၤဝဲလၢတြဲၤနါဟိအပူၤဒီးမံသပ့ၤဝဲယိာ်,ဒီးစီၤပီလူးစံၣ်တဲၤတဲလီၤတၢ်ဃဲးဃဲးဒီး,မ့ၢ်အမံသပ့ၤဝဲဒီး,လီၤတဲာ်ဝဲလၢဟံၣ်အသၢတီၤတတီၤန့ၣ်,ဆူကိာ်လာ်ဒ့ဒီးသံဝဲ,ဒီးပှၤဟံးထီၣ်က့ၤအီၤလီၤ. 10ဒီးစီၤပီလူးယုၢ်လီၤ,ဒီးမံလီၤဝဲလၢအဖီခိၣ်,ဒီးဖိးဟုအီၤဒီးစံးဝဲဒၣ်,သီၣ်ကလာ်တဂ့ၤ.အဂ့ၢ်ဒ်အံၤ,အသးသမူအိၣ်လၢအပူၤလီၤ. 11ဒီးက့ၤထီၣ်က့ၤဒီးစိၢ်ဘျဲးကိၣ်,ဒီးအီၣ်တၢ်,ဒီးကတိၤတၢ်ဃဲးဃဲးတုၤမုၢ်ဆ့ၣ်ဝါထီၣ်ဒီး,ဟးထီၣ်ဝဲဒ်န့ၣ်လီၤ. 12ဒီးပှၤဟဲစိာ်ထီၣ်ပှၤဖိၣ်သၣ်ခွါအိၣ်ဒီးအသးသမူဒီး,အိၣ်ခုၣ်အိၣ်မုာ်တဆံးတစှၤဘၣ်လီၤ.

13ဒီးပဝဲဒၣ်အံၤ,ပလဲၤဒိးထီၣ်ပာ်ကဘီဒီးပလဲၤဆူအၣ်စူး,ဒီးပဆိကမိၣ်လၢပကဒိးန့ၢ်စီၤပီလူးဖဲန့ၣ်လီၤ.အဂ့ၢ်ဒ်အံၤ,သါကလဲၤလၢအခီၣ်ဆူန့ၣ်,ဒီးမၤလိာ်ဝဲဒ်န့ၣ်လီၤ. 14ဒီးတုၤပသဂၢၢ်အီၤလၢအၣ်စူးဒီး,ပဒိးန့ၢ်က့ၤအီၤဒီးပလဲၤဆူမ့ၤတိၤလ့န့ၣ်လီၤ. 15ဒီးပဟးထီၣ်ဖဲန့ၣ်,ဒီးမုၢ်ဆ့ၣ်ထီၣ်တနံၤန့ၣ်,ပလဲၤပၢၢ်လၢတၢ်အိၣ်သဃီၤဒီးဃံအူးလီၤ.ဒီးမုၢ်ဆ့ၣ်ထီၣ်တနံၤန့ၣ်,ပလဲၤပၢၢ်လၢစါမူး,ဒီးပအိၣ်ကတီၢ်လၢတြိၤကူးလံအပူၤ,ဒီးမုၢ်ဆ့ၣ်ထီၣ်တနံၤန့ၣ်ပလဲၤဆူမံလ့ၤတူးလီၤ. 16အဂ့ၢ်ဒ်အံၤ,စီၤပီလူးပာ်လီၤအသးလၢအကလဲၤပူၤကွံာ်အ့းဖ့းစူးဒ်သိးအသုတအိၣ်ဃဲးဃဲးလၢအၤစံအပူၤတဂ့ၤလီၤ.အဂ့ၢ်ဒ်အံၤ,ဂုာ်လဲၤဝဲဒ်သိးမ့ၢ်သ့ဒီး,ကတုၤလၢယရူၤၡလ့ၣ်ဖဲဘူၣ်ယဲၢ်ဆံနံၤတနံၤလီၤ.

17ဒီးလၢမံလ့ၤတူးအပူၤန့ၣ်,မၢပှၤလဲၤကိးက့ၤတၢ်အိၣ်ဖှိၣ်အသူၣ်က့သးပှၢ်လၢအ့းဖ့းစူးအပူၤလီၤ. 18ဒီးတုၤအဝဲသ့ၣ်ဟဲတုၤလၢအအိၣ်ဒီး,အဝဲဒၣ်စံးဘၣ်အီၤ,လၢမုၢ်နံၤအခီၣ်ထံးလၢယဟဲတုၤလၢအၤစံလံၤလံၤ,ယမၤထီဘိလၢသုကျါဒ်လဲၣ်ဒ်လဲၣ်န့ၣ်,သုသ့ၣ်ညါသုဝဲလီၤ. 19ယမၤကစၢ်အတၢ်အိၣ်ဒီးတၢ်ဆီၣ်လီၤယသးတုၤအလၢာ်,ဒီးယမဲာ်ထံလီၤ,ဒီးတၢ်လ့ပစီလၢအဘၣ်ယၤလၢပှၤယူဒၤဖိကူၣ်ထီဒါယၤအဃိလီၤ. 20ဒီးလၢတၢ်ကမၤအါထီၣ်သုဘျုးသုဖှိၣ်န့ၣ်ယတပာ်ခူသူၣ်တၢ်နီတမံၤဘၣ်.ဒီးပှၤဂီၢ်မုၢ်အမဲာ်ညါမ့ၢ်ဂ့ၤ,တဟံၣ်စဲတဟံၣ်,တဟံၣ်စဲတဟံၣ်မ့ၢ်ဂ့ၤ,ယစံၣ်တဲၤတဲလီၤသု,ဒီးယသိၣ်က့ၤသီက့ၤသု, 21ဒီးအုၣ်ယသးလၢပှၤယူဒၤဖိဒီးပှၤဟ့းလ့ၣ်ဖိအမဲာ်ညါ,လၢတၢ်ပီၢ်ယၢ်လီၤက့ၤပသးလၢယွၤအမဲာ်ညါ,ဒီးတၢ်စူၢ်က့ၤနာ်က့ၤပကစၢ်ယ့ၣ်ရှူးခရံာ်အဂ့ၢ်အကျိၤဒ်လဲၣ်ဒ်လဲၣ်န့ၣ်(သုသ့ၣ်ညါ)လီၤ.

22ဒီးခဲကနံၣ်အံၤကွၢ်ကွၢ်,ယဘၣ်စၢဃာ်လၢသးန့ၣ်,ဒီးယလဲၤဆူယရူၤၡလ့ၣ်အပူၤလီၤ.ဒီးဖဲန့ၣ်တၢ်ကဘၣ်ယၤဒ်လဲၣ်ဒ်လဲၣ်န့ၣ်,ယတသ့ၣ်ညါဘၣ်. 23မ့ၢ်နာ်သက့ဒ်န့ၣ်ဒီးသးစီဆှံလၢဝ့ၢ်ကိးဖျၢၣ်ဒဲးန့ၣ်,အုၣ်အသးလၢယၤ,လီၤတံၢ်လီၤဆဲး,ဒီးစံးလၢတၢ်စၢဃာ်ဒီးတၢ်နးတၢ်ဖှီၣ်ဆူလၢ်ဟူယၤလီၤ. 24ဘၣ်ဆၣ်ဒီးယတပာ်ဘၣ်တၢ်န့ၣ်တဖၣ်လၢတၢ်နီတမံၤဘၣ်,ဒီးယတပာ်ဘၣ်ယသးသမူလၢတၢ်လုၢ်ဒိၣ်ပှ့ၤဒိၣ်လၢယဂီၢ်ဒၣ်ယဲ,ဒ်သိးယကမၤဝံၤယတၢ်ဃ့ၢ်အိၣ်ဒီးတၢ်သးခု,ဒီးတၢ်အခ့အပှၤအတၢ်မၤလၢယဒိးန့ၢ်လၢကစၢ်ယ့ၣ်ရှူးခရံာ်,လၢယကအုၣ်ယသးလီၤတံၢ်လီၤဆဲးလၢယွၤအဘျုးအဖှိၣ်အတၢ်သးခုအကစီၣ်န့ၣ်အဂ့ၢ်လီၤ.

25ဒီးခဲကနံၣ်အံၤ,ကွၢ်ကွၢ်သုဝဲဒၣ်ခဲလၢာ်လၢယလဲၤဝ့ၤဝီၤတၢ်လၢသုကျါ,ဒီးစံၣ်တဲၤတဲလီၤယွၤအဘီအမုၢ်န့ၣ်,ယသ့ၣ်ညါလၢသုတထံၣ်လၢၤဘၣ်ယမဲာ်ဘၣ်. 26မ်ဒ်န့ၣ်ဒီးအအံၤတနံၤအံၤ,ယအုၣ်ယသးလၢသုမဲာ်ညါလၢယကဆှီဒီးပှၤကညီအသွံၣ်ကိးဂၤဒဲးလီၤ. 27အဂ့ၢ်ဒ်အံၤ,ယတဟးဆှဲးစံၣ်တဲၤတဲလီၤသုလၢယွၤအတၢ်ကူၣ်တၢ်ဖးနီတမံၤဘၣ်.

28မၤသးဒ်န့ၣ်ဒီးကွၢ်လီၤသုသး,ဒီးသိတဖုခဲလၢာ်လၢသးစီဆှံပာ်သုလၢပှၤကွၢ်အီၤန့ၣ်,ဒ်သိးသုကအံးက့ၤကွၢ်က့ၤယွၤအတၢ်အိၣ်ဖှိၣ်လၢအပှ့ၤက့ၤဝဲလၢအသွံၣ်ဒၣ်ဝဲန့ၣ်တက့ၢ်. 29အဂ့ၢ်ဒ်အံၤ,ယသ့ၣ်ညါတၢ်အံၤ,တုၤယလဲၤတၢ်အလီၢ်ခံဒီး,ထွံၣ်မံၤဒူလၢအတသးလီဘၣ်သိဂီၢ်မုၢ်တဖၣ်န့ၣ်,ကဟဲနုာ်လၢသုကျါလီၤ. 30ဒီးပှၤကဂဲၤဆၢထၢၣ်လၢသုကျါဒၣ်သုဝဲ,ဒီးစံၣ်တဲၤတဲလီၤတၢ်လၢအဒၢက့ၣ်တဖၣ်,ဒ်သိးအပျဲၢ်အဘီၣ်ကပိာ်အခံလီၤ. 31မၤသးဒ်န့ၣ်ဒီးဆိးသီတက့ၢ်.ဒီးသ့ၣ်နီၣ်ထီၣ်လၢယတဆိတ့ၢ်ဘၣ်ဒီး,ယသိၣ်က့ၤသီက့ၤသု,အိၣ်ဒီးမဲာ်ထံမဲာ်နိ,သၢနံၣ်ညါ,လၢမုၢ်ဆါဆဲးလၢမုၢ်နၤ,ကိးဂၤဒဲးတက့ၢ်.

32ဒီးခဲကနံၣ်အံၤပုၢ်သ့ၣ်ဝဲၢ်သ့ၣ်ဧၢ,ယပာ်သုလၢယွၤအပူၤ,ဒီးလၢအဘျုးအဖှိၣ်အကလုၢ်အကထါအပူၤလၢအမၤထီၣ်မၤထီသုဒီးဟ့ၣ်သါသုတၢ်လၢကယဲၢ်ပှၤစီဆှံအကျါသ့လီၤ. 33ယတသးကွံဘၣ်ပှၤထူမ့ၢ်ဂ့ၤ,ပှၤစ့မ့ၢ်ဂ့ၤ,ပှၤကူပှၤသိးမ့ၢ်ဂ့ၤ,နီတဂၤဘၣ်. 34သုသ့ၣ်ညါဒၣ်သုဝဲ,လၢယစုအံၤမၤန့ၢ်တၢ်လၢယဂီၢ်ဒီးလၢပှၤအိၣ်ဒီးယၤအဂီၢ်လီၤ. 35ဒ်န့ၣ်အသိးယဒုးနဲၣ်သုလၢတၢ်ကိးမံၤဒဲးလၢသုဂ့ၤမၤတၢ်,ဒီးမၤစၢၤပှၤအဂံၢ်စၢ်ဘါစၢ်,ဒီးသ့ၣ်နီၣ်ထီၣ်ကစၢ်ယ့ၣ်ရှူးအကလုၢ်အကထါ,လၢအကစၢ်ဒၣ်ဝဲစံးလၢဟ့ၣ်တၢ်န့ၣ်ဘၣ်တၢ်ဆိၣ်ဂ့ၤအါန့ၢ်ဒိးန့ၢ်တၢ်တက့ၢ်လီၤ.

36ဒီးစံးတၢ်ဒ်န့ၣ်ဒီး,ချံးလီၤအခီၣ်,ဒီးဘါထုကဖၣ်တၢ်ဒီးပှၤခဲလၢာ်လီၤ. 37ဒီးအဝဲသ့ၣ်ခဲလၢာ်ဟီၣ်ဝဲအါအါကလဲာ်,ဒီးထိၣ်လီၤတီၢ်အသးလၢစီၤပီလူးအကိာ်,ဒီးနၢမူအီၤလီၤ.ဒီးအသူၣ်အုးသးအုးဒိၣ်ကတၢၢ်,လၢအတၢ်ကတိၤလၢအစံးတ့ၢ်ဝဲ,လၢအဝဲသ့ၣ်တထံၣ်လၢၤဘၣ်အမဲာ်ဘၣ်အဃိလီၤ. 38ဒီးလဲၤဆှၢအီၤဆူကဘီပူၤလီၤ.