Act 22 | KswSKMB | STEP | ပှၤပုၢ်သ့ၣ်ဝဲၢ်သ့ၣ်ဒီးပၢ်သ့ၣ်ဧၢ,ယတၢ်ကတိၤပူၤဖျဲးတၢ်လၢသုမဲာ်ညါအံၤ,ကနၣ်ဘၣ်တက့ၢ်.

‏ Acts 22

1 ပှၤပုၢ်သ့ၣ်ဝဲၢ်သ့ၣ်ဒီးပၢ်သ့ၣ်ဧၢ,ယတၢ်ကတိၤပူၤဖျဲးတၢ်လၢသုမဲာ်ညါအံၤ,ကနၣ်ဘၣ်တက့ၢ်. 2 ဒီးတုၤအနၢ်ဟူလၢအစံးဘၣ်အီၤလၢဧ့ၤဘြံၤအကလုၢ်ဒီး,အိၣ်ဘှီၣ်ဝဲအါန့ၢ်အန့ၣ်တက့ၢ်,ဒီးစံးဝဲဒၣ်, 3 ယဲဒၣ်အံၤယမ့ၢ်ပှၤယူဒၤဖိအိၣ်ဖျဲၣ်လၢတၢ်စူးလၢကံၤလံၤလံအပူၤ,ဒီးယမၤလိလံာ်လၢဝ့ၢ်ပူၤအံၤလၢစီၤကမၤလ့လးအခီၣ်ထံး,ဒီးယဘၣ်တၢ်သိၣ်တၢ်သီလၢပပၢ်သ့ၣ်အလုၢ်အလၢ်လီၤတံၢ်လီၤဆဲး,ဒီးယဂဲၤလိာ်ယသးလၢယွၤအပူၤဒ်သုဝဲခဲကနံၣ်အံၤခဲလၢာ်အသိးန့ၣ်လီၤ. 4 ဒီးယစၢဃာ်ပှၤပိာ်မုၣ်,ဒီးပိာ်ခွါ,ဒီးယဒၢနုာ်အီၤလၢဃိာ်ပူၤ,ဒီးယမၤအၢကျဲအံၤပၢၢ်လၢတၢ်မၤသံ, 5 ဒ်ပှၤလုၢ်တၢ်အခိၣ်,ဒီးပှၤသူၣ်က့သးပှၢ်ခဲလၢာ်ကအုၣ်အသးလၢယဂီၢ်အသိး,ဒီးယဒိးန့ၢ်လံာ်လၢအီၤဆူပှၤဒီပုၢ်ဝဲၢ်,ဒီးယလဲၤဆူဒၤမ့ၤစ့းဒ်သိးယကမိၤန့ၢ်ပှၤအိၣ်ဖဲန့ၣ်ဘၣ်စၢဃာ်ဆူယရူၤၡလ့ၣ်ဒ်သိးအကဘၣ်တၢ်စံၣ်ညီၣ်လီၤ.

6 ဒီးတၢ်မၤအသးလၢယလဲၤတၢ်အဖၢမုၢ်,ဒီးဘူးထီၣ်ဒီးဒၤမ့ၤစ့းဒီးလၢမုၢ်ထူၣ်ဃၣ်ဃၣ်န့ၣ်,တၢ်ကပီၤဖးဒိၣ်လၢမူခိၣ်,ကပီၤထီၣ်ဝးတရံးယၤသလ့ၢ်ကလာ်လီၤ. 7 ဒီးယလီၤဃံၤလၢဟီၣ်ခိၣ်အဖီခိၣ်,ဒီးယနၢ်ဟူတၢ်ကလုၢ်သီၣ်စံးဘၣ်ယၤ,စီၤစီလူးဧၢ,စီၤစီလူးဧၢ,နမၤအၤမၤသီယၤဘၣ်မနုၤလဲၣ်. 8 ဒီးယစံးဆၢ,ကစၢ်ဧၢ,နမ့ၢ်မတၤတဂၤလဲၣ်.ဒီးစံးဘၣ်ယၤ,ယမ့ၢ်ပှၤနစၤရ့းဖိယ့ၣ်ရှူးလၢနမၤအၢမၤသီအီၤလီၤ. 9 ဒီးပှၤအိၣ်ဒီးယၤတဖၣ်ထံၣ်တၢ်ကပီၤ,ဒီးပျံၤတၢ်လီၤ.မ့မ့ၢ်ပှၤကတိၤတၢ်ဒီးယၤအကလုၢ်န့ၣ်,တနၢ်ဟူဘၣ်ဝဲဘၣ်. 10 ဒီးယစံး,ကစၢ်ဧၢ,ယကမၤမနုၤလဲၣ်.ဒီးကစၢ်န့ၣ်စံးဘၣ်ယၤ,ဂဲၤဆၢထၢၣ်ဒီးလဲၤဆူဒၤမ့ၤစ့းအပူၤ,ဒီးတၢ်မၤလၢတၢ်ပာ်ဝဲလၢနဘၣ်မၤအီၤန့ၣ်,တၢ်ကစံးဘၣ်တဲဘၣ်နၤဖဲန့ၣ်ခဲလၢာ်လီၤ.

11 ဒီးတုၤယထံၣ်တၢ်တသ့ဘၣ်လၢတၢ်ကပီၤကယဲၢ်ကယူာ်အဃိဒီး,ပှၤအိၣ်ဒီးယၤတဖၣ်ဆှၢယၤလၢအစုဆူဒၤမ့ၤစ့းအပူၤလီၤ. 12 ဒီးမတၤတဂၤလၢအယူးယီၣ်ယွၤဒ်တၢ်သိၣ်တၢ်သီအသိး,ဒီးဘၣ်တၢ်လၤကပီၤလၢပှၤယူဒၤဖိအိၣ်ဖဲန့ၣ်ခဲလၢာ်,စီၤအနၤနံတဂၤ, 13 ဟဲဆၢထၢၣ်လၢယအိၣ်ဒီးစံးဘၣ်ယၤ,ဒီပုၢ်ဝဲၢ်စီၤစီလူးဧၢ,ထံၣ်ထီၣ်က့ၤတၢ်တက့ၢ်.ဒီးယကွၢ်ထီၣ်အီၤတစုဃီဖဲန့ၣ်လီၤ. 14 ဒီးစံးဝဲဒၣ်,ပပၢ်သ့ၣ်အကစၢ်ဃုထၢနၤဒ်သိးနကသ့ၣ်ညါအသး,ဒီးနကထံၣ်ဘၣ်ပှၤတီပှၤလိၤတဂၤ,ဒီးနကနၢ်ဟူဘၣ်တၢ်အကလုၢ်သီၣ်လၢအထးခိၣ်လီၤ. 15 အဂ့ၢ်ဒ်အံၤ,နကကဲထီၣ်အပှၤအုၣ်အသးလၢတၢ်လၢနထံၣ်,ဒီးတၢ်လၢနနၢ်ဟူတဖၣ်,လၢပှၤခဲလၢာ်အမဲာ်ညါလီၤ. 16 ဒီးခဲကနံၣ်အံၤနဆူလၢ်ဟူတၢ်မနုၤလဲၣ်.ဂဲၤဆၢထၢၣ်,ကိးထီၣ်ကစၢ်အမံၤ,ဒီးဒိးဘျၢ ^{▼▼22:16 လၢဟ့းလ့ၣ်အကျိာ်"ဘးပတံစၢ်."}နသး,ဒီးသ့ကွံာ်နတၢ်ဒဲးဘးတက့ၢ်.

17 ဒီးတၢ်မၤအသးလၢယဟဲက့ၤဆူယရူၤၡလ့ၣ်,ဒီးယဘါထုကဖၣ်တၢ်လၢတၢ်လုၢ်အဟံၣ်ပူၤအဖၢမုၢ်ဒီး,ယအိၣ်လၢတၢ်ထံၣ်လၢညါခီအပူၤ, 18 ဒီးယထံၣ်အဝဲဒၣ်စံးဘၣ်ယၤ,ဟးထီၣ်လၢယရူၤၡလ့ၣ်အပူၤချ့ချ့တက့ၢ်.အဂ့ၢ်ဒ်အံၤ,နအုၣ်နသးလၢယဂ့ၢ်န့ၣ်,ပှၤတတူၢ်လိာ်ဘၣ်ဝဲဘၣ်. 19 ဒီးယစံး,ကစၢ်ဧၢ,အဝဲသ့ၣ်သ့ၣ်ညါလၢယဒၢနုာ်လၢဃိာ်ပူၤဒီးယတီၢ်ပှၤလၢအစူၢ်က့ၤနာ်က့ၤနၤတဖၣ်လၢကယဲၢ်ဘူၣ်ဘျီၣ်ပူၤလီၤ. 20 ဖဲနပှၤအုၣ်အသးစီၤစတ့းဖၣ်အသွံၣ်ဘၣ်ဂၢ်လီၤအသးန့ၣ်,ယဆၢထၢၣ်လၢအဃၢၤ,ဒီးတၢ်မၤသံအီၤန့ၣ်,ယအၢၣ်လီၤအီလီၤ,ဒီးယပၢၤပှၤမၤသံအီၤန့ၣ်အကူအသိးလီၤ. 21 ဒီးစံးဘၣ်ယၤ,လဲၤတက့ၢ်.ယကမၢနလဲၤလၢအယံၤဆူပှၤကလုာ်တဖၣ်အအိၣ်လီၤ.

22 ဒီးဒိကနၣ်ဝဲတုၤလၢတၢ်ကတိၤတထံၣ်န့ၣ်,ဒီးထုထီၣ်အကလုၢ်ဒီးစံးဝဲဒၣ်,ပှၤဒ်အံၤအသိးတဂၤ,မၤကွံာ်အီၤလၢဟီၣ်ခိၣ်ချၢတက့ၢ်.အဂ့ၢ်ဒ်အံၤ,တဂ့ၤမူဘၣ်ဝဲဘၣ်. 23 ဒီးကိးပသူထီၣ်ဒီးဘ့ၣ်ကွံာ်အကူအသိး,ဒီးဖှံထီၣ်ဟီၣ်ခိၣ်အကမူၣ်ဆူတၢ်ဖးဖီအဖၢမုၢ်ဒီး, 24 ပှၤသုးဖိတကထိအခိၣ်တဂၤမၤလိာ်ဝဲ,ဒ်သိးပှၤကမိၤစီၤပီလူးဆူပှၤသုးဖိအဟံၣ်ပူၤ,ဒီးသမံသမိးအီၤလၢတၢ်တီၢ်တၢ်ဝ့ၤ,ဒ်သိးအကသ့ၣ်ညါလၢပှၤကိးထီၣ်တၢ်ထီဒါအီၤဒ်န့ၣ်အဂ့ၢ်လီၤ.

25 ဒီးပှၤစၢထီၣ်အီၤလၢပျံၤတၢ်ဖံးအဖၢမုၢ်ဒီး,စီၤပီလူးစံးဘၣ်ပှၤသုးဖိတကယၤအခိၣ်လၢအအိၣ်ဆၢထၢၣ်လၢအဃၢၤ,ပှၤရိမ့ၤဖိတဘၣ်ဘၣ်တၢ်စံၣ်ညီၣ်ဃၣ်ဘၣ်ဒီး,သုတီၢ်အီၤဘၣ်ကဂ့ၤဧါ. 26 ဒီးတုၤပှၤသုးဖိတကယၤအခိၣ်နၢ်ဟူတၢ်ဒီး,လဲၤစံးဘၣ်ပှၤသုးဖိတကထိအခိၣ်ဒီးစံးဝဲဒၣ်,နသါကမၤတၢ်မနုၤလဲၣ်.အဂ့ၢ်ဒ်အံၤ,ပှၤတဂၤအံၤမ့ၢ်ပှၤရိမ့ၤဖိလီၤ. 27 ဒီးပှၤသုးဖိတကထိအခိၣ်ဟဲဃီၤဒီးစံးဘၣ်အီၤ,နမ့ၢ်ပှၤရိမ့ၤဖိဧါ,စံးဘၣ်ယၤတက့ၢ်.ဒီးစံးဝဲဒၣ်,မ့ၢ်ဝဲသၢၣ်, 28 ဒီးပှၤသုးဖိတကထိအခိၣ်န့ၣ်ကတိၤဆၢဝဲ,ယဟ့ၣ်စ့လၢအအါဒီး,ယထီၣ်ဘးကီၢ်ဖိအကွီၢ်အံၤလီၤ.ဒီးစီၤပီလူးစံးဝဲဒၣ်,မ့မ့ၢ်ယဲဒၣ်အံၤယအိၣ်ဖျဲၣ်လၢပှၤကီၢ်ဖိအကွီၢ်လီၤ.

29 ဒီးပှၤလၢအသါကသမံသမိးအီၤတဖၣ်,ဟးထီၣ်လၢအအိၣ်တကီၢ်ခါလီၤ.ဒီးတုၤအသ့ၣ်ညါလီၤတံၢ်လၢအမ့ၢ်ပှၤရိမ့ၤဖိဒီး,ပှၤသုးဖိတကထိအခိၣ်န့ၣ်ပျံၤတၢ်လၢအစၢဃာ်အီၤအဃိလီၤ.

30 ဘၣ်ဆၣ်ဒီးလၢမုၢ်ဆ့ၣ်ထီၣ်တနံၤန့ၣ်,မ့ၢ်ပှၤယူဒၤဖိပာ်တၢ်ကမၣ်လၢအလိၤဒ်လဲၣ်ဒ်လဲၣ်န့ၣ်,တၢ်မိၣ်သ့ၣ်ညါအသးလၢတၢ်နီၢ်နီၢ်ဒီး,ဃ့ၣ်လီၤကွံာ်အပျံၤ,ဒီးမၤလိာ်ပှၤလုၢ်တၢ်အခိၣ်,ဒီးပှၤသးပှၢ်အတၢ်အိၣ်ဖှိၣ်ခဲလၢာ်,ဒ်သိးအကဟဲအိၣ်ဖှိၣ်ရိဖှိၣ်လီၤ.ဒီးမိၤလီၤစီၤပီလူးဒီးပာ်အီၤလၢအမဲာ်ညါလီၤ.