Acts 26
1ဒီးစီၤအကြံးပၤစံးဘၣ်စီၤပီလူး,တၢ်ဒုးကတိၤနၤလၢနဂီၢ်ဒၣ်နဲလီၤ.တုၤနုၤတစုစီၤပီလူးယူာ်ဃီၤအစု,ဒီးကတိၤပူၤကတိၤဖျဲးဝဲလီၤ. 2စီၤပၤအကြံးပၤဧၢ,တၢ်ကမၣ်လၢပှၤယူဒၤဖိပာ်လၢယလိၤန့ၣ်,ယကတိၤပူၤဖျဲးတၢ်လၢနမဲာ်ညါလၢမုၢ်မဆါတနံၤအံၤဒီး,ယပာ်ယသးလၢယဘၣ်အမုာ်လီၤ. 3အဂ့ၢ်ဒ်အံၤ,တၢ်အလုၢ်အလၢ်,ဒီးတၢ်သံကွၢ်လၢပှၤယူဒၤဖိအကျါန့ၣ်,နသ့ၣ်ညါခဲလၢာ်လီၤတံၢ်လီၤဆဲးလီၤ.မ်ဒ်န့ၣ်ဒီးဝံသးစူၤဒီးကနၣ်စာ်ယကလုၢ်တက့ၢ်. 4မၤသးဒ်န့ၣ်ဒီး,ယအိၣ်ယဆိးယဖံးယမၤအဂ့ၢ်အကျိၤလၢယရူၤၡလ့ၣ်အပူၤ,လၢပှၤကလုာ်ဒၣ်ယၤအကျါ,လၢယဖိၣ်သၣ်ခွါထီၣ်လံၤလံၤန့ၣ်,ပှၤယူဒၤဖိသ့ၣ်ညါဝဲခဲလၢာ်လီၤ. 5အဝဲသ့ၣ်တဖၣ်မ့ၢ်မိၣ်အုၣ်အသးဒီး,သ့ၣ်ညါဝဲလၢ,ဒ်ပဘါတၢ်အလုၢ်အလၢ်အပှၤလီၤတံၢ်ကတၢၢ်တကရၢအသိးန့ၣ်ယမ့ၢ်ပှၤဖၤရံၤၡဲလီၤ. 6ဒီးခဲကနံၣ်အံၤလၢတၢ်မုၢ်လၢ်ယွၤအတၢ်စံးပာ်လၢပပၢ်သ့ၣ်အဃိဒီး,ယဆၢထၢၣ်ဘၣ်တၢ်စံၣ်ညီၣ်လီၤ. 7လၢတၢ်စံးပာ်န့ၣ်အဃိ,ပပှၤတဆံခံဒူၣ်မၤယွၤအတၢ်ကိးမုၢ်နံၤမုၢ်နၤဒဲးသပှၢ်တၢၢ်ဒီး,မုၢ်လၢ်လၢအကန့ၢ်ဘၣ်ဝဲလီၤ.စီၤပၤအကြံးပၤဧၢ,ပှၤယူဒၤဖိပာ်တၢ်ကမၣ်လၢယလိၤမ့ၢ်လၢတၢ်မုၢ်လၢ်အံၤအဃိလီၤ. 8ယွၤဒုးဂဲၤဆၢထၢၣ်က့ၤပှၤသံန့ၣ်သုဆိကမိၣ်လၢပှၤနာ်တသ့ဘၣ်,မ့ၢ်အဘၣ်မနုၤလဲၣ်. 9မ့ၢ်လံ,ယဆိကမိၣ်တ့ၢ်လၢယကစၢ်ဒၣ်ယဲ,လၢယကြၢးမၤတၢ်ထီဒါပှၤနစၤရ့းဖိယ့ၣ်ရှူးအမံၤ,အါမံၤလီၤ. 10ဒီးတၢ်န့ၣ်တဖၣ်ယမၤလၢယရူၤၡလ့ၣ်အပူၤ,ဒီးယဒိးန့ၢ်ပှၤလုၢ်တၢ်အခိၣ်အကလုၢ်,ဒီးယကးတံာ်ဃာ်ပှၤစီဆှံအါဂၤလၢဃိာ်ပူၤဒီးတုၤအဘၣ်တၢ်မၤသံအီၤဒီး,ယအၢၣ်လီၤအီလီၤယဲလီၤ. 11ဒီးယဒုးဘၣ်အီၤလၢတၢ်နးတၢ်ကျံၤအါဘျီလၢဘူၣ်ဘျီၣ်ခဲလၢာ်အပူၤ,ဒီးယမၤဆူၣ်မၤစိးအီၤဒ်သိးအကဒုၣ်ဒွဲၣ်ယွၤလီၤ.ဒီးယသးဒိၣ်ထီၣ်အီၤဒ်ပှၤပျုၢ်တဂၤအသိးသတးဒီး,ယမၤအၢမၤနးအီၤပၢၢ်လၢတခီခူတခီဝ့ၢ်လီၤ. 12လၢယမၤဒ်န့ၣ်ဒီး,ယလဲၤဒီးပှၤလုၢ်တၢ်အခိၣ်အကလုၢ်ဆူဝ့ၢ်ဒၤမ့ၤစ့းအဖၢမုၢ်ဒီး, 13လၢမုၢ်ထူၣ်လၢကျဲန့ၣ်,စီၤပၤဧၢ,ယထံၣ်တၢ်ကပီၤလၢမူခိၣ်ဆှုၣ်န့ၢ်မုၢ်အကပီၤ,ဒီးကပီၤထီၣ်ဝးတရံးယၤဒီးပှၤပိာ်ယခံတဖၣ်လီၤ. 14ဒီးပလီၤဃံၤလၢဟီၣ်ခိၣ်အဖီခိၣ်ခဲလၢာ်,ဒီးယနၢ်ဟူတၢ်အကလုၢ်ကတိၤတၢ်ဒီးယၤလၢဧ့ၤဘြံၤအကျိာ်ဒီးစံးဝဲဒၣ်,စီၤစီလူးဧၢ,စီၤစီလူးဧၢ,နမၤအၢယၤဘၣ်မနုၤလဲၣ်.နထူဘၣ်နီၣ်ခိၣ်စူကီမးလီၤ. 15ဒီးယစံးယဲ,ကစၢ်ဧၢ,နမ့ၢ်မတၤတဂၤလဲၣ်.ဒီးစံးဝဲဒၣ်,ယမ့ၢ်ပှၤလၢနမၤအၢအီၤယ့ၣ်ရှူးလီၤ. 16မ့မ့ၢ်ဂဲၤဆၢထၢၣ်အိၣ်ထူၣ်ကလာ်လၢနခီၣ်တက့ၢ်.အဂ့ၢ်ဒ်အံၤ,ယလီၣ်ဖျါထီၣ်ယသးလၢနၤလၢတၢ်အံၤအဃိ,ဒ်သိးယကပာ်ထီၣ်နၤလၢပှၤမၤတၢ်,ဒီးပှၤအုၣ်အသးလၢတၢ်လၢနထံၣ်ဒီးတၢ်လၢယကမၤဖျါထီၣ်လၢနၤ,အဂီၢ်လီၤ. 17ဒီးယကမၤပူၤမၤဖျဲးနၤလၢပှၤဂီၢ်မုၢ်ဂီၢ်ပၤဒီးပှၤကလုာ်တဖၣ်အစုပူၤ,လၢယမၢနလဲၤဆူအအိၣ်, 18ဒ်သိးနကဒုးထံၣ်ထီၣ်အမဲာ်,ဒ်သိးအဝဲသ့ၣ်ကဃၣ်ဃီၤက့ၤအသးလၢတၢ်ခံးဆူတၢ်ကပီၤ,ဒီးလၢမုၣ်ကီၤလံၢ်အစိအကမီၤဆူယွၤအပူၤ,ဒ်သိးအကဒိးန့ၢ်တၢ်ပျၢ်တၢ်ဒဲးဘး,ဒီးကန့ၢ်ဘၣ်သါတၢ်လၢပှၤစီဆှံတဖၣ်အကျါ,လၢတၢ်စူၢ်တၢ်နာ်ယၤအဃိလီၤ. 19မၤသးဒ်န့ၣ်ဒီး,စီၤပၤအကြံးပၤဧၢ,တၢ်ထံၣ်လၢညါခီလၢမူခိၣ်န့ၣ်,တမ့ၢ်ဘၣ်ယတဒိကနၣ်ဘၣ်. 20မ့မ့ၢ်ယစံၣ်တဲၤတဲလီၤဆိလၢပှၤအိၣ်လၢဒၤမ့ၤစ့းအပူၤ,ဒီးယရူၤၡလ့ၣ်,ဒီးကီၢ်ယူဒၤဒီကီၢ်ညါ,ဒီးပှၤကလုာ်တဖၣ်,ဒ်သိးအကပီၢ်ယၢ်လီၤက့ၤအသး,ဒီးဃၣ်ဃီၣ်က့ၤအသးဆူယွၤအအိၣ်,ဒီးမၤတၢ်ကြၢးဒီးတၢ်ပီၢ်ယၢ်လီၤက့ၤအသးလီၤ. 21လၢတၢ်တဖၣ်န့ၣ်အဃိဒီး,ပှၤယူဒၤဖိဟံးန့ၢ်ယၤလၢတၢ်လုၢ်အဟံၣ်ပူၤဒီးဃုမၤသံယၤလီၤ. 22မၤသးဒ်န့ၣ်ဒီးယွၤမၤစၢၤယၤသတးဒီး,ယအိၣ်ဒံးတုၤမုၢ်မဆါတနံၤအံၤ,ဒီးယအုၣ်ယသးလၢပှၤဒီးဒိၣ်ဒီးဆံးအမဲာ်ညါ,ဒီးယစံၣ်တဲၤတဲလီၤထဲတၢ်လၢဝံတဖၣ်ဒီးစီၤမိၤရှ့စံးပာ်လၢအကအိၣ်ထီၣ်န့ၣ်လီၤ. 23အဝဲသ့ၣ်စံးဝဲလၢခရံာ်ကဘၣ်ဒိးတၢ်,ဒီးကကဲထီၣ်ပှၤဂဲၤဆၢထၢၣ်ဆိလၢတၢ်သံတဂၤ,ဒီးကဒုးနဲၣ်တၢ်ကပီၤလၢပှၤဂီၢ်မုၢ်,ဒီးပှၤကလုာ်တဖၣ်လီၤ. 24ဒီးစီၤပီလူးကတိၤပူၤဖျဲးတၢ်ဒ်န့ၣ်အဖၢမုၢ်ဒီး,စီၤဖ့စတူးစံးဝဲဒၣ်လၢအကလုၢ်ဖးဒိၣ်,စီၤပီလူးဧၢ,နပျုၢ်လီၤ.တၢ်မၤလိတၢ်အါအါကလဲာ်ဒုးပျုၢ်နၤလီၤ. 25ဒီးစံးဝဲဒၣ်,တၢ်ဒိၣ်စီၤဖ့စတူးဧၢ,တမ့ၢ်ဘၣ်ယပျုၢ်ဘၣ်.မ့ၢ်ယကတိၤတၢ်မ့ၢ်တၢ်တီ,ဒီးတၢ်သူၣ်ဆးသးဆးအတၢ်ကတိၤလီၤ. 26အဂ့ၢ်ဒ်အံၤ,တၢ်န့ၣ်တဖၣ်,စီၤပၤသ့ၣ်ညါလီၤတံၢ်လီၤဆဲး,ဒီးယကတိၤတၢ်လၢအီၤလၢယသးခူတလ့ၢ်လီၤ.အဂ့ၢ်ဒ်အံၤ,ယဆိကမိၣ်လၢတၢ်န့ၣ်တဖၣ်တအိၣ်ခူသူၣ်ဘၣ်လၢအမဲာ်ညါနီတမံၤဘၣ်.အဂ့ၢ်ဒ်အံၤ,တၢ်အံၤတမၤဘၣ်အသးလၢတၢ်သနၢၣ်အပူၤဘၣ်. 27စီၤပၤအကြံးပၤဧၢ,ဝံတဖၣ်အကလုၢ်အကထါန့ၣ်,မ့ၢ်နနာ်စ့ၢ်ကီးဧါ.ယသ့ၣ်ညါလၢနနာ်လီၤ. 28ဒီးစီၤအကြံးပၤစံးဘၣ်စီၤပီလူး,နသဆၣ်ထီၣ်ယခံဒီး,နသါကဒုးကယဲၤလၢပှၤခရံာ်ဖိညီကဒၣ်လီၤ. 29ဒီးစီၤပီလူးစံးဝဲဒၣ်,ယဘါထုကဖၣ်ယွၤဒ်သိးလၢတၢ်အညီမ့ၢ်ဂ့ၤ,လၢတၢ်အကီမ့ၢ်ဂ့ၤ,ထဲနၤတဂၤဧိၤတမ့ၢ်ဘၣ်,မ့ၢ်ဒ်သိးကယဲၢ်ပှၤလၢအနၢ်ဟူယကလုၢ်လၢမုၢ်မဆါတနံၤအံၤခဲလၢာ်,ကကဲထီၣ်ဒ်ယၤအံၤအသိး,တဒ်သိးဘၣ်,ထဲထးသွဲအံၤဧိၤလီၤ. 30ဒီးစီၤပၤဂဲၤဆၢထၢၣ်,ဒီးပဒိၣ်ဖးဒိၣ်,ဒီးနီၢ်ဘ့ၢ်နံက့ၤ,ဒီးပှၤဆ့ၣ်နီၤဒီးအီၤတဖၣ်, 31ဒီးလဲၤဆူတၢ်တဒၢ,ဒီးကတိၤလိာ်အသးဒီးစံးဝဲဒၣ်,တၢ်ကမၣ်ဂ့ၤဘၣ်သံမ့ၢ်ဂ့ၤ,ဂ့ၤဘၣ်စၢဃာ်မ့ၢ်ဂ့ၤ,ပှၤတဂၤအံၤတမၤဘၣ်ဝဲဘၣ်. 32ဒီးစီၤအကြံးပၤစံးဘၣ်စီၤဖ့စတူး,ပှၤတဂၤအံၤမ့ၢ်တကိးထီၣ်ကဲစၢ်ဘၣ်ဒီး,တၢ်မၤထူၣ်ဖျဲးအီၤသ့လီၤ.
Copyright information for
KswSKMB